Jeneral Konfrens
Tempol mo Fandesen blong Yu long Saed blong Spirit
Oktoba 2021 jeneral konfrens

Tempol mo Fandesen blong Yu long Saed blong Spirit

I Kam long Presiden Russell M. Nelson

Presiden blong Jos Ia blong Jisas Kraes blong Ol Lata-dei Sent

Semmak, taem eni kaen samting i hapen insaed long laef blong yu, !sef ples blong stap long hem long saed blong spirit i blong stap laef insaed long ol mak blong tempol kavenan blong yu!

Ol dia brata mo sista. Mi mi glad blong stap wetem yufala long moning ia blong serem ol filing blong hat blong mi.

Olsem we yufala i save, yumi stap mekem ol bigfala ripea wok long Sol Lek Tempol. Bigfala projek ia i blong mekem strong moa fas fandesen blong hem, we i bin stap mekem gud wok blong moa long wan handred yia. Be tempol ia, i mas stanap longtaem moa. Long en blong manis Mei, mi go jekem wok long bigfala projek ia. Mi ting se bae yufala i laekem blong luk wanem we waef blong mi, Wendy, mo mi, i bin luk. Mi ting se bae yu luk from wanem “Tijing blong Jisas oli stamba blong yumi”1 i kam blong gat wan niu mining long mitufala.

Vidio blong ples blong Sol Lek Tempol we oli stap wokem i kam niu bakegen: “Yumi stap luk fas fandesen blong Sol Lek Tempol. Mi stanap long wan ples andanit we Garen Rum i bin stap long hem. Taem mi stap luklukgud long hanwok blong ful bilding ia, mi sapraes mo laekem wanem we ol paeonia oli mekem. Mi mi openem ae bigwan taem mi tingting we oli bin bildim bigfala naes tempol ia wetem ol tul mo teknik blong bifo, hemia moa long wan handred yia i pas.

“Plante yia afta, sapos yumi luklukgud long fandesen ia, yumi save luk wanem we taem i mekem, ol hol long fas wok, mo ol defren step blong wok we oli no strong gud.

“Naoia, taem mi stap witnesem enjinia wok blong tedei, ol akitek, mo top man blong bildim haos, mo wanem oli save mekem blong fas fandesen ia i kam strong moa, mi mi sapraes bigwan moa. !Wok blong olgeta, i nambawan tru!

“Fandesen blong eni bilding, speseli sapos hem i bigwan olsem hemia, i mas strong mo i stanap strong inaf blong stanap agensem graon i seksek, ren, strong win, mo eni samting we i save kam spolem wan bilding. Bigfala wok we i strong smol, blong mekem fandesen i kam strong moa we i stap gohed, bae i mekem tabu tempol ia i gat wan fandesen we i save mo bae i stanap fesem ol tes blong taem.”

Mifala i no katem sot eni hadwok, blong mekem tempol ia we i no strong tumas, mo i nomo strong, wan fandesen we bae i stanap agensem ol paoa blong kriesen i go kasem Mileniom. Long sem wei, naoia i taem we yumi wanwan i mas tekem ol bigfala step—maet ol step we yumi neva tekem bifo—blong mekem fandesen blong spirit blong yumiwan i kam strong moa. Ol taem we oli no olsem bifo, i askem blong tekem step we yumi neva tekem bifo.

Ol dia brata mo sista, taem naoia, i ol las dei. Sapos yu mo mi i mas stanap agensem ol trabol mo fos we oli stap kam, i wan mas blong wanwan long yumi i mas gat wan stamba fandesen blong spirit we yumi bildimap antap long strong ston we i Ridima blong yumi, Jisas Kraes.2

Mekem se, mi askem wanwan long yufala: “?stamba blong fandesen blong yu i strong olsem wanem? “?Wanem nao yu nidim blong mekem strong moa testemoni mo andastaning blong yu long saed blong gospel?

Tempol i stap long medel blong mekem fet mo paoa blong yu long saed blong spirit i kam strong moa, from se Sevya mo doktrin blong Hem oli stap long hat blong tempol. Evri samting we oli tijim insaed long tempol, tru long instraksen mo tru long Spirit, i mekem andastaning blong yumi abaot Jisas Kraes i kam antap moa. Ol stamba odinens blong Hem oli fasem yumi tru long ol tabu prishud kavenan. Afta, taem yumi stap kipim ol kavenan blong yumi, Hem i kavremap yumi wetem paoa blong Hem we i save hilim mo givim moa strong paoa long yumi.3 Mo, O yes, bae yumi nidim paoa blong Hem long ol dei we oli stap kam.

