“Onikan te Itabaraaraa nakon te Tangira,” Riaona, Maati./Eberi 2022.
Kam Butimwaeaki Nakon te Beeba Ni Kaongora Aei
Onikan te Itabaraaraa nakon te Tangira
Iotebwa mai Aikubita, iroun Michael T. Malm
N taai tabetai ti rinanon te itabaraaraa inanon ara reitaki. Ataakina bwa ti na kanga n onika te itabaraaraa ae urubwai nakon te mataata n te itabaraara bon te bwai ae kakawaki nakon aron maiura. Ma e nage n anne ti bon korakai naba ma ngaia.
Te itabaraaraa ae urubwai e karika namakinan ae e kangaanga totokoana. Te itabaraaraa e baiti butinakona. Te bwai ae ti kona ni karaoia nako iai e bon uarereke. Ti namakina ae akea korakorara ao n taningaa te bwai ae e na riki. Te reitaki ae e uruaki ao te komiunite ae e maenako a tiku n urubekebeke.
Ma ti kona naba n rinanon te mataata n te itabaraaraa, are ti kona iai ni kunea te kainaomataaki man buakakan te itabaraaraa. Ti kona ni karikirakea te motiraoi ao te akoi, kakorakoraa ara reitaki, ao ni katokii kangaanga aika a nene ni matoa aroia. E kona n reke te rau—inanon ara reitaki ao ara komiunite.
Ngkai ngai te tia tei ni karaoan te rau man te itabaraaraa, te bumwaane, ao te karo, I a tia ni kunea bwa ana euangkerio Iesu Kristo e kona n uota nakoira te oota ao te korakora ae e kainnanoaki n onikan te itabaraaraa nakon te tangira.
Inanon te rongorongo aei ko na warekia bwa e kanga Iakobwa, Etau, ao Iotebwa ni kona n raoiakina te itabaraaraa inanon aia utu ao ti na kangaa ni karaoa naba anne inanon mweengara ao ara komiunite (taraa iteraniba 20). Ko na kona naba ni wareka ana rongorongo ae ringa te nano Unimwaane D. Todd Christofferson ae kaineti bwa e kanga te kakaitara ni kaitiakiira ngkana ti rairaki nakon te Uea ibukin buokara (taraa iteraniba 6).
A mwaiti mai ibuakora aika a teimatoa ni maraki n ae korakora ibukin uruakin aia reitaki ni mweengaia ao inanon te aonaaba. Au kangtaninga bwa te rongorongo aei e na anga te kantaninga nakoia naake a namakina ae te raoiakinaki akea manenana, ao bwa e na kakorakoraa te onimaki ae ti aki maroaa, ao ae e kakawaki riki, bwa ti namakina ae ana tangira Iesu Kristo bon te kawai ae karaoa te bitaki tiaki ti nakon nanora ma nanoia naba naake a rinanon te kangaanga n ai arora.
Mai nanou,
Chad Ford
Te burobetia iaon Katean te Rau Imarenaia Aaba, Brigham Young University—Hawaii