“Kanunay nga usa ka Misyonaryo,” Liahona, Ene. 2024.
Alang sa Kalig-on sa mga Kabatan-onan Naghinumdom
Kanunay nga usa ka Misyonaryo
Paghinumdom ni Presidente M. Russell Ballard
Samtang nagserbisyo isip usa ka batan-ong misyonaryo didto sa England, si Presidente M. Russell Ballard adunay kasinatian nga nakapausab sa iyang kinabuhi sa kahangtoran.
“Nahinumdom ko nga naglakaw sa daplin sa Suba sa Trent sa Nottingham, England. …
“Samtang naglakaw ko subay niana nga suba, … nag-ampo ko sa hilom. Gitinguha ko nga mobati og pipila ka giya gikan sa Ginoo. Nangamuyo ko nga Siya unta mahimuot sa unsay akong gipaningkamotan nga buhaton. Nangutana ko, ‘Nagbuhat ba ko sa unsay imong gusto?’”1
“Usa ka hilabihan nga pagbati sa kalinaw ug pagsabot ang miabot kanako. Nianang tukma nga gutlo sa panahon akong nahibaloan nga si Jesukristo nakaila kanako, [ug] nga Siya nahigugma kanako, … wala ako makakita og bisan unsa nga mga panan-awon ug wala ako makadungog og bisan unsa nga mga tingog, apan dili unta ako mahibalo sa mas gamhanang paagi sa reyalidad ug pagkabalaan ni Kristo kon Siya mibarog pa sa akong atubangan ug mitawag sa akong ngalan.
“Ang akong kinabuhi naumol pinaagi niana nga kasinatian. Gikan nianang adlawa hangtod karon, ang matag mahinungdanon nga desisyon nga akong gihimo naimpluwensyahan sa akong kahibalo sa Manluluwas.”2
Kini nga kahibalo nagtugot ni Presidente Ballard nga kusganong mamulong isip usa ka espesyal nga saksi ni Ginoong Jesukristo. Siya nagtudlo kanato, pinaagi sa ehemplo ug pagpamatuod, kon unsaon “aron makabarog, aron mahimong mas maayo, ug aron hingpit nga maandam sa pagserbisyo sa Ginoo.”3
Si Presidente Ballard sa Georgetown, Massachusetts, USA, niadtong Mayo 13, 2022.
Usa ka Gugma alang sa Pagpakigbahin sa Ebanghelyo
Bisan asa siya moadto, si Presidente Ballard mihimo sa pagpakigbahin sa ebanghelyo nga usa ka prayoridad. “Ang pagsangyaw sa Pagpahiuli sa ebanghelyo kanunay nga espesyal ngari kanako,” siya miingon. “Gimahal nako ang akong pagkamisyonaryo didto sa England. Gimahal nako ang akong pagkapresidente sa misyon didto sa Canada. Ug gimahal nako ang akong kasamtangang calling [isip usa ka sakop sa Korum sa Napulog Duha ka Apostoles], nga naghatag nako og mga oportunidad sa pagpakigbahin sa mensahe sa Pagpahiuli sa ebanghelyo sa tibuok kalibotan.”4
Si Presidente Ballard mitudlo nga kitang tanan makahimo sa pagpakigbahin sa gipahiuli nga ebanghelyo ni Jesukristo “pinaagi lang sa pagkahimong maayong mga silingan ug pinaagi sa pag-amuma ug pinaagi sa pagpakita og gugma. … Ug kon buhaton nato kini, kita mopadan-ag sa ebanghelyo ngari sa atong kaugalingong kinabuhi, ug kini mopadan-ag ngadto [sa uban] sa mga panalangin nga mahatag sa ebanghelyo.”5
Ang atong gugma alang sa Ginoo ug alang sa uban “mogiya nato sa pagpakigbahin sa ebanghelyo ngadto sa mga sakop sa pamilya, mga higala, mga silingan, mga kauban sa negosyo, ug uban pang mga tawo nga atong ikahimamat samtang nagpadayon kita sa kinabuhi.”6
Kami Nagkinahanglan Kaninyo Karon!
Si Presidente Ballard mitudlo nga kamo dili na kinahanglan nga maghulat nga mahimong usa ka full-time nga misyonaryo aron magsugod sa pagpakigbahin sa ebanghelyo. Siya namahayag, “Ang Simbahan nagkinahanglan sa atong kabatan-onan karon. Ang Ginoo nagkinahanglan kaninyo karon!”7
“Kini mao ang labing importante nga buhat nga kita makaapil,”8 si Presidente Ballard mitudlo. “Itugot nga ang inyong tingog madungog sa pagpahayag og mahinungdanon ug mahimayaon nga mensahe sa Pagpahiuli sa kahingpitan sa walay kataposan nga ebanghelyo ni Jesukristo.”9