Mga Young Adult
Nganong ang Langitnong Amahan Gusto nga Makaangkon Ko og Edukasyon
Bisan unsa ang inyong matarung nga mga tinguha, ang Langitnong Amahan mohatag og paagi alang kaninyo sa pagkab-ot niini.
Sukad sa gamay pa ko, gusto gayud kong mohimo sa akong Langitnong Amahan ug sa akong pamilya karon ug sa umaabut nga mapasigarbuhon. Gusto ko nga makaangkon sa tanang edukasyon kutob sa akong mahimo aron sa pagpalambo sa akong kaugalingon ug sa akong kinabuhi.
Sa akong nasud, sa Peru, mahal kaayo ang kalidad nga edukasyon ug, sa ubang dapit, wala gayud. Ang akong pamilya wala usab sa tanang mga kapanguhaan aron sa pagsuporta sa akong edukasyon. Apan ang akong mga ginikanan mitudlo kanako nga ang pagpaningkamot og maayo, pagkamakugihon, ug pagpangamuyo sa Langitnong Amahan alang sa pag-abag makatabang sa atong matarung nga mga tinguha nga mahimong matuman. Ug nagplano ko nga maningkamot og maayo.
Sa elementarya ug high school, nagkugi ko sa akong pag-eskwela aron mapalambo ang akong kaugalingon matag tuig. Human sa high school, nakasulod ko sa labing nindot nga unibersidad sa Peru ug nakadawat og maayong scholarship. Samtang anaa didto, nakigtrabaho ko og pipila ka mga organisasyon, lakip ang usa ka internship sa usa ka tibuok kalibutan nga organisasyon, ug adunay mga oportunidad sa pagpangulo sa daghan nga lain-laing matang sa mga proyekto.
Atol niana nga internship, akong gibati nga kini usa ka maayo kaayo nga oportunidad nga makabaton og edukasyon sa Iningles. Mao nga mihukom ko nga mobalhin ngadto sa Brigham Young University–Idaho. Gibati nako nga bug-at kini, apan nasayud ko nga ang Langitnong Amahan motabang kanako sa pagkab-ut niini nga tumong—kinahanglan lang ko mosalig Niya ug mobuhat sa akong bahin.
Usa ka Kausaban sa mga Plano
Andam na ko nga moadto sa BYU–Idaho, apan atol sa proseso sa pag-aplay, mibati ko og kusog nga pag-aghat nga kinahanglan kong moserbisyo og misyon sa dili pa ko mobalhin didto. Busa misunod ko sa kabubut-on sa Langitnong Amahan ug gitawag nga moserbisyo sa Trujillo, Peru. Sa dihang miuli ko, nagplano ko nga mobalik sa unibersidad sa Peru tungod kay gibati nako nga paspas kong makakuha og degree didto. Apan, akong nahibaloan nga ang akong mga scholarship didto gibakwi tungod kay nabiyaan nako ang akong pag-eskwela og sobra sa usa ka tuig aron moserbisyo sa akong misyon.
Nahugno ko ug nahisalaag. Wala ko kahibalo unsa ang buhaton. Wala ko kahibalo nganong mibati ko nga gi-aghat sa pagserbisyo og misyon kon kini nagpasabut nga mawala ang akong oportunidad nga makaangkon og degree sa kolehiyo.
Apan usa ka adlaw, nahinumduman nako ang akong presidente sa misyon nga nagsulti kanamo mahitungod sa BYU-Pathway Worldwide. Midapit siya kanamo sa pagpalambo sa among Iningles ug sa pagpadayon niini nga oportunidad dihang mibalik na kami sa panimalay—ug ako kining gibuhat!
Ang akong Panaw sa BYU-Pathway Worldwide
Nasayud ko nga ang pagsulti sa akong presidente sa misyon kanako kabahin sa BYU-Pathway dili sulagma lang. Sa dihang nagsugod ko sa programa sa Pathway, nagkinahanglan kini nga mobiyahe ko og hapit tulo ka oras matag semana aron makigkita sa akong grupo. Daghan ang akong gisakripisyo, apan nasayud ko nga ang pag-angkon og edukasyon importante kanako ug ngadto sa Ginoo. Ug kadto nga mga sakripisyo miresulta sa daghang mga panalangin.
