Tē tāvini nei te mau ’āpōsetolo ’e te mau peropheta i te feiā mo’a nā te ao ato’a nei

I te mahana nō te Fa’a’orera’a hapa a te ao, i te ’āva’e Tiurai, ’ua hōro’a te peresideni Russell M. Nelson i te hō’ē poro’i nō te fa’aorera’a hapa nā ni’a i te rāve’a sōtiare. “« E ’ere te fa’a’orera’a hapa i te ’ohipa nō te hō’ē noa taime, e ’ohipa tāmau rā ’o tē tītau i te fa’a’oroma’i, te aumihi ’e te hāro’aro’ara’a », tāna i parau. « E ’ere i te mea ’ōhie noa ’ia fa’a’ore i te hapa a te ta’ata i ha’apēpē ia ’oe. E nehenehe e fa’ari’i i te pūai mai roto mai ia Iesu Mesia. »

I roto i te hō’ē purera’a i te 21 nō Mē, ’ua a’o te peresideni Dallin H. Oaks, tauturu hō’ē i roto i te Peresidenira’a Mātāmua, i te feiā ’āpī pa’ari ’ati a’e te ao nei ’ia tāpe’a i te hi’ora’a mure ’ore nō te hāhaere nā roto i teie « mau tau urupu’upu’u mau. »

« Noa atu te huru o tō tātou vaira’a i roto i te raura’a o te mau hāmanira’a a tō tātou Metua i te ao ra, ’ua here ’oia ia tātou pā’āto’a, ’e e pārahira’a nō tātou pā’āto’a i roto i tāna fa’anahora’a maita’i roa a’e nō te ’oa’oa », ’ua parau te peresideni Oaks. « E fa’a’ite tātou i tō tātou here nōna nā roto i te ha’apa’ora’a i tāna mau fa’auera’a, tei roto ato’a ïa te here nō tāna mau tamari’i. »

’Ua fa’aitoito te peresideni Henry B. Eyring, tauturu piti i roto i te Peresidenira’a Mātāmua, i te feiā mo’a tei tae mai i te ha’amo’ara’a o te hiero nō Saratoga Springs (Utah, Marite), i te 13 nō ’Ātete, ’ia pāhono ma te fa’aro’o ’e te ito rahi i teie fare ’āpī a te Fatu.

’Ua hōro’ahia i te mau melo o te ’Ēkālesia « teie hiero ’ei tāpa’o nō te ti’aturi o te Fatu […] ’e tōna ti’aturira’a ē e pāhono mai [rātou] ma te fa’aro’o rahi a’e ’e ma te ito rahi a’e », ’ua parau te peresideni Eyring. « ’O teie hiero te vāhi e tītau pinepine ai ’outou i te mau mana o te mau fafaura’a o te hiero. ’Ua ’ite ’oia i tō ’outou ’ā’au. ’Ua ’ite ’oia i tō ’outou hina’aro ’ia fa’aitoitohia ’e ’ia riro mai ’ei ta’ata parauti’a a’e—mai tā te ao e rahi noa atu ra i te mārō ’e i te hi’a. »

’Ia paraparau te mau melo nō ni’a i te poro’i nō te Fa’aho’i-fa’ahou-ra’a, ’e ’ia fa’a’ite rātou i te reira, e putapū te ta’ata i te parau mau o tā rātou mau parau, ’ua parau te peresideni M. Russell Ballard, ti’a peresideni nō te pupu nō te Tino ’Ahuru Ma Piti ’āpōsetolo. « Te ’ohipa fa’ahiahia roa a’e o te tua’ā’ai o te ao, ’ua tupu ïa i roto i te Uru rā’au mo’a i te matahiti 1820 », ’ua parau ’oia. « ʼUa vētea te mau raʼi. »

I tōna paraparaura’a i te mau melo ’e te mau misiōnare i Toronto (Ontario), i te ’āva’e ’Ēperēra, ’ua hōro’a te peresideni Ballard i tōna ’itera’a pāpū nō te pi’ira’a peropheta o Iosepha Semita. « Pāpū roa ē e ’ohipa tei ō hōhonu i roto iāna—mai tōna upo’o i tōna ’āvae—i te fa’aro’ora’a ’oia i tō tātou Metua i te ao ra i te pi’ira’a i tōna i’oa : ‘E Iosepha, ’o tā’u Tamaiti here teie. ’A fa’aro’o iāna !’ (hi’o Iosepha Semita—’Ā’amu 1:17]. ’O tā tātou ïa poro’i », ’ua parau ’oia i te mau misiōnare.

