Te tūru’a i ni’a i te tahua

Hōho’a

cushion

E rave rahi matahiti tō’u haerera’a i te fare o tō’u metua vahine nō te tauturu iāna i roto i tāna mau ’ohipa i te fare. E 80 matahiti tōna ’e e melo ha’apa’o maita’i ’oia nō Te ’Ēkalesia a Iesu Mesia i te Feiā Mo’a i te mau Mahana Hope’a Nei.

’Ua ora na tō’u metua vahine ’ōna ana’e mai te taime ’a fa’aru’e mai ai tō’u metua tāne. Tōna ’oa’oa rahi roa a’e ’o te haerera’a ïa e fārerei i tāna nā tamari’i tāta’itahi e toru, te hōro’ara’a i te taime nō te fa’aea i pīha’i iho ia rātou ’e tāna mau mo’otua, ’e te tunura’a i te mā’a ’o tē ha’amāhanahana i te vārua.

I te mau taime ato’a ’a haere ai au i te fare o tō’u metua vahine nō te tāmā i tōna fare, ma te ha’apāpū ē, e mea nahonaho maita’i te mau mea ato’a, e ’ite noa vau i te hō’ē tūru’a i ni’a i te tahua. Pauroa te taime, e ’ohi au i te reira ’e e tu’u i ni’a i te hō’ē pārahira’a, ma te amuamu iā’u iho i te ha’apa’o ’ore o tō’u metua vahine.

’Ia ho’i fa’ahou ana’e au nō te fārerei ’e nō te tauturu i tō’u metua vahine, e ’ite fa’ahou ā vau i te tūru’a i ni’a i te tahua. ’Aita roa atu vau i parau noa a’e i te hō’ē mea i tō’u metua vahine nō teie nei tūru’a, terā rā, i te hō’ē po’ipo’i ’ua ’ite a’era vau ē, nō te aha te tūru’a i vai noa ai i ni’a i te tahua.

’Ua hina’aro tō’u metua vahine i te hō’ē vāhi marū nō te tūturi ’e nō te pure. E vahine ruhiruhiā ’oia, ’ua arata’i rā tōna fa’aro’o ’āueue ’ore iāna i ni’a i tōna nā turi ’āvae nō te pure i te mau mahana ato’a. ’E pure ’oia nō tāna mau tamari’i ’e te mau mo’otua. ’E pure ’oia nō tōna mau hoa. ’E pure ’oia nō te feiā nava’i ’ore. ’E ’e pure ’oia nō te feiā tāna i here i te mau taime ato’a, ’e, noa atu tōna matahiti pa’ari, ‘ua ’atu’atu maita’i noa ’oia ia rātou.

I teie mahana, ’aita vau e amuamu fa’ahou iā’u iho ’ia ’ite ana’e au i te tūru’a i ni’a i te tahua. I te tahi taime, e tūturi au i ni’a i te vāhi marū nō te pure i te Metua i te ao ra, ma te fa’a’ite i tō’u māuruuru nō te fa’aro’o ’e te hi’ora’a o tō’u metua vahine.