“19–25 Febwari: ‘O Plan blong God blong Yumi I Gud Tumas.’ 2 Nifae 6–10,” Kam Folem Mi—Blong Hom mo Jos: Buk blong Momon 2024 (2024)
“19–25 Febwari. 2 Nifae 6–10,” Kam Folem Mi—Blong Hom mo Jos: 2024 (2024)
I No Olsem Tingting blong Mi, be Mekem Olsem Tingting blong Yu Nomo, i kam long Harry Anderson
19–25 Febwari: “O Plan blong God blong Yumi I Gud Tumas!”
2 Nifae 6–10
Hem i kolosap 40 yia nao stat long taem ia we famli blong Lihae i aot long Jerusalem. Oli bin stap long wan niu graon we i defren olgeta, we hem i tekem olsem haf wol longwe long Jerusalem. Lihae i bin ded, mo laen blong hem i bin statem finis wan raorao we bae i stap blong plante handred yia bitwin Ol Man blong Nifae—“we oli bin biliv long ol woning mo ol revelesen blong God,”—mo Ol Man blong Leman, we oli no biliv (2 Nifae 5:6). Folem ol situesen ia, Jekob, we i bin yangfala brata blong Nifae, mo naoia oli bin odenem hem i kam wan tija long Ol Man blong Nifae, i bin wantem se kavenan pipol ia i save se God bae i neva fogetem olgeta, mekem se, olgeta tu, bae oli neva mas fogetem Hem. Hemia i wan mesej we yumi nidim tumas tedei (luk long Doktrin mo Ol Kavenan 1:15–16). “Bae yumi tingbaot hem, … from oli no sakemaot yumi. … Ol promes blong Lod oli bigwan,” Jekob i talem (2 Nifae 10:20–21). Wan long ol promes ia, we i no gat wan narawan i moa bigwan long hemia, i promes blong wan “Atonmen we i no gat en” we bae i winim ded mo hel (2 Nifae 9:7). “From hemia,” Jekob i talem, “!mekem hat blong yufala i glad!” (2 Nifae 10:23).
Ol Tingting blong Stap Lan long Hom mo long Jos
Lod i gat bigfala sore long ol pipol blong Hem, mekem se bae Hem i mekem ol promes blong Hem oli hapen.
Blong helpem ol pipol blong hem oli andastanem se oli pat blong haos blong Isrel mo oli save trastem God mo ol promes blong Hem, Jekob i talem bakegen ol toktok blong ol profesi blong Aesea, we oli raetem long 2 Nifae 6–8 Mesej ia i blong yu tu, from Ol Lata-dei Sent oli pat tu blong kavenan pipol blong God. Taem yu stap ridim ol japta ia, tingting long ol kwestin olsem olgeta ia:
-
?Wanem nao mi lanem abaot lav blong Sevya we i pemaot man from mi? ?Wanem toktok o sentens i tokbaot gud lav ia?
-
?Wanem kamfot nao Sevya i givim long olgeta we oli stap lukaotem Hem?
-
?Wanem nao mi save moa fetful blong mekem blong “wet: long Sevya mo ol blesing we Hem i bin promesem?
Jisas Kraes i sevem mi aot long sin mo ded.
Wan wei blong yumi glad moa from Jisas Kraes, hem i blong tingting long wanem bae i hapen long yumi sapos yumi no gat Atonmen. Taem yu stap ridim 2 Nifae 9:1–26, tingting blong makem, long wan kala, wanem bae i hapen long yumi sapos i no gat Atonmen blong Jisas Kraes. Afta, long wan nara kala, yu save makem wanem yumi save kasem tru long Atonmen blong Sevya. Folem wanem we yu bin ridim, ?olsem wanem nao bae yu eksplenem from wanem yumi nidim Atonmen blong Jisas Kraes? ?Wanem nao yu faenem we i givim insperesen long yu blong presem “ waes blong God, sore blong hem mo gladhat blong hem? (2 Nifae 9:8).
Antap long tijing ia we Jisas Kraes i sevem yumi aot long hem, Jekob tu i bin talemaot moa abaot hao Hem i bin mekem. Tingting blong rekodem wanem we yu faenem long 2 Nifae 9:11–15, 20–24.
Jekob i sapraes tumas long plan blong God blong fasin ia blong pemaot man, we i mekem hem i talem “!O Plan blong God blong Yumi i Bigwan Tumas!” Lukaotem ol eksklemesen poen long 2 Nifae 9 (yu save faenem plante long ol ves 8–20). ?Wanem nao yumi lanem aot long ol ves ia abaot plan blong God? ?Wanem eksperiens nao i bin helpem yu filim sam long wanem Jekob i bin filim? Olsem pat blong wosip mo stadi, tingting blong lukaotem wan hym we maet i talemaot hao yu filim abaot Hem, olsem “How Great Thou Art” (Hymns, no. 86).
Luk tu long “Where Justice, Love, and Mercy Meet,” “Jacob Teaches of the Resurrection” (ol vidio), Gospel Library; Gospel Topics, “Atonement of Jesus Christ,” Gospel Library.
Atonmen blong Sevya i no gat en.
