Dali, Sunod Kanako: Basahon ni Mormon
Unsaon Nato sa Pagbatok sa Sayop nga mga Pagtulun-an?
Hulyo 6–12
Si Korihor usa ka antikristo kinsa misangyaw “batok sa mga panagna nga gikasulti pinaagi sa mga propeta, mahitungod sa pag-anhi ni Kristo” (Alma 30:6). Misangyaw siya og ubang mga bakak ug naglingla “sa mga kasingkasing sa daghan” (Alma 30:18).
Bisan tuod nahitabo kini sobra sa 2,000 na ka tuig ang milabay, daghang mga tawo karon ang nagsangyaw sa susama nga mga butang. Unsay atong mabuhat aron sa paglig-on sa atong mga kaugalingon batok sa sayop nga mga pagtulun-an sa atong panahon?
Makaangkon Kita og Atong Kaugalingon nga Pagpamatuod
Si Korihor mitudlo sa mga tawo “nga kinahanglan walay Kristo” ug “walay pag-ula”, ug milimud siya sa pagkaanaay Dios (tan-awa sa Alma 30:12, 17, 28).
Unsaon nato sa pagkahibalo nga ang Dios ug si Jesukristo buhi? Unsa nga mga kasulatan ug personal nga mga kasinatian ang nakapalig-on sa inyong pagpamatuod mahitungod Kanila?
Makasalig Kita sa Pagpadayag
Milimud si Korihor sa espiritu sa pagpanagna ug pagpadayag. Misulay siya sa pagpatuo sa mga tawo nga “walay tawo nga nasayud sa bisan unsa nga moabut” ug “kamo dili masayud sa mga butang nga kamo dili makakita” (Alma 30:13, 15).
Makalantaw kita ngadto sa mga propeta ug sa mga apostoles sa pagdawat sa pulong sa Dios alang sa atong panahon. Sa unsang paagi nga ang pagsunod sa propeta makapanalipod kanimo batok sa sayop nga mga pagtulun-an?
Atong Hinumduman Nga ang Kamatuoran mao Ang Kamatuoran
Misulti si Korihor sa mga tawo nga walay paagi nga sila mahimo nga masayud kon unsa ang tinuod (tan-awa sa Alma 30:24), apan si Presidente Russell M. Nelson mitudlo: “Ang pipila ka butang mga tinuod gayud. …
“… Ang kamatuoran nakabase sa mga balaod nga giestablisar sa Dios. … Ang mahangturong mga balaod naglihok sa ug makaapekto sa atong matag kinabuhi, kon motuo kita niini o dili” (“The Love and Laws of God” [Brigham Young University devotional, Sept. 17, 2019], speeches.byu.edu). Unsaon nato sa pagdiskobre sa mga kamatuoran sa Dios, ug sa unsang paagi kini makapanalangin sa atong kinabuhi?