“Presidente M. Russell Ballard: Mapahinungoron sa Pagpakigbahin sa Ebanghelyo,” Liahona, Ene. 2024.
Sa Paghandom
Presidente M. Russell Ballard: Mapahinungoron sa Pagpakigbahin sa Ebanghelyo
“Si Jesukristo, ang Manluluwas ug Manunubos sa tanang katawhan, dili patay. Siya buhi—ang nabanhaw nga Anak sa Dios buhi— kana mao ang akong pagpamatuod, ug Siya naggiya sa mga kalihokan sa Iyang Simbahan karon.”1
Sa dihang si Russell Ballard usa pa ka batan-on nga naghupot sa Aaronic nga Pagkapari, siya ug ang usa ka higala mitambong sa usa ka kinatibuk-an nga miting sa pagkapari didto sa Salt Lake Tabernacle. “[Among] nakaplagan ang among kaugalingon … dapit sa mga naghagdan-hagdan nga mga lingkoranan diin wala kami labot,” mipasabot siya sa kaulahian. “Si Presidente George Albert Smith [1870–1951], sa iyang mabinationg paagi, nakakita sa among kahimtang ug midapit namo nga molingkod sa mga naghagdan-hagdan nga lingkoranan. Samtang naglingkod kami didto ug nagtan-aw sa nagpadayon nga miting, dili ko makatuo nga makaduol ko pag-usab niini nga pulpito. Nahinumdom ko nga misulti sa akong higala samtang mibiya kami sa Tabernacle, ‘Nindot kaayo nga mahimong usa ka Kinatibuk-an nga Awtoridad; unya ikaw adunay usa niadto nga mga lingkoranan nga kalingkoran diha sa ibabaw.’
“… Wala koy ideya nga moabot ang panahon sa akong kinabuhi nga makaserbisyo ko isip usa ka bishop, usa ka presidente sa misyon, usa ka Seventy, ug … usa ka Apostol. Dili kita makatag-an kon unsa ang gihunahuna sa Ginoo alang nato. Ang buhaton lamang nato mao ang pagkahimong andam ug takos alang sa bisan unsa nga iyang gikinahanglan.”2
Si Presidente M. Russell Ballard migahin sa iyang kinabuhi nga nangandam ug nagtuman sa pagserbisyo nga siya gitawag sa paghatag. Uban sa iyang espesyal nga kaikag ug kadasig alang sa misyonaryo nga buhat, ang iyang ehemplo ug pagpamatuod nakatabang sa dili maihap nga kinabuhi, nagdasig sa tanan “aron mobarog, aron mahimong mas maayo, ug aron hingpit nga maandam sa pagserbisyo sa Ginoo.”3
Pagkugi ug Pagpangulo
Si Melvin Russell Ballard Jr. natawo sa Salt Lake City, Utah, niadtong Oktubre 8, 1928, kang Melvin Russell Ballard Sr. ug Geraldine Smith Ballard. Ang bugtong lalaki sa upat ka anak, si Russell nakakat-on sa pagtahod sa mga babaye sa sayo nga pangidaron.
Si M. Russell Ballard isip usa ka gamayng bata.
