“Nasayod Ko nga Gipanalipdan Ko,” Liahona, Mar. 2024.
Mga Tingog sa mga Santos sa Ulahing mga Adlaw
Nasayod Ko nga Gipanalipdan Ko
Usa ka gubat ang miulbo sa gawas, apan samtang nagbasa ko sa Basahon ni Mormon, mibati ko og kalinaw ug wala nahadlok.
Paghulagway pinaagi ni Alex Nabaum
Niadtong 1992, ang Yugoslavian nga gubat miulbo. Ang among lungsod sa Mostar gibombahan kada adlaw. Gisuspenso ang tanang serbisyo publiko, lakip sa serbisyo sa koreyo.
Apan, niadtong Abril 1, adunay nanuktok sa akong pultahan. Sa dihang giablihan nako kini, usa ka tawo nga wala sukad nako makit-i mitunol kanako og usa ka putos gikan sa akong anak nga babaye kinsa niadto nagpuyo sa Malaga, Spain, diin siya mipasakop sa Ang Simbahan ni Jesukristo sa mga Santos sa Ulahing mga Adlaw. Sa sulod mao ang usa ka kopya sa Basahon ni Mormon.
Nagsugod ko sa pagbasa niini niana gayod nga adlaw. Usa ka gubat ang miulbo sa gawas, apan samtang nagbasa ko, mibati ko og kalinaw ug wala nahadlok. Wala madugay, akong nakat-onan nga ang kalinaw nga akong gibati mao ang Espiritu Santo. Nasayod ko nga gipanalipdan ko ug dili mamatay.
Samtang nagbasa ko, nakat-onan nako ang mahitungod ni Jesukristo ug nga Siya buhi gihapon. Nakat-onan nako ang mahitungod sa bunyag ug sa Simbahan sa Manluluwas. Nabati nako nga ang tanan nga akong gibasa tinuod. Matag karon ug unya, ang akong anak nga babaye motubag sa akong mga pangutana.
Sa dihang namatay ang akong bana niadtong 2019, midesisyon ko nga moadto sa Estados Unidos, diin nagpuyo ang akong anak nga babaye karon. Gusto kong makakita niya ug magkat-on pa og dugang mahitungod sa gipahiuli nga Simbahan.
Miestar ko sa Dakbayan sa Salt Lake, Utah, sulod sa upat ug tunga ka bulan. Misimba ko matag semana uban sa akong anak nga babaye. Ako adunay usa ka pagbati nga dili nako mahulagway. Naminaw ko sa misyonaryo nga mga panaghisgotan. Nasayod ko nga tinuod kadtong tanan. Nasinati nako ang labing matahom nga adlaw sa akong kinabuhi sa dihang misulod ko sa mga tubig sa bunyag ug nakompirmahan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw niadtong Hulyo 27, 2019.
Sa dihang misulod ko sa lawak aron makompirmahan human sa akong bunyag, ang tanan naghilak. Ang pagkahimong nabunyagan ug nakadawat sa gasa sa Espiritu Santo usa ka talagsaon nga gasa gikan sa atong Langitnong Amahan. Human sa akong kompirmasyon, nabati nako nga ang langit bukas ug nga kaming tanan magkauban didto. Sa akong patriyarkal nga panalangin human niana, nakadawat ko og daghang espesyal, mahangtoron nga mga saad.
Ang Basahon ni Mormon tinuod. Pinaagi sa pagbasa ug pag-ampo mahitungod niini, makaangkon kita og atong kaugalingon nga pagpamatuod bahin niini. Uban niana nga pagpamatuod, masayod kita nga si Joseph Smith usa ka propeta ug nga pinaagi kaniya, ang tinuod nga Simbahan ni Jesukristo napahiuli nganhi sa yuta.