Kōpeļļo̧k Lan̄ ko n̄an Bōk Jipan̄
Jen kōm̧m̧an bwe tōmak eo ad ilo Jisōs Kraist en erom̧ jerbal!
En̄in ej juon m̧wen̄an eo ejenoļo̧k im eaibojooj! Kom̧m̧ool, Laudy im Enzo ro rejitōn bōro. Ekar lukkuun em̧m̧an amiro kar jutak ilo etan jiron̄ im likao ro raibojooj ilo Kabun̄ in.
Ro jeiū im jatū jitōn bōro, ekanooj ļap ad ron̄ ilo rainin kōn Jepļaaktok eo an Kabun̄ in—lukkuun Kabun̄ eo me Rilo̧mo̧o̧r Jisōs Kraist ekar ejaake ilo iien an kar kwaļo̧k naan ioon laļ in. Jepļaaktok eo ekar ijjino 200 iiō ko rem̧ootļo̧k ilo jibūriin̄ in ke Anij im Jemān im eo Nejin, Jisōs Kraist, rekar waļo̧k n̄an Josep Smith ke ekar dik.
Jon̄oul iiō ālkin visōn in eļap im kabwūlōn̄lōn̄, Rikanaan Josep Smith im ro jet ļalem kar kūr er āinwōt membōr ro jinointata an Kabun̄ eo an Jisōs Kraist me em̧ōj an jepļaaktok.
Jān kurup jidikdik in me rekar koba ippān doon ilo Eprōļ 6, 1830, em̧ōj an erom̧ juon doulul ipeļaakin laļ kōn elōn̄ļo̧k jān 16 milien membōr ro. Em̧m̧an eo me Kabun̄ in ej kōm̧m̧ane ipeļaakin laļ in n̄an kōmeraik en̄taan ko an armej im lōn̄aj lōn̄ļo̧k armej, aolep im jeļā kake. Ak jibadbad eo an eaorōk tata ej n̄an m̧aan, kōrā, im baam̧le ko me rej ļoor Irooj Jisōs Kraist, kōjparok kien ko An, im karbōb n̄an bōk kōjeraam̧m̧an ko reļļaptata—an mour indeeo ippān Anij im ro rejitōnbōro ippāer.1
Ilo ad kakeememej m̧akūtkūt in me ekar jino ilo Jepļaaktok eo, eaorōk n̄an keememej bwe ilo ad kwaļo̧k ad kautiej Josep Smith āinwōt juon rikanaan an Anij, ejjab kabun̄ eo an Josep Smith, ejjab bar kabun̄ eo an Mormon. En̄in ej Kabun̄ eo an Jisōs Kraist. Ekar kakien kōn jejjet in wāween ān̄inn̄in etan Kabun̄ eo An: “Bwe āindein naaj etan Kabun̄ eo Aō ilo raan ko āliktata, em̧ool Kabun̄ eo An Jisōs Kraist im Armej Ro Rekwojarjar ilo Raan ko Āliktata.”2
Ikar kōnono m̧oktaļo̧k kōn aikuj in kajim̧we wāween ad ān̄inn̄in etan Kabun̄ in.3 Jān tōre eo, elōn̄ men ko kar kōm̧m̧an n̄an kakūrm̧ool kajim̧we in. Eļap aō kam̧m̧oolol Būreejtōn M. Russell Ballard im aolep Doulul eo an Jon̄oulruo Rijilōk ro, ro eļap aer kar kate er n̄an tōl kijejeto kein barāinwōt ko jet me rej iookļo̧k jibadbad eo juon me inaaj kōjeļļāik kake joteen in.
Ritōl ro an kabun̄ in im department ko, rej iookļo̧k armej im men ko jet, im milien membōr ro—im ro jet—kiiō rej kōjerbal et eo ejim̧we etan Kabun̄ in. Wāween tōl eo an Kabun̄ in me em̧ōj kar kōmālimi em̧ōj an oktak. Website eo an Kabun̄ in ej kiiō ChurchofJesusChrist.org. Atōreej ko n̄an email, etan website ko, social media jānōļ em̧ōj bar aer kōkāāl. Kuwaer eo ad ejitōnbōro em̧ōj ņa etan kiiō “Tabernacle Choir at Temple Square.”
