Lagolagoina o Lo’u Tina i Lana Malaga i le Le Toe Tagofia o le Ava Malosi

Ina ua uma le ono masina o le le toe tagofia o le ava malosi, sa amata ona ou toe maitauina lo’u tina—o le sa masani ona siva i le taavale ma tusi ni solo matagofie ma faamatala atu ni tala malie faama tagata i au uo uma. Sa peisea’i o se tasi sa tau leiloa atu i tua na faafuasei ona toe faaolaina le malamalama i ona mata ma sa galue faasoloatoa ina ia taofi pea. Sa leva e lei toe malamalama lelei o ia i le tele o tausaga, ma o se lagona manaia tele le toe foi mai o ia.

Ae e le’i umi. I se tasi po, a o lei tautala mai, sa ma iloaina ma lou uso. O ona mata pupula ma ona alafau mumu sa faailoa maia: ina ua mavae masina e ono ma aso e fa, sa toe fo’i lava i ai. Mo sina taimi, sa ma mafaufau e savavali ese mai le faitotoa, ma o ese ai mai le popole ma le fefe, ae sa ma iloaina sa manao o ia e suia. Sa le mafai ona ma faia mo ia, ae sa mafai ona ma lagolagoina o ia a o savali atu i le auala i le toe faaleleia.

I le aluga o nai masina na sosoo ai, sa ma sailia ai ma lou uso ni auala e fesoasoani ai i lou tina e faatumauina lona agai pea i luma i le le toe tagofia o le ‘ava malosi mo se taimi umi. O le a le faigofie, ae sa ia faia muamua, ma sa ma iloa e mafai ona ia toe faia.

O le molimauina o le feagai ai o lou tina ma auga faigata o le leai o se ava malosi muamua, na ma iloa ai le mea e tatau ona fai, o lea sa ma aoina uma ai fagu ava malosi ma uaina na mafai ona ma mauaina ma sa’ati uma i le alavai. Ona ma faatumuina lea i vaiinu o le Gatorade mai le faleoloa ma matua’i faamama le fale; o le ma taumafaiga sili lea e aveese ai lou tina mai le siosiomaga lea sa i ai o ia i le taimi na ia tauivi ai ma lagona o le toe fia tagofia o le ‘ava malosi.

Ina ua mavae ni nai aso, sa manuia lou tina e toe alu ai e faigaluega, ae sa ma iloa e le’i uma le tauiviga. Ae seia oo mai i lena taimi, sa natia ai le loloto o lana vaisu mai le toatele o o matou aiga ma uo. I le aluga o tausaga, sa avea ma se mea lilo—o se punavai o le maasiasi, o se mea na faamatala mai e le tagata suesue i saienisi o Brené Brown “e maua mai lona malosi i le le faatalanoaina.”³ Afai ma te mananao ia te ia e faatumau lona le toe tagofia o le ‘ava malosi, e manaomia lo matou talanoa ma faaleo i ai lagona.

O le filifili e faasoa atu i lo matou aiga ma nisi o uo faatuatuaina sa faigata, ae sa faapea foi ona maua ai lagona o le faasaolotoina. O le maasiasi “e faaleagaina ai le vaega tonu o tatou lea e talitonu e mafai ona tatou suia ma faia mea sili atu ona lelei,”⁴ ma o le faatinoga o le talanoa atu i lo’u tina e uiga i lana vaisu na toe maua ai e lo’u tina (ma au foi!) le faamoemoe. E le na o i maua, ma o le taimi muamua lea i le tele o tausaga, na amata ai ona ma vaaia se olaga e le ta’ita’iina e ana vaisu.

O le a ou le taumafai e faafoliga lelei atu: o le faatumauina o le faamoemoe e le faigofie i taimi uma. E tele tausaga sa ou lagolagoina ai lou tina a o ia taumafai e ‘alo’ese mai le ava malosi, ae o le a ou pepelo pe a ou fai atu ou te lei oo i le faanoanoa, lē fiafia, ma le le mautonu i le aluga o le olaga. O le talanoa ai e uiga i le malaga faigata a se tasi e faatoilalo ai vaisu, na faamalamalama mai ai e Peresitene Nelson: “O i latou taitoatasi o e fuafua e feaei i lena auala tusa’o maualuga agai atu i le toe faaleleia, e tatau lava ona saunia lelei mo le taua o le olaga atoa. Ae o le olaga atoa o se taui e aoga tele e tusa ai ma lona tau.”⁵

Afai e te alofa i se tasi o loo tauivi ma vaisu, ua e iloa le faigata o le vaavaai atu i le faamalepeina o i latou e i latou lava. Ae e oo lava foi i taimi o lagona faigata e toe tupu mai, e le mafai lava ona ave’esea ai le faamoemoe. Ona o Lana taulaga togiola, ua silafia ai e le Faaola “auala e fesoasoani ai [ia i tatou] e tusa ma o [tatou] vaivaiga” (Alema 7:12). “Ma le faamalologa i ona apaau” (3 Nifae 25:2), Na te si’iina a’e ai i tatou pe a tatou lagona le vaivai e faaauau ai pea, “pipii mai ia i tatou ma faamalosiau mai ia i tatou, o le musu e faamamulu i tatou se’ia o tatou taunuu ma le saogalemu i le iuga.”⁶

