“ວັນທີ 1–7 ເດືອນມັງກອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ. ໜ້າຄຳນຳຂອງພຣະຄຳພີມໍມອນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 1–7 ເດືອນມັງກອນ. ໜ້າຄຳນຳຂອງພຣະຄຳພີມໍມອນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
ວັນທີ 1–7 ເດືອນມັງກອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ
ໜ້າຄຳນຳຂອງພຣະຄຳພີມໍມອນ
ກ່ອນທ່ານຈະອ່ານເຖິງ 1 ນີໄຟ ບົດທີ 1, ທ່ານຈະເຫັນໄດ້ວ່າ ພຣະຄຳພີມໍມອນ ບໍ່ໄດ້ເປັນໜັງສືທີ່ທຳມະດາ. ໜ້າຄຳນຳຂອງມັນ ບັນຍາຍເບື້ອງຫລັງ ທີ່ບໍ່ເໝືອນໜັງສືເຫລັ້ມອື່ນໆ—ລວມທັງການຢ້ຽມຢາມຈາກທູດສະຫວັນ, ບັນທຶກຂອງສະໄໝບູຮານ ທີ່ຖືກຝັງໄວ້ເປັນເວລາຫລາຍສັດຕະວັດ ຢູ່ຄ້ອຍພູ, ແລະ ຊາຍໜຸ່ມຄົນໜຶ່ງໄດ້ແປບັນທຶກໂດຍອຳນາດຂອງພຣະເຈົ້າ. ພຣະຄຳພີມໍມອນບໍ່ພຽງແຕ່ເປັນປະຫວັດສາດເຖິງຄວາມສີວິໄລຂອງຊາວອາເມຣິກາໃນສະໄໝບູຮານເທົ່ານັ້ນ. ມັນມີຈຸດປະສົງທີ່ຈະຊັກຊວນໃຫ້ທຸກຄົນຍອມຮັບ “ວ່າ ພຣະເຢຊູຄືພຣະຄຣິດ” (ໜ້າວິເຄາະສະບັບຂອງພຣະຄຳພີມໍມອນ), ແລະ ພຣະເຈົ້າເອງໄດ້ຊີ້ນຳວິທີທີ່ມັນຖືກຂຽນ, ວິທີທີ່ມັນຖືກຮັກສາ, ແລະ ວິທີທີ່ມັນມີໃຫ້ເຮົາໃຊ້. ປີນີ້, ເມື່ອທ່ານອ່ານພຣະຄຳພີມໍມອນ, ອະທິຖານກ່ຽວກັບມັນ, ແລະ ນຳໃຊ້ຄຳສອນຂອງມັນ, ແລ້ວທ່ານຈະເຊື້ອເຊີນອຳນາດຂອງພຣະຜູ້ຊ່ວຍໃຫ້ລອດໃຫ້ມາສູ່ຊີວິດຂອງທ່ານ. ແລະ ທ່ານຈະຮູ້ສຶກຖືກດົນໃຈທີ່ຈະກ່າວ, ດັ່ງທີ່ພະຍານສາມຄົນໄດ້ກ່າວຢູ່ໃນປະຈັກພະຍານຂອງພວກເພິ່ນວ່າ, “ມັນເປັນສິ່ງທີ່ອັດສະຈັນຕໍ່ສາຍຕາ [ຂອງເຮົາ].”
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ໜ້າວິເຄາະສະບັບຂອງພຣະຄຳພີມໍມອນ
ການສຶກສາພຣະຄຳພີມໍມອນສາມາດເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໃນພຣະເຢຊູຄຣິດ.
ໜ້າວິເຄາະສະບັບຂອງພຣະຄຳພີມໍມອນ ໃຫ້ຂໍ້ມູນຫລາຍກວ່າພຽງແຕ່ຊື່ປຶ້ມເທົ່ານັ້ນ. ໃນບັນດາສິ່ງອື່ນໆ, ມັນຍັງບອກເຖິງຈຸດປະສົງຫລາຍຢ່າງ ຂອງບັນທຶກທີ່ສັກສິດເຫລັ້ມນີ້. ໃຫ້ຊອກຫາຈຸດປະສົງເຫລົ່ານີ້ຢູ່ໃນໜ້າວິເຄາະສະບັບ. ຄຳຖາມທີ່ຄ້າຍຄືກັນເຫລົ່ານີ້ສາມາດຊ່ວຍທ່ານຂະນະທີ່ທ່ານໄຕ່ຕອງວ່າ: ເປັນຫຍັງເຮົາຈຶ່ງມີພຣະຄຳພີມໍມອນ? ພຣະຄຳພີມໍມອນແຕກຕ່າງຈາກໜັງສືເຫລັ້ມອື່ນໆແນວໃດ?
