“ʻEletā Alexander Dushku,” Liahona, Nōvema 2023.
ʻEletā Alexander Dushku
Fitungofulu Taki Māʻolunga
Naʻe kau ʻa e ongomātuʻa ʻa ʻEletā ʻAlekisānita Tusikuú ki he Siasí ʻi Positoni, Masasūseti, USA, hili ʻena ʻaʻahi ki he Worldʻs Fair ʻi Niu ʻIoke Siti ʻi he 1964. Naʻe ongo fakalaumālie ki heʻene tangataʻeikí ʻa e meʻa naʻá ne ako fekauʻaki mo e ongoongoleleí ʻi ha fale ʻoku fakapaʻanga ʻe he Siasí, pea naʻá ne fakaafeʻi ʻa e kau faifekaú ke akoʻi ia mo hono kaumeʻa ʻokú na teu malí.
Naʻe foʻou ʻene ongomātuʻá ki he Siasí ʻi he taimi naʻe fāʻeleʻi mai ai iá, ka naʻe pehē ʻe ʻEletā Tusikū naʻá ne ʻiloʻi maʻu pē te ne ʻalu ʻo ngāue fakafaifekau.
Naʻe pehē ʻe ʻEletā Tusikū, ʻa ia naʻe ngāue ʻi he Misiona Portugal Lisbon mei he 1986 ki he 1988, “Naʻe toki mahino moʻoni pē kiate au ʻa e nāunau ʻo e ngāue fakafaifekaú mo e tuʻunga mālohi ʻe lava ʻo aʻusiá ʻi heʻeku ngāue fakafaifekaú.” “Naʻe fakaʻā kakato ai hoku matá ki he puleʻanga ʻo e ʻOtuá pea mo hono ʻuhingá.”
ʻOku tui ʻa ʻEletā Tusikū ʻoku ʻi ai ha ivi lahi ʻo e mēmipasipi ʻi he Siasí ke fai ha liliu ʻi he māmaní.
Naʻá ne pehē, “Neongo ʻe ngali siʻisiʻi hotau tokolahí, ka ʻoku ʻuhingamālie mo mālohi.” “ʻOku tau ʻaʻeva fakataha mo Kalaisi. Pea ʻoku tau ʻaʻeva fakataha leva. ʻOku tau hoko ko e toʻukupu mo e leʻo ʻo e ʻEikí ʻi hono hiki hake mo fakamālohia ʻa e niʻihi kehé.”
Naʻe fāʻeleʻi ʻa ʻAlekisānita Tusikū ʻi he ʻaho 17 ʻo Nōvema 1966, kia Nikolasi mo Tana Lī Tusikū ʻi Feafila, Kalefōnia, USA. Naʻe mali ʻa ʻEletā Tusikū mo Senifā Pēnami ʻi he 1988 ʻi he Temipale Salt Lake. ʻOku ʻi ai haʻana fānau ʻe toko valu mo e makapuna ʻe toko hiva.
Naʻe maʻu ʻe ʻEletā Tusikū ha mataʻitohi BA ʻi he ʻekonōmiká mei he ʻUnivēsiti Pilikihami ʻIongí ʻi he 1990. Naʻá ne maʻu hono mataʻitohi toketā laó mei he ʻApiako Lao ʻo BYU J. Reuben Clark ʻi he 1993. Naʻá ne ngāue ki ha kautaha lao fakafonua ki he mahuʻingaʻia ʻa e kakaí pea kalake ʻi he Fakamaauʻanga Tangi ʻo ʻAmeliká ki he Seventh Circuit kimuʻa ʻi heʻene ngāue fakamuimuitaha mo e kautaha lao Kirton McConkie ʻi Sōleki Sití, ʻa ia naʻá ne tokanga taha ai ki he ʻUluaki Fakaleleiʻi ʻo e Konisitūtone ʻo e ʻIunaiteti Siteití mo e tauʻatāina fakalotú.
Naʻe hoko ʻa ʻEletā Tusikū ko ha palesiteni fakasiteiki ʻi he taimi naʻe uiuiʻi ai iá. Kuó ne hoko foki ko ha pīsope, alēleaʻanga māʻolunga, tokoni ʻi he kau pīsopelikí, mo e palesiteni ʻo e kōlomu ʻo e kaumātuʻá.