I te ’āva’e ’Ēperēra ra, ’ua tere atu ’o Elder Dieter F. Uchtdorf i Farāni, i ’Aiphiti ’e i ’Īserā’ela. E purera’a ’ōro’a tāna i haere i ’Aiphiti, ’ua paraparau ’oia i te mau pīahi nō te pū Brigham Young University Jerusalem Center, ’e ’ua haere e māta’ita’i i te mau vāhi mo’a.

« E mana’o ’oa’oa e’ita e nehenehe parau, tā te Fatu i hōro’a mai, i te ti’ara’a ’ei pipi nāna i teie nei tau », ’ua parau ’oia. « E mea pāpū roa, e tītauhia ia tātou pā’āto’a ’ia ti’a ’ei pipi, ’e tītauhia ’ia ora mai te au i te mau fafaura’a tā tātou i rave.

« Te ti’ara’a rā i’ō nei ’e te hōro’ara’a i tō’u ’itera’a pāpū ’ei pipi, mai tā te mau ’āpōsetolo nō tahito ra i rave, e mea māhanahana ïa nō te ’ā’au, ’e e mea fa’ateitei te reira iā’u i te mau ao māere mau. ’E ma te ’ā’au ha’eha’a, tē mana’o ra vau ē, tē ti’aturi nei te Fatu iā’u nō te riro ’ei ’ite nōna ’e nō tōna i’oa. ’Auē ïa ’oa’oa te hāhaerera’a i te mau vāhi tā te mau hoa ’āpōsetolo i ora ana ’e i hāhaere na. »

’Ua ha’amo’a ’o Elder David A. Bednar i te fare o Iosepha ’e Emma Semita, tei tātā’i-’āpī-hia i Kirtland, Ohio, i te 26 nō ’Ātete. ’Ua parau ’o Elder Bednar i te hō’ē pupu ta’ata, fātata e 300 ta’ata, ’e tae noa atu te feiā teitei ’e te mau ti’a ha’apa’ora’a fa’aro’o ē : « ’Ua hau atu teie fare i te fare nō te ’ā’amu o te ’Ēkālesia. E nohora’a mau teie fare nō Iosepha ’e nō Emma Semita—’o te vāhi rāua i ora maoro roa a’e hou te pohera’a o Iosepha. »

’Ua paraparau Elder Quentin L. Cook i te ’āmuira’a tāmatahiti a te fare ha’api’ira’a tuatoru Brigham Young University, i te ’āva’e nō ’Ātete. ’Ua fa’ahiti ’oia i te parau a te ’aivāna’a nō ni’a i te ha’apa’arira’a ferurira’a, ’e ’ua parau ē, maoti te tāvinira’a i te hō’ē misiōni e fāna’o ai te taure’are’a i te ’ohipa ha’apa’arira’a nō te ha’api’ira’a, e fa’aineinera’a ho’i nō te ha’api’ira’a teitei.

Hau i te piti i ni’a i te toru o te mau pīahi nō BYU tei tāvini i te hō’ē misiōni, ’ua parau Elder Cook. « Nō te tahi tau ono ’āva’e, ’ua hau ïa i te 21 000 misiōnare tei ho’i mai nā te misiōni. ’A feruri na i te pūai tā teie mau pīahi nō BYU i ta’ita’i nā te ao ato’a nei. I teienei, ’a feruri i te huru tā rātou tau misiōni e ha’apūai nei i te vaira’a o te ha’api’ira’a i roto i teie fare ha’api’ira’a. »

I roto i tōna tere i Niutirani ’e i Auterāria, i te ’āva’e Mē ra, ’ua tītau manihini Elder D. Todd Christofferson i te feiā mo’a i Niutirani ’ia fa’aineine nō te ha’amo’ara’a o te hiero nō Auckland i te matahiti 2024, nā roto i te rirora’a ’ei ta’ata mo’a a’e ’e te rahi atu ā mai te Mesia te huru.

