Itok im Pād

Ijoke, erom juon rikaļooran Jisōs Kraist ekitbuuj eļapļo̧k jān kōnono im kwaļo̧k kōn Kraist. Rilo̧mo̧o̧r eo Make eaar kōjepļaaktok Kabun̄ eo An n̄an jipan̄ kōj ilo iaļ in n̄an eromļo̧k āinwōt E. Kabun̄ eo an Jisōs Kraist im Armej ro Rekwojarjar ilo Raan Ko Āliktata ej ejaak n̄an letok iien ko rem̧m̧an n̄an kamineneik pedped ko an rikaļoor. Ilo ad bōk kuņad ilo Kabun̄ in, jej ekkatak n̄an kile im jerbal ioon im̧we ko an Jetōb Kwojarjar. Jej kōļapļo̧k m̧wil eo n̄an pukōtļo̧k kōn tiriamo im jouj eo n̄an ro jet.

En̄in ej juon kijejeto to̧o̧n wōt ad mour, im ebōk kaminene.

Rikkure ro rejeļā rej joļo̧k elōn̄ awa ko n̄an kaminene pedped ko raorōk an ikkure ko aer. Nōōj ro, rijerbal ro an mejatoto, injinea ro, im em̧ool n̄a āinwōt juon rikōmat ilo jikin kōmat eo an Haariet im kapeel eo wōt ilo ad tiljek kamineneik kapeel eo ad.

Āinwōt juon kapen in baļuun, ekkā aō katakin kapen ro kōjerbal juon kein kelo̧k (simulator)—juon mijjin ej bōk jikin en̄jake in ekkāke eo. Kein kelo̧k in (simulator) ejjab wōt jipan̄ kapen ro jeļā kōn pedped ko raorōk an ekkāke; ak ebar jipan̄ er n̄an jeļā im kōm̧adm̧ōde m̧akūtkūt jab kōtmeni remaron̄ iooni n̄e rej bōk eddo in lukkuun juon baļuun.

Ejja pedped in katak ko wōt rej jerbal n̄an rikaļoor ro an Jisōs Kraist.

Niknik bōk kuņad ilo Kabun̄ eo an Jisōs Kraist im jerbal eo ie reļap enaaj jipan̄ kōj kōkōm̧anm̧anļo̧k ad m̧aanjabpopo n̄an jekjek an mour rooktaktak, jekdo̧o̧ņ ta eo remaron̄ in. Āinwōt membōr ro an Kabun̄ in, kar rōjan̄ kōj n̄an leļo̧k kōj make n̄an naan ko an Anij kōn rikanaan ro An, etto im raan kein. Kōn lukkuun jar ilo ettā n̄an Jemedwōj Ilan̄, jej jeļā n̄an kile ainikien Jetōb Kwojarjar eo. Jej bōk kūr ko n̄an jerbal, katakin, karōk, jerbal in karejar, im tōl. Jerbal kein rej kōm̧m̧an bwe jen kajoorļo̧k ilo jetōb, ļōmņak, im m̧wiļ.

Renaaj jipan̄ kōj m̧aanjabpopo n̄an kōm̧m̧an im kōjaparok bujen ko rekwojarjar me renaaj kōjeraam̧m̧an kōj ilo mour in im ilo mour eo ej itok.

Kōmij karuwaineneik aolep ro nejin Anij ipeļaakin laļ in n̄an kobatok ippām ilo jerbal in eļap. Itok im lale! Men̄e ilo apan̄ in kōn COVID-19, kobatok ippam̧ ilo online. Kobaļo̧k ippān mijenede ro am ilo online. Kappukote kōn kwe make ta eo Kabun̄ in ej kōm̧m̧ane! N̄e iien in epen ejem̧ļo̧k, kobatok ippām ilo m̧ōko im̧ōm im ilo jikin kabun̄ jar ko am!

Kōmij karuwaineneik kom̧ n̄an itok im jipan̄! Itok im jerbal ippām, jerbal in karejar n̄an ro nejin Anij, ļoor jenkwan nee ko neen Rilo̧mo̧o̧r eo, im kōm̧m̧an bwe laļ in en juon jikin em̧m̧anļo̧k.

Itok im pād! Kwonaaj kōm̧m̧an am kajoorļo̧k. Kwonaaj erom̧ em̧m̧anļo̧k, joujļo̧k im m̧ōņōņōļo̧k barāinwōt. Am tōmak enaaj m̧wilaļļo̧k im kajoorļo̧k—kapeelļo̧k n̄an jutak ņae kapan̄pan̄ im apan̄ ko an mour in.

