ខែ មីនា
ព្រះយេស៊ូវគ្រីស្ទគឺជាព្រះអង្គសង្រ្គោះរបស់យើង
« ចូរអ្នករាល់គ្នាប្រុងស្តាប់តាមព្រះបន្ទូលទាំងនេះចុះ យើងជាព្រះយេស៊ូវ ជាព្រះអង្គសង្គ្រោះនៃពិភពលោក » ( គ&ស 43:34 ) ។
សូមបន្ថែមគំនិតទាំងឡាយដែលបានផ្តល់ឲ្យត្រង់ចំណុចនេះទៅនឹងគំនិតរបស់អ្នក ។ នៅរៀងរាល់សប្តាហ៍ សូមដាក់ផែនការដើម្បី (1) ស្វែងរកគោលលទ្ធិ (2) ជួយកុមារយល់ពីគោលការណ៍នោះ ហើយ (3) ជួយឲ្យពួកគេអនុវត្តគោលការណ៍នោះនៅក្នុងជីវិត ។ »សូមសួរខ្លួនអ្នកថា ៖ « តើកុមារត្រូវធ្វើអ្វីដើម្បីរៀន ហើយថាតើខ្ញុំអាចជួយពួកគេឲ្យទទួលអារម្មណ៍នៃព្រះវិញ្ញាណបរិសុទ្ធដោយរបៀបណា ? »
សប្តាហ៍ទី 1 ៖ ព្រះយេស៊ូវគ្រីស្ទបានបង្រៀនអំពីដំណឹងល្អ ហើយធ្វើជាគំរូដល់យើង ។
ស្វែងរកគោលលទ្ធិ( ច្រៀងចម្រៀង ) ៖ សូមច្រៀងរួមគ្នានូវបទ « Do As I’m Doing » ( ច.ក. ទំព័រ 276 ) ពីរបីដងជាមួយគ្នា ដោយអញ្ជើញកុមារឲ្យជ្រើសរើសនូវសកម្មភាពដើម្បីសម្តែង ។ សូមពន្យល់ថា នៅពេលយើងធ្វើសម្មភាពតាមនរណាម្នាក់ គឺយើងធ្វើតាមគំរូរបស់គាត់ ។ សួរថាតើនរណាបានធ្វើជាគំរូដ៏ឥតខ្ចោះសម្រាប់យើងឲ្យធ្វើតាម ( ព្រះយេស៊ូវគ្រីស្ទ ) ។ សូមអញ្ជើញកុមារឲ្យនិយាយរួមគ្នាថា « ព្រះយេស៊ូវគ្រីស្ទធ្វើជាគំរូសម្រាប់យើង » ។
លើកទឹកចិត្តឲ្យមានការយល់ដឹង( ការអានព្រះគម្ពីរ ) ៖ សូមដាក់តាំងរូបភាពនៃព្រឹត្តិការណ៍ខាងក្រោមនៅលើក្តារខៀន ៖ ព្រះយេស៊ូវគ្រីស្ទទទួលបុណ្យជ្រមុជទឹក ព្រះយេស៊ូវគ្រីស្ទគង់នៅជាមួយកុមារ ព្រះយេស៊ូវគ្រីស្ទអធិស្ឋាន និងព្រះយេស៊ូវគ្រីស្ទកំពុងបង្រៀន ។ សូមអានបទគម្ពីរខាងក្រោមជាមួយនឹងកុមារ ហើយសុំឲ្យកុមារពន្យល់ពីអ្វីដែលព្រះគ្រីស្ទកំពុងបង្រៀននៅក្នុងបទគម្ពីរ ៖ម៉ាកុស 16:15 យ៉ូហាន 13:34–35នីហ្វៃ ទី 3 11:37; នីហ្វៃ ទី3 18:19 ។ ចង្អុលរូបភាពនីមួយៗដោយយឺតៗ ហើយសុំឲ្យកុមារក្រោកឈរ នៅពេលអ្នកចង្អុលទៅរូបមួយដែលបង្ហាញថាល្អបំផុតពីអ្វីដែលព្រះគ្រីស្ទកំពុងធ្វើ តាមអ្វីដែលទ្រង់បានបង្រៀនយើងឲ្យធ្វើ នៅក្នុងបទគម្ពីរដែលអ្នកអាន ។ សូមធ្វើដូចគ្នាដដែលនេះនៅក្នុងព្រះគម្ពីរផ្សេងទៀត ។