’Ua tītau manihini ’oia ia rātou ’ia ui ia rātou iho : « E aha tā’u e nehenehe e rave nō te riro ’ei ta’ata mo’a a’e, ’ei pūpūra’a maita’i a’e iā’u iho nei ’e ’ei hōro’a maita’i a’e i te Fatu i terā mahana nō te ha’amo’ara’a ? »

’Ua fa’a’ite pāpū ’o Elder Neil L. Andersen nō Iesu Mesia i tonora’ahia ’oia i ’Ātia i te ’āva’e Tetepa. « Te mau mea tā’u i rātere ’ei ’āpōsetolo nā te Fatu, ’ua hōro’a mai ïa i te ’itera’a ē, ’o Iesu te Mesia ’e tē arata’i nei ’oia i tāna ’ohipa i ni’a i te fenua nei nā roto i tāna peropheta ’e tāna mau ’āpōsetolo », tāna i parau. ’Ua tere atu Elder Andersen i te ārea nō ’Ātia Apato’erau a te ’Ēkālesia nō te fārerei ’e nō te tāvini i te feiā mo’a nō Kōrea, nō Monetōria ’e nō te fenua Tāpōnē.

I te 22 nō ’Ēperēra, ’ua fārerei Elder Ronald A. Rasband i te mono peresideni nō ’Āfirita Apato’a, ’o Paul Mashatile, i raro noa mai i te peresideni nō ’Āfirita Apato’a. ’O te taime mātāmua ïa te hō’ē ta’ata fa’atere o te ’Ēkālesia i fārerei ai i te hō’ē ti’a nō te fa’aterera’a hau nō ’Āfirita Apato’a.

’Ua paraparau nā feiā fa’atere nō ni’a i te mau rāve’a tā te ’Ēkālesia i tauturu i te tāmarūra’a i te māuiui o te mau ta’ata ’e i ha’afaufa’a i te ta’ata nō ’Āfirita Apato’a, ’ua ra’ehia te 240 mirioni moni nō reira (hau i te 13 mirioni tārā marite) tauturura’a mai te matahiti 2018 mai ā. E moni tauturu nō te mau ’ati rarahi ē tae noa atu te tauturu nō te mau ’ōpuara’a fa’afāna’o i te ’ohipa i te feiā ’āpī, ’e te mau fa’anahora’a nō te fa’a’apu i te fare ’e te mau āraira’a hāmani-’ino-ra’a nō ni’a i te parau nō te hete.

’Ua parau Elder Rasband ē, maita’i ē ’ua ’itehia i teie mau tauto’ora’a ē, « tei ’ō nei te ’Ēkālesia nō te hō’ē tau roa. Tē rave nei tātou i te reira nō te pe’e i nā fa’auera’a rahi e piti a te Fatu : here i te Atua ’e here i tō tātou ta’ata tupu. »

I roto i te hō’ē tere i te ’āva’e Tetepa i ’Itirane, ’Etotia ’e Peretāne, ’ua tūra’i Elder Gary E. Stevenson i te parau nō te tītaura’a nō te feiā mo’a ’ia « hō’ē ā tō rātou ’ā’au » (Mose 7:18) ma te « orara’a fa’atumuhia i ni’a ia Iesu Mesia », ma te ravera’a i te mau mea ato’a ’ia pe’e iāna. ’Āpe’ehia e tāna vahine, ’o Lesa, ’ua tere Elder atu Stevenson i Reykjavik, i ’Itirane, i te 7 nō Tetepa, hou ’a reva atu ai i Edinburgh, i ’Etotia ’e i Northampton, i Peretāne, i te 9–10 nō Tetepa.

I roto i te hō’ē purera’a i Marriott Center i te hepetoma nō te ha’api’ira’a a te fare ha’api’ira’a tuatoru Brigham Young University, i te 22 nō ’Ātete, ’ua hōro’a Elder Dale G. Renlund i te hō’ē a’ora’a hōhonu nō ni’a i te huru te hi’o-noa-ra’a, te ferurira’a ’e te fa’aro’o e ’ohipa ’āmui nō te fa’a’ōhie i te heheura’a. Mai te peu e fa’ata’ahia rātou, e’ita e nehenehe e tūru’i i ni’a i te hi’o-noa-ra’a, te ferurira’a ’e te fa’aro’o, ’ua ha’api’i Elder Renlund. E ti’a i teie ’oa’oa ’ia ’ohipa ’āmui.