Yumi gat promes tu se, “sapos [yumi] rere, bae [yumi] no fraet.”4 Stret save ia, i minim plante samting tedei. Lod i talemaot se, nomata ol jalenj blong tedei we oli no olsem hemia blong bifo, olgeta we oli stap bildimap ol fandesen blong olgeta antap long Jisas Kraes, mo oli bin lanem blong yusum paoa blong Hem, oli no nid blong foldaon long ol wari blong taem tedei.

Ol odinens mo kavenan blong tempol oli bin stap bifo i kam. Lod i bin givim instraksen long Adam mo Iv blong tufala i prea, mekem ol kavenan mo mekem ol sakrifaes.5 I tru, “taem we Lod i bin gat wan pipol blong hem i stap long wol ia, we i stap obei long toktok blong Hem, ol pipol ia oli kasem oda blong bildim ol tempol.”6 Ol standet tabu buk oli fulap gud long ol refrens blong tempol tijing, klos, lanwis, mo moa.7 Evri samting yumi biliv long hem, mo evri promes we God i bin mekem long ol kavenan pipol blong Hem oli kam tugeta insaed long tempol. Long evri taem, tempol i tokbaot bigwan ol bigfala trutok ia, se, olgeta we oli mekem ol kavenan wetem God mo oli kipim olgeta, oli ol pikinini blong kavenan.

From hemia, insaed long haos blong Lod, yumi save mekem ol semmak kavenan wetem God, ol semwan we Ebraham, Aesak, mo Jekob oli bin mekem. !Mo yumi save kasem ol semmak blesing!

Pikja
Ketlan mo Nauvu Tempol

Ol tempol oli bin pat blong dispensesen ia stat long ol taem bifo.8 Elaeja i bin givim ol ki blong siling atoriti i go long Josef Smit insaed long Ketlan Tempol. Ful prishud i bin kambak insaed long Nauvu Tempol.9

Kasem taem we oli bin kilimded hem, Josef Smit i bin gohed blong kasem ol revelesen we oli bin seftem fasin blong putumbak endaomen mo ol siling odinens.10 Be, hem i bin luksave se i nidim blong i kam gud moa. Afta we Brigham Yang i kasem endaomen blong hem long Mei 1842, Josef i talem long Brigham; “Hemia i no stret yet, be yumi bin mekem bes we yumi save mekem long situesen naoia, mo mi wantem yu tekem mata ia long han blong yu mo mekem gud evri seremoni.”11

Afta long ded blong Profet, Presiden Yang i bin lukaotem wok blong finisim Nauvu Tempol,12 mo afta, i bildim ol tempol long Yuta. Long dedikesen blong stori we i moa daon long Sent Joj Tempol, Brigham Yang i talem wetem paoa se tempol wok long bihaf blong ol dedman i mas hapen kwik, mo i talem: “Taem mi tingting long poen ia, mi wantem tang blong seven tanda i wekemap ol pipol.”13

Stat long tetaem ia i go, oli mekem ol tempol odinens oli kam gud moa. Presiden Harold B. Lee i eksplenem from wanem ol fasin blong wok, ol polisi, mo iven fasin blong mekem ol tempol odinens oli stap gohed blong jenis insaed long Jos blong Sevya we i kambak. Presiden Lee i talem: “Ol prinsipol blong gospel blong Jisas Kraes, oli kam long heven. I no gat wan i jenisim ol prinsipol mo doktrin ia blong Jos, be Lod nomo, tru long revelesen. Be ol wei oli save jenis taem we daereksen i kam tru long insperesen long olgeta we oli prisaed.”14

Tingbaot olsem fasin blong blesem mo pasem sakramen i jenis ova long ol yia. Long ol fas dei, wota blong sakramen, oli stap pasem long kongregesen we oli putum long wan bigfala kontena. Evri narawan i dring aot long hem. Naoia, yumi yusum ol kap we yumi save sakem. Fasin blong mekem, i jenis, be ol kavenan oli stap semmak.