កុមារកាន់តែមានគារវភាពថែមទៀត នៅពេលដែលពួកគេត្រូវរួមចំណែកនៅក្នុងការរៀនសូត្រ ។ នៅក្នុងសកម្មភាពនេះ ការធ្វើឲ្យកុមារឈរ និងអង្គុយដោយមានគារវភាពនឹងជួយពួកគេឲ្យយកចិត្តទុកដាក់ ។
លើកទឹកចិត្តឲ្យមានការអនុវត្តន៍( គូររូបភាព ) ៖ សូមឲ្យក្រដាសមួយសន្លឹកដល់កុមារម្នាក់ៗ រួចឲ្យពួកគេគូររូបរបស់ខ្លួនឯងក្នុងការធ្វើតាមគំរូរបស់ព្រះគ្រីស្ទ ។ ឧទាហរណ៍ កុមារអាចគូររូបខ្លួនគាត់ជ្រមុជទឹក បង្រៀនដំណឹងល្អដល់មិត្តភក្តិ ឬជួយដល់នរណាម្នាក់ ។ អញ្ជើញកុមារពីរបីនាក់ឲ្យចែកចាយរូបភាពរបស់ពួកគេជាមួយនឹងកុមារដទៃទៀត ហើយលើកទឹកចិត្តឲ្យពួកគេចែកចាយគំនូរនោះជាមួយនឹងក្រុមគ្រួសាររបស់ពួកគេ ។
សប្តាហ៍ទី 2 ៖ ដោយសារតែដង្វាយធួនរបស់ព្រះគ្រីស្ទ ខ្ញុំអាចប្រែចិត្ត ហើយរស់នៅជាមួយព្រះម្តងទៀត ។
ស្វែងរកគោលលទ្ធិ( ការបំពេញនៅក្នុងចន្លោះ ) ៖ ពីមុនដល់ម៉ោងថ្នាក់កុមារ សូមសរសេរនៅលើក្តារខៀនថា « ដោយសារតែ _______ របស់ព្រះគ្រីស្ទ ខ្ញុំអាច ______ រស់នៅជាមួយ _____ ម្តងទៀត » ។ សូមសរសេរពាក្យដង្វាយធួន ប្រែចិត្ត និងព្រះ នៅលើស្លាកពាក្យខុសៗគ្នា ហើយបិទវានៅក្រោមកៅអីនានានៅក្នុងថ្នាក់ ។ សូមឲ្យកុមារឲ្យស្វែងរកស្លាកពាក្យនោះ ហើយបិទវានៅលើក្តារខៀនតាមចន្លោះត្រឹមត្រូវ ។ សូមអានប្រយោគនេះរួមគ្នា ។
លើកទឹកចិត្តឲ្យមានការយល់ដឹង( អានគម្ពីរ និងឆ្លើយសំណួរ ) ៖ សូមដាក់រូបព្រះគ្រីស្ទនៅក្នុងសួនកែតសេម៉ានី ហើយនិងរូបភាពការឆ្កាងនៅលើក្តារខៀន ។ សូមបិទបាំងរូបភាពដោយប្រើបំណែកក្រដាសតូចៗ ។ នៅលើបំណែកក្រដាសនីមួយៗ សូមសរសេរសំណួរអំពីហេតុការណ៍ដែលកើតមាននៅក្នុងរូបភាព និងសេចក្តីយោងបទគម្ពីរ ដកស្រង់ចេញពី ម៉ាថាយ 26–27 ឬ លូកា 22–23 ដែលមានចម្លើយនៅក្នុងនោះ ។ ( ឧទាហរណ៍ ៖ តើទីកន្លែងដែលព្រះយេស៊ូវ បានទៅអធិស្ឋាន មានឈ្មោះអ្វី ? ម៉ាថាយ 26:36 ) ។ សូមបំបែកកុមារទៅជាក្រុមតូចៗ ហើយស្នើឲ្យក្រុមនីមួយៗមើលបទគម្ពីរ រួចស្វែងរកចម្លើយចំពោះសំណួរនោះ ។ សូមឲ្យក្រុមទាំងឡាយចែកចាយពីចម្លើយដែលពួកគេរកឃើញ ហើយបើកបំណែកក្រដាសដែលបិទបាំងនោះ ដើម្បីមើលរូបភាព ។
ដើម្បីកែសម្រួលសកម្មភាពការអានព្រះគម្ពីរសម្រាប់កុមារតូចៗ សុំឲ្យពួកគេស្តាប់ នៅពេលដែលអ្នកអាន ហើយបន្ទាប់មកក្រោកឈរ នៅពេលពួកគេស្តាប់ឮពាក្យ ឬឃ្លាដែលត្រូវនឹងសំណួរណាមួយ ។
