Ļōmņak kōn Em̧m̧an im Meanwōd an Anij

Ilo aolepān bwebwenato an laļ in, barāinwōt im eļaptata ilo iien ko reppen, rikanaan ro rekar rōjan̄ kōj n̄an kemeemej meanwōd an Anij im n̄an ļōmņake ta eo Ekar kōm̧m̧ane n̄an kōj āinwōt kajjojo armej, baam̧le ko, im āinwōt armej ro.¹ Kapilōk in jemaron̄ loe ilo aolepān jeje ko rekwojarjar ak emakijkij an waļo̧k ilo Bok in Mormon. Taitōļ in peij eo ej kōmeļeļeiki bwe juon iaan kōttōpar ko an Bok in Mormon ej “n̄an kwaļo̧k n̄an ro m̧ōttan m̧weo im̧ōn Israel ta ko reļļap Irooj Eaar kōm̧m̧ani n̄an ro jemāer.”² Kōjjem̧ļo̧k eo ilo Bok in Mormon ekoba kajjitōk eo an Moronai: “Lo, ikōņaan kōketak kom̧ bwe n̄e kwōnaaj kōnono jān men kein … bwe kom̧in keememej ekōjkan an Irooj kar tūriam̧okake ro nejin armej, … im kejakļo̧kjeņ kōn e ilo būruōmi.”³

Ikutkut in kajjitōk ko jān rikanaan ro n̄an kejōkļo̧kjeņ kōn meanwōd eo an Anij ekabwūlōn̄lōn̄.⁴ Jemedwōj Ilan̄ ekōņaan bwe jen keememej meanwōd eo An im An eo Nejin Ejitōn bōro, ejjab n̄an kam̧ōņōņōik Er make ak n̄an im̧we in me ej itok jān ememļo̧kjeņ me jej emmeļo̧ki. Ilo ad ļōmņake jouj eo Aer, kōļmenļo̧kjeņ im meļeļe ko ad rej ļapļo̧k. Ilo ad kejōkļo̧kjeņ kōn tūriam̧o̧ eo Aer, jettāļo̧k, eļapļo̧k ad jar, im jej dim.

Juon en̄jake eo ekajoor kōn juon kar rinan̄inmej ej kwaļo̧k ekōjkan an jouj im tūriam̧o̧ maron̄ ukōt kōj. Ilo 1987, ikar jino jeļā kajjien Thomas Nielson, juon em̧m̧aan etiljek eo ekar aikuj jānij menono eo an. Kar 63 an iiō rūttoon im ekar jokwe ilo Logan, Utah, ilo Amedka kan. Ālkin an kar pād ilo tariņae ilo Pata eo an Laļ in Kein Karuo, ekar m̧areiki Donna Wilkes ilo Logan Utah Tampeļ. Ekar erom̧ juon eo etijem̧ļo̧k ilo ekkal kōn birōk ilo elōn̄ kain ļōmļōm. Ilo iiō ko tokālik ilo mour eo an ekar lukkuun itok limoin in jerbal ippān ļaddik eo jibūn erūttotata, Jonathan, ilo iien an jikuuļ kakkije. Rein ruo rekar ejaake juon jem̧jerā eo ekajoor, kōnke Tom ekar lo jet iaan m̧wil im kadkadin ippān Jonathan.

Tom ekar inepata ilo an kar to an kōttar juon eo me en leļo̧k an menono. Ekar jab juon em̧m̧aan eo me ejeļā kijenmej. Ekajoor kōm̧m̧an kōttōpar im tōpar kōttōpar ko an kōn kijejeto in jerbal im kāālet ko an rejejjet. En̄taan kōn nan̄inmej in menono, ilo an jab maron̄ kōm̧m̧an jabdewōt, Tom jet iien ekar kajjitōk ippa ta eo ikar kōm̧m̧ane n̄an kōmakōj jerbal eo. Ilo an kōm̧m̧an kōjak, ekar letok ļōmņak in kōn wāween ko imaron̄ ļoori bwe in kōm̧m̧an bwe en lōn̄ en emaron̄ letok an menono ilo iien eo em̧ōkajtata.

