Ringim Papa

Pikja

Call Dad

Yu i kamaot long skul i go long ples blong man i wokbaot we i fasfas long man. Hed blong hem i fulap long matematik we i karem long ekstra klas blong hem. Ol pipol oli hariap wetem ol ambrela. Ol bigbigfala drop blong ren oli stap foldaon kwiktaem, mo rod ia i wetwet evriwan.

Fren blong Yu, Lin, i stanap long saed blong hem. “Yu ringim papa blong yu blong i kam pikimap yu,” Lin i talem. “Masta Zhang i talem se wota i ron long sam ples long taon ia.”

“Mi save go hom miwan nomo.”

“!Be yu lukluk evri wota ia!” Lin i talem, i poenem wota we i stap spid i go long hol.

Blong smol taem, Yu i gat wan fani filing. ?Lin i talem tru? Mebi hem i mas ringim Papa blong i draevem hem i go long hom bifo ol rod ia oli fulap long wota. Be hem mo Papa i bin raorao smol long las naet, mo Yu i bin kros yet i stap. Hem i no wantem askem help long Papa blong hem.

Yu i karemaot jen long baeskel blong hem, mo i talem tata long Lin. Sapos mi ron spid moa long baeskel, Yu i tingting, bae mi save kasem hom bifo ol rod ia oli fulap long wota.

Hem i ron spid i go, be i no longtaem ol han blong hem oli kolkol, klos blong hem oli wetwet evriwan, mo hem i taet. Bakegen, hem i tingting blong ringim Papa. ?Filing ia i kam long Tabu Spirit? Ol misinari we oli bin baptaesem hem oli bin talem se Tabu Spirit i save stap olsem gaed blong hem. Yu i lukluk i go long skae. Skae i grei tumas mekem se hem i no save lukluk top blong ol bilding. Be hem i bin kros yet long Papa.

Yu i no wantem save long filing ia mo i gohed blong ron i go. Wota i kam antap tumas, mekem se ol ona blong ol stoa oli sarem stoa blong olgeta. Ol pipol oli muvum ol ting blong olgeta i go long ol floa blong haos we oli moa hae. Yu i luk wan mama i pusum tufala pikinini blong hem i go tru long bigfala wota ia long wan smol plastik bot.

Naoia wota i stap long angkel blong hem. Yu i nomo save purumbut long pedol blong baeskel blong hem. Hem i jiam daon mo i pusum baeskel. Ating i let tumas blong ringim Papa naoia, mo ren ia i stap foldaon yet. Tanda i faerap mo laetning i laet antap long hem. Yu i fraet. !Mo hem i taet tu! Hem i lukluk i go fored. Hom i longwe yet. Sapos nomo hem i bin lisin long Tabu Spirit, be no, hem i wantem stap tingting long smol raorao ia.

Yu i stop blong talem wan sot prea. Hem i no save harem voes blong hem antap long noes blong ren mo tanda, be hem i bin save se Papa long Heven i save harem hem.

“Papa long Heven,” Yu i bin prea. “Plis helpem mi blong gobak hom sef.” Taem hem i finis blong prea, hem i filim paoa blong gogohed.

Smol taem moa afta, Yu i save luk haos blong hem antap long hil. Hem i kolkol, i taed, mo i mestem wan saed sus samples, be Yu i pulum hem i go antap long hil. Hem i bin luk Papa i stap wet long hem aotsaed. Papa i ron i kamdaon long hil i mitim hem, i saksakem wota long semtaem we hem i stap ron.

Taem Papa i kasem hem, hem i putum han blong hem i raonem Yu. “Mi wari tumas! Papa i talem. “!Sapos yu ringim mi nomo!”

“Mi ting se yumitu kroskros long yumitu,” Yu i talem.

“Mi mi neva kros tumas long yu blong helpem yu,” Papa i talem. Afta, hem i tekem baeskel blong Yu mo i pusum i go kasem antap long hil.

Iven wetem tanda we i stap faerap bitwin ol tolfala bilding mo hevi ren we i stap foldaon, wan wom filing i fulumap hat blong Yu. Hem i bin filim pis mo hem i filim se hem i sef taem hem i bin stap folem Papa i gohom. ●