ດຽວນີ້ອາດເປັນເວລາທີ່ດີ ທີ່ຈະວາງແຜນເປັນການສ່ວນຕົວ ຫລື ເປັນຄອບຄົວສຳລັບການອ່ານພຣະຄຳພີມໍມອນໃນປີນີ້. ທ່ານຈະອ່ານເມື່ອໃດ ແລະ ຢູ່ໃສ? ທ່ານຈະເຊື້ອເຊີນພຣະວິນຍານໃຫ້ເຂົ້າມາສູ່ການສຶກສາຂອງທ່ານແນວໃດ? ມີຫຍັງເປັນພິເສດບໍທີ່ທ່ານຈະຊອກຫາຂະນະທີ່ທ່ານສຶກສາ? ຍົກຕົວຢ່າງ, ທ່ານອາດຊອກຫາຂໍ້ພຣະຄຳພີທີ່ບັນລຸຈຸດປະສົງທີ່ທ່ານໄດ້ພົບເຫັນຢູ່ໃນໜ້າວິເຄາະສະບັບ? ທ່ານອາດບັນທຶກລາຍຊື່ຂອງຂໍ້ຕ່າງໆລົງໄວ້ທີ່ເສີມສ້າງສັດທາຂອງທ່ານໃນພຣະເຢຊູຄຣິດ.
ເບິ່ງ 2 ນີໄຟ 25:26; ໂມໄຊຢາ 3:5–8; ແອວມາ 5:48; 7:10–13; ຮີລາມັນ 5:12; 3 ນີໄຟ 9:13–18; 11:6–14; ໂມໂຣໄນ 10:32–33 ນຳອີກ.
ຄຳສັນຍາຂອງສາດສະດາ. ປະທານຣະໂຊ ເອັມ ແນວສັນ ໄດ້ກ່າວວ່າ, “ຂ້າພະເຈົ້າສັນຍາວ່າ ເມື່ອທ່ານໄຕ່ຕອງສິ່ງທີ່ທ່ານສຶກສາ [ຢູ່ໃນພຣະຄຳພີມໍມອນ], ປະຕູສະຫວັນຈະເປີດອອກ, ແລະ ທ່ານຈະໄດ້ຮັບຄຳຕອບໃຫ້ແກ່ຄຳຖາມຂອງທ່ານເອງ ແລະ ໄດ້ຮັບການຊີ້ນຳສຳລັບຊີວິດຂອງທ່ານເອງ” (“The Book of Mormon: What Would Your Life Be Like without It?,” Liahona, Nov. 2017, 62–63).
ຄຳນຳຕໍ່ພຣະຄຳພີມໍມອນ; “ປະຈັກພະຍານຂອງພະຍານສາມຄົນ”; “ປະຈັກພະຍານຂອງພະຍານແປດຄົນ”
![]()
ຮູບພາບໄອຄອນຫ້ອງຮຽນສາດສະໜາ
ພຣະວິນຍານບໍລິສຸດສາມາດເປັນພະຍານຕໍ່ທ່ານວ່າ ພຣະຄຳພີມໍມອນແມ່ນຈິງແທ້, ແມ່ນແຕ່ຖ້າຫາກທ່ານບໍ່ເຄີຍເຫັນແຜ່ນຈາລຶກຄຳ ຄືກັນກັບພະຍານສາມຄົນ ແລະ ພະຍານແປດຄົນໄດ້ເຫັນກໍຕາມ. ຂະນະທີ່ທ່ານອ່ານ ຖ້ອຍຄຳຂອງພວກເພິ່ນ, ໃຫ້ຄິດກ່ຽວກັບວ່າ ປະຈັກພະຍານຂອງພວກເພິ່ນເພີ່ມຄວາມເຂັ້ມແຂງໃຫ້ແກ່ປະຈັກພະຍານຂອງທ່ານແນວໃດ.