Juon raan eo ekam̧ōņōņō im ekaam̧jak, ekar wōr juon epojak n̄an leļo̧k menono n̄an Tom. Jaij in menono eo im taip in bōtōktōk eo rekar jejjet n̄an doon, im rileļo̧k menono eo ekar dik, 16 iiō dettan. Menono eo kar leļo̧k ej an Jonathan, ļaddik eo ejitōnbōro jibūn Tom. Ilo raan ko m̧oktaļo̧k, Jonathan ekar pād ilo jorrāān me ekar kōm̧m̧an bwe en mej ke wa eo me ekar iuwe ie ekar itaak ippān juon tūrāāin.

Ke ikar loļo̧k Tom im Donna ilo aujpitōļ, rekar lukkuun burom̧ōj. Epen n̄an pijaikļo̧k ta eo rekar jelm̧aeiki, ilo aer jeļā bwe mour eo an Tom emaron̄ aitokļo̧k ilo an kōjerbal menono eo an ļaddik eo jibūn. Kar jinoin, rekar makoko in ļōmņake bwe menono eo kar letok in ro jinen im jemān Jonathan ro rekar lukkuun liejļōļ, leddik eo nejier im ļeo pāleen. Tom im Donna rekar jeļā, men̄e, ekar jab jerbal kōmālij eo an Jonathan, im rekar meļeļe bwe jar eo aer kōn juon eo en maron̄ leļo̧k menono n̄an Tom ekar jab kōm̧m̧an bwe Jonathan en pād ilo jorrāān. Ejjab, menono eo an Jonathan ekar juon menin letok eo me emaron̄ kōjeraam̧m̧an Tom ilo iien eo ekar lukkuun aikuji. Rekar kile bwe juon men eo em̧m̧an emaron̄ waļo̧k jān jorrāān in im kar kāālet n̄an wōnm̧aanļo̧k wōt kake.

M̧wijm̧wij n̄an jāniji menono eo an ekar lukkuun em̧m̧an. Ālkin wōt iien eo, Tom ekar juon em̧m̧aan eoktak. Oktak eo ekar ilōn̄inļo̧k ājmour eo an ak barāinwōt kam̧m̧oolol. Ekar ba n̄an n̄a ke ej ļōmņak aolep jibbon̄ kōn Jonathan, leddik eo nejin im ļeo pāleen, im kōn menin letok eo ekar bōke, im etke menin letok eo ekar lukkuun menin aikuj. Men̄e an jeļā kōm̧m̧an kōjak im kije rekar alikkar wōt, ikar lo bwe Tom ekar lukkuun m̧ool, jeļā ļōmņak, im em̧man buruōn.

Tom ekar bar mour 13 iiō tokālik ālkin iien eo kar jānij menono eo an, iiō ko me jon̄an ņe eban kar tōpari. Kadkad eo an ilo iien mej eo an ekar kwaļo̧k bwe iiō kein ekar kōtļo̧k bwe en im̧we mour ko an baam̧le eo an im ro jet kōn juoj im iakwe. Ekar juon eo me leļo̧k jipan̄ ilo ittino im juon waanjon̄ak kōn kōjatdikdik im kije.

Āinwōt Tom, kōj kajjojo jekar bōk menin letok ko me jejjab maron̄ kakke n̄an kōj make kaki, menin letok ko jān Jemedwōj Ilan̄ im eo Nejin Ejitōnbōro, ekoba lo̧mo̧o̧r kōn katok in pinmuur eo an Jisōs Kraist.⁵ Jekar bōk mour ilo laļ in; jenaaj bōk ānbwin ilo mour eo ālkin mour in, im lo̧mo̧o̧r indeeo im mour eo eutiejtata—eļan̄n̄e jej kāālete—aolep kōn Jemedwōj Ilan̄ im Jisōs Kraist.

Aolep iien jej kōjerbal, jeraam̧m̧an jāne, ak barāinwōt ļōmņak kōn menin letok kein, jej watōke ej wūjlepļo̧k, jouj, im tūriam̧o̧ an ro rej letok. Kautiej n̄an ro rej letok eļapļo̧k jān ad kam̧m̧oolol wōt. Ļōmņak kōn menin letok ko Aer emaron̄ im eaikuj ukōt kōj.

