Mau parau tumu nō te aupurura’a

Te haʼafaufaʼaraʼa i te aupururaʼa

Mai te mea tē uiui ra ’outou, e mea faufa’a ānei tā ’outou aupurura’a, ’a feruri na i teie mau mana’o.

Hōho’a

woman hugging a young woman in a wheelchair

E mea ’ōhie ’ia uiui ē, tē fa’atupu ra ānei tā tātou aupurura’a i te hō’ē mea ta’a ’ē, i te taime iho ā rā e fa’aruru tātou i tā tātou iho mau ’arora’a.

I roto i tō’u orara’a nā mua a’e i te pere’o’o tūra’ira’i, mea au roa nā’u ’ia ’ite i te tāpura tāpa’ora’a i’oa a te Sotaiete Tauturu nō te hōro’a i tōna taime. Pinepine au i te pāpa’i i tō’u i’oa nō te tahi ’ohipa tāvinira’a. ’Ua riro te reira ’ei rāve’a fa’a’itera’a i tō’u ineine « ’ia amo te tahi i tā te tahi mau hōpoi’a, » (Mosia 18:8).

E ’ere te hape nā te tāpura i ’ore ai au i tārima fa’ahou. ’Oia mau, ’aita roa atu tā’u e nehenehe e tārima fa’ahou. Nō tō’u huma, e’ita tā’u e nehenehe e tāpe’a i te tāpura i roto i tō’u rima, terā noa a’e pa’i. ’Aita iho ā ïa e ta’ata i tītau iā’u ’ia tāpa’o i tō’u i’oa. Terā rā, ’āuē ïa tō’u hina’aro ’ia nā reira ! E ha’a’ati te tāvinira’a ia tātou i te here o te Atua ’e e fa’atū’ati ia tātou ia vetahi ’ē. ’Ua hina’aro roa vau i taua mana’o tū’atira’a ra.

Nō te mea e tītauhia te tahi ta’ata nō te tauturu i te aupuru iā’u iho nei, ’aita paha ïa tā’u tāvinira’a e faufa’ahia nō te hōpoi’a e tītauhia nō te tauturura’a iā’u nei. ’Ua riro taua tāpura ra ’ei fa’aha’amana’ora’a i te mea tā’u e ’ore fa’ahou e nehenehe e rave—ē ’ite mai nei tō’u tuahine aupuru i tō’u hīa’ai.

’Ua ani mai ’oia iā’u, e aha tā’u e hina’aro e rave nō te tāvini, ’eiaha noa rā te mea tā’u e hina’aro nei ’ia ravehia nō’u. I muri iho, ’ua pāpa’i ’oia i tō’u i’oa i ni’a i te tāpura. ’Ua haere mai ’oia i tō’u fare ’e ’ua tauturu iā’u ’ia hāmani i te mā’a tā’u i parau e fa’aineine au nō vetahi ’ē. ’Aita roa atu ’oia i parau noa a’e ē, ’o vau nei ho’i e tauturuhia nei, e aha pa’i ïa tā’u e tāmata nei i te tauturu ia vetahi ’ē. ’Ua ’oa’oa ’oia i te ’āmuira’a iā’u.

’Ua ’ite a’era vau ē, e mea ho’ona tā’u mau tauto’ora’a. Nā roto i te tauturu a tō’u tuahine aupuru, ’ua ti’a iā’u ’ia rave i te tahi ma’a ’ohipa. E hi’o te ta’ata i teie ’ohipa mai tāna e hina’aro e hi’o, nō’u nei rā, e ’ohipa ta’a ’ē mau ïa. Noa atu ē, ’aita te reira i ha’amaita’i ti’a atu i tō’u ’utuāfare ’e ’aita i fa’aora i tō’u tino, ’ua tauturu rā i te fa’aora i tō’u ’ā’au.

