Meei 27–Tuun 2: ‘A Aranaki Bwa Ana Botanaomata te Atua.’ Motiaea 25– 28,” Nakomai, Iriirai—Ibukin te Mweenga ao te Taromauri: Ana Boki Moomon 2024 (2024)
“Meei 27–Tuun 2. Motiaea 25–28,” Nakomai, Iriirai—Ibukin te Mweenga ao te Taromauri: 2024 (2024)
Rairakin Aramwa te Teei, iroun Gary L. Kapp
Meei 27–Tuun 2: “A Aranaki Bwa Ana Botanaomata te Atua”
Motiaea 25-28
Imwiin ae e kaniia teniua te rooro ni maeka n aaba aika kakaokoro, te naan Nibwaite a manga katiteuanaaki n riki bwa kurubu n aomata aika ti teuana. Ana botanaomata Rimwaai, ana botanaomata Aramwa, ao ana botanaomata Motiaea—riki te botanaomata i Taraemera, ake aki riki mairoun Nibwaai—ngkai ni kabane “a warekaki ma Nibwaite” (Motiaea 25:13). A rawata mai ibuakoia naba aika a tangiria ni kan riki bwa membwa n te Ekaretia, n aroia ana aomata Aramwa. Ngaia ni kabane bon koraki ake “a tauraoi ni katoka iaoia aran Kristo” a bwabetitoaki, “ao a aranaki bwa a na botanaomata te Atua” (Motiaea 25:23–24). Imwiin ririki aika bati ni mangaongao ao n tautoronaki, e taraa n ae Nibwaite e na reke aia tai ni kukurei inanon te rau.
Ma imwain anne, taan aki kakoaua a moana bwainikirinakiia Aika Itiaki. Ae karika riki te rawawata n te nano bon aei bwa angiia ake aki kakoaua bon oin natiia naake taan kakoaua—te “rooro ae rikirake” (Motiaea 26:1), n ikotaki ma natin Motiaea mwaane ao temanna natin Aramwa te mwaane. N te rongorongo e taekina kamimiin rokon te anera. Ma te kakai ae koaua n te karaki aei bon tiaki ti kaotiia anera nakoia naati mwaane aika tionako. Te rairaki bon te kakai, ae n te anga teuana, ma teuana, e riai ni riki iroura ngaira ni kabane.
Iango ibukin Reiakinana n te Mweenga ao n te Taromauri
I kona ni buokiia tabeman n roko nakon Iesu Kristo.
Te rairaki e bon onoti nakon temanna—e aki kona ni kaeweaki kanga aron te bwaibwai nakon natim temanna. Ngkai ko wareka Motiaea 26:1–6, iangoia bwa tera raoi bukina ngkai “te roro ae rikirake” a kitana te koaua, ao nora mwiin te bwai ae riki n aia aki kakoaua. Ko na bae ni iangoa naba aomata ake ko tangiria ni uotiia nakon Kristo. Inanon am kamatebwai ni Motiaea 25–28, e na wirikiriki te Tamnei nakoim bwa tera ae ko na karaoia ni buokiia ni karikirakea aia onimaki iroun Iesu Kristo.
Ana toro aika kakaonimaki te Atua a ukoukora karaoan Ana kantaninga.
N tabetai ti na bae ni iangoia bwa te tia kairiiri n te Ekaretia n aron Aramwa e atai n taainako bwaai aika e riai ni karaoi. Ni Motiaea 26 ti wareka te kangaanga inanon te Ekaretia are Aramwa e tuai kaitibo ma ngaia mai imwaina. Tera ae karaoia Aramwa n te kaangaanga aei? (taraa Motiaea 26:13–14, 33–34, 38–39). Tera are e riki nakon Aramwa are kaotia bwa ko na kanga n taobarai kangaanga inanon ami utu ke am mwakuri n te Ekaretia?