Juon oktak eo ekabwūlōn̄lōn̄ kar kōn Alma eo Edik. Āinwōt Alma ekar “ilo̧k n̄an kōpata ņae Anij,”⁶ juon enjeļ ekar waļo̧k. Kōn “juon ainikien jourur,”⁷ enjeļ ekar kaje Alma kōn an jum̧ae Kabun̄ eo im “ko̧o̧teļo̧k būruōn armej ro.”⁸ Enjeļ eo ekar kobaiktok kakkōl in: “Kwo̧n ilo̧k, im keememej ineen kōm̧akoko an ro jemam̧ …; im keememej ewi jon̄an men ko [Anij] Eaar kōm̧m̧an n̄an er.”⁹ Kōn aolepān men ko ekar kwaļo̧k, men eo ņe eļap im aorōk enjeļ eo ekar ba.

Alma ekar ukweļo̧k im ekar jab bar keememeje. Ekar tokālik kwaļo̧k kakkōl eo an enjeļ eo n̄an ļeo nejin Hilamōn. Alma ekar kapilōk, “Ikōņaan bwe kwōn kōm̧m̧an āinwōt iaar kōm̧m̧an, ilo ememej jipo̧kwe eo an ro jemād; bwe raar pād ilo kōm̧akoko, im ejjeļo̧k juon eaar lo̧mo̧o̧ren er ijello̧kun wōt eo eaar Anij an Ebream, … Aisak, im … Jekab; im em̧ool Eaar lo̧mo̧o̧ren er ilo en̄taan ko aer.”¹⁰ Alma ekar ba, “Ij likūt aō lōke ilo E.”¹¹ Alma ekar meļeļe bwe ilo ad keememeje an kar rōļo̧k jān kōm̧akoko im jipan̄ ilo iien “mālejjon̄ ko im inepata ko otemjeļo̧k,” jejeļā Anij im m̧ool in kallim̧ur ko An.¹²

Jet iaad ewōr ad en̄jake eļap āinwōt Alma, aeet oktak ko ad remaron̄ jon̄an wōt juon aer kabwūlōn̄lōn̄. Rilo̧mo̧o̧r ekar kallim̧ur etto:

“Im Inaaj lewōj n̄an kom̧ juon bōro ekāāl, im Inaaj likūt juon jetōb ekāāl i buļōmi: im Inaaj joļo̧k bōro deka … , im Inaaj lewōj n̄an kom̧ juon bōro kanniōk.

“Im Inaaj likūt Jetōb eo Aō ilo kom̧. …

“… Im kom̧ naaj armej ro doō im N̄a, Inaaj ami Anij.”¹³

Rilo̧mo̧o̧r, eo ekar jerkakpeje ekar ba n̄an ri Nipai ro wāween an oktak in bōk jikin. Ekar kile jekjek eo eaorōk ilo karōk eo an Jemedwōj Ilan̄ ke E ekar ba:

“Im Jema eaar jilkintok Eō bwe In maron̄ toto ioon debāāl; im ālkin kar kotak Eō ioon debāāl, bwe In maron̄ kan̄ōltok armej otemjej n̄an eō. …

“Im kōn un in kar kotak Eō; kōn menin, ekkar n̄an kajoor eo an Jema Inaaj kan̄ōltok aolep armej otemjej n̄an Eō.”¹⁴

Ta eo emenin aikuj n̄an kwe n̄an kepaake Rilo̧mo̧o̧r? Ļōmņak kōn wūjlepļo̧k eo an Jisōs Kraist n̄an ankilaan Jemān, An anjo̧ ioon mej, An bōk Ioon jerawiwi im bōd ko am̧, An bōk kajoor eo an Jemān n̄an akweļap kōn eok, im An lo̧mo̧o̧r eutiejtata kōn eok.¹⁵ Men kein rejjab ke n̄an kepaake eok n̄an E? Rej n̄an n̄a. Jisōs Kraist “ej jutak kōn pā ko reppeļļo̧k, kōjatdikdik im m̧ōņōņō n̄an kōmour, jeorļo̧k bōd, karreo, kōkajoorļo̧k, karreo, im kokwojarjare [kwe im n̄a].”¹⁶

