“5–11 Febwari: ‘Fri blong Jusum Fridom mo Laef We I No Save Finis tru long Bigfala Man blong Toktok.’ 2 Nifae 1–2,” Kam Folem Mi—Blong Hom mo Jos: Buk blong Momon 2024 (2024)

“5–11 Febwari. 2 Nifae 1–2,” Kam Folem Mi—Blong Hom mo Jos: 2024 (2024)

Pikja

Adam mo Iv i stap aot long Garen blong Iden

Adam mo Iv, i kam long Douglas Fryer

5–11 Febwari: “Fri blong Jusum Fridom mo Laef We I No Save Finis tru long Bigfala Man blong Toktok”

2 Nifae 1–2

Sapos yu save se bae laef blong yu i stap kam long en, ?wanem ol las mesej nao bae yu wantem serem wetem olgeta we yu lavem tumas? Taem we profet Lihae i bin filim se hem i stap kam long en blong laef blong hem, hem i singaotem famli blong hem i kam tugeta blong las taem. Hem i serem wetem olgeta wanem Papa long Heven i bin talemaot long Hem. Hem i serem testemoni blong hem abaot Mesaea. Hem i bin tijim ol trutok insaed gospel we i spesel tumas long hem i go long ol man we oli spesel tumas tu long hem. Hem i tijim fasin blong stap fri, blong stap obei, Foldaon blong Adam mo Iv, fasin blong pemaot man tru long Jisas Kraes, mo glad. I no evri pikinini blong hem i jusum blong laef folem wanem we hem i bin tijim—i nogat wan long yumi we i save mekem ol joes ia blong olgeta we yumi lavem. Be yumi save tijim mo testifae abaot Ridima, we i mekem yumi “fri blong jusum fridom mo laef we i no save finis” (luk long 2 Nifae 2:26–27).

Ol Tingting blong Stap Lan long Hom mo long Jos

2 Nifae 1:13–29

Mi save “wekap, mo girap aot long das.”

Long 2 Nifae 1:13–29, tekem not long ol toktok we Lihae i yusum blong tokbaot situesen blong Leman mo Lemyul long saed blong spirit. Wanem i helpem yu wekap aot long wan “dip slip” long saed blong spirit? ?Wanem i helpem yu sakemaot “ol jen” long saed blong spirit long laef blong yu? Tingbaot testemoni blong Lihae long ves 15 mo invitesen blong hem long ves 23. ?Wanem mesej nao Papa long Heven i gat blong yu long ol ves ia?

Yusum ol pikja. Stap yusum ol pikja bae i helpem olgeta we oli stap lan blong andastanem ol trutok abaot gospel mo tingbaot olgeta blong longtaem. Taem yu rere blong tijim aotlaen ia, tingting long wanem pikja yu save yusum. Eksampol, ating wan pepa jen i save helpem olgeta we oli stap lan blong andastanem ol toktok blong Lihae long 2 Nifae 1:13 o 2 Nifae 2:27.

Pikja

Seminari pikja bokis

2 Nifae 2

Hem i from Jisas Kraes, mi “fri blong jusum fridom mo laef we i no save finis.”

Famli blong Lihae i bin stap long wan niu graon, wetem fulap samting blong save mekem. Ol joes we oli bin mekem long niu ples ia bae i impoten from sakses mo hapines blong olgeta. Ating hemia nao from wanem Lihae i tijim boe blong hem, Jekob, abaot ejensi (fasin blong mekem joes), o blong save mekem ol joes, long 2 Nifae 2. Taem yu stadi ol ves 11–30, raetemdaon sam ansa we i stret long ol kwestin ia:

?From wanem fasin blong mekem joes i impoten tumas long Papa long Heven, nomata se sam pipol oli yusum long defren wei blong spolem man?
?Olsem wanem fasin blong agens i traem blong mekem yumi wik o spolem gud fasin blong yumi blong mekem joes?
?Olsem wanem nao Sevya i stap helpem yumi blong “jusum fridom mo laef we i no save finis”?(ves 27)?

Hemia wan nara wei blong lanem abaot fasin blong mekem joes long 2 Nifae 2: Lukaotem ol samting we yumi nidim blong gat fasin blong mekem joes mo blong kasem tabu paoa ia blong kam huia yumi wantem kam. Eksampol:

2 Nifae 2:5: Wan save long saed blong wanem i gud mo nogud
2 Nifae 2:11, 16:
2 Nifae 2:16:
2 Nifae 2:21:
2 Nifae 2:6–9, 26, 28:

?Wanem nao i save hapen long fridom blong joes blong yumi sapos i no gat wan o moa long ol samting ia?

Wanwan long ol sikis seksen ia blong Blong Ol Yut Oli Kam Strong: Wan Gaed blong Mekem Ol Joes i gat insaed “ol invitesen” mo “Ol Promes Blesing.” Lukluk long wan o moa long ol seksen ia, mo jusum wan promes blesing we yu stap hop from long laef blong yu. ?Wanem invitesen nao yu nidim blong tekem aksen folem blong save kasem blesing ia? Tingting blong serem wetem wan nara man ol blesing ia we yu bin kasem tru long ol invitesen ia.

Luk tu long ol Gospel Topics, “Agency and Accountability,” Gospel Library; “Know This, That Every Soul Is Free,” Hymns, no. 240.

2 Nifae 2:1–4, 6–25

God i save tanem ol hadtaem blong mi i go long ol blesing.