Ang iyang amahan, usa ka hanas nga negosyante, nanag-iya og tindahan sa mga sakyanan, ang Ballard Motor Company. Bisan kon ang iyang amahan dili aktibo sa Simbahan sa bata pa si Russell, si Russell miingon gihapon, “Siya nakahimo og dakong impluwensya sa akong kinabuhi. Iyang gitisok kanako ang tinguha nga magkugi.”4
Ang propesyonal nga kinabuhi sa iyang amahan dili lamang ang ehemplo sa kakugi nga gipakita sa amahan alang sa iyang anak. Ang amahan ni Russell nanag-iya og gamayng umahan sa prutas nga peach didto sa Holladay, Utah, diin nagbuhi siya og mga putyokan aron mokuha sa pollen sa mga buwak sa peach. “Si Papa ganahan kaayo sa iyang kalma nga mga putyokan. … [Siya] naningkamot kanunay nga iapil ko sa iyang trabaho sa mga balay sa putyokan, apan lipay kaayo ko nga pasagdan siya nga moatiman sa iyang mga putyokan.”5
Ang impluwensya niana nga kabilin sa pagkugi nga nakat-onan gikan sa iyang amahan nagpadayon sa kinabuhi ni Russell Ballard. Ang iyang igsoong babaye nga si Ann Keddington nahinumdom, “Kanunay siya nga adunay trabaho, bisan bata pa siya.” Ang iyang unang trabaho mao ang pagpamutol sa kasagbotan ug pag-atiman sa nataran, apan sa kadugayan misugod siya sa pagtrabaho sa ma-Sabado ug human sa klase adto siya sa tindahan sa iyang amahan.6
Sa hayskul si Russell adunay mga oportunidad sa pagpalambo sa iyang mga kahanas sa pagpangulo, ang pag-apil sa student government sa East High School sa Salt Lake City ug ang pagka-presidente sa East High Seminary sa iyang tuig sa senior hayskul, mao ang pipila sa ubang mga kalihokan.7 Human sa hayskul mieskwela siya sa University of Utah, diin miapil siya sa Sigma Chi Fraternity ug nakadawat og angga nga “ang bishop” taliwala sa iyang kaigsoonan sa fraternity tungod sa iyang ehemplo sa pagkamatinuoron sa iyang tinuohan.8
Mga Panalangin sa Misyonaryo nga Pagserbisyo
Litrato ni M. Russell Ballard isip usa ka batan-ong misyonaryo.
Si Russell gitawag aron moserbsiyo didto sa British Mission niadtong 1948, diin usa siya ka magtatambag sa kapangulohan sa misyon ubos sa duha ka managlahi nga mga presidente sa misyon. Siya miserbisyo human dayon sa pagtapos sa Ikaduhang Gubat sa Kalibotan, ug sa kaulahian siya mipasabot nga nianang higayona ang “mga Mormon ‘usa ka yubit ug usa ka pagya’ (3 Nephi 16:9), ug ang mga misyonaryo gikataw-an ug gibugalbugalan.” Siya mihinumdom: “Gani ang mga tawo molabay og mga butang namo, ug luwaan kami sa pipila. Apan, wala kami moatras.”9 Siya nakakat-on gikan sa iyang mga kasinatian ug, sama sa iyang giingon, “gimahal nako ang akong pagkamisyonaryo didto sa England.”10
Usa sa labing mahinungdanong mga panalangin nga nadawat ni Russell gikan sa pagserbisyo og misyon mao ang dili mapaling nga pagpamatuod. Siya mihinumdom: “Tungod sa akong kasinatian sa misyon, nakaangkla ko ngadto sa pagpamatuod bahin sa katinuod sa pagpahiuli sa Simbahan ni Jesukristo pinaagi ni Propeta Joseph Smith. Mibarog ko didto sa Hyde Park ug didto sa daghang uban pa nga mga kadalanan sa mga Isla sa Britanya ug mihatag sa akong pagpamatuod nga si Joseph Smith usa ka propeta sa Dios, nga ang ebanghelyo gipahiuli sa kahingpitan niini, ug nga ang pagkapari ug ang awtoridad sa pagpanalangin sa katawhan sa makausa ania na usab sa yuta. Kon magsige ko og hatag sa akong pagpamatuod, mas nahimo kining kabahin kanako.”11
Si Elder Ballard nga nagsangyaw dapit sa merkado didto sa Nottingham, England, niadtong 1949.