Tingting hevi long trifala trutok ia:

  1. Restoresen i wan rod we i gohed, i no wan taem we i hapen, mo bae i gohed olsem kasem taem Lod i kam bakegen.

  2. Stamba poen blong kam tugeta blong Isrel15 i blong tekem ol blesing blong tempol i go long ol fetful pikinini blong God.

  3. Taem yumi stap lukaotem blong mekem poen ia long wei we i wok gud moa, Lod i soemaot moa niu samting. Restoresen ia we i stap gogohed, i nidim revelesen we i gogohed.

Fas Presidensi mo Kworom blong Olgeta Twelef Aposol, plante taem oli bin askem Lod sapos i gat ol moa gud wei blong tekem ol blesing blong tempol i go long ol fetful pikinini blong Hem. Yumi stap lukaotem blong Hem i soem rod oltaem, long wei blong meksua we evri ples oli folemgud semmak instraksen, kavenan mo odinens blong tempol nomata ol defren lanwis mo kalja.

Anda long daereksen blong Lod mo blong ansarem ol prea blong yumi, i gat sam las jenis we oli mekem. Hem nao, Hem i wantem yu blong andastanem klia moa, wanem stret yu stap mekem kavenan blong mekem. Hem nao, Hem i wantem yu blong gat eksperiens fulwan long tabu odinens blong Hem. Hem nao i wantem yu blong andastanem ol spesel janis, ol promes, mo ol responsabiliti blong yu. Hem nao i wantem yu blong gat ol niu tingting mo blong yu wekap long saed blong spirit, olsem i neva hapen bifo. Hemia i wanem Hem i wantem blong evri pipol we i go long tempol, nomata weaples oli stap long hem.

Ol jenis long ol fasin blong wok insaed long tempol, mo ol narawan we bae oli kam afta, oli ol pruf we oli gogohed blong kam blong soem se Lod i laef mo i stap lidim Jos blong Hem. Hem i stap givim ol janis long wanwan long yumi blong pusum fandesen long saed blong spirit long wan moa gud wei taem yumi mekem laef blong yumi i lukluk nomo long Hem mo long ol odinens mo kavenan blong tempol blong Hem. Taem yu tekem tempol rekomen blong yu, wan hat we i wantem sakem sin, mo wan maen we i wantem lanem samting insaed long haos blong Lod, bambae Hem i tijim yu.

Sapos longfala rod, nogud helt, o nara samting i stopem yu blong go long tempol blong smol taem, mi invaetem yu blong putum wan taem, blong talem bakegen long maen blong yu, ol kavenan ia we yu bin mekem.

Sapos yu no lavem yet blong go long tempol, go plante taem moa—yu no katem taem. Letem Lod, tru long Spirit blong Hem, i tijim mo givim insperesen long yu long ples ia. Mi promesem yufala, se wetem taem, tempol bae i kam wan ples blong sefti, blong harem gud, mo kasem revelesen.

Sapos i posibol blong mi blong toktok wetem wanwan yang adalt, bae mi plis mo askem yufala blong faenem wan kompanion we bae yu sil wetem long tempol. Maet yu stap askem yuwan se bae i mekem wanem samting i defren long laef blong yu. Mi promesem se bae i mekem evri samting i defren. Taem yu mared insaed long tempol mo gobak oltaem, bae yu kam strong moa mo luksave rod long ol desisen blong yu.

Sapos mi save toktok wetem wanwan hasban mo waef we oli stil no go yet blong sil long tempol, bae mi plis mo askem yufala blong mekem ol step we i nid blong kasem odinens ia we i bigwan mo i jenisim laef.16 ?Bae i mekem wanem samting i defren? Sapos yu wantem progres blong oltaem mo stap tugeta blong oltaem. Blong stap talem nomo se bae yutufala i blong oltaem, bae i no mekem hemia i hapen. I no gat wan nara seremoni o kontrak we bae i mekem hemia i hapen.17

Sapos mi save toktok long wanwan man o woman we i wantem mared tumas, be i no faenem wan yet blong taem we i no save finis, mi talem strong long yu se yu no wet kasem mared, blong yu endao insaed long haos blong Lod. Stat naoia blong lanem mo gat eksperiens long wanem i mining blong gat prishud paoa olsem tul blong faet.

