Elder Alexander Dushku

’Ua tomo mai nā metua o Elder Alexander Dushku i roto i te ’Ēkālesia i Boston, i Massachusetts (Marite), i muri iho i tō rāua haerera’a i te Fa’a’ite’itera’a rahi a te ao i New York City, i te matahiti 1964. ’Ua putapū te vārua o tōna metua tāne i te fa’aro’ora’a ’oia nō ni’a i te ’evanelia i roto i te hō’ē piha fa’a’ite’itera’a turuhia e te ’Ēkālesia, ’e ani atu ra i te mau misiōnare ’ia ha’api’i iāna, ’e terā vahine tei riro mai ’ei vahine nāna.

E mea ’āpī tōna nā metua i roto i te ’Ēkālesia i te fānaura’ahia ’oia, ’ua parau rā Elder Dushku ē, ’ua ’ite noa ana ’oia ē e tāvini ’oia i te hō’ē misiōni.

« I te ravera’a vau i tā’u misiōni tō’u ha’amatara’a i te māramarama maita’i i te hanahana o te ’ohipa misiōnare, ’e te pūai o te reira », ’ua parau Elder Dushku, ’oia tei tāvini i roto i te misiōni nō Lisbon (Pōtītī), mai te matahiti 1986 ē 1988. « ’Ua ’ara’ara hope roa tō’u mata i te bāsileia o te Atua, ’e tōna aura’a. »

Tē ti’aturi nei Elder Dushku ē, e fāito pūai rahi tō te mau melo o te ’Ēkālesia ’ia fa’atupu i te ’ohipa ta’a ’ē i roto i te ao nei.

« Noa atu tō tātou nūmera iti, e mea fa’ahiahia rā ’e te mana rahi », ’ua parau ’oia. « Haere ’āpipiti tātou e te Mesia, te rima ’e te rima. ’Ei reira hāhaere tātou nā muri i te tahi ’e te tahi. ’O tātou nei tē riro mai ’ei rima ’e ’ei reo nō te Fatu i te fa’aitoitora’a ’e i te ha’apūaira’a ia vetahi ’ē. »

’Ua fānauhia Alexander Dushku i te 17 nō Novema 1966, nā Nicholas ’e Donna Lee Dushku i Fairfield, i California (Marite). ’Ua fa’aipoipo Elder Dushku ia Jennifer Burnham i te matahiti 1988 i te hiero nō Roto Miti. E va’u tamari’i tā rāua, ’e e iva mo’otua.

E parau tū’ite ’aravihi tuatoru tei noa’a ia Elder Dushku, i te pae nō te fa’arava’ira’a faufa’a, i te fare ha’api’ira’a tuatoru Brigham Young University, i te matahiti 1990 ’Ua noa’a iāna te hō’ē parau tū’ite tōro’a nō te ture i te fare ha’api’ira’a ture J. Reuben Clark nō BYU, i te matahiti 1993. ’Ua rave ’oia i te ’ohipa nō te hō’ē taiete ha’apa’o ture nō te maita’i o te huira’atira, ’e ’ua riro ato’a ’ei pāpa’i parau nō te tiripuna horora’a o te hātua hitu, nā mua atu i tāna ’ohipa nei nō te taiete ha’apa’o ture Kirton McConkie i Salt Lake City, i reira ’oia i te rōtahira’a i ni’a i Ha’amonora’a mātāmua nō te papa ture Marite ’e te ti’amāra’a i te pae fa’aro’o.

Tē tāvini ra Elder Dushku ’ei peresideni titi i te pi’ira’ahia ’oia. ’Ua tāvini ato’a ’oia ’ei ’episekōpo, ’ei melo ’āpo’ora’a teitei, ’ei tauturu ’episekōpo, ’ei peresideni pupu peresibutero.