ສິ່ງໃດດົນໃຈທ່ານກ່ຽວກັບວິທີທີ່ພະຍານເຫລົ່ານີ້ໄດ້ແບ່ງປັນປະຈັກພະຍານຂອງພວກເພິ່ນເຖິງພຣະຄຳພີມໍມອນ? ໃຫ້ໄຕ່ຕອງວິທີທີ່ທ່ານຈະສາມາດແບ່ງປັນປະຈັກພະຍານຂອງທ່ານເຖິງພຣະຄຳພີມໍມອນ—ໂດຍສະເພາະພະຍານເຖິງພຣະເຢຊູຄຣິດ. ຍົກຕົວຢ່າງ, ໃຫ້ວາດພາບເຫັນວ່າ ທ່ານກຳລັງເວົ້າລົມກັບເພື່ອນຄົນໜຶ່ງ ຜູ້ທີ່ບໍ່ເຄີຍໄດ້ຍິນກ່ຽວກັບພຣະຄຳພີມໍມອນມາກ່ອນ. ທ່ານຈະບອກລາວຫຍັງແດ່ກ່ຽວກັບພຣະຄຳພີມໍມອນ? ທ່ານຈະພະຍາຍາມດົນໃຈເພື່ອນຂອງທ່ານໃຫ້ອ່ານພຣະຄຳພີແນວໃດ? ໃຫ້ຄິດທີ່ຈະທົບທວນ ຄຳນຳຕໍ່ພຣະຄຳພີມໍມອນ. ທ່ານອາດພົບເຫັນລາຍລະອຽດທີ່ເປັນປະໂຫຍດ ເພື່ອຈະແບ່ງປັນກັບເພື່ອນຂອງທ່ານ. ວິດີໂອດັ່ງຕໍ່ໄປນີ້ອາດໃຫ້ແນວຄິດແກ່ທ່ານນຳອີກ:
ໃຫ້ຄິດທີ່ຈະຂຽນລາຍຊື່ຂອງສິ່ງທີ່ທ່ານຈະແບ່ງປັນກັບເພື່ອນຄົນໜຶ່ງຂອງທ່ານກ່ຽວກັບພຣະຄຳພີມໍມອນ. ໃຫ້ພະຍາຍາມແບ່ງປັນພຣະຄຳພີມໍມອນໂດຍການໃຊ້ ແອັບພຣະຄຳພີມໍມອນ.
ເບິ່ງ Ronald A. Rasband, “This Day,” Liahona, Nov. 2022, 25–28; Gospel Topics, “Book of Mormon,” ຫ້ອງສະໝຸດພຣະກິດຕິຄຸນ; “ການອະທິຖານຄັ້ງທຳອິດຂອງໂຈເຊັບ ສະມິດ,” ເພງສວດ ແລະ ເພງຂອງເດັກນ້ອຍ, 14.
ພະຍານສາມຄົນໄດ້ສະແດງປະຈັກພະຍານເຖິງພຣະຄຳພີມໍມອນ.
“ປະຈັກພະຍານຂອງສາດສະດາໂຈເຊັບ ສະມິດ”
ການອອກມາຂອງພຣະຄຳພີມໍມອນເປັນສິ່ງມະຫັດສະຈັນ.
ຖ້າຫາກມີຄົນຖາມທ່ານ ວ່າພຣະຄຳພີມໍມອນມາຈາກໃສ, ທ່ານຈະຕອບວ່າແນວໃດ? ທ່ານຈະບັນຍາຍເຖິງການມີສ່ວນກ່ຽວຂ້ອງຂອງພຣະເຈົ້າໃນການມອບພຣະຄຳພີມໍມອນໃຫ້ເຮົາແນວໃດ? ຂະນະທີ່ທ່ານອ່ານ ປະຈັກພະຍານຂອງໂຈເຊັບ ສະມິດ, ໃຫ້ເອົາໃຈໃສ່ຕໍ່ວິທີທີ່ເພິ່ນໄດ້ບັນຍາຍມັນ. ອີງຕາມສິ່ງທີ່ທ່ານໄດ້ອ່ານ, ທ່ານຄິດວ່າ ພຣະເຈົ້າຮູ້ສຶກແນວໃດກ່ຽວກັບຄວາມສຳຄັນຂອງພຣະຄຳພີມໍມອນ?