Mo long wanwan long yufala we i mekem ol tempol kavenan, mi plis mo askem yufala blong lukaotem—wetem prea mo oltaem—blong andastanem ol tempol kavenan mo ol odinens.18 Ol doa long saed blong spirit bae oli open. Bae yu lanem olsem wanem blong openem vel bitwin heven mo wol, olsem wanem blong askem ol enjel blong God blong givhan long yu, mo kasem gud moa ol daereksen blong heven. Ol hadwok wetem strong tingting we yu mekem, bae i kam givim moa paoa mo mekem strong moa fandesen blong yu long saed blong spirit.

Ol brata mo sista blong mi. Taem ol niu wok long Sol Lek Tempol oli finis, bae i no gat wan moa sef ples long taem we graon i seksek long Sol Lek Vale, bitim blong stap insaed long tempol ia.

Semmak, taem eni kaen samting i hapen insaed long laef blong yu, sef ples blong stap long hem long saed blong spirit i blong stap laef insaed long ol mak blong tempol kavenan blong yu.

Plis, bilivim mi taem mi talem se sapos fandesen blong yu long saed blong spirit, yu bildimap antap long Jisas Kraes, yu no nid blong fraet. Taem yu tru long ol kavenan blong yu we yu mekem insaed long tempol, bae yu kam strong moa tru long paoa blong Hem. Afta long hemia, taem graon i seksek long saed blong spirit, bae yu save stanap strong from fandesen blong yu long saed blong spirit i strong gud mo i no save muv.

Mi lavem yufala ol dia brata mo sista. Ol trutok ia, mi save: God i Papa blong yumi long Heven, Hem i wantem yu blong jusum blong kam hom long Hem. Plan blong Hem blong yu progres blong taem we i no save finis, i no fasfas, mo i sapotem fridom blong joes blong yu. Yu yu fri blong jusum se huia yu afta—mo bae yu stap wetem hu—long wol we i stap kam.

!God i stap laef! !Jisas Hem i Kraes! Hemia i Jos blong Hem we i kambak blong helpem yu blong kasem tabu fiuja blong yu. Mi testifae olsem long tabu nem blong Jisas Kraes, amen.

Ol Not

  1. Luk long “Tijing blong Jisas Oli Stamba blong Yumi,” STSP, pej 6.

  2. Blong mekem se taem we devel bae i sendemaot ol strongfala win blong hem, … bae oli no gat paoa ova long yufala …; hemia i from strong ston we yutufala i bin bildimap yutufala antap long hem, we i wan sua fandesen, wan fandesen we sapos ol man oli bildimap olgeta antap long hem, oli no save foldaon.” (Hileman 5:12; oli ademap italik).

  3. Luk long Doktrin mo Ol Kavenan 109:15, 22.

  4. Doktrin mo Ol Kavenan 38:30; luk tu long Doktrin mo Ol Kavenan 10:55.

  5. Luk long Moses 5:5–6.

  6. Gaed long Ol Skripja, “Tempol.”

  7. Eksampol, luk long Eksodas 28; 29; Levitikas 8. Tabenakol blong Moses, oli save olsem “tenet blong testemoni” (Namba 9:15) mo wan “tabenakol blong testemoni” (Eksodas 38:21). Tempol blong Solomon, oli prapa spolem long 587 BKB, samfala yia afta we famli blong Lihae i aot long Jerusalem. Serubabel i putumbak tempol ia samples 70 yia afta. Faea i prapa spolem long 37 BKB. Herod i mekem tempol ia i kam bigwan moa samples long 18 BKB. Mo tempol ia, we Jisas i save, i bin smas gud long 70 AKB. Nifae i gat ol eksperiens ia blong laekem tempol tru “long bigfala hil plante blong prea, (1 Nifae 18:3) mo afta, long Ol Amerika, hem i bildim wan “folem fasin we oli bildim tempol blong Solomon,” nomata i no nidim tumas taem (luk long 2 Nifae 5:16).

  8. Luk long Doktrin mo Ol Kavenan 88:119; 124:31.

  9. Luk long Doktrin mo Ol Kavenan 110:13–16; 124:28. Kona ston blong Nauvu Tempol oli bin putum long 6 Epril, 1841, sam manis afta we Josef Smit i kasem revelesen blong bildim tempol ia. Oli mekem Nauvu Tempol i kam moa bigwan. Eksampol. Lod i eksplenem se oli nidim ples blong baptaes blong ol Sent blong oli kasem baptaes long bihaf blong olgeta we oli bin ded (luk long Doktrin mo Ol Kavenan 124:29–30).

