2 Nephi 20–25

Ang mga anak ni Lehi adunay problema sa panagbingkil. Ang problema nagkagrabe sa umaabot nga mga henerasyon, nga misangpot ngadto sa pagkabahin-bahin, pagkabihag, kagul-anan, ug kalaglagan. Ug ang panagbingkil nagpadayon nga mahimong usa ka problema karon.

Sa paghunahuna nianang tanan, hunahunaa ang mga panagna diha sa 2 Nephi 21–22. Ikonsiderar kon giunsa sa pagtuman sa Manluluwas kining mga panagna. Unsa ang pasabot sa panagna nga ang lobo “mopuyo uban sa nati nga karnero” para ninyo? (2 Nephi 21:6). Pamalandonga kon unsa ang inyong mabuhat aron mahimong tigpasiugda sa kalinaw.

Tan-awa sa Dale G. Renlund, “Ang Kalinaw ni Kristo Makawagtang sa Pagdumot,” Liahona, Nob. 2021, 83-85.

Si Nephi ug ang iyang pamilya maoy saksi sa pagkatibulaag sa Israel (tan-awa sa 2 Nephi 25:10). Karon kamo makaapil sa pagpundok sa Israel (tan-awa sa 2 Nephi 21:12). Samtang mobasa ka sa 2 Nephi 21:9–12, Hunahunaa kon sa unsang paagi kamo makatabang sa pagtuman sa mga panagna nga gihulagway niining mga bersikulo.

Pananglitan, samtang mobasa ka mahitungod sa “bandila” (sumbanan o bandera) nga ipataas aron mapundok ang katawhan sa Dios, hunahunaa kon sa unsang paagi ninyo nakita ang Dios mipundok sa Iyang katawhan, sa pisikal ug espirituwal nga paagi. Unsa ang makapadani sa katawhan ngadto sa Ginoo ug sa Iyang Simbahan?

Unsa ang inyong gibati nga nadasig nga buhaton aron makatabang sa pagpundok sa katawhan sa Dios?

Ang gingharian sa Babelon usa ka gamhanang hulga sa politikal ug militar ngadto sa karaang Israel. Apan ngadto sa katawhan ni Nephi––ug kanato karon––ang mas dako nga hulga mao ang unsay girepresentar sa Babelon: pagkakalibotanon ug sala. Hunahunaa kon unsa kaha ang epekto sa mga pasidaan diha sa 2 Nephi 23–24 ngadto sa katawhan nga nahadlok o midayeg o misalig sa bahandi ug gahom sa Babelon (tan-awa, pananglitan sa 23:6–9, 11, 19–22; 24:10–19). Unsa ang pipila ka susamang mga butang nga tingali kita mahadlokan o modayeg o mosalig karon? Unsa ang inyong gibati nga tingali mao ang mensahe sa Manluluwas diha kaninyo niining mga kapitulo? Hunahunaa kon unsaon ninyo sa pagpakita nga kamo “nagmaya sa pagkahalangdon [sa Ginoo]” (2 Nephi 23:3).

Imahe

icon sa seminary

2 Nephi 25:19–29

“Kami naghisgot kang Kristo … kami nalipay diha kang Kristo.”

Si Nephi bukas kabahin sa pagpakigbahin sa iyang mga gituohan—ilabi na sa iyang pagpamatuod ni Jesukristo. Sa inyong tibuok nga pagtuon sa 2 Nephi 25, hunahunaa ang kabahin sa tinguha ni Nephi sa “pagdasig sa [iyang] mga anak … sa pagtuo kang Kristo, ug aron makig-uli sa Dios” (bersikulo 23). Unsa ang gusto ni Nephi nga mahibaloan sa katawhan mahitungod sa Manluluwas? (tan-awa sa mga bersikulo 12–13, 16). Sa unsang paagi naningkamot si Nephi sa pagdasig sa katawhan aron motuo diha Kaniya? (tan-awa sa mga bersikulo 19–29). Timan-i ang mga tudling niining mga kapitulo nga makapaaghat kaninyo sa pagtuo ug pagsunod ni Jesukristo.

Ang pipila kanato mahimong dili mobati nga sama ka maisogon ni Nephi nga naghisgot mahitungod ni Kristo. Apan tingali makakaplag kamo og butang diha sa pagtulon-an ni Nephi diha sa 2 Nephi 25:23–26 nga nakapadasig kaninyo sa paghisgot mahitungod Kaniya ngadto sa uban nga mas dayag. Pananglitan, sa pamahayag ni Nephi nga “Kami nalipay diha kang Kristo” tingali makapaaghat kaninyo sa paghunahuna kon sa unsang paagi ang Manluluwas nakahatag kaninyo og kalipay—ug unsaon ninyo sa pagpakigbahin kana nga kalipay sa uban.

