Weeppān ilo E

Jemedwōj ilan̄ im ad Rilo̧mo̧o̧r, Jisōs Kraist, ewōr ippāer kajoor in lo̧mo̧o̧ren kōj im ukōt kōj. Remaron̄ jipan̄ kōj bwe jen erom āinwot Er.

Jet iiō ko remo̧otļo̧k, juon iaan ro jimaam edik, Aaron, eaar jino wōr an nan̄inmej ko. Eaar jino an em̧ōkm̧ōk, wōr jet mao, im ar jab mejen ājmour. Ālikin jet kakōlkōl ko, ekar alikkar bwe ebōk nan̄inmej in jabwe būtōktōk, juon kūj ijo dri ko rej kabōjrak an kōm̧m̧an red blood cell ko, white blood cell ko, im bōtōktōk ko. Ilo ejelok uno im kein kōmour i, enaaj pen ak apan̄ an bōtōktōk in m̧an jabdewōt kain kūnej, im jekdo̧o̧n kūnej jidrik ko jān wōtlo̧k, itaak, ak nan̄inmej ko remaron̄ kauwatata n̄an mour.

Ium̧win juon tōre, Aaron ar bōk bōtōktōk im bōtōktōk ko liļaki n̄an dāpij e jen kauwatata. Taktō ro raar kōmeļeļeik bwe kōmour eo de eo n̄an nan̄inmej eo enaaj kar juon dri leļo̧k n̄ane, im jekjek eo em̧m̧an tata bwe en mour enaaj kar kōm̧m̧an bwe juon jein ak jatin en rileļo̧k eo. Elan̄e juon iaan ro jein ak jatin renij juon wōt kain dri ippān, im tōprak in leļo̧k eo emaron̄ dāpij an mour. Ļaddik ro emān jatin raar kakōlkōl, im juon, Maxwell, ekar āinwōt jetjet tata.

Men̄e ej juon eo ematch n̄an leļok, ak leļo̧k in dri eo jen bar juon ej lukkun kauwatata wot. Jerbal in ej aikuj bwe cell ko an Aaron make ilo dri eo ekijkij naaj kar jorrāān jān kobaik in chemotherapy im radiation jimor mokta jen bōk stem cell ko jān dri eo an ļeo jatin Maxwell. Innām kōnke kōn immune system eo an Aaron emeļeļe, enaaj kar aikuj in makeļo̧k ilo aujpitōļ eo ium̧we jejjo wiik ko innām ilo m̧weo ium̧win jejjo allōn̄ ko kōn kakien ko rein juon, mo ko, im uno ko.

Kōjatdikdik eo kōn tōprak eo jān leļo̧k in dri eo me āinbwin eo an Aaron eban kar bōk cell ko an rileļo̧k eo im bwe cell ko an Maxwell renij kar kōm̧m̧ani red im white blood cell ko aikuji im platelet ko ilo ānbwinin Aaron. Juon transplant eo ewājepedik ekōm̧m̧ane juon oktak ilo wāween mour. Ekabwilōn̄lōn̄, juon taktō ekar kōmeļeļeik bwe eļan̄n̄e Aaron ekar kōm̧m̧ane juon jorrāān im door būtōktōk ko ilo jikin jorrāān eo, police ro remaron̄ kar kalbuuji ļeo jatin Maxwell. Ej kōnke bōtōktōk in Aaron enaaj kar itok jān cell ko an Maxwell ilo iien leļo̧k eo im pād ie DNA eo an Maxwell, im menin enaaj jekjek eo in to̧o̧n wōt an mour.

