“Marso 18–24: ‘Kini Mao ang Agianan.’ 2 Nephi 31–33,” Dali, Sunod Kanako—Alang sa Panimalay ug sa Simbahan: Basahon ni Mormon 2024 (2024)
“Marso 18–24. 2 Nephi 31–33,” Dali, Sunod Kanako—Alang sa Panimalay ug sa Simbahan: 2024 (2024)
Christ Teaching His Disciples [Kristo Nagtudlo sa Iyang mga Disipulo], ni Justin Kunz
Marso 18–24: “Kini Mao ang Agianan”
2 Nephi 31–33
Lakip sa kataposang narekord nga mga pulong ni Nephi, makita nato kini nga pamahayag: “Ang Ginoo misugo kanako, ug ako kinahanglan gayod nga motuman” (2 Nephi 33:15). Kini usa ka maayong lakbit-saysay [summary] sa kinabuhi ni Nephi. Gitinguha niya nga masabtan ang kabubut-on sa Dios ug maisogon nga mituman niini—bisan og kana nagpasabot sa pagrisgo sa iyang kinabuhi aron sa pagkuha sa tumbaga nga mga palid gikan ni Laban, sa paghimo og barko ug sa pagtabok sa dagat, o matinud-anong pagtudlo sa doktrina ni Kristo gamit ang ka yano ug gahom. Si Nephi makasulti nga madanihon sa panginahanglan nga “mopadayon sa unahan uban ang pagkamakanunayon kang Kristo,” sa pagsunod sa “higpit ug pig-ot nga dalan nga mopadulong sa kinabuhi nga dayon” (2 Nephi 31:20, 18) tungod kay mao kana ang dalan nga iyang gisunod. Nasayod siya pinaagi sa kasinatian nga kini nga dalan, bisan og malisod usahay, makapalipay usab, ug nga “walay lain nga agianan ni ngalan nga gihatag ubos sa langit diin ang tawo maluwas diha sa gingharian sa Dios” (2 Nephi 31:21).
Mga Ideya alang sa Pagkat-on diha sa Panimalay ug sa Simbahan
Si Jesukristo ug ang Iyang doktrina mao lamang ang agianan ngadto sa kinabuhing dayon.
Kon kinahanglan ninyong ilaktod-saysay ang dalan ngadto sa kinabuhing dayon sa pipila lamang ka pulong, unsay inyong isulti? Bantayi kon giunsa ni Nephi sa paghulagway niini diha sa 2 Nephi 31. Hunahunaa ang pagdrowing og usa ka dalan ug pagsulat subay sa dalan og pipila sa mga baroganan o mga lakang nga inyong makit-an niining mga kapitulo. Mahimo ninyong idugang ang inyong drowing sa inyong kaugalingon nga laktod-saysay sa unsay gitudlo ni Nephi mahitungod sa matag baroganan.
Samtang ka mobasa sa 2 Nephi 31:18–20, timbang-timbanga ang inyong kaugalingong paningkamot sa “pagpadayon sa unahan” subay sa dalan sa ebanghelyo.
Tan-awa usab sa “Padayon, Mga Santos,” Hymns, nu. 42.
Ang pagsunod sa mga pagtulon-an ni Jesukristo modala kanato ngadto sa kinabuhing dayon.
Gipakita ni Jesukristo ang hingpit nga ehemplo sa pagkamasulundon sa dihang Siya gibunyagan.
Nahitabo man ang inyong bunyag gahapon o 80 ka tuig nang milabay, kadto usa ka importante nga panahon. Ikaw misulod og usa ka mahangtoron nga pakigsaad sa pagsunod ni Jesukristo. Paghunahuna sa inyong bunyag samtang nagbasa ka mahitungod sa bunyag sa Manluluwas diha sa 2 Nephi 31:4–13. Ang pagtubag sa mga pangutana nga sama niini makatabang:
-
Nganong gibunyagan man si Jesukristo? Nganong mipili ako nga magpabunyag?
-
Unsa ang mga saad nga akong gihimo sa dihang gibunyagan ako? Unsa ang gisaad sa Ginoo agig balos? (Tan-awa sa mga bersikulo 12–13; tan-awa usab sa Mosiah 18:10, 13).
