“Asan’ny tempoly,” Liahona, ôktôbra 2021
Hafatra isam-bolana ao amin’ny Liahona ôktôbra 2021
Ny asa atao any amin’ny tempoly
Tranon’ny Tompo ny tempoly. Afaka mandray ôrdônansy sy manao fanekempihavanana Aminy isika any amin’ireo tempoliny. Afaka manatanteraka ôrdônansy ho an’ireo razambentsika ihany koa isika any amin’ny tempoly.
Sarin’ny Tempolin’i Barranquilla any Kôlômbia, nataon’i Bruno Lima
Hatramin’izay ny Tompo dia nandidy ny vahoakany hanangana tempoly. Ny tempoly dia toerana masina izay ahafahantsika mahatsapa ny fitiavan’ Andriamanitra, sy mandray ôrdônansy, ary manao fifanekena Aminy. Manangana tempoly maneran-tany ny Fiangonana ankehitriny mba hahafahan’ny olona maro kokoa hatrany mahazo ireo fitahiana ireo.
Sarina vehivavy eo anoloan’ny Tempolin’i Tendrombohitr’i Oquirrh Utah, nataon’i Nexeo sy i Matthew Reier
Ny Fanafiana Masina
Afaka mandeha any amin’ny tempoly mba handray ireo ôrdônansy sy hanao fanekempihavanana, na fifanekena, amin’ Andriamanitra ireo mpikamban’ny Fiangonana izay miaina amim-pahamarinana. Ôrdônansy iray raisintsika any amin’ny tempoly ny fanafiana masina. Ny andian-teny hoe fanafiana masina dia midika hoe “fanomezana”. Ny fanafiana masina any amin’ny tempoly dia fanomezana avy amin’ Andriamanitra. Amin’io ôrdônansy io isika dia mianatra momba ny drafitry ny Ray any An-danitra ho an’ny famonjena antsika, ary manao fanekempihavanana isika ny hitandrina ireo didin’ Andriamanitra. Raha mahatoky amin’ireo fanekempihavana ataontsika isika dia hitahy antsika Andriamanitra.
Sarina mpivady mandehandeha eo akaikin’ny Tempolin’i Manila Filipina, nataon’i Cristina Smith
Famehezana ho iray ny fianakaviana
Ny fanambadiana atao any amin’ny tempoly dia antsoina ihany koa hoe famehezana. Rehefa voafehy any amin’ny tempoly ny mpivady iray ka mitandrina ireo fanekempihavanana nataon’izy ireo dia ho mpivady mandrakizay izy ireo. Raha miteraka izy ireo, dia ho voafehy amin’izy ireo ihany koa ireo zanany. Ireo ray aman-dreny izay fehezina taorian’ny nananan’izy ireo zanaka dia afaka ny hofehezina amin’izy ireo ireo zanany. Raha miaina amim-pahamarinana izy ireo dia ho fianakaviana iray mandrakizay.
Sarin’ny Tempolin’i Lisbonne any Pôrtogaly, nataon’i Leslie Nilsson
Asa atao any amin’ny tempoly ho an’ireo zanak’ Andriamanitra rehetra
Manao ny asan’ny tantaram-pianakaviana isika mba hahafantarana momba ireo razambentsika. Avy eo isika dia manatanteraka ny asa atao any amin’ny tempoly isoloana tena azy ireo. Ataontsika ho azy ireo ireo ôrdônansy rehetra izay ilain’ny velona: batisa, fandraisana ho mpikambana, fandraisana ny fisoronana (ho an’ireo lehilahy), sy ny fanafiana masina, ary ny famehezana. Afaka misafidy izy ireo avy eo raha tiany ny hanaiky ireny ôrdônansy ireny. Amin’io fomba io no ahafahan’ireo zanak’ Andriamanitra rehetra misitraka ireo fitahian’ny filazantsara.
Sarina fianakaviana eo anoloan’ny Tempolin’i Philadelphie any Pennsylvanie, nataon’i Cody Bell
Ireo fitahian’ny asa atao any amin’ny tempoly
Raha mitandrina ireo fanekempihavana ataontsika any amin’ny tempoly isika dia ho voatahy sy ho voaro, ary hampatanjahina. Hanana ny herin’ny fisoronana hiaraka amintsika isika. Ho iray mandrakizay ny fianakaviantsika.
Ny tempoly ihany koa dia toerana iray hahazoana fiadanana sy fanambarana. Rehefa manao ny asa atao any amin’ny tempoly isika dia afaka mandray fitarihana ara-panahy sy mahatsapa ny fitiavan’ Andriamanitra.
© 2021 an’ny Intellectual Reserve, Inc. All rights reserved. Natonta tany Etazonia Amerika. Fankatoavana ny tamin’ny teny anglisy: 6/19. Fankatoavana ny fandikana: 6/19. Fandikana ny Monthly Liahona Message, ôktôbra 2021. Malagasy. 17467 654