Sa pagkatinuod, ang iyang misyonaryo nga serbisyo nakatabang sa pag-andam niya alang sa daghang katungdanan sa umaabot. Sa wala pa siya matawag ngadto sa Korum sa Napulog Duha ka Apostoles, si Presidente Ballard miingon: “Sa tanang pagbansay nga akong nadawat sa akong mga buluhaton sa Simbahan, walay mas importante nako kaysa pagbansay nga akong nadawat isip usa ka 19 anyos nga elder nga nagserbisyo og full-time nga misyon didto sa mga Isla sa Britanya. Kon akong tan-awon og balik, akong makita nga walay pagbansay sa akong kinabuhi nga mas importante sa unsay akong gibuhat karon sa Simbahan kaysa pagbansay nga akong nadawat isip usa ka full-time nga misyonaryo.”12
Mapahinungoron sa Kinabuhi sa Pamilya
Human sa iyang misyon, si Russell nagpadayon sa iyang pag-eskwela didto sa University of Utah. Wala madugay human sa pagpauli, miadto siya sa usa ka “Hello Day Dance.” Siya mipasabot: “Ang usa nako ka higala … misulti nako bahin sa usa ka maanyag nga sophomore nga ginganlan og Barbara Bowen, nga iyang gihunahuna nga angay nakong mahimamat. Gikuha niya siya ug gipailaila kami, ug misugod kami og sayaw.
“Sa kawalay swerte, kini maoy gitawag kaniadto og ‘tag dance,’ nga nagpasabot nga imong ikasayaw ang babaye hangtod lang nga may laing tawo nga motapik sa imong abaga og mopuli nimo. Si Barbara masadyaon ug inila, busa nakasayaw lang ko niya og wala moabot og minuto sa dihang laing batan-ong lalaki ang mitapik kanako.
“Kana dili nako madawat. Kay nakat-onan man nako ang importansya sa follow-up diha sa akong misyon, gipangayo ko ang iyang numero sa telepono ug gitawgan siya sa sunod dayon nga adlaw aron makig-date kaniya, apan busy siya sa eskwelahan ug sosyal nga mga kalihokan. Maayo gani, ang akong misyon mitudlo kanako nga magmakanunayon bisan atubangan sa kadismaya, ug ako sa kadugayan nakatakda og date. Ug kana nga date nasundan pa og uban. Hinuon niadto nga mga date nakumbinser ko siya nga ako lamang ang tinuod ug buhing returned missionary—sa labing minos kutob nga may kalabotan kaniya.”13
Si Russell ug si Barbara naminyo niadtong Agosto 28, 1951.
Ang iyang kamapadayonon ug kamapahinungoron nabugtian, ug siya ug si Barbara naminyo didto sa Salt Lake Temple niadtong Agosto 28, 1951. Nakabaton sila og pito ka anak: sila si Clark, Holly, Meleea, Tamara, Stacey, Brynn, ug Craig.
Si Presidente Ballard mipakigbahin og kasinatian nga iyang nasinati isip usa ka batan-ong amahan diin iyang nakat-onan kon unsa ka lisod ang tahas sa pagka-inahan. “Nagserbisyo ko isip usa ka magtatambag ug unya isip bishop sulod sa 10 ka tuig. Nianang panahona gipanalanginan kami og unom sa pito namo ka anak. Si Barbara sa kasagaran kapoyon na pag-ayo sa higayon nga mouli ko sa Dominggo sa gabii. Gisulayan niya sa pagpasabot kon unsay bation nga maglingkod sa luyo nga bahin panahon sa panagtigom alang sa sakramento uban sa bag-o namong pamilya. Unya miabot ang adlaw nga ako gi-release. Human sa 10 ka tuig nga paglingkod sa atubangan, karon naglingkod ko uban sa akong pamilya didto sa luyo.
“Ang choir sa mangantahay nga mga inahan sa ward mihatag sa musika, ug akong nakita ang akong kaugalingon nga naglingkod kauban sa among unom ka anak. Wala pa gayod ako nagkapuliki sukad sa tibuok kong kinabuhi. Puno sa kiko-kiko nga dulaan ang akong duha ka kamot, ug kadto wala kaayo mosalir. Ang [mga snack] nangayabo, ug makaulaw kaayo kadto. Ang koloranan nga mga libro daw dili na gayod makalingaw kanila.
“Samtang ako nakigbisog uban sa mga bata hangtod nahuman ang miting, mitan-aw ako kang Barbara, ug nagtan-aw siya kanako ug nagpahiyom. Akong nakat-onan sa akong kaugalingon nga mas hingpit nga pasalamatan ang gibuhat sa tanang … minahal nga mga inahan nga maayo ug matinud-anon kaayo!”14
Si Elder Ballard uban sa iyang pamilya atol sa iyang ika-80 nga adlawng natawhan niadtong Oktubre 2008.
