“Lēsoni 7: 1 Nīfai 2,” Ngaahi Vitiō ʻo e Tohi ʻa Molomoná: Ngaahi Fakahinohino ʻa e Faiako Seminelí (2019)
“Lēsoni 7: 1 Nīfai 2,” Ngaahi Vitiō ʻo e Tohi ʻa Molomoná: Ngaahi Fakahinohino ʻa e Faiako Seminelí
Ngaahi Vitiō ʻo e Tohi ʻa Molomoná
Lēsoni 7: 1 Nīfai 2
Fakakaukau ʻi he faʻa lotu ki he founga ʻe ala tokoni ai e Ngaahi Vitiō ʻo e Tohi ʻa Molomoná ki hoʻo kau akó ke nau ʻiloʻi, mahino, ongoʻi e moʻoni mo e mahuʻinga, pea moʻui ʻaki e tokāteline mo e ngaahi tefitoʻi moʻoni ne akoʻi ʻi he Tohi ʻa Molomoná.
“Ko e Mavahe ʻa e Fāmili ʻo Līhaí ki he Feituʻu Maomaonganoá” (3:47)
Fakaʻaongaʻi ʻo e Vitiō Ko ʻEní
ʻE lava ʻo fakaʻaongaʻi e konga ʻuluaki ʻo e vitiō ko ʻení (mei he 00:00 ki he 02:31) ke tokoni ke aleaʻi ʻe he kau akó e fehuʻi ko ʻeni mei he lēsoní:
“Ko e hā ʻokú ke ako mei he ngaahi fili ʻa Līhai ki he meʻa ke ʻavé mo e meʻa ke tukú?”
ʻE lava ʻo fakaʻaongaʻi e konga ua ʻo e vitiō ko ʻení (mei he 2:32 ki he 3:47) ke tokoni ke mahino lelei ange ki he kau akó e fakamatala fakamahino mo e puipuituʻa ko ʻeni mei he lēsoní:
“Mahalo naʻe tataki ʻe Līhai hono fāmilí ki he Tahi Kulokulá ofi ki he Kūlifa ʻo ʻAkapaá, meimei ki he maile ʻe 180 nai (kilomita ʻe 290) mei Selusalema. Naʻe fie maʻu heni ke fai ha fononga ʻi he fonua vela mo pakukā, pea ʻiloa he kau kaihaʻa naʻa nau tatali ke kaihaʻa mei he kau fononga ne ʻikai ke mateuteú. Hili ʻenau aʻu ki he Tahi Kulokulá, naʻe toe fononga e fāmilí he ʻaho ʻe tolu kimuʻa pea nau toki nofo kemi ʻi ha teleʻa ʻi ha veʻe vaitafe. Naʻe mei ʻaho ʻe 14 ʻa e fononga mei Selusalema ki he teleʻa he veʻe vaitafé. Mahalo ʻe fie maʻu ke ke fakamanatu ki he kau akó ʻa e ngaahi vā mamaʻo mo e ngaahi taimi ko ʻení ʻi heʻenau lau kau ki he fononga foki ʻa Nīfai mo hono ngaahi tokouá ki Selusalemá.”
Fakakaukau ke huluʻi e vitioó hili hono ʻoange e fakamatala puipuituʻá.
“Ko e Lotua ʻe Nīfai ʻa Leimana mo Lemiuelá” (6:02)
Fakaʻaongaʻi ʻo e Vitiō Ko ʻEní
Te ke lava ʻo huluʻi e vitiō ko ʻení ʻi hoʻo aʻu ki he konga ʻo e naunau fakalēsoní ʻoku pehē:
“ʻAi ke lau fakalongolongo ʻe he kau akó ʻa e 1 Nīfai 2:11–14.”
Fakakaukau ke fakaʻaliʻali e ngaahi fehuʻi ko ʻeni mei he naunau fakalēsoní pea fakaafeʻi e kau akó ke kumi ha ngaahi tali ʻi heʻenau mamata ʻi he vitioó.
“Ko e hā e niʻihi ʻo e ngaahi ʻuhinga naʻe lāunga ai ʻa Leimana mo Lēmiuela kau ki heʻena tamaí?
“ʻI he 1 Nīfai 2:11, ʻoku ʻuhinga e foʻi lea ko e kia-kekeva ki he hīkisia pe taʻe-fie-auna. Ko e hā ʻoku faʻa fakatupu ai ʻe he ngaahi ongoʻi hīkisiá ke lāunga e kakaí?
“ʻOkú ke pehē ko e hā ʻoku hoko ai e lāungá he taimi ʻe niʻihi ko e tupu mei he ʻikai mahino ki he kakaí ʻa e ngaahi fetuʻutaki mo e ʻOtuá?”
Hili e mamata ʻa e kau akó ʻi he vitioó, fakaafeʻi kinautolu ke fakaʻilongaʻi e ngaahi kupuʻi lea ʻi heʻenau folofolá mei he veesi ʻokú ne poupouʻi ʻenau talí. Hoko atu leva mo e lēsoní ʻo hangē ko hono ʻoatu ʻi he tohi lēsoní.