“I Rineia bwa N na Ongo Irouna,” Riaona, Maati./Eberi 2022.
Bwanaaia Aika Itiaki ni Boong aika Kaitira: Aine n te Onimaki
I Rineia bwa N na Ongo Irouna
Ngke e taekina te keeke temanna te aine n ana kaoti koaua, I euta matau ao n rangi n ongora.
I bungiaki inanon te Ekaretia, ngaia are I kaea te Moanrinan ao aia waaki ni kakukurei kairake. I kukurei n tain te Moanrinan ibukin taian anene ao reirei.
Ngke ai tebwi tabun au ririki, ao kanga, I a moanna ni bwaka imwiin ae I mwaing nakon te uoote ae boou. I iriirii aia waaki ni kakukurei kairake n angiin te wiiki, ma I bon titiku n akea raraou ao n aki bati ni ira buakon te takakaro. I aki rangi ni kukurei n tain te taromauri n te Tabati, ma I bon roroko n tabetai. I ataia ae I tuai raoi n rangi n rairaki nakon te euangkerio ao ana reirei. Bon akea raoi au koaua irou.
N aron ae e ririki n tain teuana te kaoti koaua, e a rerenako au iango. I aki raoi rangi n ongoraa ngkana a kaotii aia koaua membwa, ma I aki toki n atonga amen ni banen taian koaua. Ngkanne e teirake temanna te titita nakon te tabo n taetae ao ni moana kaotan ana koaua. Ngke e taekina te keeke, I euta matau ao n rangi n ongora.
“I aki toki n tataetae nakon Tamara are i Karawa, ngkana I umuna naba te keeke,” e taku. “I taekina au tataro ae kimototo bwa e na riki te keeke ao ni mwai raoi. I ataia bwa E kaekai ara tataro.”
I aki rangi ni iangoa nanon te kaoti koaua anne ni karokoa e a uruaki ara kaa n aki maeu ngke ti tangiria n nako n te titooa ni karekei amwarake. N te tai anne I uringa ana taeka te titita. Ngaia are, I okira au ruu ni matu ao ni butiia te Atua bwa E na buokiira bwa e na maeu te kaa. I katorobubua ao n tataro. Ngke e moti au tataro, I anaa te kiing ao ni karinna ni kamaeua te kaa. Ao ngkanne e roko kaekaan au tataro—tangin te kaa ae e maeu.
Mai imwiin te kaeka nakon te tataro ae bebete, I bitaki man ae n nang moanna ni bwaka nakon te kawai are e buokai ni karekea au koaua ao n rairaki n ae bwanin nakon te euangkerio. Taekan te anene n te Moanrinan ae mamate nanou iai, “I Namakina Ana Tangira au Tia Kamaiu,” 1 e riki bwa tiaki ti taekan te anene. A riki bwa namakin ake a bon reke irou.
Ngkai I a tatataro ibukin bwai ni kabane. Ao e ngae ngke kaekaan ke taina aki kaoti nakon are I kantaningaia, I tiku n rineia bwa N a ongo Irouna ngkai I uringa ana taeka Nibwaai: “Ma taraia, I tuangkami bwa kam na teimatoa n tataro ao n aki mamaara iai” (2 Nibwaai 32:9).