Sa iyang mensahe “Kita Naghisgot Kang Kristo” (Liahona, Nob. 2020, 88–91), si Elder Neil L. Andersen nagsugyot kon sa unsang paagi kita makapamulong nga mas dayag kabahin ni Kristo sa nagkalain-laing mga kahimtang. Hain sa iyang mga sugyot ang importante kaninyo? Unsa nga mga oportunidad nga inyong naangkon sa paghisgot kabahin ni Kristo sa uban?

Unsa ang inyong gibati nga nadasig nga isulti sa uban mahitungod ni Jesukristo? Kon kamo nagkinahanglan og pipila ka ideya, mahimo ninyong pangitaon sa “Ang Buhi nga Kristo: ang Pagpamatuod sa mga Apostoles” (Gospel Library). Usa ka himno sama sa “Nagtuo Ako Kang Kristo” (Mga Himno, nu. 78) mahimong makahatag kaninyo og dugang mga ideya.

• Aron matabangan ang inyong mga anak sa paghanduraw niini nga mga bersikulo, tan-awa kon kamo makakaplag ba og usa ka kahoy nga giputol o usa ka sanga nga nagtubo gikan sa usa ka kahoy (o paggamit og usa ka hulagway sa ubos). Kon ang “sanga” diha sa 2 Nephi 21:1 nagrepresentar ni Jesukristo, unsa ang gitudlo sa mga bersikulo 2–5 ngari kanato mahitungod Kaniya?

Imahe

gamay nga tanom nagtubo gikan sa tuod sa kahoy

• Unsay gitudlo sa 2 Nephi 21:6–9 mahitungod sa unsay mahitabo kon ang tanan mosunod sa Manluluwas? (tan-awa usab sa 4 Nephi 1:15–18). Unsaon nato paghimo sa atong panimalay nga mas mahisama niini? Ang inyong mga anak tingali malingaw sa pagtan-aw og mga litrato sa mga hayop nga nahisgotan diha sa mga bersikulo 6–7—mga hayop nga kasagaran managkaaway apan dili magpasakitay sa usag usa kon si Jesus moanhi pag-usab (tan-awa ang pahina sa kalihokan niining semanaha). Ang inyong mga anak mahimong makadrowing og mga hulagway sa ilang kaugalingon ug niining mga hayop nga malinawon nga nagpuyo uban ni Jesus.

• Si Isaias nag-ingon nga ang Ginoo mopatindog og usa ka “bandila alang sa mga nasod” aron sa pagtabang sa pagpundok sa katawhan ngadto Kaniya (tan-awa sa 2 Nephi 21:11–12). Tabangi ang inyong mga anak nga makasabot nga ang ensinya [ensign] mao ang sama sa usa ka bandila. Tingali malingaw sila nga magdrowing sa ilang kaugalingon nga bandila. Mahimo sila nga maglakip og mga hulagway o mga pulong nga morepresentar og mga rason nga sila miduol ngadto ni Jesukristo ug sa Iyang Simbahan. Tugoti sila nga maghisgot kabahin sa ilang mga bandila, ug tabangi sila sa paghunahuna kon unsaon nila sa pagtabang sa uban sa “pagpundok” ngadto ni Jesukristo.

• Human mag-uban sa pagbasa sa 2 Nephi 22:4–5, mahimo kamo nga makig-istorya sa inyong mga anak mahitungod sa “hamili nga mga butang” nga nabuhat sa Ginoo. Unsa ang pipila ka mga “kahimoan taliwala [kanato]” nga atong ikapahayag? Aron matabangan ang inyong mga anak sa paghunahuna mahitungod niini nga pangutana, kamo mahimong mag-uban sa pagpanganta og usa ka awit nga mahitungod sa Manluluwas, sama sa “Nagtuo Ako ni Kristo” (Mga Himno, nu. 78). Mahimo kamo nga magpuli-puli sa pagkompleto og usa ka kapahayag sama niining usa: “Nagtuo ako ni Kristo; Siya .” Unsaon man nato sa pagtabang ang uban nga mga tawo nga masayod kon unsa ang nabuhat sa Manluluwas alang kanato?

• Unsaon ninyo sa pagtabang ang inyong mga anak nga “[mag]lipay diha kang Kristo”? Ang inyong mga anak mahimong motumbok og malipayon nga mga higayon diha sa istorya o bidyo. Dayon, samtang mag-uban sa pagbasa sa 2 Nephi 25:26, mahimo silang maghisgot kon nganong sila “nalipay diha kang Kristo.”