  10. Luk long Doktrin mo Ol Kavenan 131; 132. Insaed long Doktrin mo Ol Kavenan 128 i gat wan leta we Josef Smit i bin raetem i go long Sent abaot baptaes blong ol ded. Long ples ia hem i talemaot se fasin blong sevem ol ded man “i wan nid mo i wan mas long fasin blong sevem yumi, … [from] se olgeta, sapos i no gat yumi, oli no save kam stret gud evriwan—mo semmak, yumi, sapos i no gat olgeta dedman blong yumi, bae yumi no save kam stret gud evriwan.” (ves 15).

  11. Joseph Smith, insaed long Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 454.

  12. Man blong Histri George A. Smith i endem toktok blong hem se 5,634 brata mo sista oli kasem endaomen blong olgeta long Nauvu Tempol we oli i no finis yet, long Disemba 1845 mo Jenuware 1846. Siling blong ol kapol i bin gohed kasem 7 Febwari [1846,] mo long tetaem ia, i gat moa long 2,000 kapol we oli joenem olgeta tru long prishud, blong taem long wol ia mo blong taem we i no save finis” (Bruce A. Van Orden, “Temple Finished before Exodus,” Deseret News, Dec. 9, 1995, deseret.com; luk tu long Richard O. Cowan, “Endowments Bless the Living and Dead,” Church News, Aug. 27, 1988, thechurchnews.com).

  13. “?Wanem nao yu ting se ol papa we oli ded, oli save talem sapos oli save toktok? ?Bae oli talem se, mifala i stap slip long ples blong taosen yia, long ples long kalabus haos, stap wet long dispensesen ia blong kam? ?From wanem? sapos oli gat paoa, ol tanda blong heven bae oli stap long ol sora blong yumi, sapos nomo yumi save luksave wok ia we i impotem we yumi stap long hem. Evri enjel long heven oli stap lukluk long smol han we i fulap long ol pipol mo stap leftemap tingting blong olgeta i go long fasin blong sevem evri famli. … Taem mi tingting long poen ia, mi wantem tang blong seven tanda i wekemap ol pipol.” (Discourses of Brigham Young, sel. John A. Widtsoe [1954], 403–4).

  14. Harold B. Lee, “God’s Kingdom—a Kingdom of Order,” Ensign, Jan. 1971, 10. Luk tu long wan toktok we Presiden Wilford Wudrof i bin talem long 1896. Hem i talem “Mi wantem talem olsem presiden blong Jos Ia blong Jisas Kraes blong Ol Lata-dei Sent, se yumi mas wokbaot fored mo progres. Yumi no finis yet wetem revelesen. … Presiden [Brigham] Young, we i folem Presiden Josef Smit, i lidim mifala i kam long ples ia. Hem i oganaesem ol tempol ia mo mekem ol stamba tingting blong koling blong hem mo ofis. … Hem i no kasem evri revelesen we i blong wok ia; semmak tu long Presiden Taylor, mo Wilford Woodruff. Bae i no gat en long wok ia kasem we i kam stret evriwan” (The Discourses of Wilford Woodruff, sel. G. Homer Durham [1946], 153–54).

  15. Luk long 2 Nifae 9:8–9.

  16. Luk long Doktrin mo Ol Kavenan 131:2–4.

  17. Luk long Doktrin mo Ol Kavenan 14:7.

  18. Elda John A. Widtsoe i bin raetem: “Ol man mo ol woman we oli stap go long tempol, wetem ae we i open, tingting hevi long ol simbol mo ol kavenan mo mekem efot blong gohed blong andastanem mining we i fulwan, God i talemaot ol toktok blong hem, mo ol revelesen bae i kam. Endaomen i rij plante mekem se wan krangke nomo i save traem blong tokbaot, i fulap gud long ol revelesen i go long olgeta we oli yusum paoa blong olgeta blong lukaotem mo luk, we i nogat wan toktok blong man we i save eksplenem o mekem i klia ol samting we i posibol blong stap insaed long tempol. Endaomen we oli givim tru long revelesen, oli andastanem moa gud tru long revelesen” (long Archibald F. Bennett, Saviors on Mount Zion [Sunday School manual, 1950], 168).