M̧ool kein rej aikuj letok n̄an kōj juon bōro ekāāl im im̧we kōj n̄an kāālet n̄an ļoor Jemedwōj Ilan̄ im Jisōs Kraist. Aaet jekdo̧o̧n bōro ko rekāāl “remaron̄ jebwābwe, … remaron̄ eļļo̧k jān Anij eo [jej] iakwe.”¹⁷ N̄an jelm̧ae menin, jej aikuj ļōmņak aolep raan kōn menin letok ko me jekar bōki im kōn ta eo emenin aikuj. Kiin̄ Benjamin ekar kapilōk, “Ikōņaan bwe kom̧in keememej, im iien otemjej bōk ilo ememļo̧kjeņ, ļap eo an Anij … im An em̧m̧an im meanwōd n̄an kom̧.”¹⁸ Eļan̄n̄e jej kōm̧m̧ane āindein, jej karbōb n̄an bōk kōjeraam̧m̧an ko raibojooj jān lan̄.

Kejōkļo̧kjeņ kōn em̧m̧an im tūriam̧o eo an Anij ej jipan̄ kōļapļo̧k ad eo̧ron̄ jetōb eo. N̄an ukōt tok, ej kōļapļo̧k en̄jake ko an jetōb ilo kōj im ej kōtļo̧k bwe jen jeļā m̧ool ko an men otemjej kōn kajoor eo an Jetōb Kwojarjar.¹⁹ Menin ekoba juon naan in kam̧ool kōn m̧ool ko an Bok in Mormon; ilo ad jeļā bwe Jisōs ej Kraist eo, ad Rilo̧mo̧o̧r im Ripinmuur; im tōmak bwe gospel eo An em̧ōj an bar jepļaaktok ilo raan ko āliktata.²⁰

N̄e jej keememej meanwōd eo an Jemedwōj Ilan̄ im Jisōs Kraist im ta eo Rekar kōm̧m̧ane n̄an kōj, jeban bōk Er ilo ad likjab in kam̧m̧oolol kake, āinwōt Tom ekar jab likjab ilo an kam̧m̧oolol kōn menono eo an Jonathan. Ilo juon wāween eo ekam̧ōņōņō im em̧m̧an, aolep raan Tom ekar keememej jorrāān eo ekar waļo̧k me ekar kaitokļo̧k mour eo an. Kōn m̧ōņōņō ilo ad jeļā bwe jemaron̄ bōk lo̧mo̧o̧r im mour eo eutiejtata jej aikuj keememej bwe lo̧mo̧o̧r im mour eo eutiejtata ekar itok ilo juon wōņeen eo eļap.²¹ Jemaron̄ kautiej ilo lan̄lōn̄ ilo ad kile bwe n̄e ejjab Jisōs Kraist, ejjeļo̧k ad kōjatdikdik, ak kōn E, jemaron̄ bōk menin letok eo em̧m̧antata Jemedwōj Ilan̄ emaron̄ letok.²² Ilo m̧ool, kile in ej kōtļo̧k bwe jen lan̄lōn̄ kōn kallim̧ur eo “mour indeeo ilo laļ in” im āliktata bōk “mour indeeo … em̧ool aibojooj indeeo” ilo laļ eo ej itok.²³

N̄e jej kile em̧m̧an eo an Jemedwōj Ilan̄ im Jisōs Kraist, lōke eo ad ilo Er eļapļo̧k. Jar ko ad reoktak kōnke jejeļā bwe Anij ej Jemād im kōj jej ro Nejin. Jejjab pukot n̄an ukōt Ankilaan ak jān dāpij ankilaad n̄an Ankilaan im kōjparok kōj n̄an kōjeraam̧m̧an ko me Ekōņaan letok, pedped wōt ioon ad kajjitōk kaki.²⁴ Jekōņaan bwe en ļap ad ettā, erreo, dim, im āinwōt Kraist.²⁵ Oktak kein rej kōkarbōbbwe kōj n̄an kōjeraam̧m̧an ko jet jān lan̄.