?Wanem nao yu save mekem blong andastanem moa atonmen blong Jisas Kraes we i no gat en? (2 Nifae 9:7). Ating oli save lukluk long wan samting, o tingting long sam samting we namba blong hem i no gat en—ol lif gras long wan plantesen, ol smol sid blong sanbij long solwota, o ol sta long skae. ?Long wanem wei nao Atonmen blong Sevya i no gat en? ?Olsem wanem hem i blong yuwan tu? ?Wanem sentens long 2 Nifae 9 i helpem yu filim bigfala tangkyu from samting ia we Sevya i bin mekem blong yu?
Mi save kam long Kraes mo folem plan blong God.
Long 2 Nifae 9, Jekob i yusum tufala sentens we i gat paoa we i no talem sem samting: “plan we i fulap wetem sore blong bigfala Krieta” mo “plan ia blong trik blong nogud wan” (2 Nifae 9:6, 28). Ating yu save droem wan rod mo nemem Plan blong Papa long Heven. Afta lukaotem 2 Nifae 9:27–52. Lukaotem ol woning mo ol invitesen we Jekob i bin givim blong helpem yumi folem plan ia. Raetemdaon wanem we yu faenem long saed blong rod ia. ?Olsem wanem nao Setan i stap traem blong winim yumi blong no folem plan blong God? ?Wanem nao Spirit i talem long yu blong mekem olsem ansa long ol woning mo invitesen ia blong Jekob?
Sakrifaes blong Jisas Kraes i save karem glad i kam long mi.
Mesej blong Jekob, i wan mesej blong glad. “Mi talem long yufala ol samting ia,” hem i talem, “blong mekem se yufala i save glad mo leftemap hed blong yufala blong oltaem” (2 Nifae 9:3). Taem yu stap ridim 2 Nifae 10:20, 23–25, wanem nao yu faenem we i leftemap hat blong yu? ?Wanem nao bae yu mekem blong tingbaot olgeta samting ia taem yu filim se tingting blong yu i kam slak?
Luk tu long Jon 16:33; D. Todd Christofferson, “Glad Ia blong Ol Sent,” Liahona, Nov. 2019, 15–18; “Jacob Encourages the Nephites to Be Reconciled with God” (video), Gospel Library.
Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.
Sam Tingting blong Tijim Ol Pikinini
Jisas Kraes i Sevya blong mi.
-
?Olsem wanem yu save helpem ol pikinini blong yu blong andastanem mo filim se oli nidim Jisas Kraes? Ol aktiviti blong wik ia tu oli save help. Yusum wan eksampol we i isi olsem blong wan hol mo wan lada. Tingting blong yusum 2 Nifae 9:21–22 blong toktok wetem ol pikinini blong yu se from wanem yu stap talem tangkyu from Jisas Kraes.
-
Wan wei blong helpem ol pikinini blong andastanem from wanem yumi nidim Sevya, hem i blong tijim olgeta abaot Foldaon. Yu save soem wan pikja blong Adam mo Iv, olsem Leaving the Garden of Eden (Gospel Library), mo wan pikja blong Jisas Kraes long kros. Askem ol pikinini blong talem long yu wanem nao i stap hapen long wanwan pikja. ?Olsem wanem nao yumi olsem Adam mo Iv? Ating 2 Nifae 9:6–10 i save helpem olgeta blong luk wanem we Jisas Kraes i mekem blong yumi. Tingting blong Invaetem ol pikinini blong serem ol filing blong olgeta abaot Jisas Kraes. Wan singsing olsem “Filim Lav Ia blong SevyaFrenJulae 2021, pej 13, i save help tu.
Tijim trutok wetem ol stori mo ol eksampol. Mekemsua se ol stori mo eksampol we yu yusum oli tijim trutok. Eksampol, taem yusum aktiviti pej blong wik ia, tijim se Jisas Kraes i bin kam insaed long “hol” blong helpem yumi wanwan blong folem ol step long rod ia mo kamaot long hol ia.
2 Nifae 9:20, 28–29, 42–43, 49
“Hat blong mi i glad long stret mo gud fasin.”
-
Blong leftemap tingting blong ol pikinini blong “[glad] long stret mo gud fasin” o obei Lod wetem fasin blong stap glad (2 Nifae 9:49), ating yu save serem ol eksampol we wan pikinini i jusum gud o i jusum nogud. Invaetem ol pikinini blong stanap taem wan long olgeta i jusum wan samting we i mekem oli hapi mo sidaon taem wan i jusum wan samting we i mekem olgeta i no hapi. ?Wetaem nao yumi bin filim hapi from yumi bin jusum wan samting blong save folem Jisas Kraes?
-
Ol pikinini blong yu bae oli mitim ol pipol (sapos oli no mekem yet) we oli ting se ol komanmen blong Lod oli krangke o hem i ol bilif blong bifo. Ating yu mo ol pikinini blong yu i save tokbaot olsem wanem blong eksplenem from wanem yumi hapi blong kipim ol komanmen. ?From wanem hem i impotem blong gat tras long ol kaonsel blong God iven taem yumi no save andastanem fulwan? Leftemap tingting blong ol pikinini blong luk long 2 Nifae 9:20, 28–29, 42–43 blong helpem olgeta blong tingting hevi mo toktokraon long kwestin ia.
Blong moa tingting, luk long namba blong manis ia long Fren magasin.
Hem i Hilim Plante Kaen Sik, i kam long J. Kirk Richards