លើកទឹកចិត្តឲ្យមានការអនុវត្តន៍( មើលគោលបំណងមេរៀន ) ៖ សូមពិភាក្សាជាមួយកុមារពីអត្ថន័យនៃពាក្យដង្វាយធួន និងការប្រែចិត្ត ហើយពន្យល់អំពីរបៀបដែលដង្វាយធួនអាចប្រសិទ្ធពរជ័យដល់យើង ( សូមមើលពិតចំពោះសេចក្តីជំនឿ ៖ សេចក្តីយោងដល់បទគម្ពីរទាំងឡាយ [ 2004 ] ទំព័រ 14–20, 132–35 ) ។ សូមបង្ហាញអំណោយមួយដល់កុមារ ។ សូមឲ្យកុមារម្នាក់ព្យាយាមឲ្យអំណោយដល់កុមារម្នាក់ទៀត ហើយឲ្យកុមារម្នាក់ទៀតនោះធ្វើជាបដិសេធមិនទទួលយកអំណោយ ។ សូមពន្យល់ថា នៅពេលយើងមិនទទួលយកអំណោយមួយដែលបានផ្តល់ឲ្យយើង នោះយើងមិនអាចរីករាយនឹងពរជ័យនៃអំណោយនោះទេ ។ សូមឲ្យកុមារស្តាប់ពីអ្វីដែលពួកគេត្រូវធ្វើ ដើម្បីទទួលអំណោយទាននៃដង្វាយធួន នៅពេលដែលអ្នកអានជាមួយគ្នានូវ គោលលទ្ធិ និងសេចក្តីសញ្ញា 19:16 ។
សប្តាហ៍ទី 3 ៖ ពីព្រោះតែព្រះយេស៊ូវបានរស់ឡើងវិញ ខ្ញុំក៏នឹងរស់ឡើងវិញផងដែរ ។
ស្វែងរកគោលលទ្ធិ( ស្តាប់រឿង ) ៖ សូមប្រើរូបភាពនៅទំព័រ 123 ក្នុងសៀវភៅទារកដ្ឋាន ( សូមមើលរូបភាពនៅទំព័រ 121 ) ដើម្បីប្រាប់រឿងពីការរស់ឡើងវិញ ( សូមមើលយ៉ូហាន 19:41–42; 20:1, 11–18 ) ។ សូមពន្យល់ថា នៅពេល ព្រះយេស៊ូវគ្រីស្ទបានរស់ឡើងវិញ រូបកាយ និងវិញ្ញាណរបស់ទ្រង់បានផ្គុំគ្នាឡើងវិញ ការណ៍នេះអាចកើតមានដល់មនុស្សគ្រប់រូប ។ សូមឲ្យកុមារនិយាយថា « ពីព្រោះតែព្រះយេស៊ូវបានរស់ឡើងវិញ ខ្ញុំក៏នឹងរស់ឡើងវិញផងដែរ » ។
លើកទឹកចិត្តឲ្យមានការយល់ដឹង ( ពិភាក្សាពីអារម្មណ៍ ) ៖ នៅលើក្តារខៀន សូមសរសេរនូវពាក្យដែលពិពណ៌នាថាតើពួកសិស្សរបស់ទ្រង់អាចមានអារម្មណ៍បែបណា នៅថ្ងៃដែលព្រះយេស៊ូវសុគត ( ដូចជាទុក្ខសោក សោកសៅ មិនសប្បាយចិត្ត និងអស់សង្ឃឹម ) ។ សូមឲ្យកុមារលើកឡើងនូវពាក្យផ្ទុយគ្នានោះ ( ដូចជា សុភមង្គល រីករាយ សង្ឃឹម និងសេចក្តីជំនឿ ) ហើយសរសេរពាក្យទាំងនោះនៅលើក្តារខៀន ។ ពន្យល់ថា អារម្មណ៍ទាំងនេះគឺជាអារម្មណ៍ដែលពួកសាវកមាននៅពេលដែលព្រះយេស៊ូវបានរស់ឡើងវិញ ។ សូមពិភាក្សានូវពរជ័យមួយចំនួន ដែលបានមកពីការដឹងថាយើងនឹងបានរស់ឡើងវិញ ( សូមមើលអេសាយ 25:8; អាលម៉ា 22:14 ) ។
