Te mau parau niu o te ’evanelia
Te hi’ara’a e tuha’a ïa nō te ʼōpuara’a a te Atua
Maoti te Hi’ara’a, e haere mai tātou i ni’a i te fenua nei ’e e nehenehe tātou e ho’i i te hō’ē mahana nō te ora i pīha’i iho i tō tātou Metua i te ao ra.
Adam and Eve in the Garden of Eden [Adamu ’e Eva i roto i te ’ō i Edene], nā Robert T. Barrett ; Adam and Eve Cast Out of the Garden [’Ua ti’avaruhia Adamu’e Eva i rāpae i te ’ō], nā Gary L. Kapp, ’eiaha e tāpitihia te nene’ira’a ; Adam and Eve [Adamu ’e Eva], nā Jay Bryant Ward ; The Resurrection [Te ti’afa’ahoura’a], nā Harry Anderson
I roto i te ’ō i Edene, ’ua fa’aue te Atua ia Adamu ’e ia Eva ’eiaha e ’amu i te hotu nō te tumu rā’au nō te ’ite i te maita’i ’e te ’ino. I muri iho ’ua parau ’oia ia rātou, « Tei ia ’oe iho te mā’iti… ’a ha’amana’o ē, ’ua rāhui au i te reira » (Mose 3:17). ’Ua fa’ahema Sātane ia Eva ’ia ’amu i te hotu nō te tumu rā’au. ’Ua parau ’oia iāna : « E riro ’ōrua mai te mau atua te huru, i te ’ite i te maita’i ’e te ’ino. » (Mose 4:11). ’Ua ’amu ’oia i te hotu ’e ’ua hōro’a atu i te reira ia Adamu. ’Ua ti’avaru te Atua ia rāua i rāpae i te ’ō i Edene.
Te Hi’ara’a
I te fa’aru’era’a Adamu ’e ’o Eva i te ’ō i Edene, ’aita fa’ahou rāua i mua i te aro o te Atua. ’Ua parauhia teie fa’ata’a-’ē-ra’a i te Atua te pohe pae vārua. Te aura’a nō te fa’aru’era’a i te ’ō, ’o te rirora’a ïa ’o Adamu ’e ’o Eva ’ei ta’ata tāhuti ’e ’ua nehenehe ia rāua ’ia pohe. Noa atu ē, ’aita fa’ahou ’o Adamu ’e ’o Eva i pīha’i iho i te Atua ’e ’ua riro ’ei ta’ata tāhuti i teienei, ’ua ’oa’oa rāua ’e ’ua ’ī ho’i i te ti’aturi i tō rāua ’itera’a ē, e nehenehe rāua e haere i mua (hi’o Mose 5:10–11). « ’Ua hi’a Adamu ’ia vai te mau ta’ata ; ’e tē vai nei te mau ta’ata ’ia noa’a tō rātou ’oa’oa » (2 Nephi 2:25).
E taime tāmatara’a
’Ia fānau-ana’e-hia tātou, tē ora nei tātou i te hō’ē vāhi ta’a ’ē i te Atua, mai tā Adamu ’e ’o Eva i rave i muri a’e i te Hi’ara’a. Tē fa’ahema nei Satane ia tātou ’ia rāve i te mau mā’itira’a ’ino. Maoti teie mau fa’ahemara’a tātou e tāmatahia ai nō te mā’iti i rotopū i te maita’i ’e te ’ino (hi’o Alama 12:24). I te mau taime ato’a e hara tātou ’e e’ita tātou e tātarahapa, e rahi fa’ahou atu ā tātou i te ātea ’ē i te Metua i te ao ra. ’Ia tātarahapa rā tātou, e ha’afātata atu ā ïa tātou i tō tātou Metua i te ao ra.
Te pohe pae tino
’Ua hāmanihia te fenua nō tātou (hi’o 1 Nephi 17:36). Nā te Hi’ara’a i fa’ati’a ia Adamu ’e ia Eva ’ia fa’atupu i te fa’auera’a a te Atua ’ia fānau i te tamari’i, ’e ’ua ti’a atu ra ia tātou ’ia haere mai i te fenua nei i roto i te hō’ē tino tāhuti. E pohe tō tātou tino ’ia tae i te hō’ē mahana, e tāmau noa rā tō tātou vārua i te ora. E tāhō’ē-fa’ahou-hia tō tātou tino ’e tō tātou vārua ’ia ti’afa’ahou ana’e tātou.
Fa’aorahia e Iesu Mesia
Nā roto i te mana tāra’ehara a Iesu Mesia, e nehenehe tātou e upo’oti’a i ni’a i te pohe pae tino ’e pae vārua. Nō te mea ’ua ti’afa’ahou mai te Mesia, e ti’afa’ahou ïa te mau ta’ata ato’a tei fānauhia i ni’a i teie fenua nō te ora ē a muri noa atu. ’E nō te mea ’ua mamae te Mesia nō tā tātou mau hara, e nehenehe tātou e tātarahapa ’e e fa’a’orehia te hara, ’ia ti’a ho’i ia tātou ’ia ora fa’ahou i pīha’i iho i tō tātou Metua i te ao ra.