Ang iyang asawa mihinumdom usab sa daghang oras nga iyang gigahin sa iyang pamilya. Siya “hilabihan nga nagmahal sa iyang pamilya, ug sila ang unahon sa kanunay,” miingon siya. “Siya usa ka bishop sulod sa daghang katuigan ug naghupot og daghang trabaho sa Simbahan, apan kadto nga mga responsibilidad wala gayod makadaot sa iyang pamilya. Kon anaa siya sa balay, siya mogahin sa iyang panahon.”15
Sa kaulahian sa kinabuhi, sila si Presidente ug Sister Ballard nalingaw sa paggahin og panahon uban sa ilang mga anak, mga apo, ug mga apo sa tuhod. Ang iyang mga anak ug mga apo naghandom sa mga bakasyon sa pamilya nga nagbisita sa makasaysayanon nga mga dapit sa Simbahan sama sa Palmyra, Kirtland, ug Nauvoo; nagtambong og pagpahinungod sa Preston England Temple niadtong 1998; nagbiyahe didto sa Balaan nga Yuta; ug nagbaktas tabok sa giagian sa mga pioneer.
Human sa kamatayon sa iyang asawa niadtong Oktubre 2018, si Presidente Ballard miingon, “Mapasalamaton kaayo ko nga masayod kon asa karon ang akong pinanggang si Barbara ug nga magkauban kami pag-usab uban sa among pamilya, hangtod sa tanang kahangtoran.”16
Gipalig-on pinaagi sa Panulundon sa Hugot nga Pagtuo
Isip usa ka kaliwatan sa igsoong lalaki ni Propeta Joseph Smith nga si Hyrum, si Russell Ballard mapagarbohon kanunay sa iyang pioneer nga katigulangan. Duha sa iyang mga apohan ug ang iyang apohan sa tuhod miserbisyo sa Korum sa Napulog Duha ka Apostoles. Human sa iyang pagtawag niana nga katungdanan, si Presidente Ballard miingon: “Ako miisip niini nga usa ka panalangin nga mahimong representante karon sa pamilya ni Joseph ug ni Hyrum, ug mopahibalo sa publiko nga ang pagsunod sa akong apohan sa tuhod, si Joseph F. Smith, ug sa akong duha ka apohan, sila si Hyrum Mack Smith ug Melvin J. Ballard, ngadto sa Konseho sa Napulog Duha ka Apostoles usa ka dakong dungog ug responsibilidad. Buhaton nako ang akong labing maayo aron mamahimong matang sa sulugoon nga angayan nianang katungod sa kinamagulangan [birthright].
“Sa pipila ka higayon gihupay ko sa akong Kaigsoonan nga ilang gibati nga ang akong mga katigulangan mipaluyo sa akong katungdanan diha sa pikas habig sa tabil ingon man usab ang Unang Kapangulohan ug ang Konseho sa Napulog Duha dinhi niini nga habig sa tabil.”17
Ang panan-awon sa iyang apohan nga si Melvin J. Ballard nga migakos sa Manluluwas didto sa Salt Lake Temple nakatabang ni Presidente Ballard nga makalatas sa lisod nga mga panahon,18 ug ang usa ka plake [plaque] nga nakasulat ang kataposang mga pulong sa iyang apohan sa buhi pa—“Labaw sa tanan, mga kaigsoonan, kita maghunahuna og tarong”—gisab-it sa usa ka bungbong sa iyang opisina. “Dili ko makaadto sa akong opisina bisan unsang adlawa sa semana nga dili makakita niadto nga mga pulong,” si Presidente Ballard mipasabot. “Akong nakita nga kini nakatabang kaayo kanako.”19 Sa pagkatinuod, kadtong yano nga mga pulong, “maghunahuna og tarong,” nahimong motto sa pamilya ni Presidente Ballard samtang nag-awhag siya sa mga sakop sa iyang pamilya nga maghunahuna og klaro sa paghimo og mga desisyon ug sa paghinumdom sa kayano sa ebanghelyo.20
Si Presidente Ballard mao ang usa ka talagsaong ehemplo sa pagsalig ug sa pagpadayon sa kabilin sa hugot nga pagtuo pinaagi sa mga pamilya. Alang kaniya, ang kasaysayan sa Simbahan ug ang hugot nga pagtuo sa unang mga Santos malungtarong nakasumpay sa iyang kaugalingong kasaysayan sa pamilya. Siya mipahinumdom nga kitang tanan “makakuha og dakong kalig-on, labi na ang atong kabatan-onan, gikan sa pagsabot sa kasaysayan sa atong Simbahan.”21 Ug bisan kon kadaghanan sa hugot nga pagtuo sa mga Santos gisulayan niadtong “ika-19 nga siglo nga Mormon pioneer trek, kinahanglan natong hinumdoman nga ‘ang malisod nga panaw sa kinabuhi nagpadayon!’ alang sa matag usa kanato samtang atong ipakita ang atong kaugalingong ‘hugot nga pagtuo sa matag lakang.’”22
Si Elder Ballard milabay sa unang pangseremonyas nga paglabay sa bola [pitch] sa wala pa magsugod ang dula sa Los Angeles Dodgers niadtong Agosto 2009.