-
Unsaon nako sa pagpakita nga ako mapasaligon gihapon sa pagsunod ni Jesukristo?
“Siya kinsa molahutay hangtod sa kataposan, ang mao maluwas.”
Samtang magbasa ka sa 2 Nephi 31:15–20, pangutan-a ang inyong kaugalingon, “Unsaon nako sa pagkahibalo kon ako naglahutay hangtod sa kataposan?” Unsa ang inyong nakat-onan gikan ni Nephi nga makatabang kaninyo sa pagtubag niini nga pangutana?
Si Elder Dale G. Renlund nagtudlo: “Ang paglahutay hangtod sa kataposan dili usa ka buwag nga lakang diha sa doktrina ni Kristo—nga daw atong gikompleto ang unang upat ka lakang ug dayon mopahulay sa usa ka luwas nga kahimtang, molahutay og lisod nga butang, ug magpaabot nga mamatay. Dili, ang paglahutay sa kataposan mao ang aktibo ug tinuyo nga pagbalik-balik sa mga lakang” (“Lifelong Conversion” [debosyonal sa Brigham Young University, Sept. 14, 2021], 2, speeches.byu.edu). Unsaon ninyo sa pagbalik-balik sa mga lakang diha sa doktrina ni Kristo (hugot nga pagtuo, paghinulsol, bunyag, ug pagdawat sa Espiritu Santo)?
Pinaagi sa mga pulong ni Kristo ug sa Espiritu Santo, ang Dios mopakita kanako sa unsay buhaton.
Mibati ka na ba sukad nga dili sigurado mahitungod sa sunod nga mga lakang sa inyong kinabuhi? Ang katawhan ni Nephi adunay susama nga mga problema (tan-awa sa 2 Nephi 32:1). Pangitaa ang mga tubag ni Nephi diha sa 2 Nephi 32:2–9. Unsaon ninyo pagpahayag diha sa inyong kaugalingong mga pulong ang unsay gitudlo ni Nephi? Unsa nga mga kasinatian ang nakatabang ninyo nga makakat-on nga ang mga pulong ni Nephi tinuod?
Hunahunaa ang paghimo og usa ka lista sa mga desisyon o mga sitwasyon (karon ug sa umaabot) diin kamo nagkinahanglan og giya sa Dios. Unsa ang inyong nakat-onan gikan sa 2 Nephi 32 nga makatabang kaninyo sa pagdawat og inspirasyon gikan Kaniya? Unsa kahay makadala sa mga tawo nga “magpatig-a sa ilang mga kasingkasing batok sa Balaang Espiritu”? (2 Nephi 33:2).
Samtang kamo mamalandong sa tambag ni Nephi, hunahunaa kon giunsa ninyo pagtuon ang mga pulong sa Manluluwas. Imo ba kining mahulagway isip nagtimo-timo, nagkaon, o nagbusog? Unsa ang kalainan, sa inyong opinyon? Hunahunaa kon unsaon ninyo nga inyong mahimo ang inyong kasinatian sa mga pulong sa Manluluwas nga mas mahisama sa usa ka pagbusog. Tingali makakuha ka og mga ideya gikan sa usa ka higala o sakop sa pamilya.
Pagbusog sa mga pulong ni Kristo. Adunay daghang paagi sa pagbusog diha sa mga pulong ni Kristo, lakip ang pag-ampo alang sa inspirasyon, mangutana sa dili pa ug atol sa pagtuon, magbatbat sa mga pulong, mamalandong, mag-cross-reference, paghimo og mga mubo nga sulat, mangita sa mga kamatuoran sa ebanghelyo, ug paggamit sa mga kasulatan ngadto sa inyong kinabuhi (tan-awa sa 1 Nephi 19:23).
Unsaon ninyo sa pagdapit ang Espiritu Santo aron mahimong usa ka makanunayon nga kompanyon sa inyong kinabuhi, imbis usa lang ka panagsa nga bisita? Basaha ang tulo ka sugyot ni David A. Bednar aron mahimong usa ka “padayon nga reyalidad” ang pakig-uban sa Espiritu Santo diha sa “Dawata ang Espiritu Santo” (Liahona, Nob. 2010, 94–97). Unsaon ninyo paggamit ang iyang tambag?
