Muria na Veiliutaki nei Tamaqu

E tiko na ivakarau ni veivakamarautaki ni noqu matavuvale levu. Ena veiolidei, sota vata, se so tale na soqo talei, keitou dau kauta na waqa nei noqu momo mai Tongatapu, na yanuyanu levu duadua e Tonga, ki na dua na yanuyanu totoka e taudaku o Pangaimotu. E kea, ena siga taucoko keitou na qito volibol se pool, voce bavelo, vakakina na vakatakakana kei na sisili.

Ni keitou yaco yani ki Pangaimotu, e dau laki kele ciri toka na neitou waqa ena loma ni kena toba, ka ra dau vakaleleci ki baravi ena dua na waqa lailai o iratou na qase. O iratou na gone—na tavalequ kei ratou na taciqu—e ratou sega ni dau via waraka na waqa ni vakalele. E ratou vinakata ga me ratou qalo mai na waqa levu me yaco ki baravi, oti, ni cava na gade balavu o ya, e ratou na qalo lesu kece.

Niu se goneyalewa lailai, au dau via lako vata kei iratou, ia na qalo o ya a dau dredre vei au baleta na wai volekata na neitou waqa e titobu. Au dau rerevaka keu sega ni butu rawa e botoni wai e ra—Au kila sara ga ni dua na ka ena toboki au ka dreti au sobu. Vakakina, na yawa mai na baravi ki na waqa sa balavu sara ga. Vakacava keu sa na wale ni bera niu yaco?

Sa kila tu o tamaqu na kena bibi vei au meu na qalo.

Ni sa tekivu me dromu mai na siga ena dua tale na siga e Pangaimotu, a kacivi au sara o koya. Sa na vukei au o koya meu sa na qalo mai baravi ki na waqa.

A taubale vata kei au o tamaqu mai na vanua mamatia ki na wai titobu. Ena gauna ga au sa sega ni vakila kina na qele e ra e yavaqu, au sa tekivu rere ka saga meu ququmi vua, ia a sega ni vakatara. Ena lomaleqa, au sa tekivu tagi, ia a tu ga e yasaqu o tamaqu ka vakayaloqaqataki au meu qalo tikoga.

Ena gauna, au sa tayelu kina ka teketeke, au sa vakila niu sa sega ni toso rawa, Au sa wale sara ga! Sa qai kaya o tamaqu meu veisautaka na iwalewale ni noqu qalo.

Au a vakarorogo matua ki na domona, ena noqu icegu ka toso sara tiko, kau sega ni kila ni keirau sa yaco ki waqa—ena kena totolo sara au a sega ni namaka.

A sobuti au e dua na yalo ni qaqa sa rawati rawa niu sa kaba yani e waqa, kau kila rawa kina ena loma ni ilakolako o ya—niu a vakanamata tiko ena noqu qalo vakakina vei tamaqu—sa sega tale niu rerevaka na waitui.

Ni toso na yabaki, au sa qalo rawa e kea, lako yani ka lesu mai, ena vuqa na gauna kau sega ni rere. Na ka a dau dredre sara tu e liu sa mai ka rawarawa sara.

Au vakasamataka na nona a dusimaki au o tamaqu ena imatai ni noqu qalo rawa ki waqa. A yalololoma o koya, ia a tudei tikoga. A vakatara meu sotava vakai au na dredre, ia a toka volekati au ga ena ilakolako taucoko. Ena so na gauna au a taqaya kau a vosavosa, ia a vakayaloqaqataki au tikoga ena vosota kei na loloma.

Au sa vulica mai kina ni o Tamada Vakalomalagi e cakacaka ena sala vata ga o ya. Sa kila tu o Koya ni noda tiko eke e vuravura me da na vuli, ka vakawasoma, ena gadrevi kina vei keda meda lako tani mai na noda tiko wele. Sa kila tu o Koya ni vuqa noda ibolebole e vuravura ena dredre ka veivakararawataki, ka dodonu kina me da na sotava vakaikeda me rawa ni da tubu cake, ia sa dau tu o Koya e yasada, me dusimaki keda ka vakayaloqaqataki keda, ka vukea me vukica na noda malumalumu ki na qaqa.

Ni gauna eda vosota kina na noda vakatovolei ena yalomalua kei na vakabauta, sa na rawa me kauti keda voleka mai vei Tamada Vakalomalagi. Sa rawa mera vakavulici keda meda nuitaka na Nona loloma vakalou kei na Nona gagadre vei keda meda qaqa. Me vakataka na ka a cakava vei au o tamaqu ena vuqa na yabaki sa oti mai Pangaimotu, sa rawa vei Tamada Vakalomalagi me veisautaki keda ki na keda veituvaki vou e vinaka cake ka vukei keda meda rawa-ka vakalevu cake ena kena eda sega ni cakava rawa vakai keda.