Higala ngadto sa Higala
Ang Sekreto nga Sagol
Ni Sister Cristina B. Franco
Ikaduhang Magtatambag sa Kinatibuk-ang Kapangulohan sa Primary
Gikuha gikan sa “Ang Kalipay sa Dili Hinakog nga Pagserbisyo,” Liahona, Nob. 2018, 55–57.
Ang Langitnong Amahan gusto nga moserbisyo kita sa uban. Ang akong magtutudlo sa Primary mao ang usa ka talagsaong ehemplo sa pagserbisyo. Sa dihang motambong kami sa Primary, si Sister Antonietti kanunay magdala og chocolate cake. Di gyud ko ganahan og chocolate cake! Ang tanan ganahan niini. Apan wala gayud ko mikaon niini.
Usa ka adlaw, nangutana siya nako, “Nganong dili man ka motilaw og gamay? Kini nga cake gihimo uban sa usa ka espesyal nga sagol.”
Miuyon ko sa pagtilaw niini. Ug tag-ana unsa? Giganahan ko niini!
Daghang katuigan ang milabay ang akong inahan misulti kanako unsa ang sekreto nga sagol ni Sister Antonietti. “Si Sister Antonietti walay daghang kwarta,” miingon ang akong inahan. “Matag semana mopili siya tali sa pagbayad alang sa usa ka biyahe sa bus padulong sa Primary o sa pagpalit og mga sagol sa paghimo sa chocolate cake alang sa imong klase. Kanunay siya nga mipili sa chocolate cake. Busa imbis mosakay sa bus, molakaw siya og sobra sa duha ka milya [3 km], padulong ug pabalik, bisan unsa pa ang panahon.”
Ang sekreto nga sagol ni Sister Antonietti mao ang gugma nga aduna siya alang sa uban!