“Pebrero 26–Marso 3: ‘Iyang Ngalan Pagatawgon og … Ang Prinsipe sa Kalinaw.’ 2 Nephi 11–19,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Pebrero 26–Marso 3. 2 Nephi 11–19,” Dali, Sunod Kanako—Alang sa Panimalay ug sa Simbahan: 2024 (2024)
Pebrero 26–Marso 3: “Iyang Ngalan Pagatawgon og … Ang Prinsipe sa Kalinaw”
2 Nephi 11–19
Ang pagkulit diha sa metal nga mga palid dili sayon, ug ang luna sa gagmay nga mga palid ni Nephi limitado. Busa nganong si Nephi mihimo og pangikamot sa pagkopya sa daghan kaayong mga sinulat ni propeta Isaias ngadto sa iyang rekord? Siya mibuhat niini tungod kay siya gusto nga atong tuohan si Jesukristo. “Ang akong kalag nahimuot,” misulat siya, “sa pagpamatuod ngadto sa akong mga katawhan sa kamatuoran sa pag-anhi ni Kristo” (2 Nephi 11:4). Nakita ni Nephi kon unsa ang mahitabo sa iyang katawhan sa umaabot nga mga henerasyon. Iyang nakita nga, bisan pa sa ilang dagkong mga panalangin, sila mamahimong mapagarbohon, mabingkilon, ug kalibotanon (tan-awa sa 1 Nephi 12; 15:4–6). Iya usab nakita ang susama nga mga problema sa atong panahon (tan-awa sa 1 Nephi 14). Ang mga sinulat ni Isaias nagpasidaan batok sa maong pagkadaotan. Apan sila mihatag usab ni Nephi og paglaom alang sa mahimayaon nga umaabot––usa ka kataposan sa pagkadaotan, usa ka pagpundok sa mga matinud-anon, ug “dako nga kahayag” alang niadtong kinsa “naglakaw sa kangitngit” (2 Nephi 19:2). Tanan kini mahitabo tungod kay ang “usa ka bata [na]tawo” kinsa makahimo sa paghunong sa tanang panagbangi––“Ang Prinsipe sa Kalinaw” (2 Nephi 19:6).
Mga Ideya alang sa Pagkat-on diha sa Panimalay ug sa Simbahan
Unsaon nako nga mas makasabot sa mga pagtulon-an ni Isaias?
Si Nephi miangkon nga “ang mga pulong ni Isaias dili yano” (2 Nephi 25:4). Apan siya mipakigbahin usab og mga ideya sa pagtabang kanato nga makakaplag sa kahulogan sa mga sinulat ni Isaias:
-
“Mopasunod sa iyang mga pulong ngadto” sa inyong kaugalingon (2 Nephi 11:2). Daghan sa mga pagtulon-an ni Isaias adunay daghang posible nga mga kahulogan ug mga paggamit. Pananglitan, kon kamo mobasa mahitungod sa mga pinuy-anan diha sa 2 Nephi 14:5–6, ikonsiderar kon sa unsang paagi kini nga mga bersikulo magamit sa inyong panimalay. Pangutan-a ang inyong kaugalingon, “Unsa man ang gusto sa Langitnong Amahan nga akong makat-onan?”
-
Pangitaa ang mga simbolo ni Jesukristo (tan-awa sa 2 Nephi 11:4). Daghan sa mga pagtulon-an ni Isaias mahitungod sa Manluluwas gipasabot pinaagi sa mga simbolo. Pananglitan, giunsa pagrepresentar ang Manluluwas diha sa 2 Nephi 19:2? Unsa ang gitudlo niini nga simbolo diha kaninyo mahitungod Kaniya?
-
“Tinguhaa nga mahimong “napuno sa espiritu sa panagna” (2 Nephi 25:4). Samtang kamo magtuon, pag-ampo alang sa espirituwal nga giya. Mahimong dili ninyo masabtan ang tanang mga butang diha diha dayon, apan ang Espiritu makatabang kaninyo nga makakat-on unsay inyong gikinahanglan nga mahibaloan.