EmRee Pugmire

Utaha, Fenua Marite

Nā roto i tāna tauturu, ’ua hau atu ’outou i te au maita’i

Hōho’a

the Old Testament prophet Enoch and people from the city of Zion

City of Zion Translated [Te ’Oire nō Ziona tei fa’ahuru-’ē-hia], nā Del Parson ; hōho’a nō te hi’o fa’arahi nā Getty Images

E mana’o mātauhia te fē’a’ara’a i tōna au maita’i nō te rave i te ’ohipa a te Fatu. ’Ua tupu ato’a teie huru mana’o i ni’a i te peropheta Enoha. I te fa’auera’a te Fatu iāna ’ia pi’i i te ta’ata ’ia tātarahapa, ’ua pe’ape’a ’oia i te mea ē, « e tamaiti ’āpī ho’i au, ’e ’ua au ’ore mai ho’i te mau ta’ata iā’u ; e ta’ata reo maumau vau » (Mose 6:31).

Terā rā, ’ua fafau mai te Fatu ē, e pārahi ’oia i pīha’i iho ia Enoha ’e e pārahi tōna Vārua i ni’a iāna, ’e « e fa’ati’a vau i tā ’oe ato’a ra mau parau […] nō reira, ’a haere mai na muri ia’u » (Mose 6:34).

’Ua ha’apa’o ’o Enoha i te mea tā te Fatu i fa’aue mai, ’e ’ua riro mai ’oia ’ei fa’aurura’a rahi i ni’a i te nūna’a, e ’ere nō tōna iho mana, nō te « rahi [rā] o te mana o te reo tā te Atua i hōro’a mai iāna ra » (Mose 7:13).

Mau parau tumu e tāpe’a mai

Mai te mea e uiui tō ’outou mana’o ē, e mea faufa’a ānei tā ’outou aupurura’a, ’a feruri na i teie mau parau tumu :

E tauturu te hāro’aro’ara’a i te aupurura’a ’e tāna mau ’ōpuara’a ia tātou ’ia hi’o tano atu ā i tā tātou mau tauto’ora’a.
- Te aupurura’a, ’ua hau atu ïa i te patura’a i te mau tā’amura’a pūai a’e ; nō ni’a rā te reira i te tauturura’a ia vetahi ’ē ’ia ha’apūai i tō rātou tā’amura’a i te Fa’aora.¹
- E ’ere te aupurura’a i te hō’ē noa fa’auera’a ’ohipa ; ’o te orara’a rā i tā tātou mau fafaura’a e tāvini iāna nā roto i te aupurura’a i te tahi ’e te tahi.
- ’Aita te aupurura’a e pe’e nei i te hō’ē fa’anahora’a tei fa’ata’a-ātea-hia. Tē ’ume nei te reira ia tātou ’ia fa’atanotano i te huru o te ’ohipa nei, ’e ’ia ’imi i te fa’aurura’a nō te aupuru mai tā te Fa’aora.
E nehenehe te hāro’aro’ara’a i tō te Atua hi’ora’a i tā tātou aupurura’a e taui i tō tātou hi’ora’a.
- ’Aita te Atua e fāito nei i te aupurura’a i ni’a i te mau fa’ahope’ara’a rarahi ’aore rā te māuruurura’a te ta’ata i tā tātou mau tauto’ora’a (hi’o i te hi’ora’a o Oliver Granger i roto i Te Parau Ha’api’ira’a ’e te mau Parau Fafau 117:12–13).²
- ’Ia maita’i ana’e tō tātou hina’aro, ’e ’ia rave tātou i te tauto’ora’a pāpū, e mea faufa’a tā tātou aupurura’a nōna (hi’o Te Parau Ha’api’ira’a ’e te mau Parau Fafau 4:2, 5).
- ’Ua ineine te Atua i te fa’arahi atu ā i tā tātou tāvinira’a « ha’iha’i ’e te ’ite-’ore-hia »³ (hi’o Te Parau Ha’api’ira’a ’e te mau Parau Fafau 123:17).

E aha tā tātou e nehenehe e rave ?

’Eiaha e ha’ape’ape’a nō ni’a i te mea ’aita ’outou e mana’o ra e nehenehe tā ’outou e rave, e feruri rā nā roto i te pure i te mea tā ’outou e nehenehe e rave. I muri iho, ’a rave. ’Ia ’ohipa ’outou nā roto i te i’oa o te Fatu, e nehenehe tāna e fa’arahi i tā ’outou mau tauto’ora’a ’e e fa’a’ohipa i te reira nō te ha’amaita’i ia ’outou ’e ’ia vetahi ’ē (hi’o 2 Nephi 32:9).