Ang BYU-Pathway Worldwide mao ang tukma nga oportunidad nga akong gipangita. Kini naghatag kanako og access sa edukasyon sa usa ka barato nga kantidad, mitugot kanako nga makatrabaho, ug nakatabang nako nga makakuha og edukasyon sa Iningles. Ug gumikan niining tanan, nakakaplag ko og talagsaong mga higala kinsa miawhag nako nga magmaisugon ug magpadayon sa pagpaningkamot sa pagkab-ot sa akong mga tumong. Gibati nako nga mas lig-on sa espirituhanong paagi ug nahimong mas maayo nga disipulo ni Jesukristo.
Sa katapusan, ako mao ang unang internasyonal nga estudyante nga nakadawat og bachelor’s degree pinaagi sa BYU-Pathway Worldwide. Ang edukasyon mibukas og talagsaong mga oportunidad alang kanako. Welfare ug self-reliance specialist na ako karon alang sa South America Northwest Area sa Simbahan, ug usa usab ako ka boluntaryo nga misyonaryo alang sa BYU-Pathway sa Peru. Nakita nako ang dako kaayo nga potensyal sa matag estudyante, ug giawhag nako sila sa pagpadayon sa unahan sama nga giawhag ko sa akong mga higala sa eskwelahan. Gumikan niini nga panaw, nakaamgo ko nga ang Langitnong Amahan kanunay nag-uban kanako sa tibuok nga kasinatian.
Ang Langitnong Amahan Gusto nga Molampus Kita
Ang akong panaw nakapalig-on sa akong pagpamatuod sa edukasyon. Ug nagplano gihapon ko nga magpadayon sa paglambo ug pagkat-on sa matag adlaw kutob sa akong mahimo. Anaa kita sa kalibutan aron mouswag, aron masulayan, aron molambo, aron sa pagpakita sa atong pagkamasulundon, ug sa pagsalig sa Manluluwas aron mahimong takus sa pagbalik ngadto sa atong Langitnong Amahan. Ngadto sa Dios, “tanan nga mga butang … mga espirituhanon”—lakip ang edukasyon (tan-awa sa Doktrina ug mga Pakigsaad 29:34). Ang atong tanan nga kasinatian ug ang kahibalo nga atong maangkon dinhi sa yuta makatabang kanato nga mahimong mas mahisama sa atong Manluluwas ug moandam kanato sa paghimo og mas maayong mga desisyon, aron mas maayong makaserbisyo dinhi sa kalibutan, ug aron mas mahimong maayo nga mga himan diha sa Iyang mga kamot.
Ang edukasyon naghatag og paagi aron makaangkon og kahibalo ug dayon sa pagbuhat, sa pagbarug sa kamatuoran ug katarung, ug sa pagpuyo og kinabuhi nga gusto sa atong Langitnong Amahan alang kanato—usa ka kinabuhi nga puno sa kalipay.
Nasayud ko nga ang atong Langitnong Amahan mopanalangin sa atong mga paningkamot, ilabi na kon ang tinguha sa atong kasingkasing mao ang mouswag ug moserbisyo Kaniya ug sa Iyang mga anak. Nasayud ko nga kon Siya mohatag sa Iyang mga anak og direksyon, “siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Gusto Niya nga kita molampus!
Ang matag usa kanato kinahanglang mopahimulos sa matag oportunidad sa edukasyon ug pag-uswag nga gibutang sa Ginoo sa atong agianan, kon kini pinaagi man sa BYU-Pathway o uban pang oportunidad sa edukasyon. Nahigugma Siya kanato ug mogiya kanato kanunay. Gusto niya nga makat-on kita sa tanan kutob sa atong mahimo dinhi sa yuta. Ug nasayud ko nga makasinati kita og dagkong mga milagro samtang malipayon kita nga maningkamot ug magkugi ug mosalig sa Iyang giya. Nasayud ko nga nakasinati ko og dagkong mga milagro.