Lihae i bin save se yangfala boe blong hem Jekob i bin safa “plante hadtaem” mo “plante harem nogud” long taem we hem i smol (2 Nifae 2:1). ?From wanem yu ting se testemoni blong Lihae long 2 Nifae 2:1–3, 6–25 bae i impoten tumas long Jekob? ?From wanem i impoten tumas long yu? Lukaotem ol toktok mo ol sentens we yu faenem i fulap speseli long paoa. ?Olsem wanem God i konsekretem ol hadtaem blong yu blong oli kam blesing blong yu? (Luk long 2 Nifae 2:2.)

Luk tu long Rom 8:28; Dale G. Renlund, “Fasin blong Mekem I No Stret long Man we I Mekem Man I Kros,” Liahona, Mei 2021, 41–45.

2 Nifae 2:15–29

Foldaon mo Atonmen blong Jisas Kraes, oli ol stamba pat insaed long plan blong Papa long Heven.

Plante man i biliv se Foldaon i wan aksiden nomo mo we Iv mo Adam i bin mekem wan mistek we bae i stap longtaem taem tufala i jusum blong kakae frut ia. Long 2 Nifae 2:15–28, Lihae i tijim sam moa trutok abaot Foldaon—mo abaot fasin blong pemaot man tru Kraes. Taem yu stap ridim ol ves ia, mekem wan lis blong ol trutok abaot wanem we i bin hapen long Garen blong Iden Ol kwestin olsem oli save help:

?From wanem i nidim blong gat Foldaon?
Wanem rol nao Jisas Kraes i plei blong sevem yumi aot long ol samting we yumi mas fesem from Foldaon?
?Olsem wanem nao we, taem yumi andastanem gud Foldaon, hem i helpem yumi blong andastanem moa gud nid ia blong yumi blong gat Jisas Kraes?

Luk tu long Dallin H. Oaks, “The Great Plan of Happiness,” Ensign, Nov. 1993, 72–75.

Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.

Hat blong Yufala I No Mas Trabol, i kam long Howard Lyon

Sam Tingting blong Tijim Ol Pikinini

2 Nifae 1:13, 15, 23

Jisas i helpem mi winim ol samting we mi mas fesem from sin.

Blong helpem ol pikinini blong yu i andastanem invitesen blong Lihae blong “sakemaot ol jen” blong sin, ating yu save wok tugeta blong mekem wan jen aot long ol pis blong pepa. Long ol pis pepa ia, ol pikinini blong yu oli save help blong raetem sam samting we Setan i temtem yumi blong mekem. Afta yufala i save rid tugeta 2 Nifae 1:13, 15, 23 taem oli stap aktemaot folem sam long ol sentens insaed long ol ves ia—we i tekem tu hemia blong sakemaot pepa jen ia. ?Olsem wanem wan sin i olsem wan jen? ?Olsem wanem nao Jisas i helpem yumi blong “sakemaot ol jen” blong sin?

2 Nifae 1:20

Mi kasem blesing taem mi stap obei long ol komanmen blong God.

Bae i save helpem ol pikinini blong yu blong komperem ol komanmen blong God long ol sus, ol hat, ol hanglav, o ol nara samting we i protektem yumi? Ating bae yu save letem olgeta oli traem sam taem yu stap tokbaot olsem wanem ol komanmen i protektem yumi. Afta yu save ridim 2 Nifae 1:20, talemaot gud se yumi “kam antap gud long graon ia” (kasem blesing o kasem proteksen) taem yumi obei long ol komanmen. Serem wan eksperiens we yu bin kasem blesing o proteksen from se yu bin stap folem ol komanmen.
Blong soem wanem i defren bitwin kam antap gud long graon ia mo katemaot yufala long God (luk long 2 Nifae 1:20), yu mo ol pikinini blong yu i save luk wan plant we i helti mo oli katemaot wan lif o branj blong hem. Afta ol pikinini blong yu i save luklukbak long ol joes we Nifae mo ol brata blong hem oli bin mekem (luk long 1 Nifae 2:11–16; 3:5–7; 18:9–11). ?Wanem nao ol risal blong ol joes ia? ?Wanem nao ol joes we i helpem yumi blong yumi joen i stap wetem God?

2 Nifae 2:11, 16, 27

God i givim long mi fridom blong mekem joes.

Blong helpem ol pikinini blong yu oli andastanem wanem we Lihae i bin tijim abaot ol oposit blong toktok mo mekem ol joes, yufala i save plei wan gem we taem yu talem wan toktok (olsem laet) mo ol pikinini blong yu oli talem oposit blong hem (tudak). Helpem olgeta blong lanem from wanem oposit i pat blong plan blong God taem yufala i ridim tugeta 2 Nifae 2:11, 16. Afta yu save serem ol stori abaot wan pikinini we hem i kasem temtesen blong mekem wan rong joes. Ol pikinini blong yu i save serem wanem oposit blong rong joes mo aktemaot.
Blong lanem abaot wanem i defren bitwin “fridom” mo “prisena” (2 Nifae 2:27), ol pikinini blong yu oli save droem ol pikja blong wan animol insaed long fanis blong hem, mo wan animol aotsaed long bus blong hem. ?Wijwan long tufala animol ia i fri? Invaetem ol pikinini blong oli poenem stret pikja taem yu ridim toktok ia “fri” long 2 Nifae 2:27. Testifae se Jisas Kraes i mekem yumi fri.
Singsing tugeta wan singsing olsem “Choose the Right” (Hymns, no. 239). ?Wanem nao yumi lanem aot long singsing ia abaot mekem ol joes?

Blong moa tingting, luk long namba blong manis ia blong Fren magasin.

Lihae mo Ol Pipol blong Hem Oli Kasem Niufala Wol, i kam long Clark Kelley Price

Pikja

aktiviti pej: semmak olsem Adam mo Iv, mi mi gat fridom blong mekem joes