Litrato pinaagi ni Lori Shepler / AP
Kalamboan ug Kapakyasan sa Negosyo
Sa iyang propesyonal nga kinabuhi, si Russell Ballard nagtrabaho sa industriya sa mga sakyanan, real estate, ug pagpamuhunan. Ang importante nga mga leksiyon sa kinabuhi miabot gikan sa wala damha nga mga tinubdan, ug ang unang nakat-onan ni Russell mao ang kaimportante sa pagpaminaw sa tambag sa iyang amahan ug sa pag-aghat sa Espiritu diha sa mga butang nga espirituwal ug temporal.
“Ang Ford Motor Company nangita og mga tigbaligya aron ibaligya ang ilang bag-ong linya sa mga sakyanan,” siya mihinumdom. “Ang mga ehekutibo sa Ford midapit sa akong amahan ug nako aron motan-aw sa usa ka pagpasundayag sa unsay ilang gihunahuna nga usa ka malamposon gayod nga produkto. Sa dihang nakita namo ang mga sakyanan, ang akong amahan, nga aduna nay sobra sa 35 ka tuig nga kasinatian sa negosyo, mipasidaan nako sa pagkahimong tigbaligya.”
Si Presidente Ballard mipasabot: “Samtang nakigbisog ko niini, nangutana usab ko sa Ginoo bahin niini, nangayo og giya. Lisod kaayo kadto nga desisyon; naglambigit kini og dakong kwarta, dakong pasalig sa akong bahin. Sa higayon nga ang akong amahan ug ako nakakita sa mga sakyanan ako adunay klaro nga pagbati nga dili mopadayon sa pag-franchise.”
Apan, si Presidente Ballard miingon, “ang personnel sa pagpamaligya sa Ford maawhagon kaayo, ug mipili ko nga mahimong labing una sa Siyudad sa Salt Lake City—ug kataposan diay—nga tigpamaligya og Edsel. Ug kon kamo wala makaila kon unsa ang Edsel, pangutana sa inyong apohang lalaki. Siya mosuli ninyo nga ang Edsel usa ka pakyas gayod.”
Usa ka Ford Edsel, nga nabaligya ni Russell Ballard sa iyang tindahan sa sakyanan sa Siyudad sa Salt Lake.