An Aaron mour jān būtōktōk in ļeo jatin ekar kwaļo̧k elōn̄ ļōmņak ko kōn bōtōktōk in pinmuur eo an Jisōs Kraist im jelet eo an Pinmuur eo An ilo kōj. Ikōņaan pedped rainin ioon oktak in letok mour eo, n̄an indeeo me ej waļo̧k ilo ad kōtļo̧k an Irooj jerbali kabwilōn̄lōn̄ ko ilo kōj.¹

Ekar ejjeļo̧k an Aaron kajoor ilo e make n̄an anjo̧ ioon nan̄inmej eo. Ānbwinin ekar jab maron̄ kōm̧m̧ani blood cell ko aikuji n̄an dāpij mour eo an. Jekdoon ta eo ar make kōm̧m̧ane, ar jab maron̄ kōmour dri eo an. Ejja āinwōt an Aaron kar jab kemour e make, jejjab maron̄ lo̧mo̧o̧ren kōj make. Jekdo̧o̧n ta ewi kekmo̧o̧j, māletlet, kapeel, ak kajoor eo ad, jejjab maron̄ karreoik kōj make jān jerawiwi ko ad, ukōt ānbwinnid n̄an juon jekjek jab wabanban, ak utiej tata kōn kōj make. Menin emaron̄ itok wot jen Rilo̧o̧mo̧r Jisōs Kraist im Pinmuur eo An indeeo. “Bwe ejjeļo̧k bar juon iaļ ak āt ium̧win lan̄ me armej remaron̄ mour ilo aelōn̄ in kiin̄ eo an Anij.”² Ej būtōktōk in pinmuur eo An me ej karreoik kōj im kōkwojarjar kōj.³

Men̄e Aaron ekar jab maron̄ kemour e make, bwe lōke in di eo en maron̄ jerbal ekar aikuj in m̧ōņōņō in kōm̧mane ta eo taktō ro raar kajjitōk—jekdo̧o̧n men ko repen, im apan̄. Men̄e jejjab maron̄ lo̧mo̧o̧ren kōj make, n̄e jej bōk ankilaan Irooj im kōjparok bujen ko ad, iaļ eo ej peļļo̧k n̄an pinmuur eo ad.⁴ Āinwōt jekjek eo ekabwilōn̄lōn̄ an DNA eo an blood cell ko an Aaron oktak, jemaron̄ kōm̧m̧an bwe būruōd en oktak.⁵ im wōr nememen In ilo paotok ko ad.⁶ im erom juon mennin kōm̧anm̧an ekāāl ilo Kraist.⁷

Alma ekar kakememej armej in Zarahemla ro kōn ebeben eo mokta im rar oktak. Kōnono kōn jemen, Alma ekar kameļeļe bwe “Im ekkar n̄an an tōmak eaar wōr juon oktak ekajoor kōm̧m̧ane ilo būruōn.”⁸ Im Eaar kajitōk, “Kom̧ ar bōk ke oktak in ekajoor ilo būruōmi?”⁹ Ekar jab armej ro me raar ukōt būruwier make. Irooj ekar kōm̧m̧ane lukkuun oktak eo. Alma ekar lukkuun alikkar kōn menin. Eaar ba, “Lo, eaar ukōt burueer”¹⁰ Raar “kōttāik er im likūt aer lōke ilo Anij em̧ool im emour … [im] raar niknik n̄an jem̧ļo̧kin … [im] raar mour.”¹¹ Armej ro raar m̧ōņōņō in kōpeļļo̧k būruier im kōjerbal tōmak, innām Irooj ekar ukōt būruier. Im ekar juon oktak in bōro ekar kajoor! Ļōmņak kōn oktak eo ilo mour ko an em̧m̧aan rein ruo kar etaer Alma m̧okta im ālkin an būruier kar oktak.¹²

Jej ajri ro nejin Anij kōn mejan kajjik aiboojoj. Jemaron̄ oktak n̄an erom āinwōt E im “bōk tarlep in lan̄lōn̄.”¹³ Setan, ilo rejet eo juon, ekōņaan bwe jen en̄taan āinwōt e.¹⁴ Ewōr ippād maron̄ eo n̄an kāālet wōn eo jej ļoore.¹⁵ N̄e jej ļoor Setan, jej leļo̧k n̄an e kajoor.¹⁶ N̄e jej ļoor Anij, E ej letok ad kajoor.