Tera ae e reireina Aramwa te Uea n Motiaea 26:15–32? Ataia bwa tabeua ana kaeka te Uea aki kaineti nakon kaekaan ana titiraki Aramwa. Tera ae e kauringiira aio iaon te tataro ao karekean kaotioti aika a onoti?
Tuua bon akea tokiia. Iangoia bwa a na kanga karaki ao reirei man booki aika tabu ni kaineti nakon maium. Te katooto, ko kona n titirakiniko, “Tera taneiai aika I a tia ni karekei aika titebo ma ake iroun Aramwa?” ke “Tera koaua ake a reiakinaki iroun Aramwa ae a kona ni buokai?”
Te Atua e kabwarai au bure n akea boona ngkai I raira nanou ao ni kabwarai aia bure aomata tabeman.
Te rairannano ao te kabwarabure bon boto ni iango aika a okioki n Motiaea 26–27. Taratarai taeka ao mwakoro n taeka ake a reirei iaon te rairannano ao te kabwarabure n Motiaea 26:22–24, 29–31; 27:23–37.
Tabeman aomata tao a na tabeaianga ngkana e bon kabwarai aia bure te Atua . Tera ae ko iangoia bwa Aramwa te Ikawai e na aanga bwa te reirei nakoia membwa n te Ekaretia i Taraemera ake e reke te tabeaianga anne irouia? Tera ae e reiakinna Aramwa mairoun te Uea n Motiaea 26:15–31 are e kona ni buokiia kaain te Ekaretia? (taraa naba Moronaai 6:8; Reirei ao Berita aika Tabu 19:16–18; 58:42–43).
Rinanon Iesu Kristo, I kona ni bitaki nakon ae tamaroa riki.
E bon teretere bwa Aramwa te Teei e kainnanoa te manga bungiaki n maiun tamneina. Ngaia ao natim Motiaea mwaane bon “ngaiia kabanean ngkoa buakakaia taan bure” (Motiaea 28:4). Ma bon imwiin naba rairakina, Aramwa e kakoaua bwa e rangi ni kakawaki te rairaki—ibukiia aomata nako: “Ko na tai miimi,” e taku, “bwa ni kabane aomata … a na bane ni manga bungiaki” (Motiaea 27:25; e kairaki ma te kamataata).
Ngkai ko wareka taekan ana taneiai Aramwa ni Motiaea 27:8–37, iangoia ni kariniko n te karaki aei. Ko kona ni iangoi bwaai ni maium aika a riai ni bitaki? Antai, n aron taman Aramwa, ae e na bae n tataro ibukim “ma te onimaki ae bati”? Tera taneiai aika a tia ni buoka “kaota [kim]n te mwaaka ao te kariaiakaki iroun te Atua”? (Motiaea 27:14). Tera “bwaai aika moan te korakora” ae e a tia te Uea ni karaoi ibukim ke am utu ake ko riai n “uring”? (Motiaea 27:16). Tera ae ko reiakinna man ana taeka Aramwa te Teei ao n ana mwakuri bwa tera nanon te manga bungiaki? Tera banna ni katooto ake ko a tia n noori?
Anaa te tai ni korei tabeua kawai are te Tia Kamaiu e buokiko ni bitaki—ke ni manga bungiaki—e ngae ngke baika ko rinanoi aki rangi ni korakora aroia ke n rangi ni waekoa n aron Aramwa. Iai te anene n taromauri ae ko kona n aneneia ke n ongoraa nako iai ae e kaota am namakin, n aron “I Mimi N Ana Tangira”? (Anene n Taromauri,, nambwa 20). Antai ae e na kona ni buokaki man ongoraean am taneiai?
Unimwaane David A. Bednar e kabotaua te manga bungiaki nakon aron waakin karaoan te kukambwa bwa e na riki ni pickle (taraa “Ye Must Be Born Again,” Riaona, Meei 2007, 19– 22). Tera ae reireiniko kabotauakin bwaai aikai iaon te rairaki?
Taraa naba Gospel Topics, “Become like Jesus Christ,” Gospel Library; “Alma Testifies He Has Been Born of God” (witeo), Gospel Library.