Im elmen ad jinoe? Ekanooj lōn̄ wāween ko rekkar.

Ij karuwaineneik kom̧ n̄an riiti Bok in Mormon. Eļan̄n̄e ejjeļo̧k juon am̧ kape, komaron̄ riit ilo ChurchofJesusChrist.org⁴ ak download i Bok in Mormon app eo. Bok in Mormon ej bar juon kallim̧ur kōn Jisōs Kraist im juon m̧ōttan Kallim̧ur M̧okta im Kallim̧ur Ekāāl. Jej iakwe aolepān jeje kein rekwojarjar im jej ekkatak jeni.

Kōmij karuwaineneik kom̧ n̄an joļo̧k jidik iien ilo ComeuntoChrist.org n̄an lo ta eo membōr ro an Kabun̄ in rej katakin im tōmak.

Karuwaineneik mijenede ro n̄an lowaj eok ilo online ak ilo kapijuknen ijo ekkar—ewōr juon aer ennaan kōn kōjatdikdik im kōmour. Mijenede rein rej ļadik im leddik ro nejid rejitenbōro ro rej jerbal ilo elōn̄ jikin ko ipeļaakin laļ in kōn iien im jāān ko aer make.

Ilo Kabun̄ eo an Jisōs Kraist, kwonaaj lo baam̧le ko me rejjab oktakļo̧k jen kwe. Kwonaaj lo armej ro ro reaikuji jipan̄ eo am im ro rekōņaan jipan̄ eo ilo am kajjieon̄ in erom̧ ijo em̧m̧antata ilo kwe make—armej eo Anij ekar kōm̧anm̧ane bwe kwon erom̧.

Komaron̄ ļōmņak, “Ikar kōm̧m̧ani bōd ko ilo mour e aō. Ijjab jeļā n̄e ij en̄jake n̄an pād ilo Kabun̄ eo an Jisōs Kraist. Anij ejjab maron̄ itok limo in ippān juon āinwōt n̄a.”

Jisōs RiKraist eo, men̄e E ej “Kiin̄ an kiin̄ raņ,”⁵ Messaia eo, “eo Nejin Anij emour,”⁶ ej lukkuun kea kōn kajjojo ro nejin Anij. Ej kea jekdo̧o̧n jerbal ro eo an armej eo—jeram̧ōļ ak m̧weie, jab wānōk ak wānōk eo an armej eo. Ilo tōre in mour eo An ioon laļ, Rilo̧mo̧o̧r eaar jerbal in karejar n̄an aolep: n̄an eo em̧ōņōņō im ejeraam̧m̧an, n̄an eo ejorrāān im jebwābwe, im n̄an ro ejjeļo̧k aer kōjatdikdik. Ekkā, armej ro Ekar jerbal im jerbal in karejar n̄an er ekar jab kajjojo ro rebun̄bun̄, aiboojoj, ak m̧weie. Ekkā, armej ro Ekar kotak er ekar dik aer n̄an ukōtļo̧k bōtaab kam̧m̧oolol, bōro ettā, im ikdeelel n̄an wōr tōmak.

Eļan̄n̄e Jisōs ekar joļo̧k mour in jerbal in karejar eo An ilo mour in n̄an “ro jatū ediktata,”⁷ E en kar ke iakwe er rainin? Ejjab ke wōr juon jikin ilo Kabun̄ in An n̄an aolep ro nejin Anij? Men̄e n̄an ro rejjab erreeo, jowan, ak ajimakeke?

Ejjeļo̧k jon̄an wānōk eo ippam̧ n̄an maron̄ bōk tiriam̧o eo an Anij. Ami jar en jab eļaaj ak kajoor ak jejjet n̄an maron̄ tōpar lan̄.

Ilo m̧ool, Anij ejjab kalijōkļo̧k⁸—men ko an laļ in ejjeļo̧k tokjāer n̄an E. Ejeļā būruwōm̧, im Ej iakwe eok jekdo̧o̧n ta taitōl eo am, jāān ko am̧, ak jon̄an ro rej ļoor eok ilo instagram.

Ilo ad kōņaan leļo̧k būruwōd n̄an Jemedwōj Ilan̄ im epaakļo̧k E, jenaaj en̄jake An epaaketok kōj.⁹

Jej ajri ro Nejin rejitenbōro.

