“Mayokani Ekangisaka Biso na Nzambe,” Liahona, Sanza ya mibale 2022
Etinda ya Sanza Liahona Sanza ya mibale 2022
Mayokani Ekangisaka Biso na Nzambe
Kosala mpe kobatela mayokani ememaka mapamboli.
Liyokani ezali elaka ya Tata na Lola mpe bana na Ye. Atiaka mibeko mpo na mayokani oyo tosalaka elongo na Ye. Ntango tosali oyo Ye asengi, tozwaka mapamboli ebele. Mpe tozwaka mapamboli kaka na mabele awa te—ntango tosali mpe tobateli mayokani, tokozonga kofanda elongo na Nzambe mpe mabota na biso na lola mokolo moko.
Mayokani mpe Makuli
Tosalaka mayokani na ntango ya makuli songolo. Tosengeli kosala makuli yango mpe kotosa mayokani wana na ntina ete tozonga kofanda elongo na Nzambe. Makuli oyo esalemaka na likoki ya bonganganzambe. Makuli oyo ezali na libatisi mpe nkotisa, kozwaka Bonganganzambe ya Melekisedeke (mpo na mibali), mpe makuli oyo tozwaka na tempelo. Na ntango ya elambo, bandimi ya Eklezia babandelaka bilaka oyo basalaki epai ya Nzambe (tala Malongi mpe Mayokani 20:77, 79).
Mayokani Esungaka Biso Tobika na Boyengebene
Na ntango ya libatisi, tolakaka kolanda Yesu Klisto, kokanisa Ye ntango nyonso, mpe kobatela mitindo (tala Malongi mpe Mayokani 20:37). Nzambe alaki ete Molimo Mosantu akoki kozala na biso ntango nyonso.
Ntango mibali bazwaka bonganganzambe, balakaka kobika na bolongobani na nguya ya Nzambe. Nzambe alaki kopambola bango. (Tala Malongi mpe Mayokani 84:33–40.)
Mayokani Tosalaka na Tempelo
Ntango bandimi ya Eklezia bazwaka dotasio na bango na tempelo, balakaka kobika na bolongobani mpe komikaba na nsango malamu. Balakami nguya kouta na Nzambe (tala Malongi mpe Mayokani 38:32; 109:22).
Na ntango ya bokangisi na tempelo, mobali mpe mwasi babalani mpo na seko mpe balaki kozala na bolongobani epai ya moko mpe mosusu mpe epai ya Nzambe. Nzambe alaki bakoki kozonga epai na Ye mpe kofanda elongo lokola libota mpo na seko. (Tala Malongi mpe Mayokani 132:19–20.)
Tozali Bato ya Liyokani
Baoyo bakomi bandimi ya Eklezia ya Yesu Klisto ya Basantu ba Mikolo mya Nsuka bakomaka bato ya liyokani ya Nzambe. Bazwaka libula ya mapamboli mpe mikumba ya liyokani ya Abalayama (tala Bagalatia 3:27–29). Kozala eteni ya bato ya liyokani ya Nzambe elimboli tosunganaka moko na moko mpo na kopusana epai ya Klisto. Elimboli lisusu tosalaka mpo na kolendisa Eklezia ya Nzambe na mabele. Ntango tobateli mayokani na biso, tokoki kozwa nguya mpe bokasi kouta na Nzambe.
© 2019 na Intellectual Reserve, Inc. Makoki manso mabatelami. Ebetami na Etazini. Bondimami na lokota ya Angele: 6/19. Bondimami ya bobongoli: 6/19. Bobongoli ya Monthly Liahona Message, February 2022. Lingala. 18313 639