Yaloqaqa mo Dodoliga Yani

Ena vakayagataki keda na Kalou me da vakayaco veisau kevaka eda na vorata na rere.

iVakatakilakila

rau veivosaki ka matadredredre e rua na turaga

Ni da tamata vakabauta, eda gadreva vakalevu na yaloqaqa ena veigauna oqo, ena gauna sara mada ga ni noda veiqaravi. A lesi o Joni (sa veisautaki na yaca) me veiqaravi vei Pita, e dua na lewenilotu ka se bera vakadua ni tiko ena soqoni ni tabanalevu. A lomaleqataka o Joni na nona torovi Pita tiko, me vaka ni se bera ni sotavi koya ka sega ni kila na nona bula. Ia ni nanuma tiko na ivakasala me “loloma, veiwasei, ka veisureti,” a masulaka o Joni me dusimaki ka qai tuva taumada me rau veitokani yalodina vata kei Pita. A vakayagataka nona gauna me kilai Pita, ena veisiko wasoma, qiri ena talevoni, kei na dua na gade vagauna ni katalau. A tubucake o Joni me kilai Pita vakavinaka, ka sa vakabauta o Pita na nodrau veitokani. Ena gauna e gadreva kina na veivuke, sa matau vua me gole yani vei Joni, ka a marautaka mai.

Ena dua na siga, a vakauqeti o Joni ni rairai sa vakarau tu o Pita ki na veisureti me lesu tale mai ki lotu. Ena dua na nodrau veisiko, a kauta cake mai o koya ena nona vakasama ga. A cegu vakalailai o Pita. “Sa 17 na yabaki oqo noqu se sega tu ni laki lotu,” a kaya o koya. “Ia mo kila, au vakabauta niu na cakava.” Ni sa yaco yani o Pita ki na tabanalevu, a tu e kea o Joni me kidavaki koya ka dabe vata kei koya. Sa vakavinavinaka o Joni ni sa rawa vua me uabaleta na nona rere taumada. Mai na sasaga oqo, erau a rawata ruarua na tagane na veitokani dina ka vakalougatataka na nodrau bula.

Taura na Yaloqaqa Bulabula

iVakatakilakila

O Esiteri e mata ni Tui

O Esiteri e mata ni Tui, mai vei Minerva Teichert

Na italanoa kei Esiteri ena Veiyalayalati Makawa (raica na Esiteri 1–10) e vakavuvulitaka e vuqa na ivakavuvuli ia e rairai kilai vinaka me italanoa ni yaloqaqa. E dua na marama gone ni Jiu o Esiteri ena gauna a digitaki kina me ranadi ka vakaraitaka na yaloqaqa levu ena nona sotava na nona bula me vakabulai ira na nona tamata.

Ena veivakacalai, sa lawakitaki oti kina na tui me solia e dua na lawa me ra vakamatei kece kina na Jiu ena matanitu. A vakasamataka o Esiteri e dua na ituvatuva e gadrevi kina na vakabauta cecere ka sa madigi duadua ga me veisautaka na vakasama ni tui.

Ena nona itovo vakavanua e kea, me lako vua na tui ka sega ni sureti ena rawa ni yaco me vakamatei kina. Ia a cakava ga ena yalo qaqa na nona ituvatuva ka kerei ira na nona tamata me ra lolo vata kei koya (raica na Esiteri 4:16). Mai na nona cakacaka ni yaloqaqa kei na nodra cakacaka eso tale, sa rawa kina vua me vakauqeta na tui me veisautaka na nona lewa. A saumi mai na masu nei Esiteri kei ira na nona tamata.

E rawa ni da rai cake vei Esiteri me ivakaraitaki ni yaloqaqa, ena veiqaravi sara mada ga, ni da biuta vakatikitiki na noda rere me da kila e dua ka vukei ira ena nodra bolebole.

iVakavuvuli me Vakasamataki

Na cava eda rawa ni cakava kevaka eda kunei keda ena taudaku ni noda vanua ni vakacegu ni da veiqaravi?

A masulaka o Joni na veidusimaki ni Kalou. Ena veivuke ni Kalou, sa rawa ni da vorata na rere (raica na Same 34:4).
Eda na masu talega meda vakila na loloma ni Turaga vei ira na tani. “Sa biuta tani na rere na loloma levu sara” (1 Joni 4:18).
Me vakataki Esiteri, e rawa ni da vakayagataka na lolo kei na masumasu me vaqaqacotaka na noda vakabauta meda cakacaka kina (raica na Esiteri 4:3).
E rawa ni da nuitaka ni tiko na kaukauwa ena maroroi ni noda veiyalayalati (raica na Vunau kei na Veiyalayalati 110:9). Ni da bulataka na noda veiyalayalati ena rawa kina vei keda meda ciqoma na Nona veivuke.
E rawa ni da vaqaqacotaka na noda vakabauta ena lolo ka ciqoma e lomada na yalayala ni Turaga vei keda. Vakasamataka na yalayala eso ena veitikina oqo: Vakarua 31:6; Aisea 41:10; 2 Timoci 1:7; Vunau kei na Veiyalayalati 6:33.

Na Cava E Rawa Ni Da Cakava?

Mo ni yaloqaqa mo ni dodoliga yani. Se me da kila e dua se sureti ira me ra cakava e dua na ka e rawa ni vakalougatataka na nodra bula, ena vukei iko na Kalou.