លើកទឹកចិត្តឲ្យមានការអនុវត្តន៍( ចែកចាយពីអារម្មណ៍ ) ៖ សូមសរសេរនៅលើក្តារខៀន « ខ្ញុំមានអំណរគុណដែលព្រះយេស៊ូវបានរស់ឡើងវិញ ដោយសារ … » សូមអញ្ជើញសមាជិកវួដម្នាក់ដែលមានមនុស្សជាទីស្រឡាញ់ខ្លួន បានទទួលមរណភាពឲ្យមកចូលរួមនៅក្នុងថ្នាក់កុមារ ហើយសុំឲ្យចែកចាយខ្លីៗពីអ្វីដែលគាត់មានអំណរគុណចំពោះការរស់ឡើងវិញ ។ សួរដល់កុមារ ប្រសិនបើពួកគេស្គាល់នរណាម្នាក់ដែលបានទទួលមរណភាព ហើយសុំឲ្យពួកគេបិទភ្នែក ហើយគិតអំពីមនុស្សម្នាក់នោះ ។ សុំឲ្យកុមារមួយក្រោកឈរ ហើយបំពេញឃ្លាដែលមាននៅលើក្តារខៀន ហើយចែកចាយថាតើការរស់ឡើងវិញមានអត្ថន័យយ៉ាងណាចំពោះពួកគេ ។
សប្តាហ៍ទី 4 ៖ ព្រះយេស៊ូវគ្រីស្ទ គឺជាព្រះអង្គសង្រ្គោះរបស់យើង ។
ស្វែងរកគោលលទ្ធិ ( ពិភាក្សាពាក្យ « ព្រះសង្រ្គោះ » ៖ សូមបង្ហាញនូវវត្ថុ ឬរូបភាពមួយចំនួនដែលតំណាងឲ្យអ្នកដែលអាចសង្រ្គោះដល់ជីវិតរបស់យើង ( ដូចជា វេជ្ជបណ្ឌិត នគរបាល ឬសន្តិសុខ ) ហើយពិភាក្សាពីរបៀបដែលពួកគេអាចសង្រ្គោះដល់យើង ។ សូមបង្ហាញរូបភាពរបស់ព្រះយេស៊ូវ និងពន្យល់ថា ទ្រង់គឺជាតួអង្គតែមួយប៉ុណ្ណោះដែលអាចសង្រ្គោះយើងពីផលនៃសេចក្តីស្លាប់ និងអំពើបាបដ៏អស់កល្បនិច្ច ។ សរសេរនៅលើក្តារខៀន នូវពាក្យថា « ព្រះយេស៊ូវគឺជាព្រះអង្គសង្រ្គោះរបស់យើង » ហើយសូមអានវាជាមួយនឹងកុមារ ដោយសង្កត់ន័យទៅលើពាក្យ « ព្រអង្គសង្រ្គោះ » ។
លើកទឹកចិត្តឲ្យមានការយល់ដឹង ( ស្តាប់រឿងក្នុងព្រះគម្ពីរ ) ៖ ប្រាប់ដល់កុមារពីរឿងនិទានមួយចំនួននៅក្នុងព្រះគម្ពីរអំពីប្រជាជនដែលត្រូវបានសង្រ្គោះពីអំពើបាបដោយព្រះអង្គសង្រ្គោះ ( ឧទាហរណ៍ អាលម៉ាជាកូន [ សូមមើលអាលម៉ា 36:6–24], អេណុស [ សូមមើល អេណុស 1:1–8] , ស៊ីអែសរ៉ុម [ សូមមើល អាលម៉ា 15:3-12] ,បិតារបស់ឡាម៉ូណៃ [ សូមមើល អាលម៉ា 22:1–26] បុរសដែលត្រូវបានមកជួបព្រះយេស៊ូវ [ សូមមើល លូកា 5:17–26] ) ។ ពន្យល់ថា តាមរយៈដង្វាយធួនរបស់ព្រះយេស៊ូវគ្រីស្ទ យើងទាំងអស់គ្នានឹងត្រូវបានសង្រ្គោះពីអំពើបាប ។ សូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គសង្រ្គោះ ហើយអញ្ជើញកុមារពីរបីនាក់ឲ្យថ្លែងទីបន្ទាល់របស់ពួកគេអំពីទ្រង់ ។