« ‘’O te fa’aro’o ’aore e ’ohipa’ [Iakobo 2:20] e’ita te reira e pūai mai ’o ’ōna ana’e. E tupu noa te fa’aro’o i te rahi nā roto i te hi’o-noa-ra’a ’e te ferurira’a, ’āpitihia i te tahi atu ’ohipa pae vārua. Hau atu, pinepine te hi’o-noa-ra’a, te ferurira’a ’e te fa’aro’o i te tītauhia, e ’ere nō te fa’ari’i noa i te heheura’a ta’ata hō’ē, nō te māramarama ato’a rā i terā heheura’a. »

I te 15 nō Tiunu, ’ua fārerei Elder Gerrit W. Gong i tōna Teitei ra ia Sheik Osman Nuhu Sharubutu, te Fa’atere pure mahometa rahi ’e te ’Īriti ture mahometa rahi nō te fenua o te Rēpūpirīta nō Kana. ’Ua tupu te fārereira’a i te nohora’a o te ’Īriti ture mahometa rahi i Accra.

’Ua fa’a’ite Elder Gong i te here a Te ’Ēkālesia a Iesu Mesia i te Feiā Mo’a i te mau Mahana Hope’a nei nō tō tātou nā metua mātāmua, ’o Adamu ’e Eva, mai te mau mahometa ato’a : « Mātou ato’a nei, tē ti’aturi nei mātou ē, nō roto mai tātou i taua nā metua ra, e ’ia ora tātou ma te au ’ei ’utuāfare e ti’a ai. » ’Ua fa’a’ite Elder Gong ē, tē arata’ihia nei tātou e te hō’ē peropheta nā te Atua, te peresideni Russell M. Nelson, ’e tāna mau ha’api’ira’a mai tā te Fa’atere pure ato’a ïa. « Tē ha’api’i mai nei tō tātou peropheta ’ia vaiiho i te Atua ’ia upo’oti’a, tē ha’api’i nei ’oia ’ei feiā fa’atupu hau tātou pā’āto’a, tē ha’api’i nei ’oia ’ei tauturu tātou i te feiā ’āpī ’ia noa’a te fāito ha’api’ira’a ’e te ha’api’ipi’ira’a, ’ia manuia rātou i roto i te orara’a, ’e tē ha’api’i nei ’oia ’ia ha’afaufa’a i te mau vahine ’e tō tātou u’i ’āpī. E mau parau teie tā’u i fa’aro’o ia ’oe i te paraura’a i teie mahana. »

’Ua haere Elder Ulisses Soares i te hō’ē tere 10 mahana i Tīreni, i Urutue ’e i Rāparata i te ’āva’e nō Tiunu. I Rāparata, ’ua hōro’a ’oia i te hō’ē a’ora’a i te hō’ē ’āmuira’a fa’aro’o, e uiuira’a mana’o ato’a i mua i te hō’ē pāpa’i ve’a rāparata, ’e ’ua haere ato’a e aupuru i te mau melo o te ’Ēkālesia.

« E ha’amata te hau nā roto i te fa’aturara’a i te ta’a-’ē-ra’a o te ta’ata tāta’itahi », ’ua parau Elder Soares i te feiā i putuputu mai nō te fa’anahora’a o te ao World Congress of Interreligious and Intercultural Dialogue i Buenos Aires. « Te parau nō te tura ta’ata, e mea ta’a ’ē mai terā ta’ere i terā ta’ere, e pou rā te reira i roto i te hō’ē ao pe’e haere noa ’e te tāuiui. E fa’afāito te mau ti’ara’a mana o te ta’ata i te ’aifāito ’ore nō te fāna’ora’a i te maita’i ta’a ’ē, te tao’a rahi ’e te rāve’a au. ’E e mea tano ’ia fa’aturahia taua mau ti’ara’a mana ra i te mau vāhi ato’a. »