“Ons Lig in die Wildernis,” Liahona, Jan. 2024.
Maandelikse Liahona-boodskap, Januarie 2024
Ons Lig in die Wildernis
Diegene wat die Boek van Mormon opreg lees, volgens die leringe daarvan leef en oor die waarheid daarvan bid, sal die Heilige Gees voel en hulle geloof in, en getuienis van, die Saligmaker vermeerder.
Beeld van die broer van Jared met blink klippies, deur Normandy Poulter
Selfs as jong seun het ek ʼn getuienis van die Boek van Mormon gehad. Ek het veral aangetrokke gevoel tot die storie van die broer van Jared en sy volk op reis na “ʼn land van belofte” (Ether 2:9).
Toe die broer van Jared voor die vooruitsig te staan kom om in onverligte bote te reis, het hy gevra, “Kyk, o Here, sal U toelaat dat ons hierdie groot water sal oorsteek in die donker?” En die Here het geantwoord en gesê: “Wat wil julle hê moet Ek doen dat julle lig mag hê in julle vaartuie?” (Ether 2:22, 23).
Die broer van Jared het geweet dat die Here almagtig is. Hy het geweet dat die Here die bron van alle lig is. Hy het geweet dat die Here sy mense beveel het om in tyd van nood tot Hom te roep. Derhalwe het die broer van Jared geloof in die Here uitgeoefen en 16 klein klippies voorberei. Jy onthou dat hy die Here toe gevra het om die klippies met sy vinger aan te raak, “sodat hulle mag skyn in die donker” (Ether 3:4).
Die beeld van die Here wat daardie klippies aanraak, is in my gedagtes ingeëts sedert ek daardie storie die eerste keer gelees het. Ek kan daardie toneel sien asof dit voor my oë afspeel. Miskien is dit omdat die beeld van die duisternis wat deur lig verdryf word so werklik vir my is.
Wanneer ek nie die Heilige Gees voel nie, wanneer ek ʼn bietjie uit voeling met die Here se gees is, voel ek duisternis. Maar wanneer ek die Boek van Mormon lees, keer die lig terug. Die Boek van Mormon was vir my soos ʼn blink klippie wat deur die Here aangeraak is. Dit het my reis deur die lewe verlig.
ʼn Lig vir Ewig
Soos diegene wat deur die hand van die Here na die voortydse Amerikas gebring is, kom ons almal voor storms en donker dae te staan tydens ons reis na die beloofde land van verheffing. Maar die Here sal vir ons doen wat Hy vir die Jarediete en die Nefiete gedoen het. Hy sal ons lei en ons pad verlig—as ons Hom gehoorsaam, geloof in Hom beoefen en vir sy hulp pleit.
Die Here het vir Nefi gesê: “En ek sal ook jul lig in die wildernis wees; en Ek sal die weg voor jul berei as dit so sou wees dat jul my gebooie sal onderhou: daarom, in soverre julle my gebooie onderhou, sal julle gelei word na die beloofde land; en julle sal weet dat dit deur My is dat julle gelei word” (1 Nefi 17:13).
Die Here het vir Nefi se broer Jakob gesê: “Ek sal ʼn lig vir hulle wees vir ewig, wat my woorde hoor” (2 Nefi 10:14).
Van die Saligmaker het die profeet Abinadi getuig: “Hy is die lig en die lewe van die wêreld; ja, ʼn lig wat eindeloos is, wat nooit verdonker kan word nie” (Mosia 16:9).
Van Homself het die Saligmaker getuig: “Ek is die lig en die lewe van die wêreld.” Hy het bygevoeg: “Kyk, Ek is die lig; Ek het ʼn voorbeeld gestel vir julle” (3 Nefi 9:18; 18:16).
Voel die Lig
Ek is lief vir ons profeet, President Russell M. Nelson. Ek is geseënd om sy aan sy met hom te dien. Wanneer hy by ʼn vertrek instap, voel daardie kamer dadelik helderder. Hy dra die Lig van Christus saam met hom.
Die Lig van Christus is werklik. Dit “is die goddelike energie, mag, of invloed wat vanaf God deur Christus uitgaan en lewe en lig aan alle dinge gee.” Dit is ʼn gekoesterde geestelike gawe wat God se kinders na die Heilige Gees en die evangelie van Jesus Christus kan lei.1 Die lees van die Boek van Mormon versterk daardie Lig.
Soms moet ons terugkyk op ons lewens om te onthou hoe ons op ons reis gehelp is. Wanneer ons terugkyk, kan ons weer die Saligmaker se invloed voel. Wanneer die skrifture sê: “Onthou, onthou” (Helaman 5:12), dink ek dit sê vir ons: “Moenie net onthou wat jy eens geweet of gevoel het nie; voel eerder weereens daardie lig.”
Vir sommige mense is dit maklik om geestelike lig te voel. Vir ander kan dit weens persoonlike wroegings of wêreldse afleidings moeilik wees om geestelike lig te voel. Maar as ons getrou is, sal lig kom—soms op maniere wat ons nie verwag nie.
