“Faaaogaina o le Sau, Muliumuli Mai ia te A’u—Mo Aiga ma le Ekalesia,” Sau, Mulimuli Mai ia te A’u—Mo Aiga ma le Ekalesia: Tusi a Mamona 2024 (2023)
“Faaaogaina o le Sau, Mulimuli Mai ia te A’u—Mo Aiga ma le Ekalesia,” Sau, Mulimuli Mai ia te A’u—Mo Aiga ma le Ekalesia: 2024
Faaaogaina o le Sau, Mulimuli Mai ia te A’u—Mo Aiga ma le Ekalesia
E Mo Ai Lenei Punaoa?
O lenei punaoa e mo soo se tasi e manao e aoao mai le Tusi a Mamona—taitoatasi, o se aiga, ma i vasega o le Ekalesia. Afai e te lei suesueina e le aunoa tusitusiga paia i le taimi ua tuanai, ua mafai ona fesoasoani lenei punaoa ia te oe e amata ai. Afai ua i ai sau mausa lelei i le suesueina o tusitusiga paia, e mafai ona fesoasoani lenei punaoa ia e maua ai nisi mau aafiaga ‘anoa.
Tagata Taitoatasi ma Aiga i le Fale
O le nofoaga sili e aoao ai le talalelei o le aiga. O ou faiaoga i le lotu e mafai ona lagolagoina oe, ma e mafai ona e maua le faamalosiauga mai isi tagata o le uarota. Ae ina ia ola ai faaleagaga, e manaomia e oe ma lou aiga le fafagaina i aso taitasi mai “le afioga lelei a le Atua” (Moronae 6:4; tagai foi i le Russell M. Nelson, “Malelega Amata,” Liahona, Nov. 2018, 6–8).
Faaaoga lenei punaoa i soo se auala e fesoasoani ai ia te oe. O otootoga o loo faamamafa mai ai nisi o upumoni e faavavau o loo maua i le Tusi a Mamona ma fautuaina mai ai manatu ma gaoioiga e fesoasoani ia te oe e suesue taitoatasi ai tusitusiga paia, faatasi ma lou aiga, po o uo. A o e suesue, mulimuli i le taitaiga a le Agaga ia maua upumoni e faavavau e taua ia te oe. Vaavaai mo savali a le Atua mo oe, ma mulimuli i uunaiga e te maua.
Faiaoga ma Tagata Aoao i le Lotu
Afai e te faiaoga i se vasega o le Peraimeri, se vasega a le autalavou po o tagata matutua o le Aoga Sa, se korama a le Perisitua Arona, po o se vasega a Tamaitai Talavou, ua uunaia oe e faaaoga otootoga o i lenei punaoa a o e sauni e aoao atu. O leSau, Mulimuli Mai ia te A’u—Mo Aiga ma le Ekalesia o le mataupu aoaoina mo lau vasega i le Aso Sa. O manatu e aoao ai i lenei punaoa ua mamanuina mo le aoaoina i le aiga ma i le lotu. A o e sauni e aoao atu, amata i le i ai o ou lava aafiaga i tusitusiga paia. O lau tapenaga aupito tāua lava o le a tupu a o e sailiili i tusitusiga paia ma saili musumusuga a le Agaga Paia. Vaavaai mo upumoni e faavavau e fesoasoani ia te oe e avea atili ai faapei o le Tama Faalelagi ma Iesu Keriso. O le Sau, Mulimuli Mai ia te A’u e mafai ona fesoasoani ia te oe e faailoa ai nisi o nei upumoni ma malamalama ai i le matalalaga o tusitusiga paia.
Ia manatua o le aoaoina o le talalelei, i le mea sili, e faatotonugalemu i le aiga ma lagolagoina e le Ekalesia. I se isi faaupuga, o lou tiutetauave autu lava o le lagolagoina lea o tagata o loo e aoaoina i a latou taumafaiga e aoao ma ola i le talalelei i le aiga. Tuu atu ia i latou ni avanoa e faasoa mai ai o latou aafiaga, manatu, ma fesili e uiga i fuaitau o mau. Valaaulia i latou e faasoa mai upumoni na latou maua. E sili atu le taua o lenei mea nai lo le taumafai ia aofia ai se aofaiga faapitoa o anomea.
Peraimeri
O lau tapenapenaga e aoao atu le Peraimeri e amata a o e suesue patino i le Tusi a Mamona ma faatasi ai ma lou aiga. A o e faia, ia faalogo i uunaiga ma malamalamaaga faaleagaga mai le Agaga Paia e uiga i tamaiti i lau vasega Peraimeri. Ia agaga tatalo, ma e mafai e le Agaga ona musuia oe i manatu e fesoasoani ia i latou e aoao le talalelei a Iesu Keriso.
