Mataupu 49
O Mamona ma Ana Aoaoga
I le tele o tausaga ina ua mavae le asiasiga a Iesu Keriso i tagata Sa Nifae, na tuua ai le ekalesia e se vaega toaitiiti o tagata ma faaigoa i latou o Sa Lamana.
Na oo ina toetoe lava e amioleaga tagata uma o Sa Nifae ma Sa Lamana.
O se alii amiotonu e igoa ia Amarona sa i ai tusitusiga paia. Na faatonuina o ia e le Agaga Paia e natia tusitusiga paia ina ia malupuipuia.
Na ta’u atu e Amarona ia Mamona, o se alii talavou e 10 tausaga, le mea o loo natia ai nei tusitusiga. Na iloa e Amarona e mafai ona ia faatuatuaina Mamona.
Pe a atoa le 24 tausaga o Mamona, ona ia aumaia lea o papatusi a Nifae ma tusia ai mea e uiga i ona tagata.
O le 11 o tausaga o Mamona, na faia ai se taua i le va o Sa Nifae ma Sa Lamana. Na manumalo Sa Nifae, ona toe i ai foi lea o le filemu.
O le amioleaga tele o Sa Nifae na toe aveesea ai e le Alii le au soo e toatolu, ma ua le toe i ai ni vavega ma ni faamalologa. E le i toe taitaiina tagata e le Agaga Paia.
O le 15 o tausaga o Mamona na asiasi atu ai Iesu ia te ia. Na aoaoina e Mamona le tele o mea e uiga i le Faaola ma lona agalelei.
Na manao Mamona e aoao atu i tagata, ae na fetalai atu Iesu ia te ia e aua, ona ua amioleaga tele tagata. Ua faasagatau o latou loto i le Atua.
E le i umi, ae toe amata foi le isi taua. O Mamona e malosi ma tino ese, ma ua filifilia o ia e tagata Sa Nifae e taitaia la latou autau.
Na tau tagata Sa Nifae ma Sa Lamana mo le tele o tausaga. Na taumafai Mamona e uunaia ona tagata e tau mo le puipuiga o o latou aiga ma o latou fale.
Ua amioleaga tele tagata Sa Nifae, ma ua le fesoasoani i ai le Alii.
Na ta’u atu e Mamona i tagata Sa Nifae, na o le pau le auala e mafai ai ona faaolaina i latou o le salamo. Ae sa teena e tagata.
Na latou mitamita i lo latou malosi, ma ua latou faapea mai o le a latou fasiotia uma tagata Sa Lamana. Ona o le amioleaga o tagata Sa Nifae, na le toe taitaia ai e Mamona la latou autau.
Ua amata ona faatoilaloina e Sa Lamana Sa Nifae i taua uma. Ma na filifili Mamona o le a ia toe taitaia le autau a Sa Nifae.
Na ia iloa o le a le manumalo tagata amioleaga o Sa Nifae i le taua. E le i salamo i latou pe tatalo atu mo se fesoasoani.
Na ave uma e Mamona tusitusiga paia mai le mauga na natia ai e Amarona ma tusi ai i tagata o le a latou faitauina ia tusitusiga i se aso.
Na manao o ia e malamalama tagata uma e aofia ai ma tagata Iutaia, e uiga ia Iesu Keriso, salamo ma papatisoina, ma ola i le talalelei ma faamanuiaina.
Na musuia e le Agaga Mamona e tuufaatasi papatusi laiti a Nifae, lea o loo i ai valoaga o le afio mai o Keriso, ma papatusi a Mamona.
Na taitai atu e Mamona tagata Sa Nifae i le nuu o Kumora, lea na latou toe sauniuni ai e tau ma tagata Sa Lamana.
Ua oo ina matua Mamona. Ma na ia iloa o le taua mulimuli lea. Na le manao o ia e maua e tagata Sa Lamana tusitusiga paia ma faaleagaina.
O lea na ia ave atu ai papatusi a Mamona i lona atalii, o Moronae, ma natia le isi vaega o papatusi i le Mauga o Kumora.
Na osofaia ma fasiotia e Sa Lamana tagata uma sei vagana ai ni Sa Nifae e 24. Na manu’a foi Mamona.
Na faanoanoa tele Mamona ona o le toatele o Sa Nifae ua maliliu, ae na ia iloa ua maliliu i latou ona ua latou teena Iesu.
Na taumafai Mamona e aoao atu le upu moni i tagata Sa Nifae. Na ia ta’u atu ia i latou le taua o le faatuatua ia Iesu Keriso.
Na taumafai o ia e aoao i latou e faamoemoe i le Togiola a Iesu Keriso ma maua le alofa, le alofa mama o Keriso.
Ma na tusia foi e Mamona tusi i lona atalii o Moronae, lea na ia aoao atu foi le talalelei i tagata Sa Nifae.
Na tusia foi e Moronae tala e uiga i le matautia o le amoleaga o Sa Nifae. Na ia ta’u atu ia Moronae e tumau i le faatuatua ia Iesu Keriso.
Na fasioti e tagata Sa Lamana Mamona ma tagata uma o Sa Nifae sei vagana ai Moronae, lea na faamaeaina le tusiaina o tusitusiga paia.