“Jen Loļo̧k Tampeļ eo,” Liaona, M̧aaj./Eprōļ. 2022.
Ainikien Armej ro Rekwojarjar ilo Raan Ko Āliktata: Kōrā in Tōmak
Jen Loļo̧k Tampeļ eo
Ke ikar jar n̄an jeļā wāween aō maron̄ jipan̄ jinen ļeo pāleeō, ikar ļōmņak kōn tampeļ eo.
Pija in Bogotá Colombia Tampeļ jān Ivan Ortiz Ponce
Ilo iien ajedeed an nan̄inmej in COVID-19, Bogotá Colombia Tampeļ eo ekar kilōk. Kōnke ijjab maron̄ bar deļon̄e ie, ilo jet iien inaaj etetal bajjōk n̄an tampeļ eo, keememejļo̧k jerbal ko ikar kōm̧m̧ani ijeņ āinwōt juon rijerbal ilo tampeļ.
Jinen ļeo pāleeō ekar jino an lukkuun nan̄inmej ejidimkij ālkin juon tōre ālkin an kar jino juon iien COVID-19 quarantine ilo Colombia. Ke ikar jar n̄an jeļā wāween aō maron̄ jipan̄ e, ikar ļōmņak kōn tampeļ eo.
Ke ij ļōmņake tampeļ eo, ikar en̄jake unoojdikdik an Jetōb Kwojarjar bwe in kajjitōk ippān jinen ļeo pāleeō eļan̄n̄e enaaj em̧m̧an ippān loļo̧k e “juon iaan jikin ko raibojooj tata ioon laļ in” ippa.
Ilo juon ainikien em̧ōjņo, ekar uwaak, “Aaet.”
Jej pijaikļo̧k an jino jān m̧weo m̧ōn ilo Medellín, etetal jān m̧weo m̧ō ilo Bogotá, innem tōparļo̧k tampeļ eo. Jej pijaikiļo̧k an deļon̄e im jerbal ilo tampeļ. Jej pijaikiļo̧k aer jijet ippān doon ilo celestial room, kōm̧m̧ane juon jar in kam̧m̧olool n̄an Irooj.
Ālkin wōt, jej akweļap ippān Jemedwōj Ilan̄ bwe jinen ļeo pāleeō, ekkar n̄an Ankilaan, emaron̄ bar bōk ājmour im āliktata maron̄ em̧m̧an an mour ilo ānbwin n̄an bar etal n̄an tampeļ. Ekar juon iien eaorōk, en̄jake eo eaorōk me ej kōkajoorļo̧k im kapilōk e.
Juon iaan bwebwenato ko an Rilo̧mo̧o̧r me ej un̄ūr eō eļap me ekar waļo̧k ilo jikin kweilo̧k eo etan Capernaum. Bwebwenato in ej katakin kōj bwe Irooj emaron̄ kōjeraam̧m̧an im kōmour ro jet kōn jipan̄ jān ro uwaan baam̧le im ro m̧ōttāer.
Ke armej ro ilo Capernaum rekar ekkatak bwe Jisōs ekar pād ilo juon em̧ rejeļā kake, rej bōktok n̄an e juon em̧m̧aan eo me ekar nan̄inmej in akā.
“Im ke re ban kepaak E kōn elap jar eo, rej kapeļļo̧k mōttan kejenwan ikijjien ijo Ej pād ie: im ke emōj aer rupe, rej katolaltak kinien leo e akā ej babu.”
Ke Jisōs ekar lo tōmak eo aer, Ekar bar n̄an em̧m̧aan eo, “Kwōn jerkak, im bōk kiniōm̧, im ilo̧k n̄an m̧weo im̧ōm̧.” (Lale Mark 2:1–11.)
Āinwōt em̧m̧aan eo akā, jinen ļeo pāleeō ekar mour kōn kajoor eo an Rilo̧mo̧o̧r kōn juon kōjeraam̧man an priesthood im kōn tōmak eo an im tōmak eo an baam̧le eo im ro m̧ōttāer.
Ilo iien kein ralikkar, ijeļā jemaron̄ bōk tōl n̄an kōkajoorļo̧k im kapilōk ro rej pād ilo aikuj. Eļan̄n̄e jej oktak n̄an Jemedwōj Ilan̄ im aolep iien keememej E im eo Nejin, jemaron̄ bōk aeņōm̧m̧an, kōjatdikdik, im kōmour.