E Veivosakitaki ena Soqoni ni iTabagone ni Veimatalotu na iTukutuku Raraba kei na Lotu e Viti

“Na itukutuku raraba e rawa ni sala ni kena vakayagataki me vaqaqacotaki na duavata, dina ga ni tiko na duidui vakamatalotu kei na vakabauta vakavanua,” a kaya vakaoqo o Willie Irava, e dua na itabagone qase cake mai na Lotu i Jisu Karisito ni Yalododonu Edaidai.

A vosa tiko o Irava ena Parokaramu ni Soqo Vakayalo ni Veivosaki ni iTabagone ni Veimatalotu, e ratou a vakarautaka na Missionary Society of Saint Columban e Viti.

A vakaraitaka ni gauna e yaco kina eso na ivosavosa luluqa semati ki na itukutuku raraba kei na duidui vakamatalotu kei na ivakarau vakavanua, na vakanamata ki na veika dodonu e rawa ni vakalailaitaka na veilecalecavi vakamata tamata ka vukea me tarai cake e dua na mata tamata e veivosoti ka veikilai vinaka.

“Dina ga ni tiko na veicacati e tu voliti keda tu e vuravura ka vakakina ena buturara ni itukutuku raraba, ia sa rawa meda veisautaka o ya ena noda wasea na veika dodonu baleta na vakabauta vakalotu sa tu vei keda ena rawa me veisautaka na kawatamata. Dina ga ni tu na veika butobuto, na veika vinaka ena dau cakava oqo,” a kaya.

E ratou a matataka o Irava, kei ira eso tale na itabagone mai na iTeki o Suva Viti (ilawalawa ivavakoso) na Lotu i Jisu Karisito ni Yalododonu Edaidai ena soqo a vakayacori ena Sacred Heart Cathedral e Suva.

Era a raica vakabibi na ulutaga “Na Matavuvale sa Tawamudu,” ka cakava e dua na vidio a vukea me vakamatatataka na bibi ni valetabu ena ituvatuva vakalotu ni Tamada Vakalomalagi kei na noda rawa ni bula tawamudu vata kei ira na noda daulomani ka sa vakayacori rawa oqo ena Veisorovaki ni iVakabula, o Jisu Karisito.

“Ena itukutuku raraba, sa noda kina na madigi meda wasea ka sema kei ira na matavuvale kei ira na nodra daulomani. Eda vakabauta na lewe ni Lotu ni matavuvale sa tawamudu, me vaka sa tuvanaka tu na Turaga, ka da sa vakabauta ni noda veiwekani e buli eke e vuravura sa rawa me tudei me tawamudu,” a kaya o Irava vei ira na tiko kina.

A vakarautaka na parokaramu e dua na yavu vei ira na itabagone kei na itabagone qase cake mera veiwasei ka veisoli itukutuku me baleta na nodra dui vakabauta vakalotu.

Era a matataki e vica na ilawalawa matalotu eso ena soqo oqo ka wili kina na Lotu Wesele, na Soqosoqo Vakayalo ni Lotu Baha’i, na Arya Pratinidhi Sabha e Viti, na Then India Sanmarga Ikya (TISI), na Lotu Katolika, kei na Lotu i Jisu Karisito ni Yalododonu Edaidai.

E sivia e 50 na itabagone kei na itabagone qase cake era a tiko kina.

“Au a taleitaka dina na sotavi ira na lewe ni matalotu tale eso ka a rawa meu kilai ira sara vakayadua,” a kaya o Mercedes Semaan. “E vaka ni dua na mataveivosaki dolavi raraba kau vakila niu taleitaki sara. Au vinakata sara ga meu cakava tale oqo.”

Ni vosa tiko vei ira na gonevuli ena Brigham Young University ena 2014, a kaya na iapositolo ni Yalododonu Edaidai, o Elder David A Bednar, “Sa vakatotolotaka tiko na Turaga na Nona cakacaka, ka sega ni vakacala-ka ni veivakauqeti ni veitaratara kaukauwa oqo kei na sasaga vou era sa yaco tiko ena itabagauna ni taucoko ni gauna oqo. Na itukutuku raraba era sa iyaya ni cakacaka e vuravura raraba ka na rawa ni cakamana vakayadua ka vakadodonu ki na lewe levu sara na tamata yadua kei na matavuvale.”