Tingali inyong masuta nga makatabang ang pagtan-aw ngadto sa mga tabang sa pagtuon diha sa mga kasulatan, lakip sa mga footnote, mga ulohan sa kapitulo, ug Giya ngadto sa mga Kasulatan. Ang Basahon ni Mormon ug mga manwal sa institute sa Daang Tugon adunay dugang impormasyon nga makatabang kaninyo nga makakat-on mahitungod sa makasaysayanong konteksto sa mga pagtulon-an ni Isaias.
Si Isaias nagpamatuod bahin ni Jesukristo.
Tungod kay migamit si Isaias og simbolikanhong pinulongan, mas dali nga mataligam-an ang iyang gamhanang pagsaksi bahin ni Jesukristo. Pangitaa ang Manluluwas diha sa 2 Nephi 13:13; 14:4–6; 15:1–7; 16:1–7; 17:14; 18:14–15; 22:2. Unsa ang gitudlo niini nga mga bersikulo diha kaninyo mahitungod Kaniya?
Ang panagna diha sa 2 Nephi 19:6 naglista sa pipila ka tawag ni Jesukristo. Giunsa Niya pagtuman kini nga mga katungdanan diha sa inyong kinabuhi?
Tan-awa usab sa Ulisses Soares, “Jesukristo: Ang Tig-atiman sa Atong Kalag,” Liahona, Mayo 2021, 82–84.
Ang mapagarbohon ug kalibotanon ipaubos.
Nakita ni Nephi nga ang garbo maoy hinungdan sa pagkapukan sa iyang katawhan (tan-awa sa 1 Nephi 12:19). Busa dili ikatingala nga si Nephi mopakigbahin sa iyang katawhan sa gibalik-balik nga mga pasidaan ni Isaias batok sa garbo. Sa mga kapitulo 12 ug 13, pangita og mga pulong nga gigamit ni Isaias sa paghulagway sa pagkamapagarbohon, sama sa mapahitas-on ug pagkahambog. Sa 2 Nephi 15:1–24, pangita og simbolikanhong pinulongan nga naghulagway sa mga resulta sa garbo. Dayon mahimong mosulay ka sa pag-summarize kon unsa ang inyong nabasa diha sa inyong kaugalingong mga pulong. Hunahunaa kon unsaon ninyo pagpili nga magmapainubsanon.
Tan-awa usab sa “Kapitulo 18: Maglikay sa Garbo,” Mga Pagtulon-an sa mga Presidente sa Simbahan: Ezra Taft Benson (2014), 277–289.
Ang templo mao ang balay sa Ginoo.
Si Isaias mitawag sa templo nga “ang bungtod diin ang balay sa Ginoo” (2 Nephi 12:2). Nganong ang bukid usa ka maayo nga simbolo alang sa templo?
Unsaon ninyo sa pagpasabot sa usa ka tawo nganong kita nagkinahanglan og mga templo? Mahimo ninyong makit-an ang posible nga mga tubag diha sa 2 Nephi 12:2–3 ug sa mensahe ni Presidente Russell M. Nelson “Ang Templo ug ang Inyong Espirituwal nga Pundasyon” (Liahona, Nob. 2021, 93–96). Base sa unsay inyong gibasa, unsa ang gusto sa Ginoo nga inyong makat-onan ug masinati diha sa Iyang balaan nga balay? Unsa nga mga kasinatian ang inyong naangkon didto?
Imong makit-an ang mga pangutana sa interbiyo sa rekomend sa templo diha sa mga pahina 36–37 sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili. Ikonsiderar ang pagbasa sa matag usa ug sa pagpangutana sa inyong kaugalingon, unsa ang gitudlo niining pangutanaha ngari kanako mahitungod sa mga pamaagi sa Ginoo? Sa unsang paagi kini nakatabang kanako nga “maglakaw sa iyang mga pamaagi”?
Tan-awa usab sa “Ibabaw sa Bukid,” Mga Himno, nu. 5.
