Ni’a noa i te rorouira : Feiā ’Āpī Pa’ari
Tīa’i ’ia tā’atihia
Noa atu ā ’ua tauihia tā māua fa’anahora’a, ’ua piri atu ā māua, ’e i te Atua ato’a.
Mau hōho’a ta’ata i patahia
Tē ora nei te ta’ata pāpa’i i Kantō, Tāpōnē.
Tē ’ōpua ra māua tā’u tāne mōmo’a ’ia tā’ati ia māua i teie ’āva’e i roto i te hiero nō Sapporo (Tāpōnē). Taui a’era te mau mea nō te tirotiro corona. Nō te mau mea pāpū ’ore ato’a, e ’imi au i te arata’ira’a a te Atua nā roto i te pure, te tai’ora’a i te mau pāpa’ira’a mo’a ’e te fa’aro’ora’a i te mau a’ora’a o te ’āmuira’a rahi. ’Ua nā reira noa vau, fa’ahou ’e fa’ahou ā, ’a rave ai i te mau fa’aotira’a nō ananahi. Ē ’ōpanihia atu ra te mau hiero. I teie nei mahana, tē tīa’i noa nei ā māua ’ia tā’atihia. ’Ua ’ite rā vau i te Atua i te tauturura’a ia māua i roto i teie tau fifi.
Te mau ha’amaita’ira’a i roto i te pāpū ’ore
Te parau mau, ’ua riro na teie ’ohipa ’ei ’ohipa fifi mau. ’Ua nā roto ato’a rā vau i te mau ha’amaita’ira’a e rave rahi. Maoti tō’u pāpa’ira’a i roto i te hō’ē buka ’ā’amu tō’u ’itera’a i te reira mau ha’amaita’ira’a, e ’ohipa au roa i roto i teie tau fifi.
Hō’ē ha’amaita’ira’a tā’u i ’ite, ’o tō māua tā’amura’a ïa ’e tā’u tāne mōmo’a tei pūai fa’ahou atu. E nohora’a ta’a ’ē tō māua, e orara’a ta’a ’ē, e’ita e nehenehe e fārerei. ’Ua fa’aoti rā māua e pure ’āmui ’e e paraparau nō ni’a i te mau mea tā māua e ha’api’i ra i roto i tā māua tuatāpapara’a ’evanelia. ’Ua rave ’āmui māua i te mau fa’aotira’a. Noa atu ā te ātea i rotopū ia māua, ’ua rahi mai tō māua tā’amura’a, ’e mai te huru ē, tei pīha’i iho ’oia iā’u.
Haere i mua
I te hope’a, ’ua fa’aoti māua e fa’aipoipo i te fare ’oire. ’Aita vau i ’ite ahea māua e tā’atihia ai i roto i te hiero, tē tīa’i maoro nei rā vau i te reira.
Tē ti’aturi nei au ē, e ’ohipa rahi tā tātou e nehenehe e ha’api’i mai roto i teie pararera’a ma’i pohe. Tē ti’aturi nei au ē, e ’ōpuara’a tā te Fatu nō tō tātou maita’i mure ’ore, noa atu ā te ’ohipa e tupu ’ati a’e ia tātou i roto i te ao nei—« e aroha ho’i tōna i tō te ao nei, ’e ’ia tae atu ho’i i tōna hōro’ara’a i tōna iho ora, ’ia ’ume ’oia i te mau ta’ata ato’a iāna ra » (2 Nephi 26:24).
Tē ti’aturi nei au ē, ’ua hina’aro te Fatu e tauturu ia tātou pā’āto’a ’ia ’ite i te ’oa’oa i roto i teie taime fifi rahi. ’Ua ’ite a’ena vau i te hau i te hi’ora’a vau i te mau ha’amaita’ira’a nā’u. Mai te mea tē fa’aruru nei ’outou i teie mau tāmatara’a, ’eiaha e taiā. Noa atu ā teie pararera’a ma’i pohe, e nehenehe tō ’outou ’itera’a pāpū ’ia ha’apūaihia.