Elder Jorge T. Becerra

O Jorge T. Becerra sa matamuli ma le gaoia a o tuputupu ae, ae na tuuina i ai e lona peresitene o le misiona ia avanoa e taitai ai. Sa toe taliu mai Jorge mai le Misiona i Kalefonia Arcadia ma se naunautaiga e punouai i le galuega a le Alii mo aso o totoe o lona soifua.

E lei pine ae oo mai isi mau avanoa faaletaitai nai lo le mea sa ia faamoemoeina. I le 27 o ona tausaga sa valaauina ai o ia i se au epikopo. I le 32 o ona tausaga sa valaauina ai o ia e avea ma epikopo. I le taimi muamua sa ia lagonaina lona le agavaa ao o atu tagata ia te ia ma o latou luitau.

“E matuai o’u le ilafia lava la’u mea o loo fai,” sa ia fai atu ai i lona tamā.

O le tali a lona tamā na aoao ai o ia i se lesona mamana, ma faamanatu atu ai ia te ia le faatuatuaga o lona peresitene o le misiona ia te ia, ma sa fesoasoani ai ia te ia e saunia mo valaauga faaletaitai i le lumanai, e aofia ai ona valaauga o se peresitene o le siteki i le 37 o ona tausaga.

“Sa fai mai lo‘u tamā, ‘Atalii, o le a le matua o le Agaga Paia?” Na faamatalaina e Elder Becerra: “O se taimi maoae lea o le aoaoina o au aua sa ou iloaina e mafai ona ou faia soo se mea e poloai mai ai le Alii ia te au.”

O lena lesona na tumau ai ia Elder Becerrea i le aluga o le tele o tausaga o le auauna atu ma le loto i Le Ekalesia a Iesu Keriso o le Au Paia o Aso e Gata Ai.

Na soifua mai Jorge Eduardo Torres Becerra i le aso 18 o Tesema, 1962, ia Juan C. Becerra ma Celia T. Becerra i le Aai o Sate I, Iuta, USA, lea na faafaileleina ai o ia.

Ina ua maea lana misiona, sa faaipoipo Elder Becerra ma Debbie Ilene Schneberger i le Malumalu o Sate leki i le aso 10 Aokuso, 1984. O i la’ua o matua o se fanau e toafa.

Na maua e Elder Becerra sona faailoga i suesuega lautele mai le Iunivesite o Iuta ma se faailoga amata o faatufugaga i le faatausitusi mai le Community College i Sate Leki. Sa ia aoaoina foi mea faapisinisi i le Iunivesite o Phoenix. I le 1998, na avea ai o ia ma se paaga a le Allegis Advisor Group, o se kamupani faufautua o mea tautupe. I le taimi o lona valaauga o se Fitugafulu o Pulega Aoao, sa faigaluega o ia o se faufutua o teugatupe a le Intermountain Financial Partners.

Sa avea Elder Becerra ma peresitene o Alii Talavou a le uarota, fesoasoani i se au peresitene o le misiona, fesoasoani i se au peresitene o le paranesi, faiaoga seminare, fesoasoani i se au epikopo, epikopo, peresitene o le siteki, ma se peresitene o le Misiona a Kalefonia Arcadia. I le taimi o lona valaauga, sa avea o ia o se Fitugafulu Eria.