“Lēsoni 17: 1 Nīfai 16,” Ngaahi Vitiō ʻo e Tohi ʻa Molomoná: Ngaahi Fakahinohino ʻa e Faiako Seminelí (2019)
“Lēsoni 17: 1 Nīfai 16,” Ngaahi Vitiō ʻo e Tohi ʻa Molomoná: Ngaahi Fakahinohino ʻa e Faiako Seminelí
Ngaahi Vitiō ʻo e Tohi ʻa Molomoná
Lēsoni 17: 1 Nīfai 16
Fakakaukau ʻi he faʻa lotu ki he founga ʻe ala tokoni ai e Ngaahi Vitiō ʻo e Tohi ʻa Molomoná ki hoʻo kau akó ke nau ʻiloʻi, mahino, ongoʻi e moʻoni mo e mahuʻinga, pea moʻui ʻaki e tokāteline mo e ngaahi tefitoʻi moʻoni ne akoʻi ʻi he Tohi ʻa Molomoná.
“Ko e Foaki ʻe he ʻEikí ʻa e Liahoná” (3:02)
Fakaʻaongaʻi ʻo e Vitiō Ko ʻEní
Te ke lava ʻo huluʻi e vitiō ko ʻení ʻi hoʻo aʻu ki he konga ʻo e lēsoní ʻoku pehē:
“Fakaafeʻi ha tokotaha ako ke ne lau leʻolahi e 1 Nīfai 16:9–10. Fakaʻaliʻali e tā Ko e Liahoná (62041; Tohi Fakatātā ʻo e Ongoongoleleí [2009], fika 68). Fakamahinoʻi ange e fakafofongaʻi ʻe he tokotaha ʻātí e Liahoná.
-
ʻOkú ke pehē ko e hā ha ngaahi founga naʻe ʻaonga ai ha faʻahinga meʻaʻofa pehē kia Līhai mo hono fāmilí ʻi he ngaahi tūkunga ne nau ʻi aí?
“Fakaafeʻi ha kau ako tokosiʻi pē ke nau taufetongi hono lau leʻolahi e 1 Nīfai 16:16–19.
-
Naʻe ʻaonga fēfē nai ʻa e Liahoná ki he fāmili ʻo Līhaí?
-
Naʻe faingofua nai pe faingataʻa ʻa e fononga ʻa e fāmili ʻo Līhaí hili ʻenau maʻu ʻa e Liahoná? Ko e hā e meʻa ʻoku fakahā ʻe Nīfai ʻi he 1 Nīfai 16:17–19 ke poupouʻi hoʻo talí?”
Te ke lava ʻo huluʻi e vitiō ko ʻení kae ʻoua ʻe lau e ngaahi vēsí mo fakaʻaliʻali e taá, pea fakaafeʻi e kau akó ke nau kumi e ngaahi tali ki he ngaahi fehuʻi mei he konga ko ʻeni ʻo e naunau fakalēsoní. Mahalo te ke fie tomuʻa fakaʻaliʻali e ngaahi fehuʻí mo e ngaahi vēsí. Hili hono huluʻi e vitioó, fakaafeʻi e kau akó ke vahevahe ʻenau tali ki he ngaahi fehuʻí. Poupouʻi e kau akó ke fakaʻilongaʻi ʻi heʻenau folofolá ʻa e ngaahi kupuʻi lea mahuʻinga ʻi heʻenau kumi ʻi he ngaahi veesi ʻoku ʻoatú. Hili iá pea hoko atu e naunau fakalēsoní.
“Ko e Motu ʻa e Kaufana ʻa Nīfaí” (4:46)
Huluʻi pē ʻa e 2:22 ʻo e foʻi vitiō 4:46.
Fakaʻaongaʻi ʻo e Vitiō Ko ʻEní
Te ke lava ʻo huluʻi e vitiō ko ʻení ʻi hoʻo aʻu ki he konga ʻo e lēsoní ʻoku pehē:
“Fakaafeʻi e vaeua ʻo e kalasí ke nau fekumi fakalongolongo ʻi he 1 Nīfai 16:20–22, ki he founga naʻe tali ʻaki ʻe he niʻihi ʻo e fāmili ʻo Līhaí ʻa e ʻahiʻahi ko ia ʻi he motu e kaufana ʻa Nīfaí. Fakaafeʻi ʻa e vaeua ʻe taha ʻo e kalasí ke nau fekumi ʻi he 1 Nīfai16:23–25, 30–32, ki he tali ʻa Nīfai ki he ʻahiʻahi ko ʻení mo e founga e kaunga ʻene talí ki hono fāmilí. Hili e lipooti ʻe he kulupu takitaha ʻa e meʻa ne nau ʻiló, fehuʻi ange:
-
Ko e hā ʻoku tau ako ʻi hono fakafehoanaki e ongo tali ko ʻení ki he ʻahiʻahi tatau pē?
-
Ko e hā ʻoku mahuʻinga ai ʻa e ʻalu ʻa Nīfai ki heʻene tamaí ke maʻu ha fakahinohinó, neongo naʻe lāunga ʻa Līhaí?”
Te ke lava ʻo huluʻi e vitiō ko ʻení kae ʻoua ʻe lau e ngaahi vēsí, pea fakaafeʻi e kau akó ke nau kumi e ngaahi tali ki he ongo fehuʻi mei he konga ko ʻeni ʻo e naunau fakalēsoní. Mahalo te ke fie tomuʻa fakaʻaliʻali e ngaahi fehuʻí mo e ngaahi vēsí. Hili e vitioó, fakaafeʻi e kau akó ke vahevahe ʻenau tali ki he ngaahi fehuʻí pea poupouʻi kinautolu ke toe vakaiʻi e ngaahi veesi ʻoku ʻoatú, ʻo fakaʻilongaʻi e ngaahi kupuʻi lea tataú ʻi heʻenau maʻu ia ʻi heʻenau folofolá. Hili iá pea hoko atu e naunau fakalēsoní.