Litrato pinaagi sa Getty Images
Si Presidente Ballard miobserbar: “Gitugotan nako ang akong kaugalingon nga mobaliwala sa mga pag-aghat sa Espiritu nga akong gibati. Gisunod nako ang tambag sa ikasiyam nga seksiyon sa Doktrina ug mga Pakigsaad, apan nagduhaduha ko gikan sa pagbati nga gihatag sa Ginoo nako.” Ania ang leksiyon nga nakat-onan: “Kon kamo andam nga maminaw ug magkat-on, ang pipila sa labing makahuloganon nga mga pagtulon-an nagagikan niadtong nag-una kaninyo. … Kon kamo maminaw ug motuman sa ilang tambag, sila makatabang og giya kaninyo sa inyong mga pagpili nga alang sa inyong kaayohan ug panalangin ug makapalayo kaninyo gikan sa mga desisyon nga makadaot kaninyo.”23
Bisan kon morag malamposon sa iyang tanang panimpalad sa negosyo, si Russell mihimo niining kapakyasan isip kasinatian sa pagkat-on nga makatabang niya nga “maghunahuna og tarong” bahin niadtong mga matang sa mga desisyon sa umaabot.24
Pagserbisyo sa Ginoo
Human sa pagserbisyo isip usa ka bishop sa duha ka higayon, si Russell Ballard miserbisyo sa mga high council ug isip tigtambag sa korum sa mga priest sa wala pa matawag niadtong Hulyo 1974 aron mangulo sa Canada Toronto Mission. Kana nga calling nagmatuod sa labihan ka mahinungdanon sa pagpangandam alang sa iyang umaabot nga full-time nga mga buluhaton sa pagserbisyo diha sa Simbahan. Duha ka tuig human niana, niadtong Abril 3, 1976, gitawag siya isip usa ka sakop sa Unang Korum sa Seventy. Siya gitawag ngadto sa kapangulohan niana nga korum niadtong Pebrero 21, 1980. Niadtong Oktubre 6, 1985, siya gitawag isip usa ka sakop sa Korum sa Napulog Duha ka Apostoles sa edad nga 57. Ang iyang ordinasyon ngadto niana nga calling niadtong Oktubre 10, 1985, pinaagi ni Presidente Spencer W. Kimball (1895–1985) mao ang kataposang ordinansa sa pagkapari nga gipahigayon ni Presidente Kimball sa wala pa siya mamatay.
Niadtong Enero 14, 2018, human sa kamatayon ni Presidente Thomas S. Monson (1927–2018) ug sa pag-set apart ni Presidente Russell M. Nelson isip ika-17 nga Presidente sa Simbahan, si Presidente Ballard gi-set apart isip Akting nga Presidente sa Napulog Duha ka Apostoles.
Si Presidente Russell M. Nelson ug si Presidente Ballard sa gawas sa Vatican sa Rome, Italy, niadtong Marso 2019.
Sa iyang kapasidad isip Kinatibuk-ang Awtoridad, si Presidente Ballard adunay oportunidad nga moapil sa buhat sa Ginoo diha sa lainlaing mga paagi. Miserbisyo siya isip Executive Director sa Departamento sa Misyonaryo ug midumala usab sa mga Departamento sa Curriculum ug Correlation. Siya mitabang usab sa pag-atiman sa Komitiba sa Pangpubliko nga mga Kalihokan sa Simbahan.
Niadtong 1980 mihatag siya og katungod nga ang unang chapel matukod didto sa Nigeria. Upat ka tuig human niana mibalik siya ngadto sa Africa, mibiyahe ngadto sa Ethiopia human sa usa ka kagutom aron modesisyon kon unsaon pag-apud-apod sa mga pundo nga nakolekta human sa usa ka espesyal nga puasa sa tibuok Simbahan. Gikuyogan ni Glenn L. Pace, nga nianang higayona maoy direktor sa pagdumala sa Departamento sa mga Serbisyo sa Welfare sa Simbahan, ang duha nakighimamat sa usa lamang ka miyembro sa Simbahan nianang higayona, usa ka naghupot sa Melchizedek nga Pagkapari. Atol niana nga pakighimamat si Presidente Ballard mihatag og pag-ampo ug usa ka panalangin sa Ethiopia, diin siya, sama sa nahinumdoman ni Brother Pace, “mitawag sa gahom ug awtoridad sa balaang Melchizedek nga Pagkapari ug mimando sa mga elemento sa pagpundok aron magdala og ulan nganha sa yuta, nga sa ingon aron mahupay na kadtong nag-antos sulod sa daghan na kaayo nga katuigan. Usa na ka tuig nga walay ulan, ug ang pag-ampo gihatag diha sa tin-aw ug init nga Dominggo sa buntag.”
