“26 Febwari–3 Maj: ‘Hem bae oli singaotem hem Prins ia blong Pis.’ 2 Nifae 11–19,” Kam Folem Mi—Blong Hom mo Jos: Buk blong Momon 2024 (2024)
“26– Maj 3 Febwari. 2 Nifae 11–19,” Kam Folem Mi—Blong Hom mo Jos: 2024 (2024)
26 Febwari–3 Maj: “Hem bae oli singaotem hem Prins ia blong Pis.”
2 Nifae 11–19
Blong stap raet antap long ol buk o pej we oli wokem long aean, i no wan isi samting, mo spes long ol smol buk blong Nifae, i smol nomo. ?So from wanem nao Nifae i traehad blong kopi plante long ol raeting blong profet Aesea i go long rekod blong hem? Hem i mekem from hem i wantem yumi blong bilivim Jisas Kraes. “Sol blong mi i harem gud,” hem i raetem, “blong pruvum long ol pipol blong mi, trutok long saed blong taem we Kraes bae i kam” (2 Nifae 11:4). Nifae i bin luk wanem we bae i hapen long ol pipol blong hem long fiuja jeneresen. Hem i bin luk se, nomata ol bigfala blesing, bae oli foldaon long fasin blong gat hae tingting, fasin blong rao, mo fasin blong wol (luk long 1 Nifae 12; 15:4–6). Hem i luk tu ol semmak problem long dei blong yumi tedei (luk long 1 Nifae 14). Ol raeting blong Aesea i givim woning agensem ol fasin nogud. Be oli bin givim tu long Nifae hop blong wan fiuja we i fulap wetem glori—wan en blong fasin nogud, wan kam tugeta blong ol fetful, mo “wan bigfala laet” blong ol pipol we oli bin wokbaot long tudak” (2 Nifae 19:2). Evri samting ia bae i hapen from “wan pikinini i [bin] bon” we i save endem evri kros—“Prins blong Pis” (2 Nifae 19:6).
Ol Tingting blong Stap Lan long Hom mo long Jos
?Olsem wanem nao mi save andastanem gud moa ol tijing blong Aesea?
Nifae i luksave se “ol toktok blong Aesea oli no klia” (2 Nifae 25:4). Be Nifae i givim ol tingting blong helpem yumi faenem mining long ol raeting blong Aesea.
-
“Yusum ol toktok blong hem long” yuwan (2 Nifae 11:2). Plante long ol tijing blong Aesea oli gat plante posibol mining mo fasin blong yusum. Eksampol, taem yu rid abaot ol ples blong stap long 2 Nifae 14:5–6, tingting long hao bae yu aplaem ol ves ia long hom blong yu. Askem yuwan, “Wanem nao Papa long Heven i wantem mi blong lanem?”
-
Lukaotem ol simbol blong Jisas Kraes (luk long 2 Nifae 11:4). Plante long ol tijing blong Aesea abaot Sevya oli tanem i go long ol simbol. Eksampol, ?olsem wanem nao oli tokbaot Sevya long 2 Nifae 19:2? ?Wanem nao simbol ia i stap tijim yu abaot Hem?
-
“Lukaotem blong yu “fulap wetem Spirit blong profesi” (2 Nifae 25:4). Taem yu stadi, prea from spirit blong givhan. Maet bae yu no andastanem evri samting long fas taem ia, be Spirit i save helpem yu blong lanem wanem yu nidim blong save.
Maet bae yu faenem se bae i helpem yu tu blong stadi long ol help tul insaed long ol skripja, olsem ol futnot, ol heding blong ol japta, mo Gaed long Ol Skripja. Ol institiut lesenbuk blong Buk blong Momon mo OlTesteman, oli gat moa infomesen we i save helpem yu lanem abaot ol bakgraon histri blong ol tijing blong Aesea.
Aesea i stap testifae abaot Jisas Kraes.
From se Aesea i yusum plante lanwis blong ol simbol, hem i isi blong no luksave strong witnes blong hem abaot Jisas Kraes. Lukaotem Sevya long 2 Nifae 13:13; 14:4–6; 15:1–7; 16:1–7; 17:14; 18:14–15; 22:2. ?Wanem nao ol ves ia oli tijim yu abaot Hem?
Profesi long 2 Nifae 19:6 i givim sam taetol abaot Jisas Kraes. ?Olsem wanem nao Hem i fulfilim ol rol ia insaed long laef blong yu?
Luk tu long Ulisses Soares, “Jisas Kraes: Man we I Givim Kea long Sol blong Yumi,” Liahona, Mei 2021, 82–84.
Olgeta we oli gat hae tingting mo oli tingting long ol samting blong wol, bambae oli putum tingting blong olgeta i stap daon.
Nifae i bin luk finis se hae tingting bae i mekem se ol pipol blong hem bae oli foldaon (luk long 1 Nifae 12:19). So, i no wan sapraes we Nifae i wantem ripitim long ol pipol blong hem ol woning ia we Aesea i talem abaot fasin blong gat hae tingting. Long ol japta 12 mo 13, lukaotem ol toktok we Aesea i yusum blong tokbaot fasin blong gat hae tingting, olsem hae tingting mo flas. Long 2 Nifae 15:1–24, lukaotem ol lanwis blong simbol we i tokbaot risal blong gat hae tingting. Afta ating yu wantem traem blong mekem i sot wanem we yu bin ridim long toktok blong yuwan. Tingting long olsem wanem bae yu jusum blong gat tingting i stap daon.