Si Jesukristo motubos sa Iyang katawhan.
Bisan sa kadaotan nga iyang naobserbahan, si Isaias nakakita og paglaom alang sa umaabot. Ikonsiderar ang pagtuon sa matag usa sa mosunod nga mga tudling. Isulat ang usa o dugang pa nga kamatuoran sa matag tudling nga nagtudlo mahitungod sa atong panahon: 2 Nephi 12:1–5; 14:2–6; 15:20–26; 19:2–8. Ngano kaha nga kini nga mga tudling importante nga atong masabtan?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Pangita og mga sundanan. Diha sa mga kasulatan kita makakita og mga sundanan nga nagpakita kanato kon sa unsa nga paagi naglihok ang Ginoo. Sa 2 Nephi 11–19, kamo mahimong mangita sa mga sundanan nga nagpakita giunsa sa pagpasidaan sa Ginoo bahin sa sala ug mopasaylo sa mga tawo kinsa maghinulsol.
Mga Ideya sa Pagtudlo sa mga Anak
Ang templo mao ang balay sa Ginoo.
-
Gihulagway ni Isaias ang templo isip “ang bukid sa balay sa Ginoo.” Ang inyong mga anak tingali malingaw nga kunohay nagsaka og bukid samtang kamo mobasa sa 2 Nephi 12:2–3. Tabangi sila sa pagpangita sa hugpong sa mga pulong niining mga bersikulo nga naghulagway nganong kita adunay mga templo.
-
Sa paghulagway sa hugpong sa pulong nga “kita mosubay sa iyang mga dalan” gikan sa 2 Nephi 12:3, mahimo kang magbuhat og dalan diha sa salog nga mopaingon ngadto sa usa ka hulagway sa templo. Samtang ang inyong mga anak maglakaw sa dalan, mahimo silang maghingalan og mga butang nga ilang mahimo aron maglakaw diha sa dalan sa Ginoo.
-
Tingali ang inyong mga anak makadrowing og hulagway sa ilang kaugalingon nga miadto sa templo. Mahimo usab silang mokanta o maminaw ngadto sa usa ka awit mahitungod sa templo, sama sa “Gusto Ko nga Makita ang Templo” (Songbook sa mga Bata, 99). Tabangi sila sa pagpangita og hugpong sa mga pulong diha sa awit nga nagtudlo unsa ang templo ug unsa ang atong buhaton didto.
Si Jesukristo ang akong Manluluwas.
-
Adunay pipila ka mga ngalan si Jesukristo diha sa 2 Nephi 11:4–7; 17:14; 19:6. Tabangi ang inyong mga anak nga makit-an kini ug maghisgot kon unsa ang gipasabot niini. Pananglitan, ang “Kristo” nagpasabot nga “ang dinihugan” ug ang “Immanuel” nagpasabot nga “Ang Dios uban kanato.” Unsa ang gitudlo niini nga mga ngalan ngari kanato mahitungod ni Jesus?
-
Unsa kaha ang atong bation kon kita anaa pa didto? Unsay atong bation kon kita makakita na Kaniya pag-usab?
Si Satanas mosulay sa paglibog kanako mahitungod sa maayo ug daotan.
-
Pakit-a ang mga anak og usa ka butang nga pait o aslom, sama sa hiniwa nga lemonsito, sulod sa putos sa kendi. Basaha og dungan ang 2 Nephi 15:20. Sa unsang paagi nga mosulay si Satanas sa paghimo sa mga butang nga daotan nga maayo tan-awon? Nganong ilipat-lipat man ni Satanas ang sala? Unsaon pagtabang ni Jesukristo kanato nga makalikay sa pagkalingla ni Satanas?
Alang sa dugang nga mga ideya, tan-awa ang isyu karong bulana sa Higala nga magasin.
Panama City Panama Temple. “Ang balay sa Ginoo pagatukuron sa tumoy sa mga bukid, … ug ang tanan nga mga kanasoran mag-ambahan paingon ngadto niini” (2 Nephi 12:2).