Sa kaulahian nianang adlawa, si Brother Pace miingon, “naglingkod ko dapit sa gamayng lamesa nagsulat sa akong journal sa dihang nakadungog ko og pagpanugdog. Miadto ko sa pasilyo sakto kaayo nga nakita nako nga nagsugod na ang pag-ulan. … Mikanaog ko sa pasilyo ug nanuktok sa pultahan ni Elder Ballard. Sa pag-abot niya sa pultahan, makaingon ko nga hilabihan ang iyang kalipay [sama nako]. Militok kami og usa ka pag-ampo sa pasalamat ug mibalik sa pribado namong mga lawak ug mga hunahuna. Sukad nianang adlawa, bisan asa kami mobiyahe, nag-ulan kini.”25 Alang kang Presidente Ballard, usa kadto ka makapausab sa kinabuhi nga kasinatian.
Si Elder Ballard mibisita sa Ethiopia atol sa kagutom niadtong 1985 aron matino kon unsaon nga magamit sa labing maayo ang sobra sa $6 milyon nga gidonar sa mga miyembro sa Simbahan atol sa usa ka espesyal nga puasa.
Ang laing halandomon nga kasinatian nahitabo niadtong 1988, sa dihang si Presidente Ballard nag-organisar og pito ka bag-ong mga stake didto sa Lima, Peru, sa usa ka semana. Ang Iyang apohan nga si Elder Melvin J. Ballard mipahinungod sa South America alang sa pagsangyaw sa ebanghelyo niadtong 1925, mitag-an sa talagsaong pagtubo sa Simbahan didto. Si Presidente Ballard miingon, “[Kini nga kasinatian] nakahatag nako … og espesyal nga pagbati tungod kay akong gibati ang impluwensya sa akong Lolo sa daw talagsaong paagi nasayod nga ako nagtuman sa tinipik sa iyang talagsaong panagna.”26
Mga Pagtulon-an
Sa tanan niya nga mga pagtulon-an, si Presidente Ballard mihatag og gibug-aton sa kaimportante sa pagbaton og usa ka pagpamatuod ug sa pagpakigbahin sa mensahe sa gipahiuli nga ebanghelyo: “Kon kita wala makasabot ug dili andam nga motudlo sa uban bahin sa Pagpahiuli sa ebanghelyo ni Jesukristo pinaagi ni Propeta Joseph Smith, kinsa pa man?”27 Siya kanunayng mohagit sa mga miyembro sa pagtakda og panahon aron mangita og tawo kinsa ilang mapakigbahinan sa ebanghelyo, ug seguroon niya ang pag-follow up niadto nga mga hagit.
Siya mipasidungog usab sa mahinungdanong tahas sa kababayen-an diha sa panimalay ug sa Simbahan, mitudlo kon unsaon ang epektibong paggamit sa mga konseho, ug nanguna sa buhat sa full-time nga mga misyonaryo ug sa miyembro nga mga misyonaryo, sa hilabihan gayod nga ang usa sa iyang isigka-Apostoles kausa miingon nga ang “M.” sa iyang ngalan nagpasabot nga “misyonaryo.”28
Siya miawhag sa mga misyonaryo ug sa mga miyembro sa tibuok kalibotan pinaagi sa iyang positibo nga panglantaw bahin sa misyonaryo nga buhat. Didto sa Brigham Young University, siya mipahinumdom sa mga estudyante, kadaghanan nila mga kanhi o umaabot nga mga misyonaryo, nga “ang pagtubo sa Simbahan … anaa gayod sa inyo ug sa akong mga kamot, ug sa mga kamot sa aktibo nga mga miyembro sa Simbahan.” Siya miingon nga sa higayon nga madungog niya nga ang ebanghelyo kinahanglang ipakigbahin ngadto sa matag kalag, “Nakaingon ko sa akong kaugalingon, … ang Ginoo naghangyo nato sa pagbuhat sa butang nga imposible. [Apan] dili kini imposible. Dili kini imposible kon ang mga miyembro sa Simbahan mobuhat sa ilang kaugalingon sa unsay gihangyo Niya nga buhaton nila, ug kana mao ang agresibong pag-apil sa pagpakatap sa ebanghelyo dinhi sa yuta.”