Ilo ad kile bwe aolep men ko rem̧m̧an rej itok jān Jisōs Kraist, jenaaj kwaļo̧k tōmak ko ad eļapļo̧k im wājepdikļo̧k n̄an ro jet.²⁶ Jenaaj peran n̄e jej jelm̧ae jerbal ko reppen im jekjek ko jej pād ie.²⁷ Jenaaj kōkajoorļo̧k kōttōpar ko ad n̄an kōjparok bujen ko me jekar kōm̧m̧ani n̄an ļoor Rilo̧mo̧o̧r.²⁸ Jenaaj obrak kōn iakwe eo an Anij, kōņaan jipan̄ ro rej aikuj ilo ad jab ekajete er, iakwe ro nejid im karūttoikļo̧k er ilo jim̧we, bōk jeorļo̧k bōd iien otemjej, im m̧ōņōņō iien otemjej.²⁹ Erkein rej leen ko rekabwūlōn̄lōn̄ n̄an keememej em̧m̧an im tūriam̧o eo an Anij.

Ilo an oktak, Rilo̧mo̧o̧r eo ekar kakkōl, “Im ilo ejjeļo̧k men armej ej kainepataik Anij, ak ņae ejjeļo̧k ilo illu eo an ejouj, ijjelo̧kin ro rej jab kwaļo̧k pein ilo aolep men.”³⁰ Ijjab tōmak Anij ej illu n̄e jej meļo̧kļo̧k E. Ijjelo̧kin, ij ļōmņak E eļapļo̧k an būrom̧ōj. E ejeļā bwe jekar kadikļo̧k iien ko ad rem̧m̧an n̄an kepaake E ilo ad keememej E im em̧m̧an ko An. Kōj jej likjab jān An kepaake E n̄an kōj im kōjeraam̧m̧an ko An ekar kallim̧ur kaki.³¹

Ij kūr kom̧ n̄an keememej kajjojo raan meanwōd eo an Jemedwōj Ilan̄ im Jisōs Kraist im ta eo Rekar kōm̧m̧an n̄an kwe. Kōtļo̧k bwe ļōmņak eo am̧ kōn em̧m̧an eo Aer en dāpij buruōmi eo ejebwābwe n̄an Er.³² Kejo̧kļo̧kjeņ kōn tūriam̧o̧ eo Aer, im kwonaaj jeraam̧m̧an kōn im̧we ko an jetōb im erom̧ eļapļo̧k āinwōt Kraist. Kejo̧kļo̧kjeņ kōn burom̧ōj eo Aer enaaj jipan̄ eok “dāpdep wōt ilo niknik n̄an jem̧ļo̧kin,” m̧ae kwonaaj “bōk er ilo lan̄” n̄an “jokwe ippān Anij ilo wāween m̧ōņōņō eo ejjeļo̧k jem̧ļo̧kin.”³³

Jemedwōj Ilan̄, ej jitōn̄ļo̧k Eo Nejin Ejitōnbōro, im ekar ba. “Ron̄jake E!”³⁴ Ilo am̧ mour ekkar n̄an naan ko im ron̄jake E, keememej, ilo lan̄lōn̄ im kautiej, bwe Rilo̧mo̧o̧r ej m̧ōņōņō in kōjepļaaktok ta eo kwojjab maron̄ kar kōjepļaaktok; E ej iakwe eok n̄an kōmour kinej ko kwojjab maron̄ kōmouri; E ej m̧ōņōņō in kōm̧m̧ane ta eo ekar jorrāān;³⁵ E ej kōļļā wōņeen jabdewōt likjab ko ejelōt eok,³⁶ im E ej kōmour im kōkm̧anm̧anļo̧k bōro ko rerub.³⁷

Ke ikar kejo̧kļo̧kjeņ kōn menin letok ko jān Jemedwōj Ilan̄ im jān Jisōs Kraist, ikar jeļā kōn iakwe eo Aer ejjeļo̧k jem̧ļo̧kin im tūriam̧o̧ eo Aer jeban kōmeļeļeiki kōn aolep ajri ro nejin Jemedwōj Ilan̄.³⁸ Jeļāļo̧kjeņ in ekar ukōt eō, im enaaj ukōt barāinwōt kom̧, Ilo etan Jisōs Kraist, amen.