Mataupu 40
O Samuelu le Sa Lamana O Lo o Ta’uta’u Atu E Uiga Ia Iesu Keriso
O Samuelu, le perofeta Sa Lamana, na alu atu o ia i Saraemila e talai atu i tagata amioleaga o Sa Nifae. Na ia ta’u atu ia i latou e salamo.
Na tuliese e tagata Sa Nifae Samuelu mai le aai, ma na amata ona toe foi atu i lona nuu.
Ae na ta’u atu e le Alii ia Samuelu e toe foi atu i Saraemila ma ta’u atu i tagata mea o le a ta’u atu e le Alii i lona loto.
E le i talia e Sa Nifae Samuelu i lo latou nuu, o lea na a’ea ai e Samuelu aupa o le aai ma lauga atu ai.
Na ia folafola atu o le a faatamaia Sa Nifae i le 400 tausaga seiloga latou te salamo ma faatuatua ia Iesu Keriso.
Na ta’u atu e Samuelu i tagata Sa Nifae ua toe lima tausaga ona soifua mai lea o Iesu Keriso ma o le a ia faasaoina i latou uma o å talitonu ia te ia.
Na ta’u atu e Samuelu ia te i latou e uiga i faailoga o le soifua mai o Iesu. O le a oo mai se fetu fou, ma o le a leai se pogisa i le po a o lumanai le ao e soifua mai ai o ia.
Ona ta’u atu lea e Samuelu ia i latou faailoga o le maliu o Iesu. O le a i ai le pogisa i aso e tolu—o le la, masina, ma fetu o le a lē toe susulu.
O le a i ai foi faititili, uila ma mafuie. O le a soloia mauga, ma o le a faatafunaina aai e tele.
Na talitonu isi tagata Sa Nifae ia Samuelu ma salamo i a latou agasala. Na latou sailia le tagata Sa Nifae amiotonu e igoa ia Nifae, e papatisoina i latou.
E le i talitonu le isi vaega o Sa Nifae ia Samuelu. Na latou fetogi ia te ia i maa ma tafana i u fanafana. Ae na puipuia Samuelu e le Alii, ma e le i lavea o ia i se maa po o se u fanafana.
Ina ua iloa e tagata e lē mafai ona lavea o ia, sa toatele nisi na talitonu ia te ia ma o atu ia Nifae e papatiso ai.
Na aoao atu foi tagata e Nifae e uiga ia Iesu. Na manao o ia latou te talitonu ia Iesu, salamo ma papatisoina.
O le toatele o Sa Nifae, latou te le i talitonu lava ia Samuelu. Na latou taumafai e pu’eina o ia.
Ua oso ifo Samuelu mai le aupa ma sola atu i lona nuu.
Na amata ona aoaoina e Samuelu tagata Sa Lamana. E le i toe faalogoina o ia e tagata Sa Nifae.