“29 Jenuware–4 Febwari: ‘Bae Mi Mekem Rere Rod Bifo long Yufala.’ 1 Nifae 16–22,” Kam Folem Mi—Blong Hom mo Jos: Buk blong Momon 2024 (2024)
“29 Jenuware.–4 Febwari 1 Nifae 16–22,” Kam Folem Mi—Blong Hom mo Jos: 2024 (2024)
29 Jenuware–4 Febwari: “Bae Mi Mekem Rere Rod Bifo long Yufala”
1 Nifae 16–22
Taem Lihae i stap wokbaot i go from graon blong promes, Lod i mekem wan promes long olgeta: “Bae mi mekem rere rod bifo long yufala, sapos i olsem se yufala i holem ol komanmen blong mi” (1 Nifae 17:13). I klia se promes ia i no minim se bae wokbaot ia bae i wan isiwan—ol memba blong famli oli no bin stap agri, ol bonara oli brok, ol pipol oli traehad mo oli ded, mo oli mas bildim wan sip wetem ol samting we oli faenem long ples blong olgeta. Be, taem famli i fesem fasin blong agens, o ol wok we oli luk se i no posibol blong mekem, Nifae i bin luksave se Lod i no bin stap longwe nating. Hem i bin save se God i “givim gudfala kaekae long olgeta, mo i mekem olgeta oli kam strong, mo i givim ol wei we oli save mekem samting we hem i bin talem long olgeta” (1 Nifae 17:3). Sapos yu bin stap askem yuwan finis se from wanem ol nogud samting oli stap hapen long ol gudfala pipol olsem Nifae mo famli blong hem, bae yu lukluk samting long wan defren wei long ol japta ia. Be moa impoten long hemia, bae yu luk wanem nao ol gudfala pipol oli mekem taem ol nogud samting oli stap hapen.
Ol Tingting blong Stap Lan long Hom mo long Jos
Sevya bae i helpem mi fesem ol jalenj blong laef.
Famli blong Nifae i bin fesem sam strong jalenj—olsem yumi evriwan i stap fesem. ?Wanem nao yumi save lanem aot long Nifae taem hem i stap fesem ol fasin blong agens wetem fet long Jisas Kraes? Rid abaot ol eksperiens blong hem long 1 Nifae 16:17–32; 16:34–39; 17:7–16; 18:1–4; mo 18:9–22. Gat tingting ia blong rekodem wanem we yu faenem anda long ol topik olsem ia: “Jalenj,” “Olsem Wanem Nifae I Ansa,” mo “Olsem Wanem Lod I Bin Help.” ?Wanem nao yu bin lanem we yu save yusum long ol jalenj we yu fesem?
Afta we yu stap lanem ol samting aot long Nifae mo famli blong hem, maet yu rekodem sam moa tingting anda long ol topik ia: “Jalenj,” “Olsem Wanem Bae Mi Ansa,” mo “Olsem Wanem Lod Bae I Helpem Mi.” Taem yu mekem olsem, yu save lukluk long ol skripja olsem hemia: Matiu11:28–30; Jon 14:26–27; Mosaea 24:13–15. Wan hym olsem: “Where Can I Turn for Peace?” (Ol Hym, no. 129), i save mekem fet blong yu long Sevya i kam strong moa mo help we Hem i save givim long taem blong ol hadtaem.
Luk tu long Anthony D. Perkins, “Tingbaot Ol Sent blong Yu we Oli Stap Safa, O God blong Mifala,” Liahona, Nov. 2021, 103–5; “He Will Give You Help,” “The Lord Guides Lehi’s Journey,” “The Lord Commands Nephi to Build a Ship,” mo “Lehi’s Family Sails to the Promised Land” (ol vidio), Gospel Library; “Life Help,” Gospel Library.
1 Nifae 16:10–16, 23–31; 18:11–22
Lod i stap lidim mi tru long ol smol mo simpol wei.
Taem God i bin lidim famli blong Lihae i go long waelples, hem i no bin givim wan map long olgeta blong soem gud evri ples we bae oli wokbaot long hem. Be, Hem i givim Liahona long olgeta blong i lidim olgeta evri dei. Taem yu stap ridim 1 Nifae 16:10–16, 23–31, mo 18:10–22, tingting blong mekem wan lis blong ol trutok we oli soem olsem wanem God i stap lidim ol pikinini blong Hem (eksampol, 1 Nifae 16:10 i tijim se, samtaem, God i lidim yumi long ol wei we yumi no tingting long hem). ?Wanem semmak samting yu luk bitwin Liahona mo Tabu Spirit? Wanem ol “smol samting” we i mekem “ol bigfala samting” long laef blong yu?
Luk tu long Alma 37:7, 38–47; Doktrin mo Ol Kavenan 64:33–34.
Sapos Yufala I Rere, Yufala I No Mas Fraet, i kam long Clark Kelley Price
Ol tes blong laef blong mi, oli wan blesing.
Nomata se Nifae mo ol brata blong hem i bin gat semmak jalenj long waelples, ol eksperiens blong olgeta i defdefren olgeta. Yu save luk wanem i defren insaed long stori blong Nifae we i stap travel long waelples (luk long 1 Nifae 17:1–6) wetem stori blong ol brata blong hem (luk long 1 Nifae 17:17–22). ?Wanem nao Nifae i bin save o mekem we i helpem hem blong gat wan gud mo fetful lukluk? Tingting blong raet abaot wan hadtaem we i jes pas o wan naoia tru long wan lukluk blong fet mo fasin blong talem tangkyu. ?Wanem nao yu lanem aot long hem?