Luk tu long “Chapter 18: Beware of Pride,” Teachings of Presidents of the Church: Ezra Taft Benson (2014), 229–40.
Tempol hem i haos blong Lod.
Aesea i singaotem tempol “hil blong haos blong Lod” (2 Nifae 12:2). ?From wanem nao bigfala hil hem i wan gudfala saen blong tempol?
?Olsem wanem bae yumi eksplenem long wan from wanem yumi nidim ol tempol? Yu save faenem sam ansa long 2 Nifae 12:2–3 mo mesej blong Presiden Russell M. Nelson “Tempol mo Fandesen blong Yu long Saed blong Spirit” (Liahona, Nov. 2021, 93–96). ?Long wanem we yu ridim, wanem nao Lod i wantem yu blong lanem mo eksperiensem long tabu haos blong Hem? ?Wanem nao ol eksperiens we yu bin gat long tempol?
Yu save faenem ol kwestin blong tempol rekomen long ol pej 36–37 blong Blong Ol Yut Oli Kam Strong: Wan Gaed blong Stap Mekem Ol Joes. Tingting blong stap rid wanwan mo askem yuwan, ?Wanem nao kwestin ia i tijim mi abaot ol wei blong Lod? ?Hao nao i helpem mi blong “wokbaot long ol wei blong hem”?
Luk tu long ol Gospel Topik ia, “tempol,” Gospel Library; “Know This, That Every Soul Is Free,” Hymns, no. 5.
Jisas Kraes be i pemaot ol pipol blong Hem.
Nomata ol nogud fasin we hem i stap luk, Aesea i bin luk se bae i gat hop long fiuja. Tingting blong stap stadi long wan wan long ol skripja ia: Raetemdaon wan o moa trutok we wanwan ves ia i tijim abaot taem blong yumi blong tedei: 2 Nifae 12:1–5; 14:2–6; 15:20–26; 19:2–8. ? From wanem ol skripja ia oli impoten long yumi blong andastanem?
Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.
Lukaotem sam paten. Insaed long ol skripja, yumi save faenem ol paten we oli soem yumi olsem wanem nao Lod i stap wok. Long 2 Nifae 11–19, maet bae yu lukaotem ol paten we oli soem hao Lod i givim woning blong sin mo fogivim ol pipol we oli sakem sin.
Sam Tingting blong Tijim Ol Pikinini
Tempol hem i haos blong Lod.
-
Aesea i tokbaot tempol olsem “hil blong haos blong Lod.” Ating ol pikinini blong yu bae oli stap priten blong klaem wan hil olsem we yu ridim 2 Nifae 12:2–3. Helpem olgeta blong faenem long ol ves ia we i tokbaot from wanem yumi gat ol tempol.
-
Blong gat wan klia pikja long sentens ia “bae yumi wokbaot long ol rod blong hem” long 2 Nifae 12:3, yu save mekem wan rod long flo, we i lid i go long wan pikja blong wan tempol. Taem ol pikinini blong yu oli wokbaot long rod ia, oli save givim nem blong ol samting we oli save mekem blong wokbaot long ol rod blong Lod.
-
Ating ol pikinini oli save dro wan pikja blong olgetawan we oli stap go long tempol. Oli save singsing tu o lisin long wan singsing abaot tempol, olsem “I Love to See the TempleChildren’s Songbook, 95). Helpem olgeta blong faenem ol sentens insaed long singsing ia, we i tijim, wanem i wan tempol mo wanem yumi stap mekem long tempol.
Jisas Kraes i Sevya blong mi.
-
I gat sam nem blong Jisas Kraes long 2 Nifae 11:4–7; 17:14; 19:6. Helpem ol pikinini blong yu blong faenem ol nem ia mo wanem mining blong olgeta. Eksampol, “Kraes” i minim “tabu wan” mo “Emanuel” i minim “God wetem yumi.” ?Wanem nao ol nem ia oli tijim long yumi abaot Jisas Kraes?
-
Soem pat blong vidio ia “The Christ Child” (Gospel Library) we i soem defren pipol we oli luk Jisas blong fastaem. Stopem vidio smol long ol pat ia, askem ol pikinini abaot wanem nao ol pipol ia oli maet filim. ?Bae yumi filim olsem wanem sapos yumi bin stap long taem ia? ?Bae yumi filim olsem wanem taem yumi luk Hem bakegen?
Setan i traem blong giaman long mi abaot wanem we i gud mo wanem we i nogud.
-
Soem long ol pikinini wan samting we i konkon, olsem wan slaes blong lemon, we oli kavremap insaed long wan loli pepa. Ridim tugeta 2 Nifae 15:20. ?Olsem wanem nao Setan i stap mekem ol samting we oli nogud blong oli luk gud? Yu save soem blong 90 seken fastaem vidio ia “You Will Be Freed” (Gospel Library). ?From wanem nao fisaman ia i kavremap gud huk blong hem? ?From wanem nao Setan i kavremap gud sin? ?Olsem wanem Jisas Kraes i helpem yumi blong no draon long ol trik blong Setan?
Blong moa tingting, luk long namba blong manis ia long Fren magasin.
Panama Siti Panama Tempol “Haos blong Lod bae i stanap antap long ol bigfala hil, … mo evri kantri bae oli go long hem” (2 Nifae 12:2).