Digital Lamang: Mga Young Adult
Ang Family History Nakatabang Kanako nga Makakaplag og Mas Buhong nga Pagbati nga Nahisakop
Nakakaplag ko og mas lawom nga mga koneksiyon pinaagi sa mga milagro sa akong buhat sa family history.
Nahinumdoman nako ang akong inahan nga nagsaysay sa istorya sa kahimtang sa iyang pamilya kaniadto didto sa Mexico. Siya misulti kanamo kon sa unsang paagi ang yuta nga kabilin sa iyang amahan gikawat sa usa ka paryente ug nga ang iyang amahan wala gayod nakaila sa iyang kaugalingon nga lolo. Ug ang istorya kanunayng matapos pinaagi sa masulub-on nga asoy sa usa ka daotang grupo nga miabot ug miugdaw sa balay sa iyang pamilya ug sa tanan nga anaa sa sulod niini—lakip ang ilang mga rekord sa family history.
Nagtuo ko nga ang tanan sa among genealogical nga impormasyon sa habig sa akong inahan nawala na gayod.
Matag higayon nga akong ablihan ang FamilySearch, makabalik lang ko og pipila ka henerasyon sa iyang habig. Apan tungod sa makugihon nga buhat sa family history, among masubay ang linya sa akong amahan kutob gani sa 300 BC. Ang kalainan makapahingangha! Apan nagtuo ko nga wala na koy buhat nga mahimo, mao nga wala koy gibuhat sa among family tree sulod sa 10 ka tuig. Ang akong mga katigulangan ingon og sama sa nakalimtan nga panumdoman nga dili na kinahanglan bisitahon pag-usab.
Apan akong nakat-onan nga adunay gamhanan nga mga panalangin nga moabot gikan sa pag-ila-ila sa atong mga katigulangan.
Pagkaplag og Pagkanahisakop—ug Pagkaayo
Ganahan ko sa unsay gisulti ni Elder Gerrit W. Gong sa Korum sa Napulog Duha ka Apostoles mahitungod sa paghimo sa buhat sa family history:
“Kon kita mamatay, kita anaa gihapon. …
“Dakong buhi, ang atong mga katigulangan angayan lang nga hinumdoman. Kita mohinumdom sa atong kabilin pinaagi sa pagsulti sa mga kasaysayan, mga rekord sa clan ug mga istorya sa pamilya, mga lubong o mga lugar nga handomanan, mga kasaulogan nga gilitratohan, mga pagkaon, o mga butang nga makapahinumdom kanato sa atong mga minahal.”1
Kini nga pahinumdom mao ang nag-unang rason kon nganong midesisyon ko sa pagsulay sa pagpangita pa og dugang nga impormasyon sa akong mga katigulangan. Dili makadaot ang pagsulay, dili ba? Nakamatngon gani ko nga nakabaton og mainiton nga pagbati sa akong kasingkasing nga miaghat kanako sa pagsusi sa usa ka piho nga linya sa pamilya. (Naamgohan na nako karon nga kadto ang Espiritu, klaro lang.)
Matag higayon nga akong gisunod kini nga mga pag-aghat, makaplagan dayon nako ang usa ka katigulangan kansang mga ordinansa gikinahanglang makompleto diha sa templo. Ug sa dihang nagpadayon ko sa pagpangita kanila, gibati nako ang akong kasuod sa akong mga katigulangan nga nagsugod sa paglambo. Sa kalit akong naamgohan kon unsa sila katinuod ug unsa katinuod ang among koneksiyon. Samtang gibuhat nako ang akong family history, gibati nako nga ingon og ang akong mga katigulangan anaa diha uban kanako, nagtabang kanako nga makahimo og pag-uswag.
Aduna lang akoy gisulti ug limitado nga sinulat nga mga kasaysayan sa pamilya sa akong inahan aron makapadayon. Apan tungod kay “pinaagi sa gagmay ug yano nga mga butang ang mga dagko nga butang ipahinabo” (tan-awa sa Alma 37:6), kana nga gamay nga impormasyon mao ang akong gikinahanglan aron makadapit og milagro alang sa akong pamilya.
Samtang hinay-hinay kong midugang ngadto sa family tree sa akong inahan, nakadawat ko og usa ka mensahe gikan sa usa ka tawo sa FamilySearch nga wala nako mailhi. Usa ka ngalan sa habig sa akong inahan nga akong gipadala ngadto sa templo gireserba niini nga tawo, ug nangayo siya og tabang kanako sa pagpangita og dugang nga impormasyon mahitungod sa ilang pamilya.
Ang mga ngalan sa templo mareserba lamang pinaagi sa mga kaliwat niana nga ngalan, buot pasabot paryente ko niini nga tawo nga nagpadala og mensahe kanako. Nahibulong ko! Ang akong pamilya kanunayng nagtuo nga kami lamang ang mga miyembro sa Simbahan sa habig sa akong inahan ug nga walay bisan kinsa gikan sa iyang habig ang nagpuyo sa USA. Apan nasayop kami.
Kini nga tawo usa diay ka layo nga ig-agaw—ang ilang pamilya milalin ngadto sa Estados Unidos hapit mga 40 ka tuig sa wala pa milalin ang akong inahan ug sila aktibo nga mga miyembro sa Ang Simbahan ni Jesukristo sa mga Santos sa Ulahing mga Adlaw. Pinaagi sa unsay mahulagway lamang isip usa ka milagro, gikontak ko nila sa dihang mibisita sila sa akong estado, ug kami adunay kahigayonan sa paghimamat sa usag usa.
Nakahilak kami sa dihang nagkita na gayod kami sa kataposan. Samtang gipakigbahin namo ang among mga istorya, naamgohan namo nga kami adunay daghang pagkapareho kaysa among gituohan. Adunay butang mahitungod sa pagkaplag sa dugay nang nawala nga mga sakop sa pamilya nga makapabati sa akong kasingkasing og gugma—usa ka gugma nga adunay gahom sa pag-ayo sa pag-inusara ug sa pagkawalay kadasig ug nagpahinumdom kanako sa akong balaanon nga pagkatawo ug mahangtoron nga mga koneksiyon.
Ang Importansiya sa mga Istorya sa Atong mga Katigulangan
Mibati gayod ako og niana nga hingpit nga kalipay pinaagi niini nga buhat. Sama sa gisulti ni Elder D. Todd Christofferson, “Ang bisan unsang sakripisyo nga atong gihimo diha sa kawsa sa Ginoo makatabang sa pagkompirmar sa atong dapit uban Kaniya kinsa mihatag sa Iyang Kinabuhi og usa ka pagtubos alang sa kadaghanan.”2
Ang mga panalangin nga anaa alang kanato kon kita mohimo sa buhat sa family history “makatingala usab kaayo kini … tungod sa gilapdon, pagkapiho, ug sa sangpotanan sa mortalidad,”3 sama sa gipakigbahin ni Elder Dale G. Renlund sa Korum sa Napulog Duha ka Apostoles. Ang Ginoo mipanalangin sa akong pamilya og mga paryente kinsa makatabang kanamo nga mobati nga mas duol og gamay sa panimalay ug mohupay sa pipila ka pag-inusara nga among gibati.
Nagtuo ko nga kini nga matang sa milagro posible nga masinati alang sa tanan kon ilang sulayan ang family history.