Luk tu long Amy A. Wright, “Kraes I Mekem I Kam Gud Samting we I bin Brok,” Liahona, Mei 2022, 81–84; “No Strength without Struggle” (vidio), Gospel Library.
Kwaet taem blong lukbak. Stap tekem taem blong tingting, tingting hevi, lukbak, o raet i save lid i go long insperesen. I save helpem yumi luk olsem wanem doktrin o ol prinsipol blong gospel i go gud wetem laef blong yumi. Taem yu tijim ol narafala man, givim taem long olgeta blong lukbak mo raetem ol filing blong olgeta. Hemia bae i save mekem se oli wiling moa blong serem ol tingting mo filing blong olgeta wetem ol narafala man.
Mi save “yusum evri skripja i kambak” long miwan.
From se oli bin raetem ol skripja longtaem finis, bae i luk olsem se oli no stret long yumi tedei. Be Nifae i bin save gud moa. Nifae i bin talem: “mi yusum evri skripja long laef blong mifala, blong hem i save stap blong helpem mifala mo blong mifala i lanem samting” (1 Nifae 19:23). Hemia wan risen Nifae i bin faenem moa paoa long saed blong spirit insaed long olgeta skripja.
Tingting long ol kwestin olsem olgeta ia, taem yu ridim 1 Nifae 20–22:
-
1 Nifae 20:1–9.?Wanem nao ol ves ia oli stap tijim ol pipol long taem blong Aesea? ?Wanem nao yu faenem, we i aplae long yu?
-
1 Nifae 20:17–22.?Wanem nao ol ves ia oli tijim abaot, hao Papa long Heven i bin lidim ol pipol blong Aesea long taem ia? ?Olsem wanem Hem i invaetem yu blong folem Hem?
Wanem moa yu faenem long 1 Nifae 20–22 we yu save tekem i kam long yuwan?
Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
1 Nephi 16:10, 28–29; 18:8–13, 20–22
Taem mi stap folem ol komanmen, Lod i stap gaedem mi.
-
Sapos yu gat wan kampas, wan map, o wan nara samting we i helpem yumi faenem wei, yu save soem long ol pikinini blong yu. Hemia i wan gud wei blong statem wan toktokraon abaot Liahona, we yu save rid abaot long 1 Nifae 16:10, 28–29. ?Wanem nao sam long ol risen we wan kampas o map i no save wok? From wanem Liahona i no wok samtaem wetem famli blong Lihae? (luk long 1 Nifae 18:9–12, 20–22). ?Wanem nao Papa long Heven i givim long yumi tedei blong lidim yumi gobak long Hem?
-
Blong helpem ol pikinini blong yu blong yusum wanem we oli lanem abaot Liahona long 1 Nifae 16:10, 26–31; 18:8–22, yu save invaetem olgeta blong tingbaot wan impoten o had desisen. ?Wanem nao God i bin givim long yumi tedei we i wok olsem Liahona? (Eksampol, luk long Alma 37:38–44.) Tingting blong serem wan eksperiens blong yuwan we Papa long Heven i bin gaedem yu.
Mi save stap olsem wan gud eksampol long famli blong mi.
-
Taem yu ridim 1 Nifae 16:21–32 tugeta, helpem ol pikinini blong yu faenem hao eksampol blong Nifae i blesem famli blong hem (luk tu long vidio “The Lord Guides Lehi’s Journey” [Gospel Library]). Hemia i save lidim yumi blong toktok raon long hao yumi save stap olsem Nifae. Invaetem ol pikinini blong mekem plan long wan samting we oli save mekem blong stap wan laet long ol narafala wan.
Papa long Heven i save helpem mi blong mekem ol samting we i had.
-
Ol pikinini oli laekem tumas blong stap talem ol stori. Yu save invaetem olgeta blong helpem yu talem stori blong Nifae we i bin kasem komanmen blong bildim wan sip (luk long 1 Nifae 17:7–19; 18:1–4; luk tu long “Japta 7: Taem blong Bildimap Sip,” long Ol Stori long Buk blong Momon, 21–22; o vidio “The Lord Instructs Nephi to Build a Ship” [Gospel Library]). Oli save singsing tugeta nambatu ves blong “Nephi’s Courage” (Children’s Songbook, 120–21). ?Wanem nao i helpem Nifae blong gat strong paoa long tingting taem we ol brata blong hem oli bin stap jikim hem taem hem i stap traem blong bildim sip?
-
Nifae i no bin save olsem wanem blong bildim wan sip, mekem se hem i dipen long instraksen we i kam long Lod. Afta ridim 1 Nifae 18:1 wetem yu, ol pikinini blong yu oli save komplitim aktiviti pej blong wik ia. Taem oli mekem olsem, toktok wetem olgeta abaot hao Papa long Heven i save helpem yumi blong mekem ol had samting, jes olsem we hem i helpem Nifae.
Blong moa tingting, luk long namba blong manis ia blong Fren magasin.
Oli bin Mekem I Strong Tumas long Mi,, i kam long Walter Rane