O Se Mea e Ofo Ai i le Kerisimasi
E alala le tusitala i Colorado, ISA.
“Ia maua se Kerisimasi faaleaiga fiafia! … Wrap your hearts in love this year” (Children’s Songbook, 51).
Sa matuai faanoanoa le loto o Ana a o ia savali atu i totonu o le potu ma vaaia ai le laau Kerisimasi. Sa pa le vai vevela o le latou fale, ma na vaia ai le fola atoa. Sa taumafai pea Tama e faamama le gasu. O nai meaalofa laiti na i lalo o le laau sa matuai pala lava.
Sa toso mai e Ana ma ona tuagane laiti ni solo ma latou taumafai ai e solo mago meaalofa. Ae sa le’i aoga tele. Sa matuai palavivi lava.
Na feagai le aiga o Ana ma se taimi faigata. Sa leai se galuega a lona tamā i le taimi lea. O le a lē umi ae maua se pepe fou a lona tina, ma sa ma’i soo o ia. Ma o lenei o le a leai ni a latou meaalofa mo le Kerisimasi.
I lena po ao sauni Ana e moe, sa ia lagona atu le talanoaga a Tama ma Tina i le umukuka.
“O le a le tatou mea o le a fai?” O le fesili lea a Tina. Na foliga mai sa tagi o ia. “E le o lava se tatou tupe mo le totogi o le fale, ae o lenei foi e leai ni meaalofa mo tamaiti.” Sa oo ia Ana se lagona gaogao ma le popole i lona manava.
“O le a ta mafaufauina lava se mea,” o le tala lea a Tama.
Sa savali atu Ana i totonu o le umukuka. Na aapa atu Tina ma fusi mai ia te ia. Ma ona lima sa faataamilo i le manava o Tina, sa lagona e Ana le minoi o le pepe. Na ataata o ia. “O loo faatali le fanau mai o le tatou pepe fou. E masani lava ona e fai mai o se pepe o se vavega.”
Sa ataata atu Tina. “E sa’o. E tele mea e ao ona tatou loto faafetai ai.”
“O loo ia i tatou le tasi ma le isi,” o le tala lea a Tama. Na ia sogi atu i le ulu o Ana. “O le a lē afaina.”
A o alu atu i lona potu, sa faalogoina e Ana ona tuagane o fetagisi. Sa saofai o ia i le moega o Tavita.
“Ua faanoanoa tagata uma,” o le tala filemu lea a Tavita.
“Ma o le a leai ni a tatou meaalofa,” o le tala lea a Rapi, a o masusū.
“O le a lē afaina,” na toe fai atu ai Ana. “O le a lua vaai i ai.”
A o lei oso i lona moega, sa tootuli Ana ma ole atu i le Tama Faalelagi po o le a se mea e mafai ona ia faia mo lona aiga. Sa leai ni ana tupe e faatau ai ni meaalofa, ae sa i ai pea se lagona lelei ma le mafanafana i lona loto.
O le taeao na sosoo ai, sa taotooto pea o ia i lona moega ma mafaufau mo ni nai minute a o lei sauni mo le aoga. Ona oo mai lea o se manatu ia te ia! I lena aoauli sa faatopetope atu o ia i le fale ma fai ana feau ma ana meaaoga. Ona ia maua lea o ni pepa ma se manoa ma ni nai peni maka ma faailoga faapipii sa ia mauaina mo lona aso fanau. Sa ia aveina uma lava i lona potu ma tapuni le faitotoa.
Na toetoe a ata Ana i le mafaufau atu i le tau fai ofo o le a i ai lona aiga. Sa ia gaugauina muamua le pepa ma nonoa faatasi i se manoa e fai ai ni tamaitusi se fa. Na ia filifilia se fetu e faapipii i le tamaitusi a Tina, ae o se paneta mo Tama. Sa ia tuu se taifau mo le tamaitusi a Tavita ma se loketi mo Rapi.
Ona amata tusi lea e Ana ni ata. Mo Tina sa ia tusia sona ata o loo saluina le fola. Sa ia tusia sona ata o loo la kukaina ma Tama le taumafataga o le afiafi, o le isi ata o loo la taaalo lakapi ma Tavita, ma le tasi o loo ia faitauina atu se tusi ia Rapi. Sa tele ni aso na ia faaaluina e faatumu ai tamaitusi taitasi i ata.
Mulimuli ane na oo i le aso e sosoo ma le Kerisimasi, ma sa tuu ma le faaeteete e Ana ana tamaitusi i lalo o le laau.
O le taeao na sosoo ai, sa ia tuuina atu i tagata taitoatasi o lona aiga se tamaitusi. “Ou te fiafia i ata nei,” o le tala lea a Tavita. “Ou te fiafia e taalo i le lakapi.”
“E le na o ni ata,” na fai atu ai Ana ma ni foliga fiafia. “O ni pepa o auaunaga! O ata o loo faaalia ai mea uma o le a ou faia mo outou.”
“O le meaalofa aupito manaia lenei e mafai ona e tuuina mai ia i matou,” o le tala lea a Tina a o tilotilo i lana tamaitusi. Sa faafetai Ana ona sa fesoasoani le Tama Faalelagi ia te ia e mafaufau i le faia o pepa o auaunaga o le Kerisimasi. O le a oo mai se pepe fou, ma faatasi ai ma le fesoasoani a le Tama Faalelagi, o le a matuai lelei lava mea uma.