President Nelson, wat ons aangeraai het om “die Boek van Mormon elke dag biddend te bestudeer,”2 het verskeie maniere gedeel waarop die Boek van Mormon ons nader aan die Saligmaker kan bring, en ons help om evangelielig te voel, evangeliewaarhede te begryp en evangelieleringe uit te leef.
Soos ons die Boek van Mormon lees, het President Nelson gesê, sal ons begrip van, en ons waardering vir, die Versoening van Jesus Christus groei.
Ons sal ʼn behoefte voel om “weer gebore” te word (Mosia 27:25) soos die boek ons help om ʼn verandering te ondergaan (sien Mosia 5:2).
Soos ons die Boek van Mormon se leringe oor die versameling van Israel lees en bestudeer, sal ons ʼn al hoe groter begeerte ervaar om ons voorsate na te spoor en ordinansies van heil en verheffing vir hulle in die tempel uit te voer.
Ons sal lig voel soos ons antwoorde op ons vrae ontvang, leiding om besluite te neem, en krag om te bekeer en boosheid te weerstaan.
En soos ons waarhede lees wat in die Boek van Mormon aangetref word, sal ons genesing, vertroosting, herstelling, bystand, krag, vertroosting en gejubel vir ons siel ervaar.3
“O dan, is dit nie werklik nie?” Alma het gevra rakende die swellende, spruitende saad van waarheid, kennis en getuienis. “Ek sê vir julle, Ja, want dit is lig; en wat ook al lig is, is goed, want dit is waarneembaar, daarom moet julle weet dat dit goed is” (Alma 32:35).
Christ’s Image [Christus se Beeld], deur Heinrich Hofmann
Vind die Saligmaker in die Donker
Toe my vriend Kamryn 10 jaar oud was, het sy ʼn rare maar permanente oogsiekte opgedoen wat die horingvlies van haar regteroog aangetas het.4 Soms, wanneer die gepaardgaande pyn voortdurend en ondraaglik geword het, kon Kamryn geen lig verduur nie. Haar ouers, bekommerd dat sy blind sou word, het die vensters van haar slaapkamer donker gemaak om haar gemaklik te probeer hou. Kamryn se ma, Janna, onthou:
“Sowat vier maande ná haar diagnose het ek by haar donker kamer ingestap. Soos my oë aangepas het, kon ek sien hoe Kamryn in die fetusposisie op haar bed lê. Sy het soveel pyn gehad dat sy nie beweeg het of selfs gehuil het toe sy my hoor inkom nie. Sy het net daar gelê, albei oë toegeswel.
“Ek het by haar bed gekniel, haar hand in myne geneem en dit drie keer gedruk—ons geheime kode vir ‘Ek het jou lief’. Gewoonlik sou sy vier keer terugdruk vir ‘Ek het jou meer lief’, maar sy het nie gereageer nie. Sy het te veel pyn gehad. Met trane wat oor my wange stroom, het ek na my eens lewenslustige 10-jarige gekyk wat nou in die bed opgekrul gelê het. My hart het gebreek.”
Janna het stil, opreg gebid.
“Ek het vir Hemelse Vader gesê ek weet Hy weet die beste, maar ek het gebid: ‘Help haar asseblief.’ Terwyl ek daar gesit en bid het, het ʼn warm gevoel oor my gespoel. Ek het kalm gevoel toe ʼn gedagte oor die Saligmaker Jesus Christus by my opgekom het: ‘Hy’s die lig. Vind Hom in die donker.’”
Janna het haar kop gelig en in Kamryn se oor gefluister, “Jy moet die Saligmaker in die donker vind.”
Daarna het Kamryn aan die slaap geraak terwyl sy na gesange en skrifture op die Kerk se biblioteek-app luister.
Wanneer haar ooginfeksie opvlam, vind Kamryn die Saligmaker in die donker.
Foto met vergunning van Kamryn se familie
Kamryn se siekte lê die meeste van die tyd dormant, maar wanneer dit opvlam, troos Janna en haar man, Darrin, haar en hang weer komberse oor haar slaapkamervensters. Tydens daardie pynlike tye, sê Kamryn: “Ek vind maar net die Saligmaker in die donker.”5
Wanneer die lewe “ʼn donker en somber wildernis” blyk te wees (1 Nefi 8:4), moet ons dalk ook die Saligmaker in die donker vind. Ek getuig dat die Boek van Mormon, met sy getuienis “dat Jesus die Christus is, die Ewige God,”6 ons na Hom sal lei. Ek weet dat diegene wat die Boek van Mormon opreg lees, volgens die leringe daarvan leef, en oor die waarheid daarvan bid, die Heilige Gees sal voel en hulle geloof in, en getuienis van, die Saligmaker sal vermeerder.
Laat ons dankbaarheid toon vir hierdie “mees korrekte” boek7 deur dit te lees, dit te koester, en dit te gebruik om ons geloof, en die geloof van ander, in die Lig van die Wêreld te versterk.
© 2024 deur Intellectual Reserve, Inc. All rights reserved. Gepubliseer in die VSA. Engelse goedkeuring: 6/19. Vertalingsgoedkeuring: 6/19. Vertaling van Monthly Liahona Message, January 2024. Language. 19273 501