Te Atua e ongo au tataro ao e na kaekai nakon Ana kantaninga ao ana tai.
Tao ko a tia n rinanon are e rinanona Aramwa te Ikawai ma kaain am utu ae e karaoi rinerine aika a karika te kabuanibwai. Tera ae ko kunea ni Motiaea 27:8–24 ae e anganiko te kaantaninga? A kanga kiibu aikai n roota aron am tataro ibukiia tabeman?
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
E tangirai te Uea bwa N na kabwarai buure.
-
Ni buokiia natim ni kunea bwa tera ae e reireina Aramwa te Uea iaon te kabwarabure, ko kona ni kaoiia bwa a na wareka Motiaea 26:29–31 ao warekia bwa iraua te tai ae kaoti te taeka ae “kabwarabure”. Tera ae a reirei kiibu aikai ibukin kabwaraan aia bure tabeman? (Taraa naba “Help Me, Dear Father,” Aia Boki n Anene Ataei, 99.)
-
Ni katuruturua ana banna ni katooto te Tia Kamaiu n te kakabwarabure, ko kona ni kaota Tamneina iaon te kaibangaki ao bootaki wareka Ruka 23:33–34. Tera ae tuanga Tamara are i Karawa Iesu bwa E na karaoia ibukiia aomata ake a tauria iaon te kaibangaki? Imwiin te marooro aei, natim a kona ni katea kain te karaki n te ikabwarabure imarenaia.
-
N tabetai e kangaanga ae ti na kabwarai oin ara bure ngkana ti karaoi kairua. E na kanga ana taeka te Atua nakon Aramwa n ibuobuoki? A kona natim ni karaoa ae aongkoa a taetae ma temanna ae e taku bwa te Atua e aki kona ni kabwarai aia bure. Kaoiia natim bwa a na kakaea te bwai n Motiaea 26: 22– 23, 29–30 ae e na kona ni buoka te aomata anne.
Iesu Kristo e buokai bwa na kona n riki n ai Arona.
-
Rairakiia Aramwa te Ataei ao natin Motiaea mwaane e kona ni kaotia nakoia natim bwa, man mwaakan te Tia Kamaiu, a kona ni bitaki aomata ni kabane. Ngkoe ao natim kam kona ni kabongana te korotamnei inanon te kabwarabwara aei, n te iteraniba n te waaki ni kakukurei, ao tabeua kiibu man koroboki aika tabu man Motiaea 27:8–37 n karakina te rongorongo (taraa naba “Mwakoro 18: E Raira Nanona Aramwa te Ataei,” n Karaki man Ana Boki Moomon, 49–52). Kabotoa katuruturuan te kibu 24, n reirei iaona bwa Aramwa e raira nanona ao Iesu Kristo e buokia ni bitaki. Tuangiia natim bwa a na katei kain te karaki aei ngkana a tangiria.
E Kimwareirei Tamana,, iroun Walter Rane
I kona n tataro ao n aki mamatam bwa te Atua e na kakabwaiaia aomata ake I tangiriia.
-
Baane wareka Motiaea 27:8–24, ao tuangiia natim bwa a na katebenakoa bwa tera ae a karaoia Aramwa ma ana botanaomata ni buoka Aramwa te Ataei. Ko a tia ni kakaraoa te aki mamatam ao n tataro ibukin temanna? Tibwaua am taneiai ma natim, ao kaoiia bwa a na tibwaua aia taneiai naba.
-
Iai ae ko ataia ke ataia natim ae kainnanoa Ana ibuobuoki te Atua? N iriira ana banna ni katooto Aramwa, tao kam kona ni bane n tataro ibukin te aomata anne, ao ngkana natim a konaa, aki mamatam ibukiia naba.
Ibukin iango riki tabeua, taraa te beeba ni kaongora n te namwakaina aio n te Rao maekatiin.
Kamataata n tamnein te anera ae kaoti nakon Aramwa te Teei, iroun Kevin Keele