Em̧ōj ad tōpar kijejeto kein reļļap im rekabwūlōn̄lōn̄ kōnke n̄e jej joļo̧k etan Irooj jān Kabun̄ eo An, jej joļo̧k Etan āinwōt pedped eo ioļapļaptata in kabun̄ jar eo ad im mour ko ad. N̄e jej bōk iood etan Rilo̧mo̧o̧r ilo iien peptaij, jej kallim̧ur n̄an kam̧ool, kōn naan, ļōmņak, im kōm̧m̧an ko ad, bwe Jisōs ej Kraist.4
M̧oktaļo̧k, ikar kallim̧ur bwe eļan̄n̄e jenaaj “kōm̧m̧ane ijo em̧m̧antata n̄an kajim̧we et eo ejim̧we an Kabun̄ eo an Irooj,” Enaaj “lelaļtak kajoor im kōjeraam̧m̧an ko n̄an ioon bōran Armej ro Rekwojarjar ilo Raan Ko Āliktata, kōņaan ko me jej jan̄in kar loi.”5 Ikar kōkāāle kallim̧ur in.
N̄an jipan̄ keememej E im n̄an kile Kabun̄ eo an Jisōs Kraist im Armej ro Rekwojarjar ilo Raan Ko Āliktata āinwōt Kabun̄ eo an Irooj, jem̧ōņōņō in kwaļo̧k kadkad in juon kōkaļļe eo me enaaj kwaļo̧k jikin eo ioļaptata an Jisōs Kraist ilo Kabun̄ eo An.
Kōkaļļe in ekoba etan Kabun̄ in repād ilowaan dōkā in jabōn em̧. Jisōs Kraist ej lukkuun dōkā in jabōn em̧.6
Ilo ioļapļap in kōkaļļe in ej jutak kōn statue in Kraist eo me kar kōm̧m̧an jān marble an Thorvaldsen. Ej kwaļo̧k kōn Irooj ke ekar jerkakpeje im, emour ej erļo̧ke pein n̄an wōnm̧aeik ro me renaaj itok n̄an E.
Ilo kōkkaļļe in, Jisōs Kraist ej jutak ium̧win in juon arch. Arch in ej kakeememej kōj kōn Rilo̧mo̧o̧r ke ekar jerkakpeje im anjo̧ jān lōb eo ilo raan eo kein kajilu ālkin mej eo an ioon debwāāl.
Kōkaļļe in elōn̄ ro rejeļā kake, āinwōt an to ad jan̄nuwaad kōn gospel eo ekar jepļaaktok ippān Kraist eo ekar jerkakpeje, im emour rainin.
Kōkaļļe in enaaj kiiō jerbal āinwōt juon kakilen eo jej loe em̧ōj kōmālimi ikkijeen jeje ko, nuuj ko, im m̧akūtkūt ko an Kabun̄ in.7 Enaaj kakeememej aolep bwe en̄in ej Kabun̄ eo an Rilo̧mo̧o̧r im ta eo jej kōm̧m̧an, āinwōt membōr in Kabun̄ eo An eo ej pedped ioon Jisōs Kraist im gospel eo An.
Kiiō, ro jeiū im jatū rejitōnbōro, ilju ej Palm Sunday, āinwōt an Elder Gong lukkun wājepdik an kar katakin kake. Innem jej deļon̄e wiik eo eaorōk tata me ej kōmeramļo̧k Ijtō in. Āinwōt rikaļoor ro an Jisōs Kraist, mour ilo juon tōre eo nan̄inmej in COVID-19 ej ajedeed em̧ōj an likūt laļ in ilo jorrāān, jejjab “kōnono [wōt] kōn Kraist ak kwaļo̧k kōn Kraist ak kōjerbal juon kōkaļļe eo ej bōk jikin Kraist.
Jen kōmourrur tōmak eo ad ilo Jisōs Kraist ilo juon wāween ekajoor.
Āinwōt ami jeļā, membōr ro an Kabun̄ in rej kōjparok kien jitlo̧k ej kōm̧m̧an juon raan ilo kajjojo allōn̄.