ເບິ່ງ Ulisses Soares, “The Coming Forth of the Book of Mormon,” Liahona, May 2020, 32–35; Saints, vol. 1, The Standard of Truth, 21–30; Gospel Topics Essays, “Book of Mormon Translation,” ຫ້ອງສະໝຸດພຣະກິດຕິຄຸນ ນຳອີກ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ໜ້າວິເຄາະສະບັບຂອງພຣະຄຳພີມໍມອນ
ການອ່ານພຣະຄຳພີມໍມອນຊ່ວຍໃຫ້ເຮົາມີສັດທາໃນພຣະເຢຊູຄຣິດ.
-
ໃຫ້ລູກໆຂອງທ່ານເບິ່ງ ແລະ ຈັບບາຍພຣະຄຳພີມໍມອນ. ຊ່ວຍພວກເຂົາຊີ້ໄປຫາຊື່ລອງ, ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ. ທ່ານອາດຊ່ວຍພວກເຂົາໃຫ້ຊອກຫາ, ຢູ່ທີ່ໜ້າວິເຄາະສະບັບ, ວະລີທີ່ວ່າ “ພຣະເຢຊູຄື ພຣະຄຣິດ, ພຣະເຈົ້າຜູ້ສະຖິດນິລັນດອນ, ຜູ້ຊຶ່ງສະແດງພຣະອົງເອງໃຫ້ປະຈັກແກ່ປະຊາຊາດທັງປວງ.” ຊ່ວຍໃຫ້ພວກເຂົາເຂົ້າໃຈວ່າ ນີ້ໝາຍຄວາມວ່າ ພຣະຄຳພີມໍມອນສິດສອນເຮົາກ່ຽວກັບພຣະເຢຊູຄຣິດ. ບອກພວກເຂົາສັ້ນໆວ່າ ພຣະຄຳພີມໍມອນໄດ້ເພີ່ມຄວາມເຂັ້ມແຂງໃຫ້ແກ່ສັດທາຂອງທ່ານໃນພຣະເຢຊູຄຣິດແນວໃດ. ທ່ານກໍສາມາດຖາມພວກເຂົາກ່ຽວກັບເລື່ອງພຣະຄຳພີມໍມອນທີ່ພວກເຂົາມັກຫລາຍນຳອີກ. ການຮ້ອງເພງ “ຈາລຶກທອງຄຳ” (ເພງສວດ ແລະ ເພງຂອງເດັກນ້ອຍ, 71) ສາມາດເຕືອນພວກເຂົາເຖິງເລື່ອງລາວບາງເລື່ອງ.
ພຣະຄຳພີມໍມອນເປັນສີລາສຳຄັນຂອງສາດສະໜາຂອງເຮົາ.
-
ໜ້າກິດຈະກຳຂອງອາທິດນີ້ ແລະ ພາບຢູ່ຂ້າງລຸ່ມສາມາດຊ່ວຍລູກໆຂອງທ່ານໃຫ້ເຂົ້າໃຈຖ້ອຍຄຳຂອງໂຈເຊັບ ສະມິດ ຢູ່ໃນ ຄຳນຳຕໍ່ພຣະຄຳພີມໍມອນ: “ພຣະຄຳພີມໍມອນ [ເປັນ] ສີລາສຳຄັນຂອງສາດສະໜາຂອງເຮົາ.” ມັນອາດຈະເປັນເລື່ອງມ່ວນທີ່ຈະສ້າງ ຫລື ແຕ້ມຮູບປະຕູໂຂງໂດຍມີສີລາສຳຄັນຢູ່ຈຸດກາງສູງສຸດ. ຈະມີຫຍັງເກີດຂຶ້ນ ຖ້າຫາກສີລາສຳຄັນຖືກຖອນອອກ? ຈະມີຫຍັງເກີດຂຶ້ນ ຖ້າຫາກເຮົາບໍ່ມີພຣະຄຳພີມໍມອນ? ພວກທ່ານອາດອ່ານວັກສຸດທ້າຍຂອງຄຳນຳນຳກັນ ເພື່ອພົບເຫັນວ່າເຮົາຈະຮຽນຮູ້ຫຍັງຕື່ມອີກເມື່ອເຮົາຮັບເອົາຄວາມຈິງແທ້ຂອງພຣະຄຳພີມໍມອນ. ເຮົາຈະສາມາດເຮັດໃຫ້ພຣະຄຳພີມໍມອນເປັນສີລາສຳຄັນຂອງສັດທາຂອງເຮົາ ໃນພຣະເຢຊູຄຣິດໄດ້ແນວໃດ?
