Elder Dean M. Davies

Ni a draiva tiko ki vale mai na cakacaka ena 1989, a vesuki o Elder Dean M. Davies ena dua na uneune e San Francisco, California e Amerika, ka a kuretaka vakaukauwa sara na nona motoka. E muri, ni vakasamataka tiko na revurevu ni vakacaca ki na vanua oya, a vakananumi o koya ena bibi ni kena tarai cake na noda bula ena dua na yavu dei.

“E sega ni dua vei keda ena nakita me tara na noda vale, vanua ni cakacaka, se na veivale vakatabui ni sokalou ena nuku se tikitiki ni vatu ka sega na ituvatuva kei na iyaya e veiganiti,” a kaya o koya. “Meda sa ciqoma na veisureti ni iVakabula meda lako mai Vua. Meda sa tara cake noda bula ena dua na yavu dei ka taqomaki.”¹

O Elder Davies, ka a veiqaravi tu ena Matabisopi Vakatulewa vakatekivu mai na Epereli 2012, a tokoni me dua na Vitusagavulu Vakaitutu Raraba enai ka 3 ni Okotova, 2020. Ena Matabisopi Vakatulewa a veiqaravi tu mai o Elder Davies vaka-iKarua ni Daunivakasala kivei Bisopi Gary E. Stevenson me yacova ni a tokoni o Bisopi Stevenson me lewe ni Kuoramu ni iApositolo Le Tinikarua enai ka 3 ni Okotova, 2015. A qai tokoni o Elder Davies me iMatai ni Daunivakasala vei Bisopi Gérald Caussé, o koya ka sosomitaki Elder Stevenson me Bisopi Vakatulewa vou.

A sucu o Dean Myron Davies e Salt Lake City, Utah, Amerika ena 1951. Ni oti na nona veiqaravi vakadaukaulotu tudei ena Tabana ni Kaulotu na Uruguay/Paraguay, a vakamautaki Darla James ena 1973 ena Valetabu e Salt Lake. E lewe 5 na luvedrau ka 17 na makubudrau.

Ena Julai 1995, a tekivu cakacaka ena Lotu, na vanua a veiqaravi kina o koya me dairekita ni Tabacakacaka ni Cakacaka Digitaki, kei na itavi me baleta na iyauqaqa digitaki, na droinitaki ni valetabu, kei na tara ni valetabu. Ni bera ni cakacaka ena Lotu, a cakacaka tu o Elder Davies ena High Industries, Inc., e Lancaster, Pennsylvania, e Amerika, kei na Bechtel Investments, Inc., e San Francisco. A rawata o koya na koroi ena economics ni teitei mai na Brigham Young University ka qai taura na parokaramu torocake ni veiliutaki eso mai na Stanford kei na Northwestern Universities.

E sa veiqaravi oti o Bisopi Davies vaka peresitedi ni Tabana ni Kaulotu e Puerto Rico San Juan, daunivakasala ni peresitedi ni kaulotu, peresitedi ni iteki, daunivakasala ni peresitedi ni iteki, vunivola liu ni iteki, lewe ni matabose e cake, kei na vica na matabisopi.