A o e sauni e aoao atu, e te ono maua ni lagona musuia faaopoopo e ala i le suesueina o manatu taitasi e aoao atu ai i lenei punaoa. O otootoga taitasi i le Sau, Mulimuli Mai ia te A’u—Mo Aiga ma le Ekalesia o loo i ai se vaega ua faaautuina “Manatu mo le Aoaoina o Tamaiti.” Mafaufau i nei manatu o ni fautuaga e faaosofia ai au musumusuga. E te iloa tamaiti i lau vasega Peraimeri—ma o le a sili atu lou iloa o i latou a o e fegalegaleai ma i latou i le vasega. E silafia foi e le Atua i latou, ma o le a Ia musuia oe i auala sili e aoao ma faamanuia ai i latou.
Atonu na mafai ona fai e tamaiti o lau vasega nisi o gaoioiga i le Sau, Mulimuli Mai ia te A’u faatasi ma o latou aiga. Ua lelei lena. E lelei le faifai soo. Mafaufau e valaaulia tamaiti e fefaasoaai i le tasi ma le isi mea na latou aoaoina i le fale—e ui e tatau foi ona e fuafuaina ni auala mo tamaiti e auai ai e tusa lava pe latou te le o aoaoina i le fale. E sili ona lelei le aoaoina e tamaiti o upumoni o le talalelei pe a faifai soo le aoao atu o nei upumoni i ni gaoioiga eseese. A e iloa o se gaoioiga e aoao mai ai e lelei mo tamaiti, fuafua e toe fai ma toe fai, aemaise pe a o e faiaoga i tamaiti laiti. E mafai foi ona e toe faamanatu se gaoioiga mai se lesona talu ai.
I masina e lima Aso Sa, e fautuaina faiaoga o le Peraimeri e sui le otootoga o le Sau, Mulimuli Mai ia te A’u i le Aso Sa lona lima i se tasi pe sili atu o gaoioiga e aoao ai i le “Faaopoopoga E: Mo le Peraimeri—Sauniaina o Fanau mo se Olaga Atoa i luga o le Ala o feagaiga a le Atua.”
Vasega a le Autalavou ma Tagata Matutua o le Aoga Sa
O se tasi o mafuaaga autu tatou te potopoto ai i vasega o le Aoga Sa o le lagolago ma uunaia e le tasi le isi a o tatou taumafai e mulimuli ia Iesu Keriso. O se auala faigofie e faia ai lenei mea o le fai atu lea o se fesili e pei o le “O le a se mea na aoao atu e le Agaga Paia ia te oe i lenei vaiaso a o e suesueina le Tusi a Mamona i le Sau, Mulimuli Mai ia te A’u?” O tali i lenei fesili e mafai ona taitai atu ai i ni talanoaga anoa e fausia ai le faatuatua ia Iesu Keriso ma Lana talalelei.
Ona mafai lea ona e valaaulia le talanoaga e faavae i fautuaga mo suesuega i le Sau , Mulimuli Mai ia te A’u. Mo se faataitaiga, o se manatu mo suesuega e ono fautuaina ai le sailiili i le Alema 36 ma le faia o se lisi o upu o loo aoao mai ai e uiga i le matafaioi a le Faaola i le salamo. E mafai ona e fai i tagata o le vasega e faasoa mai ma talanoa e uiga i upu na latou maua. Pe e mafai foi ona e faaaluina sina taimi e fai faatasi ai le lisi o se vasega.
Vasega o le Korama a le au Perisitua Arona ma Vasega a Tamaitai Talavou
Pe a potopoto korama a le Perisitua Arona ma vasega a Tamaitai Talavou i Aso Sa, e fai si ese o lo latou faamoemoega mai se vasega o le Aoga Sa. E faaopoopo atu i le fesoasoani o le tasi i le isi e aoao le talalelei a Iesu Keriso, e fono foi nei vaega e fefautuaai faatasi e uiga i le faataunuuina o le galuega o le faaolataga ma le faaeaga (tagai Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 1.2). Latou te faia lenei mea i lalo o le taitaiga a au peresitene o vasega ma korama.
Mo lenei mafuaaga, e tatau i fonotaga taitasi a korama po o vasega ona amata i se uso o le au peresitene o le korama po o le vasega e taitaia se talanoaga e uiga i taumafaiga ia, mo se faataitaiga, ola i le talalelei, auauna atu i tagata e manaomia le fesoasoani, faasoa atu le talalelei, pe auai i le galuega o le malumalu ma talafaasolopito o aiga.
A maea lenei taimi mo le fefautuaai faatasi, e taitai e se faiaoga le vasega po o le korama i le aoaoina faatasi o le talalelei. O taitai matutua po o tagata o le vasega po o le korama e mafai ona tofia e aoao atu. O le au peresitene o le vasega po o le korama, e feutagai ma taitai matutua, e faia nei tofitofiga.
O tagata ua tofia e aoao atu e tatau ona saunia e ala i le faaaogaina o fautuaga e aoao ai i le otootoga faalevaiaso o le Sau, Mulimuli Mai ia te A’u. I otootoga taitasi, o lenei aikona o loo faailoa mai ai se gaoioiga e faapitoa le talafeagai i le autalavou. Peitai, o soo se fautuaga i le otootoga e mafai ona faaaoga o se gaoioiga e aoao ai mo le autalavou.
Mo se faataitaiga o le lisi o mataupu mo fonotaga a korama ma vasega, tagai i le faaopoopoga O.