Jekdo̧o̧n ro rej kowaan E.

Jekdo̧o̧n ro me, āinwōt pen bōro, ajri pen kōm̧anm̧ōde, erom illu ippān Anij im Kabun̄ eo An, lim men ko m̧weier, im diwōjļo̧k im ba bwe rej ilo̧k im jab bar ro̧o̧ltok.

N̄e juon ajri ej ko jān m̧weo, emaron̄ jab kile an ro jinen im jemen inepata kake ilo aer reilo̧k jen wintō eo. Kōn būruwōn tiriam̧o, rej lale an ļaddik ak leddik eo etal—kōjatdikdik bwe ajri eo nejier ejitenbōro enaaj katak juon men jān en̄jake in im bōlen kalimjōk mour kōn mej ko rekāāl—im em̧ool jepļaak n̄an kapijuknen.

Kōn menin āindein ippān Jemedwōj Ilan̄ eo ej iakwe. Ej kōttar ad ro̧o̧lļo̧k.

Am̧ Rilo̧mo̧o̧r, ej dān in kōmjaļaaļ kōn iakwe im tiriamo ilo mej ko Mejen, ej kōttar am ro̧o̧lļo̧k. Jekdo̧o̧n n̄e kwoj en̄jake am̧ ettoļo̧k jān Anij, Enaaj lo eok; Enaaj wōr an tiriam̧o n̄an eok im ettōr waj n̄an atbakwoj eok.¹⁰.

Itok im pād.

Jej ritotak ro rej etetal ilo iaļ in mour wabanban ilo juon kappukōt eo eļap kōn meļeļe eo im m̧ool eo eļap. Ekkā, ad aolep lo iaļ eo ekaju epād im̧aan—jeban lo im̧aan ijo ej tōlļo̧k. Jemedwōj Ilan̄ ejjan̄in kar letok n̄an kōj aolep uwaak. Ej kōtmene kōj n̄an pukōt aolep men ko kōn kōj make. Ej kōtmene kōj n̄an tōmak—jekdo̧o̧n n̄e epen n̄an kōm̧m̧ane.

Ej kōtmene bwe jen jerbal kōn aerad im kōļapļo̧k ad kapeel—kajoor in kōņaan—im bar bōk juon bun̄tōn m̧aanļo̧k.

En̄in ej wāween eo jej ekkatak im eddōk.

Kwoj kōņaan ke bwe aolep men ren kōmeļeļeik ilo lukkuun tipdikin? Would you honestly want every question answered? Em̧ōj ke an kajjojo jikin kalikkare?

Ij tōmak elōn̄ iaad renaaj kar m̧ōkaj aer m̧ōk kōn an lan̄ tōl. Jej jeļā katak ko raorōk an mour kōn iminene. Jān ekkatak jān bōd ko ad. Kōn ukweļo̧k im kile kōj make bwe “jerawiwi ejjan̄in kar m̧ōņōņō.”¹¹

Jisōs Kraist, eo Nejin Anij, eaar mej bwe bōd ko ad ren jab liakeļo̧k kōj im dāpij ad eddōkļo̧k. Kōnke kōn E, jemaron̄ ukweļo̧k, im bōd ko ad remaron̄ in erom̧ men ko renaaj jipan̄ kōj n̄an bōk aiboojoj eo eļapļo̧k.

Kwojjab aikuj in etetal ilo iaļ in makeļo̧k. Jemādwōj Ilan̄ ejjan̄in de ilo̧k jān kōj n̄an jōbwābwe ilo marok.

Etke, ilo jibriin̄ in 1820 eo, Eaar waļo̧k ippān Nejin, Jisōs Kraist, n̄an ļaddik eo edik, Josep Smith.

Ļōmņak kake jidik! Anij eo an laļ in ekar waļok n̄an armej!

Menin ekar eo m̧oktata in elōn̄ jelm̧ae ko Josep ekar wōr an ippān Anij im armej in lan̄ ro jet. Elōn̄ iaan naan kein armej rein rekwojarjar raar ekōnono n̄an e rej jeje ilo jeje ko rekwojarjar an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Epidodo tōpari. Jabdewōt emaron̄ riiti im ekkatak kōn er make ennaan eo an Anij n̄an kōj ilo tōre in ad.

Jej karuwaineneik kom̧ n̄an ekkatak kaki kōn kom̧ make.