ພຣະຄຳພີມໍມອນເປັນສີລາສຳຄັນຂອງສາດສະໜາຂອງເຮົາ.
“ປະຈັກພະຍານຂອງພະຍານສາມຄົນ”; “ປະຈັກພະຍານຂອງພະຍານແປດຄົນ”
ເຮົາສາມາດເປັນພະຍານເຖິງພຣະຄຳພີມໍມອນ.
-
ເພື່ອຊ່ວຍລູກໆຂອງທ່ານໃຫ້ເຂົ້າໃຈວ່າການເປັນພະຍານໝາຍຄວາມວ່າແນວໃດ, ທ່ານສາມາດບັນຍາຍເຖິງບາງສິ່ງທີ່ທ່ານໄດ້ເຫັນທີ່ພວກເຂົາບໍ່ໄດ້ເຫັນ. ແລ້ວໃຫ້ພວກເຂົາເຮັດເຊັ່ນດຽວໃຫ້ແກ່ທ່ານ. ສິ່ງນີ້ສາມາດນຳໄປສູ່ການສົນທະນາກ່ຽວກັບຜູ້ຄົນ 11 ຄົນທີ່ໄດ້ເຫັນແຜ່ນຄຳຊຶ່ງພຣະຄຳພີມໍມອນຖືກແປມາຈາກນັ້ນ. ຂະນະທີ່ທ່ານອ່ານປະຈັກພະຍານນຳກັນ, ທ່ານສາມາດເວົ້າລົມກັນກ່ຽວກັບວ່າ ເປັນຫຍັງພະຍານເຫລົ່ານີ້ຈຶ່ງຢາກໃຫ້ຄົນອື່ນມາຮັບຮູ້ກ່ຽວກັບປະຈັກພະຍານຂອງພວກເພິ່ນ. ເຮົາຢາກບອກໃຜແດ່ກ່ຽວກັບພຣະຄຳພີມໍມອນ?
“ປະຈັກພະຍານຂອງສາດສະດາໂຈເຊັບ ສະມິດ”
ພຣະຄຳພີມໍມອນໄດ້ຖືກມອບໃຫ້ເຮົາ ໂດຍອຳນາດຂອງພຣະເຈົ້າ.
-
ເພື່ອຊ່ວຍລູກໆຂອງທ່ານໃຫ້ຮຽນຮູ້ວ່າພຣະເຈົ້າໄດ້ມອບພຣະຄຳພີມໍມອນໃຫ້ເຮົາແນວໃດ, ທ່ານສາມາດອ່ານພາກສ່ວນໜຶ່ງຂອງ “ປະຈັກພະຍານຂອງສາດສະດາໂຈເຊັບ ສະມິດ” ໃຫ້ພວກເຂົາຟັງ. ທ່ານກໍຍັງສາມາດໃຊ້ “ບົດທີ 1: ພວກເຮົາມີພຣະຄຳພີມໍມອນໄດ້ແນວໃດ” (ໃນ ເລື່ອງພຣະຄຳພີມໍມອນ, 2–4) ນຳອີກ. ລູກໆຂອງທ່ານອາດມັກສະແດງຕາມເລື່ອງສອງສາມເທື່ອ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Moroni Delivers the Golden Plates [ໂມໂຣໄນມອບແຜ່ນຈາລຶກຄຳ], ໂດຍ ແກຣີ ແອວ ຄາບ