“Dili kita kinahanglan nga mabalaka bahin sa pagpatubo niini nga Simbahan,” siya miingon. “Ang Ginoo mosangkap ug ang Ginoo mobayaw ug ang Ginoo modasig ug ang Ginoo mohimo niining posible nga ang Iyang buhat magpadayon. … Ang Dios mopanalangin kaninyo, dayon, ug mopanalangin nako, nga kita makabaton og kaisog, maayong paghukom, disiplina sa kaugalingon ug pagpangandam, nga kita maandam sa matag paagi sa pagbuhat sa atong bahin, bisan unsa man kana, sa pagpalig-on sa gingharian sa Dios sa tibuok yuta.”29
Sa Scotland aron makighimamat sa mga lider sa gobyerno niadtong Oktubre 2021, si Presidente Ballard mibisita sa sementeryo diin ang iyang mga apohan sa mga apohan sa tuhod mitambong sa simbahan ug gilubong diha sa mga nataran.
Pagpamatuod bahin sa Gipahiuli nga Ebanghelyo
Ang pagpamatuod nga nakatisok sa bata pa siya, nga naugmad atol sa iyang misyon, ug nalig-on sa iyang tibuok kinabuhi nga pagserbisyo kanunay nga nakagamot diha sa kayano sa mga kamatuoran sa ebanghelyo. “Akong ipataas ang akong tingog ngadto sa tibuok kalibotan pinaagi sa pagpamatuod nga ako nasayod sa walay pagduhaduha o pangutana nga si Joseph Smith miabli niini nga dispensasyon pinaagi sa balaanong pagpadayag ug misugod sa pagpahiuli dinhi sa yuta sa tinuod nga Simbahan ni Jesukristo.”30
Uban sa Unang Kapangulohan ug sa Korum sa Napulog Duha ka Apostoles alang sa pagpahinungod sa Rome Italy Temple niadtong 2019.
Siya namahayag nga ang atong hugot nga pagtuo “kinahanglan nga nakasentro diha ni Jesukristo, diha sa iyang kinabuhi, diha sa iyang pag-ula, ug diha sa pagpahiuli sa iyang ebanghelyo dinhi sa yuta sa kataposang mga adlaw. …
“Walay butang nga mas talagsaon o importante niini nga kinabuhi kaysa mahibalo nga ang Dios ang atong Amahan sa Kahangtoran ug ang iyang Anak, si Jesukristo, namulong pag-usab gikan sa kalangitan ug nagtawag og mga propeta ug mga apostoles aron itudlo ang kahingpitan sa walay kataposan nga ebanghelyo sa makausa pa dinhi sa yuta.”31
Sa pagkatinuod, ang iyang tibuok kinabuhi nga pagserbisyo ug debosyon sa pagpadali sa buhat sa Ginoo nakatabang niya nga mamahimo sa unsay gikinahanglan sa Ginoo kaniya nga mamahimo. “Ang akong panabot sa ebanghelyo nakahatag nako og giya diha sa matang sa amahan ug karon usa ka lolo nga ako kinahanglan nga mamahimo. Ang akong pagpamatuod, nga akong naangkon sa akong kabatan-on, nakatabang nako sa pagtubag sa matag katungdanan diha sa Simbahan, lakip na niining bug-at nga katungdanan sa pagkakaron nga mahimong usa ka sakop sa Korum sa Napulog Duha ka Apostoles. Ang akong pagpamatuod, nga akong naangkon sa dugay na nga panahon didto sa kadalanan sa England, mitubo pagtulon-an human sa usa ka pagtulon-an ug lagda human sa usa ka lagda hangtod nga ako makabarog sa atubangan ninyo … ug makapamatuod isip usa ka espesyal nga saksi ni Ginoong Jesukristo nga ang atong Manluluwas buhi ug Siya mao ang Anak sa Dios nga atong Amahan sa Kahangtoran. Ang akong kinabuhi dili na gayod sama sukad nga ako miangkla sa akong kalag ngadto sa mga kamatuoran sa gipahiuli nga ebanghelyo ni Jesukristo.”32