E Dua na iYaya ni Cakacaka ena Liga ni Turaga

Rauta ni dua na yabaki sa oti a taura kina o watiqu, o Alessandra, e dua na itukutuku vakau ena talevoni mai vua e dua na marama ena neitou tabanalevu mai Brazil. Sa sivi oqo e rua na yabaki mai na iotioti ni gauna rau a sota kina. A vola vakaoqo na marama oqo: “Ena dua na siga ca duadua ni noqu bula, au sega ni kila niu sa mai tu oqo ena lotu. Niu sa gole mai, o a raici au. O ni a taura na ligaqu ka kaya vei au meu dabe e yasamu. Au a vosa vei iko. O a vakarorogo ka vakasalataki au.”

Oqo a vaka me dua na veitalanoa rawarawa ena gauna oya. Ia a qai yaco me dua na madigi vei watiqu me dua na iyaya ni cakacaka ena liga ni Turaga. A veiqaravi ki vua na marama lomani oya ka sotava tiko e dua na gauna ni bolebole. A sega ni vakasamataka sara o Alessandra. A vakauqeti ga me vakarorogo ka veivakacegui, ka cakacakataka na veivakauqeti. Ia oqo, ni oti e rua na yabaki vakacaca, a ciqoma o koya na itukutuku vakau ena talevoni veikauyaki oqo mai vua na marama oya, ka vakaraitaka na nona vakavinavinaka.

Mai na veika oqo au sa vulica ni da sega ni gadreva e dua na veikacivi me da iyaya ni cakacaka ena liga ni Turaga. Ena gadrevi ga me tu vei keda na gagadre. “O koya, kevaka dou gadreva mo dou qarava na Kalou dou sa lesi ki na cakacaka.” (Vunau kei na Veiyalayalati 4:3).

Ena Veiyalayalati Makawa eda wilika kina me baleta e dua tale na tamata ka a veiqaravi me iyaya ni cakacaka ena liga ni Kalou. O Esiteri a dua na goneyalewa ka rau a takali na nona itubutubu ni se gone. A qai susugi cake mai vei Moatekai na tavalena.

Ni sa sere oti o Tui Easuerosi maivei Ranadi o Vasitai, a digitaki Esiteri me nona ranadi vou. “A sa ka levu na loloma ni tui vei Esiteri ka lailai vei ira kecega na yalewa tani, a sa vinakati koya ka lomani koya vakalevu cake” (Esiteri 2:17). O Esiteri e Jiu, ia e sega ni kila oqo na tui.

O Emani, e dua na daunivakasala ni tui, a toroi cake na nona itutu me cecere cake vei ira kece na turaga ka tiko vata kei koya (raica na Esiteri 3:1). A sa bukiveretaka “me vakarusai ira na Jiu, ka vakaoti ira kecega, ko ira na gone kei ira na qase” (Esiteri 3:13).

Ni sa kila o Esiteri na bukivere nei Emani, a vakauqeti Esiteri o Moatekai me vosa vua na tui. Ni vakayacora oqo e ririkotaki ni na rawa ni leqa kina, ia a qai vakayaloqaqataki ga ena vosa nei Moatekai. A tomana: “Ia ko cei e kila de ko sa yaco beka mo ranadi e na vuku ni gauna oqo?” (Esiteri 4:14).

“Ia kevaka kau sa mate, au sa mate ga,” a kaya (Esiteri 4:16) ka lako yani vua na tui ka sega ni kacivi. Oqo e dua na voroki ni lawa e totogitaki ga ena mate. Ena vuku ni nona yaloqaqa, a rawa kina vei Esiteri me vakauqeta na tui. Sa yaco kina, me solia na tui e dua na lawa mera vakabulai na Jiu. Ena lawa oqo, sa “kaya ko koya na tui vei ira na Jiu era tiko ena koro kecega me ra soqoni vata, ka veitotaki vata me ra bula” (Esiteri 8:11).

A lomasoli o Esiteri me dua na iyaya ni cakacaka ena liga ni Turaga. Na nona bula ni talairawarawa kei na yalodina a vakarautaki koya. Niu vakasamataka na nona lako ki na loqi cecere ni tui ka sega ni bau sureti, au qoroya na nona yaloqaqa. Au nanuma kina na veisureti nei Peresitedi Russell M. Nelson kivei keda kece sara meda laiva me qaqa tikoga na Kalou ena noda bula.¹ A lomasoli o Esiteri me laiva me qaqa tikoga na Kalou.

Na tavalei Esiteri o Moatekai a dua talega na iyaya ni cakacaka ena liga ni Turaga. A susugi Esiteri vakavinaka sara. A solia vua na veitokoni, yaloqaqa, kei na veivakauqeti. Sa tu kece vei keda na ilesilesi meda cakava, ka sa ka bibi ka gadrevi sara vakatautauvata na ilesilesi yadua.

A biuti Esiteri na Turaga ena nona vale na tui ena dua na inaki—me vakabulai ira na Jiu. Me vaka ga a vakayacora vei Esiteri, sa biuti keda na Turaga meda veivuke me vakayacori taucoko kina na Nona inaki. Ena vuku ni ka oqo, sa dodonu me da sa vakarau tu ka kilikili kaya ni da sotava na madigi e solia o Koya.

Na madigi me da iyaya ni cakacaka ena liga ni Turaga era wavoliti keda tu. Sa noda itavi meda vakavakarau meda cakacakataka. E vakavuqa ni da sega ni kila na gauna se na rawa vakacava me ra yaco mai na veimadigi oqori. Eda gadreva me da bula kilikili kaya ena veitokani ni Yalo Tabu ka tu vei keda na yalo sa gagadre. Ena qai dusimaki keda na Turaga meda cakava na veika e gadreva o Koya meda cakava.

Ena Vunau kei na Veiyalayalati 35:3, a kaya na Turaga vei Sidini Rikitoni, “Au sa raici iko kei na nomu cakacaka. Au sa rogoca na nomu masu, ka qisi iko ki na dua na cakacaka bibi cake.”

E kilai keda na Turaga ka sa tiko na noda dui cakacaka meda cakava. Ena so na gauna ena dua na cakacaka o keda duadua ga eda rawa ni cakava. Na cakacaka oqo e rawa ni tiko ena vuvale ni ra vukea tiko e dua na itubutubu e dua na gonetagane se luvena yalewa e vakaleqai tiko. Se e rawa ni tiko ena loma ni noda itavi ena Lotu. Na kena dina, e rawa ni dua ga na gauna, dua ga na vanua, kei na dua na tamata.

E kaya o Peresitedi Dieter F. Uchtdorf, na iKarua ni Daunivakasala e liu ena Mataveiliutaki Taumada: “Sa solia vei iko na Turaga na nomu ilesilesi me baleta e dua na inaki. Era na tiko beka na tamata kei na yalo o na rawa ni yacova ka tara. E rairai sega beka ni dua e rawa ni cakava ena sala vata ga oya.”²

E kaya o Peresitedi Uchtdorf, “Ni da vakatotomuria na Nona ivakaraitaki uasivi duadua [na iVakabula], sa rawa kina na ligada me Ligana; na matada na Matana; na lomada me Lomana.”³

Me vakataki Esiteri, Moatekai, kei Elder Fetzer, na watiqu, kei na vuqa tale, sa rawa vei keda kece meda iyaya ni cakacaka ena liga ni Turaga.