Katak eo kōn jitlo̧k ej jān etto. Eto an armej ro rebun̄bun̄ ilo baibōļ mour kake ilo tōre ko etto. Moses, David, Ezra, Nehemaia, Esther, Aiseia, Daniel, Joel, im elōn̄ ro jet rekar jitlo̧k im kwaļo̧k naan kōn jitlo̧k.8 Jān jeje ko an Aiseia, Irooj ekar ba “Ej jab en̄in jitlo̧k eo Iar kāālōte? jeļate korak in jerawiwi, jeļate toon ine eo, im kōtļo̧k ro em̧ōj kam̧akokoik er?”9
Rijilōk Paul ej kakkōl Armej ro Rekwojarjar ilo Korint n̄an “leļo̧k kom̧ n̄an jar.”10 Rilo̧mo̧o̧r Emake ekar kwaļo̧k bwe jet men ko rej etal “ilobōlej ak kōn jar im kōn jitlo̧k.”11
Ikar ba raan ko ļo̧k ilo juon pijaan alooj ilo social media ke “Āinwōt juon taktō im rim̧wijm̧wij, eļap aō kautiej taktō ro retijem̧ļo̧k, scientist ro, im Aolep ro me rej jerbal aolep raan n̄an kadikļo̧k ajedeed in nan̄inmej eo COVID-19.”12
Kiiō, āinwōt Būreejtōn eo an Kabun̄ eo an Jisōs Kraist im Armej Ro Rekwojarjar ilo Raan Ko Āliktata, Ijeļā bwe Anij ejeļā bwe Anij “An aolep kajjojo, aolep mālōtlōt, im aolep jeļāļo̧kjeņ; E meļeļe men otemjeļo̧k, im E ej juon E tūriam̧okake, em̧ool n̄an lo̧mo̧o̧r, n̄an ro renaaj ukweļo̧k im tōmak ilo Etan.”13
Kōn menin, ilo tōre kein me eļap inepata, ilo an ļapļo̧k ajedeed in nan̄inmej, men eo ekkā ad kōm̧m̧an im eaorōk tata ej n̄an jar im kūr Jemedwōj Ilan̄ im eo Nejin—Rikōmour eo Ekajoortata—n̄an kwaļo̧k kajoor eo Aer ekabwūlōn̄lōn̄ n̄an kōjeraam̧m̧an armej ro ioon laļ in.
Ilo ennaan eo aō ilo pijaan alooj eo, ikar kūrtok aolep n̄an kobatok ilo jitlo̧k ilo Jabōt, M̧aaj 29, 2020 Elōn̄ iaami remaron̄ kar dedeļo̧k aer alooje pija in im kar kobatok ilo jitlo̧k eo. Jet iaami bolen rekar jab. Kiiō jej aikuji wōt jipan̄ eo jān lan̄.
Kōn menin, ro jeiū im jatū, ilo wāween eo me ļōmaro nejin Mosaia rekar ioone, ro raar leļo̧k er make n̄an eļap jar im jitlo̧k,14 im āinwōt m̧ōttan eo an Eprōļ 2020 kweilo̧k eo eļap, ij kūr n̄an bar juon jitlo̧k an aolepān laļ in. N̄an ro me rāājmour remaron̄ kōm̧m̧an, jen jitlo̧k, jar, im kobaik tōmak ko ad bar juon alen. Jen jar im kajjitōk jipan̄ n̄an anjo̧ jān ajedeed in nan̄inmej in me ekapopo ipeļaakin laļ in.
Ij kūrtok kom̧ aolep, ekoba ro rejjab jān Kabun̄ in, n̄an jitlo̧k im jar ilo Good Friday, Eprōļ 10, bwe nan̄inmej in ejadeed en bōjrak, rilale rinan̄inmej ro ren pād ilo kōjparok, economy en kajoor wōt, im mour en em̧m̧an.
Ewi wāween ad jitlo̧k? Ruo iien m̧ōn̄ā ak likio in 24 awa ej wāween eo jeminene kake. Ak kwoj kālet ta eo kwonaaj ļōmņak ej juon kaarmājet n̄an eok, āinwōt ami keememej kaarmejet in eutiej me Rilo̧mo̧o̧r ekar kōm̧m̧an kōn kom̧. Jen koba ippān doon ilo akweļap kōn kōmour an aolepān laļ in.
Good Friday enaaj juon raan ewānōk bwe Jemedwōj Ilan̄ im Jisōs Kraist ren eo̧ron̄ kōj!
Ro jeiū im jatū, ij kwaļo̧k aō iakwe kom̧ jān tum̧wūlaļ in buruō, ippānļo̧k naan in kam̧ool eo aō kōn jerbal in ekwojarjar eo me jej bōk koņaad ie. En̄in ej Kabun̄ eo an Jisōs Kraist im Armej Ro Rekwojarjar ilo Raan Ko Āliktata. E eo ej jeban Kabun̄ in im Ej tōl e ta ko jej kōm̧m̧ani. Ijeļā bwe Enaaj uwaake kajjitōk ko an armej ro An. Ij kam̧ool ilo etan ekwojarjar Jisōs Kraist, amen.