O lea la, pe faatoa tasi lau la’a pe malaga i le afe maila faatasi ma se tasi o loo aga’i atu i se malaga o le toe faaleleia, o nisi nei o mea sa ou aoaoina i le aluga o tausaga:

1. Fesoasoani ia i latou ia aloese mai tulaga e faaosofia ai.

   Pe o le tagata o loo e lagolagoina o se uo, toalua, tagata o le aiga, po o se paaga, o le fesoasoani ia i latou e aloese mai tulaga faaosofia e tele! Soo se taimi lava e o atu ai lou aiga e aai ma lou tina, mo se faataitaiga, matou te talosagaina e nonofo i se laulau ese mai le mea o lo’o faatau ai pia. Afai e le maua se laulau, matou te talatalanoa seia oo ina avanoa se laulau.

2. Fautua mo i latou i tulaga faaagafesootai.

   E le faapea o le talanoa atu i le tagata o lo’o e fesoasoani i ai e uiga i lona vaisu, o lona uiga ua latou saunia e tau atu i le lalolagi. I uluai laasaga o le toe faaleleia, e mafai ona faigata tele ona faamalamalama pe aisea e aloese ai se tasi mai ni tulaga patino pe faia ni faaiuga patino, aemaise lava i tagata ese. I tulaga nei, ia faafaigofie le olaga mo i latou e ala i le fesoasoani atu ia i latou e faamalamalama ni mea e faalavelave.

3. Fesoasoani ia latou maua punaoa faaopoopo mo le lagolago.

   Po o le a lava le aafia ai o oe i le faagasologa o le toe faaleleia, e leai lava se auala e mafai ona e faia uma ai. O nisi taimi e manaomia ai e lo’u tina le talanoa i se tasi sa i ai iina, se tasi na o’o i ai, ma e le afaina lena mea! O punaoa faapolofesa ma vaega lagolago (e pei o le Polokalama o le Toe Faaleleia o Vaisu a le Ekalesia, o vaega e toe faaleleia, tagata tomai faapitoa o vaisu ma le amio) ua suia moni ai olaga, o lea la aua nei faatuai le uunaia o le tagata ua e lagolagoina e faaaoga nei meafaigaluega.

4. Afai latou te pa’ū’ū, fesoasoani ia i latou ia toe tutu i luga.

   Afai ana tatou nonofo i se lalolagi atoatoa, e le tatau ona i ai taumafaiga faigata o le fefo’ifo’i a’i, ae peitai o le olaga faitino lenei. Afai o le tagata o loo e lagolagoina ua i ai ni lagona e toe foi, ia faamanatu atu ia i latou le mamao na latou o mai ai. Faamalosiau atu i latou e ‘aua lava ne’i fiu pe a mavae ni toilalo faifai pea ma pe mafaufau [o latou] e le mafai ona lafoaia agasala ma faatoilaloina le vaisu.”⁷ E pei ona faaupuina e Elder Ulisses Soares o le Korama a Aposetolo e Toasefululua, “[E] le mafai ona taofia lo latou le toe taumafai”⁸ (ma e faapena foi outou). E le faapea o le toe o’o mai o lagona e toe fo’i i tua, o le a o latou toe fo’i ai i tua e toe amata mai i le amataga. O le a le aveesea ai galuega uma na fai ma le aga’i atu i luma lea ua latou i ai. E i ai lava i taimi uma se isi avanoa e toe foi ai, aapa atu i le Faaola, ma faaauau pea ona agai i luma.

5. Pipiimau Pea i le Faamoemoe

   O le vaavaai atu i se tasi e te alofa i ai o tauivi e foia a latou vaisu, o nisi taimi e te mafaufau ai pe faamata o le a toe foi ea i latou i le lelei atoatoa. (Talitonu mai ia te au, ou te iloa. Sa tele atu ni nai taimi sa ou i ai i tulaga ia nai lo le mea ou te fia tautino atu.) E oo lava ia Mamona na ia fesili faapea “Ma o le a le mea tou te faamoemoe i ai?” Ae e tusa lava po o le a le faigata, “o le faamoemoe e ala i le Togiola a Keriso” e i ai lava i totonu o le mea e mafai ona tatou pa’i atu i ai (Moronae 7:41).

I lou olaga atoa, sa tele atu taimi na to’ilalo ai lou tina nai lo le mafai ona ou faitauina, ae ou te mitamita e fai atu ua ono tausaga talu ona ia le toe inuina se ‘ava malosi. E ui ina tele tausaga o o’u aoaoina ma toe aoaoina o auala sili e lagolagoina ai o ia, ae o le matauina o lana toe faaleleia ma toe fo’i mai na aoaoina ai au, e leai lava se tasi e mamao ese atu sana alu. E tusa lava pe faafia ona toe fo’i le tagata e te alofa i ai, faaauau pea— taumafai pea e lagolagoina i soo se auala e te mafaia ai. O le toe faaleleia o se tautinoga o le olaga atoa—o se malaga e tumu i loimata, manumalo, toilalo, ma manumalo—ma o se taua e tele sona aoga.