Ang Basahon ni Mormon nag-awhag kanatong tanan sa pagtuo ni Kristo.
Sa 2 Nephi 33, sa pagtapos ni Nephi sa iyang mga sinulat, iyang gipasabot kon nganong siya nagsulat una sa tanan. Unsa nga mga rason ang inyong nakita dinhi niini nga kapitulo? Pamalandongi ang mga istorya ug mga pagtulon-an nga inyong nabasa diha sa 1 Nephi ug 2 Nephi. Hain ang nakaimpluwensiya kaayo ninyo ug sa inyong hugot nga pagtuo diha ni Kristo?
Tan-awa usab sa “Girekord ni Nephi ang Iyang Kataposang Pagpamatuod” (bidyo), Gospel Library.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Ideya sa Pagtudlo sa mga Anak
Sa dihang ako gibunyagan, ako nagsunod ni Jesukristo.
-
Adunay usa ka hulagway ni Jesus nga gibunyagan sa kataposan niining latid. Tingali ang inyong mga anak makagamit niini sa pagsulti ninyo unsa ang ilang nahibaloan mahitungod niini nga panghitabo (tan-awa usab sa Mateo 3:13–17). Nganong gusto man ni Jesus nga kita bunyagan sama sa pagbunyag Kaniya? Ang inyong mga anak makapaminaw sa mga rason samtang kamo magkauban nga magbasa og mga porsiyon sa 2 Nephi 31:4–13. Tingali makatabang kon ang usa ka tawo nga bag-o lang gibunyagan makapaambit sa iyang kasinatian.
Si Jesukristo nagtudlo kanako kon sa unsang paagi makabalik ngadto sa Langitnong Amahan.
-
Aron matabangan ang inyong mga anak nga makaaninaw sa mga pagtulon-an sa 2 Nephi 31, sila makadrowing og dalan nga adunay hulagway ni Kristo sa kataposan. Makatabang ka nila sa pagpangita o pagdrowing og mga hulagway nga nagrepresentar og mga lakang diha niana nga dalan, sama sa hugot nga pagtuo ni Kristo, paghinulsol, bunyag, ang gasa sa Espiritu Santo, ug paglahutay hangtod sa kataposan. Makatudlo sila ngadto sa mga hulagway samtang mag-uban kamo sa pagbasa sa 2 Nephi 31:17–20.
Mahimo akong magbusog sa mga pulong ni Kristo.
-
Sa pagtudlo mahitungod sa “pagbusog” sa mga pulong ni Kristo, makahangyo kamo sa inyong mga anak sa pagdrama-drama kon unsaon nila sa pagbusog sa ilang paborito nga pagkaon. Sa 2 Nephi 32:3, unsa ang gisulti ni Nephi nga kinahanglan atong piyestahan? Sa unsang paagi ang pagbusog sa pulong sa Dios lahi gikan sa basta lang nga pagbasa niini? Tingali ang inyong mga anak makadrama-drama sa mga kalainan. Ipakigbahin kanila ang mga panalangin nga inyong nadawat samtang kamo nagbusog diha sa mga kasulatan.
Gusto sa Langitnong Amahan nga mag-ampo ako kanunay.
-
Human sa pagbasa sa 2 Nephi 32:8–9, pakig-istorya sa inyong mga anak kon nganong si Satanas dili gusto nga kita mag-ampo. Nganong gusto sa Dios nga kita “mag-ampo sa kanunay”? Ang inyong mga anak makahimo og lista o makadrowing og mga hulagway sa mga sitwasyon diin sila makaampo. Dayon mahimong manganta kamo og usa ka awit nga nagtudlo mahitungod sa pag-ampo, sama sa “Ikaw Naghunahuna Ba sa Pag-ampo?” (Mga Himno, nu. 82). Mahimo ninyong pulihan ang pipila ka mga pulong sa awit sa mga pulong gikan sa ilang mga lista. Sa unsa nga paagi ang Dios makapanalangin kanato kon kita kanunay nga mag-ampo?
Alang sa dugang nga mga ideya, tan-awa ang isyu karong bulana sa Higala nga magasin.
Sa Pagtuman sa Tanang Pagkamatarong, ni Liz Lemon Swindle