Rilōmōōr eaar katakin bwe jej “aikuj wānōk.”¹⁷ Menin emaron̄ pen kamōdmōde. Elukkuun alikkar aō loe men ko rejabwe ippa make im ij metak ilo aō loe jon̄an etoļo̧k eo ilo n̄a im wanōk. Emaron̄ wōr juon ad kōņaan n̄an ļōmņak jej aikuj kōweppāān kōj make, bōtaab ejjab pidodo. Ļoor aolep elmakot ko ilo aolep bok in jipan̄ ilo laļ in ejjamin naaj bōktok. Ewōr wōt juon iaļ im juon āt me weeppān ej itok. Jej “kōweeppān er kōn Jisōs rijojomar eo an bujen eo ekāāl, eo kar jerbale jān pinmuur eweeppān in kōn kōto̧o̧rļo̧k in bōtōktōkin make.”¹⁸ Ad weeppān ej peidodo wōt kōn jouj an Anij.

Kwomaron̄ ke pijaikļo̧k ewi jon̄an an tōr jān jon̄an an naaj kar n̄an ļaddik eo jibūm Aaron n̄an ļōmņak ej aikuj in kar meļeļe im kōm̧m̧ane aolep kōmadm̧ōd in taktō ko rej kobaļo̧k ippān transplant eo an kōn e make? Jejjab aikuj ļōmņak jej aikuj in kōm̧m̧ane ta eo wōt Rilo̧mo̧o̧r eo emaron̄ kōm̧m̧ane ilo kabulon̄lon̄ in ad weppān.

Ke Moronai ekar kōjem̧ļo̧k ļo̧o̧k eo an, ekar katakin: “Aaet, itok n̄an Kraist, im weeppān ilo e, … im kaarmejjete kom̧ make jān aolep men ko rejjab em̧m̧an, im iakwe Anij kōn aolep am̧ maron̄, ļōmņak im kajoor, innām An jouj enaaj bwe n̄an kom̧, bwe jān An jouj kom̧ maron̄ weeppān ilo Kraist.”¹⁹ Juon mool eo ekaenōm̧m̧an im ekajoor. An jouj ebwe n̄an eō. An jouj ebwe n̄an kwe. An jouj ebwe n̄an aolep ro me “rej jebal in ban.”²⁰

Kōn kōm̧adm̧ōd in taktō ko āinwōt ko an Aaron, iien otemjej ewōr jet men jej jab jeļā ta ko renij waļo̧k. Ilo m̧ool, Aaron ekar aikuji transplant eo kein karuo ke ekar eo kein kajuon ekar wōr idaptōk ko ie. Kam̧m̧oolol, kōn juon oktak in bōro ilo jetōb, jej aikuj ļōmņak eļan̄n̄e enaaj waļo̧k. N̄e jej mour ekkar n̄an Ankilaan, “atartar wōt ioon tōllo̧ke ko an Eo ekajoor n̄an lo̧mo̧o̧ren,”²¹ ewōr 100 bōkjāān m̧ool kōn karreo kōn būtōktōk in Rilo̧mo̧o̧r eo im āliktata weeppān ilo E. E ej “juon Anij in m̧ool, im [jab maron̄] riab.”²²

Ejjeļo̧k kajjitōk bwe jekjek in an oktak ebōk iien im ejjamin naaj dedeļo̧k m̧ae ālkin mour in, bōtaab kallim̧ur eo ej m̧ool. N̄e kūrm̧ool eo an kallim̧ur ko an Anij rej āinwōt ettoļo̧k, jekab de kaorōk kallim̧ur ko, jeļā renaaj kūrm̧ool.²³

Oktak eo ekabwilōn̄lōn̄ ilo ājmour eo an Aaron ekar bōktok eļap lan̄lōn̄ n̄an baam̧le eo am. Pijaikļo̧k lan̄lōn̄ eo eļap ilo lan̄ āinwōt an oktak ko reļļap rej waļo̧k ilo jetōb ko ad.

Jemedwōj Ilan̄ im ad Rilo̧mo̧o̧r Jisōs Kraist, rej iakwe kōj im kar m̧ōņōņō in ukōt kōj im kōweeppān kōj Rej kōņaan bwe jen kōm̧m̧ane menin. Ej io̧lap in jerbal im aiboojoj eo Aer.²⁴ Ij kam̧ool ewōr Aer kajoor n̄an kōm̧m̧ane menin ilo ad itok n̄an Er ilo tōmak. Ilo etan Jisōs Kraist, amen.