Josep Smith eaar bwe an dik ke eaar bōk revelāsōn kein. Elōn̄ iaer raar waļo̧k m̧okta jen an 30 iiō rūttoon.¹² Ekar jabwe jeļā ippān, im n̄an jet armej, eaar jekkar bwe en juon rikanaan an Irooj.

Im em̧ool Irooj ekar kūr e jekdo̧o̧n ta—ālkin ļoor juon jon̄ak eo jej loe ilo jeje ko rekwojarjar.

Anij ekar jab kōttar n̄an lo juon armej eo eweppān n̄an kōjepļaaktok gosepl eo An.

Eļan̄n̄e En kar, Enaaj kar kōttar wōt.

Josep eaar āinwōt kwe im n̄a. Men̄e Josep eaar kōm̧m̧an bōd ko, Anij ekar kōjerbal e n̄an kadedeļo̧k jibadbad ko An reļļap.

Būreejtōn Thomas S. Monson ekkā an āliji naan in kapilōk kein: “Eo Irooj ej kūri, Irooj ej kakarbab e.”¹³

Rijilōk Paul eaar m̧ōņōņō ippān ro Rekwojarjar ilo Korint: “Kom̧win lale an kūr kom̧, ro jatū: bwe ej jab elōn̄ iaami kom̧ re mālōtlōt ilo an armej lale, e jab elōn̄ ro re maron̄, e jab elōn̄ ro utiej.”¹⁴

Anij ej kōjerbal eo em̧ōjņo̧ im meļeļe n̄an bōktok jibadbad ko An. M̧ool in ej jutak āinwōt juon naan in kam̧ool bwe ej kajoor an Anij, ejjab an armej, me ej kōtōprak jerbal eo An ioon laļ in.¹⁵

Ke Anij eaar waļo̧kļo̧k n̄an Josep Smith, Eaar kwaļo̧k kadkadin Nejin, Jisōs Kraist, im ba, “Ron̄jake E!”¹⁶

Josep eaar joļo̧k aolepen mour eo an n̄an ron̄jake E im ļoor E.

Ainļo̧k wōt Josep, rikaļoor eo ad ej ijjino kōn jokāālet eo n̄an ron̄jake Rilo̧mo̧o̧r Jisōs Kraist.

Eļan̄n̄e kwoj ikdeelel n̄an ļoor E, ain am̧ tōmak im bōk ioom̧ make An debwāāl.

Kwonaaj lo bwe kwoj pād ilo Kabun̄ eo An—juon jikin eaenōm̧m̧an im ekaruwainene ijo komaron̄ koba ilo kappukōt eo eļap an rikaļoor im m̧ōņōņō.

Ej aō kōjatdikdik bwe, ilo bicentennial iiō in an Visōn eo M̧oktata, ilo ad kōļmenļo̧kjeņ im ekkatak kōn Jepļaaktok eo an Kabun̄ eo an Jisōs Kraist, jenaaj kile bwe ejjab wōt juon iien ilo bwebwenato. Kwe im n̄an jej kōm̧m̧ane juon m̧ōttan elukkuun aorōk ilo bwebwenato in, eļap ej wōnm̧aanļo̧k wōt.

Innām, ta, m̧ōttan eo am̧ im aō?

Ej n̄an ekkatak kōn Jisōs Kraist. N̄an ekkatak naan ko An. N̄an ron̄jake E im n̄an ļoor E kōn niknik bōk koņan ilo jerbal in eļap. Ij karuwaineneik kom̧ n̄an itok im pād!

Kwojjab aikuj in wānōk. Men eo aikuj in wōr wōt ippam̧ ej ikdeelel n̄an kōļapļo̧k am̧ tōmak im kepaakļo̧k E kajjojo raan.

M̧ōttan eo ad ej n̄an iakwe im jerbal n̄an Anij im iakwe im jerbal n̄an ro nejin Anij.

Ilo am̧ kōm̧m̧ane āindein, Anij enaaj jepooļ eok kōn An iakwe, lan̄lōn̄, im tōl em̧ool ilo mour in, jekdo̧o̧ņ ium̧win jekjek ko raan keke tata, im aeet ļapļo̧k.

Jān menin ij kam̧ool, im likūt ippāmi aō kōjeraam̧m̧an kōn tum̧wilaļ in kam̧m̧oolol im iakwe n̄an kom̧ kajjojo, ilo et eo etan ad Rilo̧mo̧o̧r, ad Maajta ekwojarjar—ilo etan Jisōs Kraist, amen.