“Wat Is die Godheid?,” Liahona, Junie 2021
Maandelikse Liahona-boodskap, Junie 2021
Wat Is die Godheid?
Hemelse Vader, Jesus Christus, en die Heilige Gees is drie afsonderlike wesens met een doel.
Detail uit First Vision (Die Eerste Visioen), deur Jon McNaughton
ʼn Koerantredakteur het die Profeet Joseph Smith eenkeer gevra wat lede van Die Kerk van Jesus Christus van die Heiliges van die Laaste Dae glo. In antwoord het die Profeet 13 verklarings van geloof geskryf wat ons die Geloofsartikels noem. Die eerste verklaring sê: “Ons glo in God, die Ewige Vader, en in sy Seun, Jesus Christus, en in die Heilige Gees” (Geloofsartikels 1:1). Hierdie drie vorm wat ons die Godheid noem.
God, die Ewige Vader
God het ʼn herrese liggaam van vlees en been. Hy is die Vader van ons geeste. Hy het elkeen van sy kinders volmaak lief. God is volmaak, het alle mag, en weet alles. Hy is regverdig, barmhartig en goedhartig. Ons het as geeste met God gewoon voor ons gebore is. Hy het ons na die aarde gestuur om te leer en te groei. God se grootste begeerte is dat elkeen van sy kinders mag terugkeer om weer saam met Hom te woon nadat ons sterf. God leer ons dat ons Jesus Christus moet volg om terug te keer na God se teenwoordigheid.
Christ Preaching in the Spirit World (Christus Onderrig in die Geesteswêreld), deur Robert T. Barrett
Jesus Christus
Jesus Christus het ook ʼn herrese liggaam van vlees en been. Hy is God se Eersgebore Seun. Voor ons gebore was, het God Hom gekies om ons Saligmaker te wees. Dit beteken dat Jesus na die aarde gekom het om ʼn voorbeeld vir ons te wees, sy Evangelie te onderrig, vir ons sondes te versoen, en ons van die dood te red. Vanweë Jesus Christus, kan ons van ons sondes vergewe word wanneer ons bekeer. Jesus Christus het ook baie dinge gely sodat Hy ons kan verstaan en help. Jesus Christus het gesterf en toe weer gelewe, wat dit vir almal moontlik maak om weer te lewe.
Foto van Getty Images
Die Heilige Gees
Die Heilige Gees is die een lid van die Godheid wat nie ʼn fisiese liggaam het nie. Hy is ʼn gees. Die Heilige Gees is in staat om direk met ons geeste te kommunikeer. Hy getuig aan ons dat God werklik is en dat Jesus Christus ons Saligmaker is. Die Heilige Gees dien as God se boodskapper om ons gevoelens van liefde, leiding of vertroosting te gee. Wanneer ons gedoop en bevestig word, ontvang ons die gawe van die Heilige Gees. Na ons doop kan die Heilige Gees altyd met ons wees as ons God se gebooie onderhou.
First Vision (Die Eerste Visioen), deur Walter Rane
Joseph Smith se Eerste Visioen
Met verloop van tyd het mense verward geword oor die Godheid. Mense het nie saamgestem oor wat God, Jesus Christus, en die Heilige Gees is nie. Dit is een rede hoekom die Eerste Visioen wat Joseph Smith gehad het, so belangrik was. Hy het gesien dat Hemelse Vader en Jesus Christus liggame het en twee afsonderlike wesens is.
Listening (Luister), deur Michael Jarvis Nelson
Afsonderlik maar Verenig
Die skrifture en moderne profete leer ons dat God, Jesus Christus en die Heilige Gees afsonderlike wesens is met een doel: ons onverganklikheid en die ewige lewe (sien Moses 1:39). Soos lede van dieselfde span, werk Hulle saam om ons elke dag te help. Ons kan nader aan Hulle voel wanneer ons van ons sondes bekeer en die regte keuses maak.
Skrifture aangaande die Godheid
-
Hemelse Vader en Jesus Christus is een in doel (sien Johannes 10:30).
-
Hemelse Vader het met sy Seun gepraat (sien Matthéüs 3:16–17).
-
Jesus Christus het met sy Vader gepraat (sien Johannes 11:41).
-
Jesus Christus het vir ons gebid om eendag een te word (sien Johannes 17:11).
-
Joseph Smith het Hemelse Vader en Jesus Christus gesien (sien Joseph Smith—Geskiedenis 1:17).
-
Die Heilige Gees getuig dat Jesus Christus ons Saligmaker is (sien Johannes 15:26).
© 2021 deur Intellectual Reserve, Inc. All rights reserved. Gedruk in die VSA. Engelse goedkeuring: 6/19. Vertalingsgoedkeuring: 6/19. Vertaling van die Monthly Liahona Message, June 2021. Afrikaans. 17470 501